MIQUEAS - Kapitulo 1

1  2  3  4  5  6  7

1 Ang kaundan sini nga libro amo ang mga pulong nga ginhambal sang Ginoo kay Miqueas nga taga-Moreset sa mga panahon sang paghari ni Jotam, ni Acaz, kag si Ezequias sa Juda. Ang Ginoo nagpahayag sini nga mga butang kay Miqueas nahanungod sang Samaria kag Jerusalem.

Panalambiton para sa Samaria kag Jerusalem

2 Pamatii ninyo ini, mga kapungsoran 

   Pamatii ninyo ini, 

   Tanan kamo nga nagapuyo sa duta! 

   Ang Ginoong Dios magasaksi batok sa inyo. 

   Pamatii ninyo! 

   Nagahambal sia gikan sa iya templo sa langit.

3 Ang Ginoo nagapakari gikan sa iya balaan nga duog, 

   Magapanaog sia kag magalakat 

   Sa putokputokan sang mga bukid.

4 Dayon ang mga bukid matunaw sa idalom niya 

   Kaangay sang kandila sa kalayo. 

   Magailig ini sa mga kapatagan 

   Kaangay sang tubig nga nagailig halin sa bakulod.

5 Ini tanan mahanabo kay ang mga tawo sang Israel nagpakasala kag nagbato sa Dios. Sin-o ang basulon tungod sang pagbato sang Israel? Ang mga tawo sang Samaria! Sin-o ang nakasala paagi sa pagsimba sa diosdios sa Juda? Ang mga tawo sang Jerusalem!

6 Gani ang Ginoo nagasiling, “Himuon ko ang Samaria nga tinumpokan sang mga ginub-an didto sa wayang, ang duog nga talamnan sang ubas. Iula ko sa mga kapatagan ang mga nagkalaguba nga mga balay sang siyudad, agod maghawan ang mga sadsaran sang siyudad.

7 Ang tanan niya nga ginapakamahal nga mga diosdios magakalabuka kag pagasunogon sa kalayo. Ang mga tawo nakaangkon sini nga mga dios tungod sa ila pagbiya sa Dios, kag karon pagabatunon nila ang nagakaigo nga silot sa ila pagbiya sa Dios.”

8 Dayon si Miqueas nagsiling, “Tungod sini magapangasubo ako kag magapanalambiton. Magadayandayan ako nga hublas kag magatiniil lamang sa pagpakita sang akon kasubo. Magauwang ako kaangay sang ido kag magasiyak kaangay sang piso,

9 kay ang mga pilas sang Samaria indi na magpali. Si Juda madali na lang mag-antos sang amo man nga mga pilas kag ang kalaglagan yara na sa mga puwerta gid sang Jerusalem, sa diin ang akon mga tawo nagapuyo.”

Ang Kaaway Nagahinampot sa Jerusalem

10 Indi pagsugiri ang mga pumoluyo sang Gat nahanungod sang aton pagkalutos. Indi pag-ipakita sa ila ang inyo paghibi. Ipakita ang inyo kasubo didto sa banwa sang Apra.^a

11 Mga pumoluyo sang Safir, magpabihag kamo nga hublas kag nahuy-an. Ang mga nagapuyo sa Zaanan indi gid makagwa didto nga buhi. Kon inyo mabatian nga ang mga tawo sang Betezel nagapangalisod, mahibaluan ninyo nga wala sing dalangpan didto.

12 Ang mga pumoluyo sang Marot nagalubid sa kasakit. Nagahandom sila sing kapahuwayan, kay ang Ginoo nagdala sing kalalat-an malapit sa Jerusalem.

13 Kamo nga nagapuyo sa Laquis, takdi sing mga karuwahi ang inyo mga kabayo. Ginsunod ninyo ang mga sala nga nahimo sang Israel, gani kamo ang nanginkabangdanan sang pagpakasala sang Jerusalem.

14 Kag karon, mga pumoluyo sang Juda, magpaalam na kamo sa banwa sang Moreset Gat. Ang mga hari sang Israel indi makakuha sing bulig sa banwa sang Aczib.

15 Mga pumoluyo sang Maresa, ang Ginoo nagasiling nga itugyan niya kamo sa kaaway nga magaagaw sang inyo banwa. Ang hari sang Israel magapanago sa kuweba sang Adulam.

16 Mga pumoluyo sang Juda, magpakiskis kamo sang inyo mga ulo sa paglalaw sa mga kabataan nga inyo ginahigugma. Magpabulog kamo kaangay sang agila, kay ang inyo mga kabataan pagakuhaon sa inyo kag pagaitapok.

^aAPRA: Ang propeta nagahambal sang kaingod nga mga banwa (bersikulo 10-14) nga atakihon sang kaaway nga nagapadulong sa Jerusalem.

JONAS - Kapitulo 4 <<<   >>> MIQUEAS - Kapitulo 2