●●●●●
Ang Kaban sang Kasugtanan Gindala sa Jerusalem
(1 Cron. 13:1-14; 15:25—16:6, 43)
1 Sa liwat ginpatawag sing tingob ni David ang labing maayo nga mga soldado sang Israel nga ang ila kadamuon 30,000 ka mga tawo,2 kag gindala sila sa Baalaf sa Juda, agod makuha halin didto ang Kaban sang Kasugtanan sang Dios, nga may ngalan sang Ginoo nga Makagagahom, nga ang iya trono yara sa ibabaw sang mga sapat nga may pakpak.
3 Ginkarga nila ini sa bag-o nga karo kag ginkuha ini halin sa balay ni Abinadab nga didto sa bakulod. Si Uza kag si Ahio nga mga anak nga lalaki ni Abinadab ang nagadala sang karo,
4 si Ahio amo ang nagauna.
5 Si David kag ang tanan nga mga Israelinhon nagasinaot kag nagakinanta sa bug-os nila nga kusogg sa pagpadungog sa GINOO. Nagatinukar sila sang mga arpa, mga lira, mga bumbo, mga kastanitas kag mga platilyos.
6 Sang pag-abot nila sa linasan ni Nacon, ang baka natumba, kag si Uza nagdawhat kag nagpugong sang Kaban sang Kasugtanan.
7 Ang GINOONG Dios naakig kay Uza kag sa gilayon ginpatay sia tungod sang iya pagkadi-matinahuron. Gani napatay sia didto sa luyo sang Kaban sang Kasugtanan.
8 Si David nainit gid kay ang Ginoo nagsilot kay Uza sa iya kaakig; gani ina nga duog gintawag nga Perez Uzah tubtob karon nga adlaw.
9 Dayon si David nagkahadlok sa GINOO kag nagsiling, "Ano na lang karon ang pagdala ko sang Kaban sang Kasugtanan?"
10 Gani nagpamat-od sia nga indi na lang niya ini pagdalhon sa siyudad sang Jerusalem; sa baylo ginpaliko niya kag gindala sa balay ni Obed Edom nga nagikan sa siyudad sang Gat.
11 Nagpabilin ini didto sa sulod sing tatlo ka bulan, kag ang GINOO nagbendisyon kay Obed Edom kag sang iya mga panimalay.
12 Nabatian ni Haring David nga tungod sang Kaban sang Kasugtanan, ang Ginoo nagpauswag sang panimalay ni Obed Edom kag sang tanan niya nga pagkabutang; gani ginkuha niya ini sa balay ni Obed Edom kag gindala sa Jerusalem nga may daku nga pagkinalipay.
13 Sang makalakat sing anom ka tikang ang mga tawo nga nagadala sang Kaban sang Kasugtanan, ginpadulog sila ni David samtang naghalad sia sa Ginoo sang isa ka baka kag isa ka matambok nga karnero.
14 Si David nga nagatampi lamang sing panapton nga lino sa iya hawak, nagsaot sa bug-os niya nga kusog sa pagdayaw sa Ginoo.
15 Gani sia kag ang tanan nga mga Israelinhon nagdala sang Kaban sang Kasugtanan tubtob sa Jerusalem nga nagahinugyaw kag nagapatunog sang mga trumpeta.
16 Sang nagapasulod ang Kaban sa siyudad, si Micol nga anak nga babayi ni Saul nagtamwa sa bintana kag nakita niya si Haring David nga nagasaot sa pagdayaw sa Ginoo kag nainit gid sia kay David.
17 Gindala nila ang Kaban kag ginbutang ini sa tolda nga gin-aman ni David. Dayon nagdulot si David sing mga halad nga sinunog kag mga halad sa paghiambit sa Ginoo.
18 Sa tapos sia makadulot sang mga halad nga sinunog kag mga halad sa paghiambit, ginbendisyunan niya ang mga tawo sa ngalan sang Ginoo nga Makagagahom.
19 Dayon ginhatagan niya ang tagsa ka lalaki kag babayi sang isa ka bilog nga tinapay, isa ka gulot nga karne nga sinugba, kag mga pasas. Kag ang tagsatagsa nagpauli.
20 Si David nagpauli sa pagbendisyon sang iya panimalay, kag si Micol naggwa sa pagsugata sa iya kag nagsiling, "Ang hari sang Israel nabantugan karon nga adlaw! Ginpakita niya ang iya kaugalingon nga hublas subong sang isa ka buang sa atubangan sang mga babayi nga suloguon sang iya mga opisyales!”
21 Si David nagsabat, "Nagsaot ako sa pagdayaw sa Ginoo, nga nagpili sa akon sa baylo sang imo amay kag sang iya panimalay, sa paghimo sa akon nga pangulo sang iya mga tawo nga Israel. Magapadayon ako sa pagsaot sa pagdayaw sa GINOO,
22 kag pakahuy-an pa gid nakon ang akon kaugalingon sing labi pa. Ayhan magahunahona kai nga wala ako sing pulos, pero yadtong mga babayi magataha pa gid sa akon!"
23 Si Micol nga anak nga babayi ni Saul, wala gid makapamata.
fsa Baala (tan-awa ang 1 Cron. 13:6); sa Hebreo halin sa Baali ukon halin sa mga pangulo.
gAng isa ka dumaan nga pagbadbad kag nagakinanta sa bug-os nila nga kusog (tan-awa ang 1 Cron. 13:8): sa Hebreo upod sang tanan nga kahoy nga higera.
hPEREZ UZA: Ini nga ngalan sa Hebreo nagakahulogan "Pagsilot kay Uza."
iAng isa ka dumaan nga pagbadbad ka; sa Hebreo ako.
No comments:
Post a Comment