○○○○○
Si Saul Nagpakigkita kay Samuel
1 May isa ka tawo gikan sa tribo ni Benjamin nga ginahingalanan kay Cis, anak nga lalaki ni Abiel, apo ni Seror, sa panimalay ni Bekorat, sa kabaranggayan ni Apia. Si Cis manggaranon kag kinilala nga tawo.2 May anak sia nga lalaki nga ginahingalanan kay Saul, pamatan-on sia kag guwapo. Taga-abaga lang niya ang bisan sin-o, kag pinakaguwapo sia sa Israel.
3 Karon ang iban sang mga asno ni Cis nadula, gani nagsiling sia kay Saul, "Dalha ang isa sa mga suloguon kag pangitaa ang mga asno.
4 Naglakat sila sa mga kabakuloran sang Efraim kag sa mga kadutaan sang Salisa, pero wala didto ang mga asno. Gani nagpadayon sila sa kadutaan sang Saalim, pero ang mga asno wala didto. Dayon nagpadayon sila sa kadutaan sang Benjaminhon, pero wala man nila makita didto ang mga asno.
5 Sang pag-abot nila sa kadutaan sang Sop, si Saul nagsiling sa iya suloguon, "Dali mapauli na kita, basi si tatay magpalibog na indi sa mga asno kundi sa aton.”
6 Ang suloguon nagsabat, "Hulat anay, may isa ka balaan nga tawo diri sa banwa kag ginatahod gid sia, kay tanan nga iya ginasiling napamatud-an. Makadto kita sa iya, kag ayhan makasugid sia kon diin naton makita ang mga asno."
7 Nagpamangkot si Saul, "Kon magkadto kita sa iya, ano bala ang aton ihatag sa iya? Wala na sing pagkaon nga nabilin sa aton balalunan, kag wala kita sing ihatag sa iya."
8 Ang suloguon nagsabat, “May sensilyo ako nga pilak nga sarang ko mahatag sa iya, kag magasugid sia kon diin naton makita ang mga asno.”
9-11 Si Saul nagsabat, "Maayo gid! Dali na." Gani naglakat sila sa banwa nga ginaestaran sang balaan nga tawo. Sang nagapataklad sila sa bakulod pakadto sa banwa, may nasugata sila nga mga dalaga nga naggwa sa pagsag-ob sang tubig. Nagpamangkot sila sa mga dalaga, "Yara bala ang palamangkutan?" (Sang una, kon may mamangkot nahanungod sa Dios, magsiling sia, "Makadto kita sa palamangkutan," kay sa sadto nga tion ang propeta ginatawag nga palamangkutan.)
12 Nagsabat sila, "Huo yara sia. Dalidali kamo; bag-o lang sia nag-abot sa banwa. Una-una lang sia sa inyo, kay ang mga tawo magadulot karon nga adlaw sang ila halad sa altar didto sa bakulod.
13 Sa inyo gid pagsulod sa banwa makita ninyo sia, sa wala pa sia makataklad sa bakulod sa pagkaon. Ang mga tawo indi pa magkaon kon wala pa sia makaabot didto, kay iya anay ginabendisyunan ang halad kag dayon ang mga inagda magakaon. Taklad na kamo didto, kag inyo sia dayon makita.”
14 Gani nagderetso sila sa banwa, kag sang nagapasulod sila nakita nila si Samuel nga nagapagwa pakadto sa ila sa iya pagkadto sa duog nga ginasimbahan.
15 Karon, sa adlaw nga wala pa makaabot si Saul, ang Ginoo nagsiling na kay Samuel,
16 “Buas sa amo gid nga takna magapadala ako sa imo sing isa ka tawo halin sa tribo ni Benjamin. Haplasan mo sia subong pangulo sang akon mga tawo nga Israel, kag sia magaluwas sa ila sa mga Filistinhon. Nakit-an ko ang mga pag-antos sang akon mga tawo, kag nabatian ko ang ila pagpangayo sing bulig.”
17 Sang makita ni Samuel si Saul, ang Ginoo nagsiling sa iya, "Amo ini sia ang tawo nga ginsiling ko sa imo. Magagahom sia sa akon mga tawo."
18 Dayon si Saul nagkadto kay Samuel malapit sa puwerta kag namangkot, “Diin bala nagaestar ang palamangkutan?"
19 Si Samuel nagsabat, "Ako amo ang palamangkutan. Una ka lang sa akon sa duog nga ginasimbahan. Magakaon kamo nga duha upod sa akon karon nga adlaw. Buas pagasabton ko ang tanan mo nga mga pamangkot kag palakton ko ikaw sa imo kaladtuan.
20 Kon nahanungod sa mga asno nga nadula sang tatlo na ka adlaw nga nagligad, indi ka magpalibog kay nakita na sila. Pero sin-o gid bala ang naluyagan sang mga tawo sang Israel? Ikaw gid, kag ang panimalay sang imo amay.”
21 Si Saul nagsabat,"Katapo ako sang tribo ni Benjamin, ang labing diutay sa tribo sang Israel, kag ang akon panimalay amo ang pinakakubos sa amo nga tribo. Ngaa man nagahambal ikaw sing subong sina sa akon?"
22 Dayon gindala ni Samuel si Saul kag ang iya suloguon sa sulod sang daku nga kuwarto kag ginhatagan sila sing lugar sa kabesera sa diin may mga dinapit nga 30 ka mga tawo nga nagalingkod.
23 Si Samuel nagsiling sa kusinero, "Dalha diri ang linuto nga karne nga ginhatag ko sa imo kag ginpapain ko sa imo."
24 Gani gindala sang kusinero ang paa kag ang unod nga yara sa sini kag ginbutang sa atubangan ni Saul. Si Samuel nagsiling, "O, yari ang parti nga gintigana para sa imo. Kauna ini, kay gintigana ini para sa imo nga kaunon sa sini nga tion upod sa mga tawo nga akon gin-agda." Gani nagkaon si Saul upod kay Samuel sadto nga adlaw.
25 Sang magdulhog sila gikan sa duog nga ginasimbahan pakadto sa banwa, nag-aman sila sing tulogan, para kay Saul sa ibabaw sang atop,f
26 kag nagtulog sia didto.
Si Samuel Naghaplas kay Saul subong nga Hari
Sang kaagahon ginpukaw ni Samuel si Saul didto sa ibabaw sang atop, "Bangon na, kay palakton ko ikaw." Nagbugtaw si Saul, kag sia kag si Samuel naggwa sa kalsada.27 Sang makaabot sila sa dulonan sang banwa, nagsiling si Samuel kay Saul, "Singgana ang suloguon sa pag-una sa aton." Ang suloguon naglakat kag si Samuel nagsiling kay Saul, "Dulog anay sing makadali kag isugid ko sa imo ang ginsiling sang Dios."
fSA IBABAW SANG ATOP: Sadto nga panahon ang mga balay may matapan nga atop, kag ang mga tawo masunson nagatulog sa atop.
No comments:
Post a Comment