1 SAMUEL - Kapitulo 5

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 

○○○○○

Ang Kaban sang Kasugtanan Yara sa mga Filistinhon

1 Sang maagaw sang mga Filistinhon ang Kaban sang Kasugtanan sang Dios, gindala nila ini halin sa Ebeneser pakadto sa siyudad sang Asdod.
2 Gindala nila ini sa sulod sang templo ni Dagon nga ila dios, kag ginpatindog nila sa luyo sang iya larawan.
3 Aga pa sang madason nga adlaw, nakita sang mga tawo sang Asdod nga ang larawan ni Dagon natumba nga nagahapa sa duta sa atubangan sang Kaban sang Kasugtanan sang Dios. Ginkuha nila ini kag ginbalik sa iya nahamtangan.
4 Aga pa gid sa madason nga adlaw nakita nila nga ang larawan natumba liwat sa atubangan sang Kaban sang Kasugtanan sang Ginoo. Ang iya ulo kag ang duha ka kamot nautod, kag yara sa alagyan sang puwertahan; ang iya lamang lawas ang nabilin.
5 (Amo ini ang kabangdanan nga bisan karon nga adlaw ang mga pari ni Dagon kag ang tanan nga nagasimba sa Asdod wala nagatapak kundi nagalakad lang sa amo nga duog.)
6 Ang Ginoo nagsilot sang mga tawo sang Asdod sing tama gid kag ginpakugmat sila. Ginpatuboan niya sila kag ang mga tawo sa palibot nga kadutaan sing mga hubag.^d
7 Sang makita nila ang nahanabo, nagsiling sila, "Ang Dios sang Israel nagasilot sa aton kag sang aton dios nga si Dagon. Indi naton mapatener diri ang Kaban sang Kasugtanan.”
8 Gani nagpadala sila sing mga mensahero kag ginpatawag ang lima ka mga pangulo sang Filistinhon kag nagpamangkot sa ila, "Ano ang aton himuon sa Kaban sang Kasugtanan sang Dios sang Israel?" Nagsabat sila, “Dalha ninyo ina sa Gat." Gani gindala nila ang Kaban sang Kasugtanan sa Gat, isa man ka siyudad sang mga Filistinhon.
9 Pero sang madala nila ini didto, ang Ginoo nagsilot sang siyudad kag nagtuga sang daku nga kinagula. Ang Dios nagsilot sa ila paagi sa pagpatubo sing mga hubag sa tanan nga mga tawo sang siyudad, bata kag tigulang.
10 Gani ginpadala nila ang Kaban sang Kasugtanan sa siyudad sang Ecron, isa man ka siyudad sang mga Filistinhon; sang mag-abot ini didto ang mga tawo nagsininggit, "Gindala nila diri ang Kaban sang Kasugtanan sang Dios sang Israel, sa pagpatay sa aton tanan!”
11 Gani ila liwat ginpatawag ang tanan nga mga pangulo sang mga Filistinhon kag ginsingganan, "Ipabalik ang Kaban sang Kasugtanan sang Israel sa iya kaugalingon nga duog, agod nga indi kami magkalamatay kag ang amon mga panimalay.” Nagkinagula ang bug-os nga siyudad, kay ang Dios nagsilot sa ila sing tama gid.
12 Ang wala magkalamatay, gintuboan sing mga hubag, kag ang mga tawo nagpangayo sing bulig sa ila mga dios.


^dMGA HUBAG: Ang kaangtanan sang mga hubag sa madamo nga mga ilaga nagapakita nga ini pamisti (tan-awa ang 6:5). 

1 SAMUEL - Kapitulo 4 <<<   >>> 1 SAMUEL - Kapitulo 6