2 SAMUEL - Kapitulo 9

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

●●●●●

Si David kag si Mefiboset

1 Sang isa ka tion, si David nagpamangkot, "May nabilin pa bala nga isa sa panimalay ni Saul nga akon mapakitaan sing kaayo tungod kay Jonatan?”
2 May isa ka alagad sa panimalay ni Saul nga si Siba, kag ginsingganan sia sa pagkadto kay David. Ang hari nagpamangkot, "Ikaw bala si Siba?" Nagsabat sia, "Huo, Mahal nga Hari."
3 Ang hari nagpamangkot sa iya, “May nabilin pa bala sa panimalay ni Saul nga mapakitaan ko sing kaayo suno sa akon ginsaad sa Dios nga akon himuon?” Si Siba nagsabat, "May isa pa ka anak nga lalaki si Jonatan nga nabilin. Lupog sia."
4 Ang hari nagpamangkot, "Diin bala sia?" Nagsabat si Siba, "Yadto sia sa balay ni Maquir nga anak ni Amiel sa Lodebar."
5 Gani si David nagpasugo sa pagkuha kay Mefiboset.
6 Sang pag-abot ni Mefiboset nga anak ni Jonatan kag apo ni Saul, nagsaIudo sia sa atubangan ni David sa pagtahod sa iya. Si David nagsiling, "Mefiboset!” Kag nagsabat sia, "Yari ako, Mahal nga Hari.”
7 Si David nagsabat, "Indi ka magkahadlok! Manginmaayo ako sa imo tungod sang imo amay nga si Jonatan. Iuli ko sa imo ang tanan nga kadutaan nga iya sang imo lolo nga si Saul kag magakaon ka upod sa akon sa akon lamisa.”
8 Si Mefiboset nagsaludo liwat kag nagsiling, "Wala na ako sing pulos pareho sang isa ka patay nga ido, Mahal nga Hari! Ngaa bala ayuhan mo gid ako?"
9 Dayon ginpatawag sang hari si Siba nga alagad ni Saul kag ginsingganan, “Ginahatag ko kay Mefiboset nga apo sang imo agalon, ang tanan nga pagkabutang ni Saul kag sang iya panimalay.
10 Ikaw, ang imo mga anak nga lalaki, kag ang imo mga alagad magapanguma sang duta para sa panimalay sang imo agalon nga si Saul kag tipunon mo ang patubas nga para sa ila. Pero si Mefiboset iya magakaon upod sa akon sa akon lamisa." (Si Siba may 15 ka mga anak nga lalaki kag may 20 ka mga suloguon.)
11 Si Siba nagsabat, "Tumanon ko ang tanan nga imo ginasugo, Mahal nga Hari." Gani si Mefiboset nagkaon sa lamisa sang hari,ⁿ pareho sang isa sang mga anak nga lalaki sang hari.
12 Si Mefiboset may isa ka pamatan-on nga anak nga lalaki nga ginahingalanan kay Mica. Ang tanan nga mga katapo sang panimalay ni Siba nanginsuloguon ni Mefiboset.
13 Gani si Mefiboset nga lupog nagpuyo sa Jerusalem, kag nagkaon sa lamisa sang hari.


ⁿlamisa sang hari; sa Hebreo akon lamisa.

2 SAMUEL - Kapitulo 8 <<<   >>> 2 SAMUEL - Kapitulo 10