Liturhiya sang Pulong
Nahauna nga Balasahon - 1 Corinto 9:16-19, 22-27
Salmo sa Pagsabat - Mga Salmo 84:3, 4, 5-6, 12
Aleluya - 1 Juan 17:17B, 17A
Ebanghelyo - Lucas 6:39-42
"Indi mo bala Makita ang Puling sa imo Kaugalingon nga Mata"
Ang Pagbasa gikan sa Nahauna nga Sulat ni San Pablo nga Apostol, sa mga:
Taga-Corinto 9:16-19, 22-27
Wala ako sing kinamatarong sa pagpabugal tungod kay nagawali ako sang Maayong Balita. Kon sa bagay, katungdanan ko ang pagwali sang Maayong Balita. Kailo man ako kon indi ko pag-iwali ang Maayong Balita! Kon ang pagwali ginahimo ko sa akon lamang luyag, ti magapaabot ako sing suhol. Pero tungod nga ginahimo ko ini subong nga isa ka tulomanon, nagakahulogan nga ginahimo ko ini subong nga hilikuton nga gintugyan sa akon sang Dios. Karon, ano ang akon suhol? Ang akon suhol amo ang kalipay nga wala ako nagapabayad sa akon pagwali sang Maayong Balita, kag wala ako nagagamit sang akon mga kinamatarong, agod bayaran ako sa akon pagpangabudlay para sa Maayong Balita.
Hilway ako nga tawo kag indi ulipon sang bisan sin-o. Pero ginahimo ko ang akon kaugalingon nga ulipon sang tanan, agod madamo ang madala ko sa Ginoo. Gani, nanginkasubong ako nila sa tanan nga mga bagay sa sining nanuhaytohay nga mga tawo, agod nga maluwas ko ang iban sa ila bisan sa ano nga paagi.
Ginahimo ko ini tanan tungod sa Maayong Balita, agod nga makaambit man ako sang mga kaayuhan sini. Nakahibalo gid kamo nga sa palumba, nagaentra ang tanan nga mga manugdalagan, pero isa lang sa ila ang makabaton sing premyo. Gani magdalagan kamo agod nga makuha ninyo ang premyo. Ang tagsa ka humalampang nga nagahanas nagasunod sing maid-id sang mga tulomanon, agod makoronahan sia sang korona nga umalagi lamang. Pero kita aton nagahimo sini, agod makaangkon sang korona nga nagapadayon. Amo ina nga nagadalagan ako sing tadlong padulong sa ginatapusan sang palumba, kag amo man ina nga kasubong ako sang boksidor nga wala nagasumbag sang hangin. Ginapaanad ko ang akon lawas sa mga sumbag kag ginadisiplina ko ini, kay basi sa tapos ako makaagda sa iban sa palumba ako akon sikwayon.
Salmo sa Pagsabat:
Mga Salmo 84:3, 4, 5-6, 12
(S) Daw ano ka mahigugmaon ang imo Templo, O Ginoo, Dios nga Makagagahom!
Daku gid ang akon handom sa pagkadto didto! Ginahidlaw ako sa pagsulod sa Templo sang Ginoo. Ang akon kabug-osan nagaamba nga may kalipay sa buhi nga Dios. (S)
Bisan ang mga maya nagahimo sang ila pugad, kag ang mga salimbabatang may kaugalingon nga puloy-an; ginabutang nila ang ila mga boto malapit sa imo mga altar, Ginoo nga Makagagahom, akon hari kag akon Dios. (S)
Bulahan ang mga nagapuyo sa imo Templo, nga nagakanta sa gihapon sing pagdayaw sa imo! Bulahan sila nga ang ila mga kusog nagagikan sa imo, yadtong nagahandom gid sa pagbuylog sa mga mainampuon pakadto sa bukid sang Sion. (S)
Ang Ginoo aton mangangapin kag mahimayaon nga hari, nga nagahatag sa aton sing kaayuhan kag kadungganan. Wala niya ginadumili ang bisan ano nga maayo nga butang sa mga nagahimo sing matarong. (S)
Aleluya:
1 San Juan 17:17B, 17A
Ang imo pulong, O Ginoo, kamatuoran; pakabalaana kami paagi sa kamatuoran.
Ang Pagbasa sang Santos nga Ebanghelyo suno kay:
San Lucas 6:39-42
Kag si Jesus naghatag sa ila sini nga palaanggiran: “Ang isa ka bulag indi makatuytoy sa isa man ka bulag, kon himuon niya ini, sila nga duha madagdag sa kanal. Wala sing eskuwela nga maglabaw pa sa iya maestro; pero kon matapos na ang iya kurso manginsubong na sia sang iya maestro.
“Ngaa bala ginamulalongan mo ang diutay nga puling sa mata sang imo utod, pero wala mo ginasapak ang puling nga daw tablon kadaku sa imo kaugalingon nga mata? Paano ang pagkasiling mo sa imo utod, ‘Utod, ipakuha sa akon ang diutay nga puling sa imo mata,’ nga indi gani ikaw makakita sang puling nga daw tablon kadaku sa imo mata? Salimpapaw! Kuhaa anay ang puling nga daw tablon kadaku sa imo mata, kag dayon makakita ka kag makuha mo ang diutay nga puling sa mata sang imo utod.”
No comments:
Post a Comment