EZEQUIEL - Kapitulo 1

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48

ANG NAHAUNA NGA PALANAN-AWON NI EZEQUIEL NAHANUNGOD SA DIOS 

(1:1-7:27)

Ang Trono sang Dios

1 Sa ikalima nga adlaw sang ikap-at nga bulan sang ika-30 ka tuig, samtang ako kaupod sang mga bihag nga Judio sa ubay sang suba sang Kebar sa Babilonia, ang langit nag-abri, kag nakita ko ang Dios sa isa ka palanan-awon.

2 Sa ikalima nga adlaw sang bulan sa ikalima nga tuig sang pagbihag kay Haring Joaquin,

3 ako, si Ezequiel nga pari, anak ni Buzi, nakabati sa GINOO nga naghambal sa akon didto sa Babilonia sa ubay sang suba sang Kebar, kag didto nabatyagan ko ang gahom sang GINOO.

4 Nagtangla ako, kag nakita ko ang isa ka bagyo nga nagapakari halin sa aminhan. Ang kilat nagakirab gikan sa madamol nga gal-om kag ang langit sa palibot sini nagabanaag. Sa diin ang kilat nagakirab may nagasiga nga daw tumbaga.

5 Sa tunga sang bagyo may nakita ako nga apat ka daw mga sapat. May mga dagyaw sila sang tawo,

6 pero ang tagsatagsa sa ila may apat ka mga guya kag apat ka mga pakpak.

7 Ang ila mga tiil tadlong, pero ang ila mga kuko kaangay sang mga kuko sang baka. Ang mga sapat nagaidlak kaangay sang napahining nga saway.

8 Wala labot sang ila apat ka mga guya kag apat ka mga pakpak, ang tagsatagsa sa ila may apat ka mga kamot sang tawo sa ila mga kilid sa idalom sang ila mga pakpak.

9 Ang duha ka pakpak sang tagsa ka sapat nahumlad sa bagay nga ang mga sapat nagaporma sing kwadrado, nga ang mga punta sang ila pakpak nagadut-anay. Kon maglakat sila, nagalakat sila sing dungan nga wala nagaliso ang ila mga lawas.

10 Ang tagsa ka sapat may apat nga nagakalainlain nga mga guya: sa atubangan, guya sang tawo; sa tuo, guya sang leon; sa wala, guya sang baka; kag sa likod, guya sang agila.

11 Ang duha sang ila mga pakpak nahumlad sa bagay nga nagadut-anay ang mga punta sang mga pakpak sang madason nga mga sapat, samtang ang isa ka paris sang pakpak nagatabon sa ila mga lawas.

12 Ang tagsa ka sapat nagaatubang sa apat ka direksyon, gani wala na sila nagaliso bisan diin sila magkadto.

13 Sa tunga sini nga mga sapat may yara nga daw nagadabdab nga sulo nga wala nagauntat sa paghulag. Ang kalayo nagaibwal, kag nagakirab ang kilat gikan sa sini.

14 Ang mga sapat nagapakadto pakari nga daw kilat.

15 Sa akon pagtulok sa apat ka mga sapat, nakita ko ang apat ka mga rueda nga nagaduot sa duta, isa ka rueda sa luyo sang tagsa ka sapat.

16 Ang tanan nga rueda palareho kag nagaidlak kaangay sang malahalon nga bato. Sa tagsa ka rueda may isa pa gid ka rueda nga nagasaang sa sini,

17 kag ang mga rueda makatiyog sa apat ka mga direksyon.

18 Ang palibot sang rueda hil-ob sing mga mata.

19 Kon ang mga sapat maglakat, ang mga rueda nagaupod man sa ila, kag kon ang mga sapat mag-alsa halin sa duta, ang mga rueda nagaalsa man.

20 Ang mga sapat nagakadto bisan diin ang luyag nila kag ang mga rueda nagaupod man sa ila, kay ang mga sapat nagagahom sa ila.

21 Kon ang mga sapat maglakat ukon magdulog ukon mag-alsa halin sa duta, ang mga rueda nagaupod man.

22 Sa ibabaw sang mga ulo sang mga sapat, may yara nga daw arko nga nahimo sa masilaw nga kristal.

23 Sa idalom sang arko nagatindog ang mga sapat nga ang tagsa ka sapat nagahumlad sang duha nila ka mga pakpak nga nagadut-anay sa isa kag isa, samtang ang duha nila ka mga pakpak nagatabon sang ila lawas.

24 Nabatian ko ang gahod sang ila mga pakpak sang nagalupad sila. Kaangay ini sang daguhob sang dagat, kaangay sang ginahod sang madamo nga mga hangaway, kaangay sang tingog sang Dios nga Makagagahom. Kon wala na sila nagalupad, ginakipot nila ang ila mga pakpak,

25 pero may gahod gihapon nga nagahalin sa ibabaw sang arko sa ibabaw sang ila mga ulo.

26 Sa ibabaw sang arko, may yara nga daw isa ka trono nga nahimo sa zafiro, kag may isa nga daw dagway sang tawo nga nagapungko.

27 Ang dagway daw nagabanaag kaangay sang tumbaga sa tunga sang kalayo. Nagabanaag ini sa bug-os nga palibot nga may kasilaw.

28 Ang kasanag may mga kolor pareho sang isa ka balangaw sa mga panganod. Amo ini ang masilaw nga kapawa nga nagapahayag sang presensya sang GINOO.

PANALABITON - Kapitulo 5 <<<   >>> EZEQUIEL - Kapitulo 2