2 SAMUEL - Kapitulo 3

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

●●●●●

1 Ang inaway nagpadayon sing malawig nga tion sa tunga sang hangaway ni Saul kag sang hangaway ni David. Si David nagmabakod pa gid, kag ang iya mga kasumpong nagluya nga nagluya.

Ang mga Anak nga Lalaki ni David

2 Amo ini ang anom ka mga anak nga lalaki nga natawo kay David sa Hebron: ang nahauna amo si Amnon, nga ang iya iloy amo si Ahinoam nga taga-Jezreel;
3 ang ikaduha amo si Quileab, nga ang iya iloy amo si Abigail nga balo ni Nabal nga taga-Carmel; ang ikatlo amo si Absalom, nga ang iya iloy amo si Maaca nga anak ni Talmai nga hari sa Gesur;
4 ang ikaapat amo si Adonias, nga ang iya iloy amo si Hagit; ang ikalima amo si Sefatias, nga ang iya iloy amo si Abital; kag
5 ang ikaanom amo si Itream, nga ang iya iloy amo si Egla nga asawa ni David. Amo ini tanan ang mga anak nga lalaki ni David nga natawo sa Hebron.

Si Abner Nagbuylog kay David

6 Samtang nagpadayon ang inaway sa tunga sang mga hangaway ni David kag ni Saul, si Abner nangingamhanan pa gid sa mga sumolunod ni Saul.
7 lsa ka adlaw ginsuknaan ni Isboset nga anak ni Saul si Abner, kay si Abner naghilawas sa babayi ni Saul nga si Rizpa nga anak ni Aya.
8 Ini nagpaakig gid kay Abner kag nagsiling sia, "Ano ang dumdom mo traidor ako? Nagahunahona ka bala nga nagaalagad ako sa Juda? Halin pa gid sang una nag-unong ako sa imo amay nga si Saul, sa iya mga utod nga lalaki, kag sa iya mga abyan, kag gin-apinan ko ikaw nga indi malutos ni David; pero karon ginasuknaan mo ako sa pagpakasala sa isa ka babayi!
9-10 Ang Ginoo nagsaad kay David nga pagakuhaon niya ang ginharian kay Saul kag sa iya mga kaliwat kag himuon si David nga hari sang Israel kag sang Juda, sa bug-os nga pungsod. Karon kabay pa nga patyon ako sang Dios kon indi ko ini pagtumanon!"
11 Si Isboset kinulbaan gid sa kay Abner sa bagay nga wala gid sia makahambal bisan isa ka taga.
12 Sa sadto nga tion si David didto sa Hebron,^c kag si Abner nagpadala sing mga mensahero sa iya nga nagasiling, “Sin-o bala ang magadumala sini nga duta? Kon magsugot ka sa akon, buligan ko ikaw sa pagdala sang bug-os nga Israel sa idalom sang imo paggahom.”
13 Si David nagsabat, "Sigi, mahimo ako sing kasugtanan sa imo, pero sa isa lang ka kundisyon: dalha si Micol nga anak nga babayi ni Saul kon magkari ka sa pagpakigkita sa akon.”
14 Dayon si David nagpadala sing mga mensahero sa kay lsboset sa pagsiling, "luli sa akon ang akon asawa nga si Micol. Nagbayad ako sing 100 ka napunta nga panit sang kinatawo sang mga Filistinhon sa akon pagpangasawa sa iya."
15 Gani ginpakuha ni Isboset si Micol sa iya bana nga si Paltiel, anak ni Lais.
16 Si Paltiel nagsunod sa iya nga nagahilibion tubtob sa banwa sang Bahurim. Dayon ginsingganan sia ni Abner, “Pauli ka,” kag nagpauli sia.
17 Si Abner nagkadto sa mga pangulo sang Israel kag nagsiling sa ila, "Dugay na gid ang handom ninyo nga si David manginhari ninyo.
18 Karon ini na ang inyo kahigayunan. Dumdoma ninyo nga ang Ginoo nagsiling, 'Luwason ko ang akon mga tawo nga Israel sa mga Filistinhon kag sa tanan nila nga mga kaaway paagi sa akon alagad nga si David.'"
19 Naghambal man si Abner sa mga tawo sa tribo ni Benjamin, kag nagkadto sia sa Hebron sa pagsugid kay David kon ano ang kasugtanan nga ginhimo sang mga tawo sang Benjamin kag sang Israel.
20 Si Abner nagkadto kay David sa Hebron upod sa 20 ka mga tawo, kag si David nagpapunsyon para sa ila.
21 Dayon si Abner nagsiling kay David, "Malakat na ako karon kag dalhon ko ang bug-os nga Israel sa pagbuylog sa imo, Mahal nga Hari. Batunon ka nila subong hari. Dayon matuman mo ang imo handom kag magagahom ka sa bug-os nga duta." Si David naghatag sing kasigurohan kay Abner nga indi sia maano, kag ginpalakat niya sia.

Si Abner Ginpatay

22 Sang ulihi, si Joab kag ang iban nga mga opisyales ni David nag-abot halin sa ila pagpanalakay nga may dala nga madamo nga mga pagkabutang nga inagaw. Pero wala na didto si Abner sa Hebron upod kay David, kay si David nagpalakat sa iya kag nagpasalig nga indi sia maano.
23 Sang pag-abot ni Joab kag sang iya mga tinawo, ginsugiran sia nga si Abner nagkadto kay Haring David kag ginpalakat sia kag ginpasalig nga indi sia maano.
24 Gani si Joab nagkadto sa hari kag nagsiling, "Ano bala ang imo ginhimo? Si Abner nagkadto sa imo kag ngaa ginpalakat mo sia nga wala pag-anha?
25 Nagkari sia diri sa paglimbong sa imo, kag sa pag-usisa sang tagsa ka lugar nga imo ginakadtuan kag sang tanan nga imo ginahimo. Wala ka bala makahibalo sini?”
26 Sang paghalin ni Joab kay David, nagpasugo sia sa pagdakop kay Abner, kag gindala nila sia pabalik halin sa bubon sang Sira, pero si David wala makahibalo sini.
27 Sang pag-abot ni Abner sa Hebron, gindala sia ni Joab nga silahanon lang sa puwerta, nga kuno abi may isekrito sia sa iya, kag ginbuno niya si Abner sa tiyan. Gani si Abner ginpatay tungod kay ginpatay niya si Asael nga utod ni Joab.
28 Sang pagkabati ni David nahanungod sini nagsiling sia, "Ang GINOO nakahibalo nga ako kag ang akon mga sumolunod wala gid sing labot sa pagpatay kay Abner.
29 Kabay nga ang silot tungod sini magtupa kay Joab kag sa bug-os niya nga panimalay. Kabay nga sa tagsa ka kaliwatan sang iya panimalay may pila ka mga tawo nga matapikan sing puko ukon sing aro, ukon inutil, ukon mapatay sa inaway, ukon magutman."
30 Gani si Joab kag ang iya utod nga si Abisai nagpatay kay Abner tungod kay ginpatay niya ang ila utod nga si Asael sa inaway sa Gabaon.

Ginlubong si Abner

31 Dayon si David nagsugo kay Joab kag sa iya mga tinawo sa paggisi sang ila mga bayu, sa pagsuksok sing sako, kag sa paglalaw para kay Abner. Sang paglubong kay Abner, si Haring David mismo nagkumpanyar nga nagasunod gid sa lungon.
32 Ginlubong sia sa Hebron, kag ang hari naghibi sing tudo sa lulobngan kag amo man ang mga tawo.
33 Amo ini ang panalabiton ni David nahanungod kay Abner: "Ngaa bala napatay si Abner kaangay sang isa ka buangboang?
34 Ang iya mga kamot wala magapos, kag ang iya mga tiil wala magaid; napatay sia kaangay sang isa ka tawo nga ginpatay sang mga kriminal!" Kag ang mga tawo naghibi liwat tungod sa iya.
35 Ang mga tawo nagtinguha sa pagpakaon kay David sa wala pa magtunod ang adlaw, pero nagpanumpa sia nga nagasiling, "Kabay nga patyon ako sang Dios kon magkaon ako sang bisan ano sa wala pa magtunod ang adlaw!"
36 Natalupangdan ini sang mga tawo kag nalipay sila. Kon sa bagay, ang tanan nga ginhimo ni David naluyagan nila.
37 Ang tanan nga mga tinawo ni David kag ang tanan nga mga tawo sa Israel nakahangop nga ang hari wala sing labot sa pagpatay kay Abner.
38 Ang hari nagsiling sa iya mga opisyales, "Wala bala kamo makahibalo nga sa sini nga adlaw isa ka baganihan ang napatay sa Israel?
39 Bisan ako nga pinili sang Dios nga hari, naluyahan gid karon nga adlaw. Para sa akon, ini nga mga anak ni Sarvia nga mapintas! Kabay ang Ginoo magsilot sini nga mga kriminal suno sa nagakabagay sa ila!"


^cAng isa ka dumaan nga pagbadbad sa Hebron; sa Hebreo sa diin didto si Abner.

2 SAMUEL - Kapitulo 2 <<<   >>> 2 SAMUEL - Kapitulo 4