○○○○○
Ang Pag-agaw sang Kaban sang Kasugtanan
1 Sa sadto nga tion ang mga tawo sang Israel naggwa sa pagpakig-away batok sa mga Filistinhon. Ang mga lsraelinhon naghimo sang ila kampamento sa Ebeneser kag ang mga Filistinhon naghimo man sang ila kampamento sa Apek.2 Ang mga Filistinhon naghanda pagsalakay, kag sa tapos ang malapuyot nga pag-inaway ginlutos nila ang mga Israelinhon, kag napatay nila ang mga 4,000 ka mga tawo sa inaway.
3 Sang pagbalik sang mga nabilin nga mga hangaway sa ila kampamento, ang mga pangulo sang Israel nagsiling, “Ngaa bala gintugotan sang Ginoo nga malutos kita sang mga Filistinhon karon nga adlaw? Dali, dalhon naton ang Kaban sang Kasugtanan halin sa Silo agod ang Ginoo magaupod sa aton kag magaluwas sa aton mga kaaway.”
4 Gani nagpadala sila sing mga mensahero sa Silo kag ginpakuha ang Kaban sang Kasugtanan sang Ginoo nga Makagagahom, nga nagalingkod sa iya trono sa tunga sang mga kerubin. Ang duha ka anak nga lalaki ni Eli nga si Opni kag si Pines nag-upod sa Kaban sang Kasugtanan.
5 Sang pag-abot sang Kaban sang Kasugtanan, ang mga Israelinhon naghinugyaw sa bagay nga ang duta nagtay-og.
6 Ang mga Filistinhon nakabati sang mga paghinugyaw kag nagsiling, “Pamatii ang mga paghinugyaw sa kampamento sang mga Hebreo! Ano bala ang buot silingon sini?" Kag sang ila natalupangdan nga ang Kaban sang Kasugtanan sang Ginoo nag-abot sa kampamento sang mga Hebreo,
7 kinulbaan sila kag nagsiling, “Nag-abot ang isa ka dios sa ila kampamento. Malutos na kita sini! Wala pa gid sing may natabo sa aton nga kaangay sini halin sang una.
8 Sin-o bala ang makaluwas sa aton sa sining gamhanan nga mga dios? Sila amo ang mga dios nga nagpamatay sang mga Egiptohanon sa desierto!
9 Mga Filistinhon, magpakaisog kamo! Magpakig-away kamo subong mga lalaki, kay kon indi mangin-ulipon kita sang mga Hebreo, subong nga sila nangin-ulipon naton. Gani magpakig-away subong mga lalaki!"
10 Ang mga Filistinhon nagpakig-away sing tudo gid. Ang mga Israelinhon nalutos kag nagpalagyo pauli sa ila mga puloy-an. Madamo ang nagkalamatay sa bagay nga 30,000 ka mga hangaway nga Israelinhon ang napatay.
11 Ang Kaban sang Kasugtanan sang Ginoo gin-agaw, kag ang mga anak nga lalaki ni Eli nga si Opni kag si Pines napatay.
Ang Pagkapatay ni Eli
12 May isa ka tawo gikan sa tribo ni Benjamin nga nagdalagan halin sa patag-awayan pakadto sa Silo, kag sa amo man nga adlaw nag-abot sia. Sa pagpakita sang iya kasubo, gingisi niya ang iya bayu kag nagbutang sing yab-ok sa iya ulo.13 Sang pag-abot niya, si Eli nagalingkod sa iya lingkuran sa higad sang dalan nga nagabantay. Nabalaka gid sia nahanungod sa Kaban sang Kasugtanan sang Dios. Ginsugid sang tawo ang balita sa banwa, kag ang tanan nagtiniyabaw sa kahadlok.
14 Nabatian ni Eli ang ginahod kag nagpamangkot, “Ano bala ining ginahod?” Ang tawo nagdalidali pakadto kay Eli sa pagsugid sa iya sing balita.
15 (Ang edad ni Eli 98 na ka tuig kag indi na sia makakita.)
16 Ang tawo nagsiling, “Nakapalagyo ako halin sa inaway kag nagdalagan tubtob makaabot diri karon nga adlaw.” Si Eli nagpamangkot sa iya, “Ano ang natabo, toto?”
17 Ang tawo nagsabat, "Ang mga Israelinhon nagpalagyo sa mga Filistinhon, kag isa ini ka daku nga pagkalutos para sa aton! Wala labot sina, ang imo duha ka anak nga lalaki nga si Opni kag si Pines napatay, kag ang Kaban sang Kasugtanan sang Dios naagaw!"
18 Sang pagsambit sang tawo nahanungod sa Kaban sang Kasugtanan, nagtingkaya si Eli sa iya pulongkoan sa kilid sang puwerta sang siyudad. Tigulang na gid si kaayo kag tama ka tambok sa bagay nga sang pagkatumba niya nalunggo ang iya liog, kag napatay sia. Nanginpangulo sia sa Israel sa sulod sang 40 ka tuig.
Ang Pagkapatay sang Asawa ni Pines
19 Ang umagad ni Eli nga asawa ni Pines nagabusong, kag manugbata na sia. Sang pagkabati niya nga ang Kaban sang Kasugtanan sang Dios naagaw, kag ang iya ugangan kag bana napatay, sa gilayon ginsakitan sia kag nagbata.20 Gahimumogto na sia, pero ang babayi nga nagabulig sa iya nagsiling, "Indi ka magpakulba! Ang bata mo lalaki!" Pero wala sia magpamati ukon nagsabat.
21 Sang ulihi ginhingalanan niya ang bata kay Ikabodc nga nagasiling, "Ang himaya sang Dios wala na sa Israel"—ginpatungod niya ini sa pag-agaw sang Kaban sang Kasugtanan kag sa pagkapatay sang iya ugangan kag sang iya bana.
22 Nagsiling sia, "Ang himaya sang Dios wala na sa Israel, kay ang Kaban sang Kasugtanan sang Dios naagaw."
cIKABOD: Ini nga ngalan sa Hebreo nagakahulogan "wala sing himaya."
No comments:
Post a Comment