○○○○○
Pagpakig-away batok sa mga Filistinhon
1 [Si Saul nagaedad sing 30 ka tuig sang sia nanginhari, kag naggahom sia sa Israel sing duha ka tuig.]g2 Si Saul nagpili sing 3,000 ka mga Israelinhon kag ang iban ginpapauli niya. Gin-upod niya ang 2,000 sa Mikmas kag sa kabakuloran sang Betel, kag ang 1,000 ginpaupod niya sa iya anak nga si Jonatan sa Gabaa, sa kabakuloran sang tribo ni Benjamin.
3 Si Jonatan nagpatay sang pangulo sang mga Filistinhon sa Geba kag nabatian ini sang mga Filistinhon. Dayon si Saul nagpadala sing mga manugbalita sa bug-os nga pungsod sa pagpatunog sang budyong nga sungay sang karnero sa pagtawag sang mga Hebreo sa inaway.
4 Ang tanan nga mga Israelinhon nakahibalo nga si Saul nagpatay sang pangulo sang mga Filistinhon, kag ang mga Filistinhon nagtamay sa ila. Gani ang mga tawo nagsabat sa pagpanawag kag nag-upod kay Saul sa Gilgal.
5 Ang mga Filistinhon nagtingob sa pag-away sa mga Israelinhon. May 30,000 sila ka mga karuwahi sa inaway, 6,000 ka mga manugkabayo, kag may madamo nga mga hangaway kaangay sang balas sa baybay. Nagkadto sila sa Mikmas, sa sidlangan sang Betaben, kag naghimo sila sang ila kampamento didto.
6 Ginsalakay nila sing tudo gid ang mga Israelinhon kag nabutang sa ital-ital ang mga Israelinhon. Ang iban sang mga Israelinhon nagpanago sa mga kuweba kag sa mga gikab, sa dalagku nga mga bato, sa mga buho kag sa mga bubon.
7 Ang iban nagtabok sa suba sang Jordan pakadto sa mga kadutaan sang Gad kag Galaad. Si Saul didto pa sa Gilgal, kag ang mga tawo nga kaupod niya nagakurog sa kahadlok.
8 Naghulat sia kay Samuel sing pito ka adlaw suno sa ginsiling ni Samuel sa iya pero wala mag-abot si Samuel sa Gilgal. Ang mga tawo nag-amat-amat sa pagbiya kay Saul,
9 gani nagsiling sia sa ila, "Dalhi ninyo ako diri sing mga halad nga sinunog kag mga halad sa paghiambit." Gindulot niya ang mga halad nga sinunog,
10 kag sang nakatapos gid lang sia, nag-abot si Samuel. Si Saul naggwa sa pagsugata kag sa pag-abiabi sa iya.
11 Pero si Samuel nagsiling, "Ano ang ginhimo mo?" Si Saul nagsabat, "Nakita ko nga ang mga tawo nagabiya na sa akon, kag ikaw wala makaabot suno sa imo ginsiling, kag ang mga Filistinhon nagatipon sa Mikmas.
12 Gani naghunahona ako nga ang mga Filistinhon magasalakay diri sa akon sa Gilgal, kag wala pa ako makapahamuot sa Ginoo. Gani nagbatyag ako nga kinahanglan gid magdulot ako sing mga halad.”
13 Si Samuel nagsabat, "Binuang ang imo ginhimo. Wala ka magtuman sa sugo nga ginhatag sang GINOO nga imo Dios sa imo. Kon nagtuman ikaw, kuntani magatugot sia sa imo kag sa imo mga kaliwat sa paggahom sa Israel sing walay katapusan.
14 Pero karon ang imo paggahom indi magpadayon. Ang Ginoo magapangita sang tawo nga iya nahamut-an kag iya himuon nga pangulo sa iya mga tawo, tungod kay wala ka magtuman sa iya.”
15 Si Samuel naghalin sa Gilgal kag nagpadayon sa iya dalanon. Ang iban nga mga tawo nagsunod kay Saul sa iya paglakat sa pagbuylog sa iya mga tinawo. Naglakat sila halin sa Gilgal pakadto sa Gabaa sa kadutaan sang mga Benjaminhon. Gin-isip ni Saul ang iya mga tinawo, mga 600 sila.
16 Si Saul kag ang iya anak nga lalaki nga si Jonatan, kag ang ila mga tinawo nagpabilin sa Geba, sa kadutaan sang mga Benjaminhon, samtang ang mga Filistinhon naghimo sang ila kampamento sa Mikmas.
17 Ang mga hangaway sang mga Filistinhon naggwa sa tatlo ka grupo gikan sa ila kampamento sa pag-atake: ang isa ka grupo nagpakadto sa Orpa, sa kadutaan sang Sual,
18 ang isa nagpakadto sa Bethoron, kag ang isa pa gid nagpakadto sa dulonan sa diin lantawon ang Kapatagan sang Seboim kag ang desierto.
19 Wala sing mga panday sa salsalon nga makita sa Israel tungod kay ang mga Filistinhon nagdumili sa mga Hebreo sa pagsalsal sang mga espada kag mga bangkaw.
20 Gani ang mga Israelinhon kinahanglan magkadto sa mga Filistinhon sa pagbaid sang punta sang ila mga arado, mga sadol, mga saway, kag mga garab.h
21 Ang bayad sa pagbaid sang mga wasay kag pagkaayo sang mga inugsuntok isa ka diutay nga pilak, kag duha ka bilog nga pilak para sa pagbaid sang mga punta sang arado kag mga sadol.
22 Kag sa adlaw sang inaway wala gid sing isa sa Israelinhon nga mga hangaway nga may espada ukon bangkaw luas kay Saul kag kay Honatan.
23 Ang mga Filistinhon nagpadala sang mga hangaway sa pagbantay sang Alagyan sang Mikmas.
gGinkuha ini sa isa ka dumaan nga pagbadbad. Ang teksto sa Hebreo indi maathag.
hAng isa ka dumaan nga pagbadbad garab; sa Hebreo mga arado.
No comments:
Post a Comment