Pebrero 21, 2021, Nahauna nga Domingo sang Kwaresma

Liturhiya sang Pulong

Nahauna nga Balasahon - Genesis 9:8-15

Salmo sa Pagsabat - Mga Salmo 25:4-5, 6-7, 8-9

Ika-2 nga Balasahon - 1 Pedro 3:18-22

Sa Wala pa ang Ebanghelyo - Mateo 4:4B

Ebanghelyo - Lucas 5:27-32

1. Ang Pagbasa gikan sa Libro sang:

Genesis 9:8-15

Karon ang Dios nagsiling kay Noe kag sa iya mga anak nga lalaki, “Karon magahimo ako sing kasugtanan sa inyo kag sa inyo mga kaliwat, kag sa tanan nga mga tinuga nga nagakabuhi—mga pispis, tanan nga mga sapat—ang tanan nga naggowa sa arka upod sa inyo. Sa sini nga mga pulong magahimo ako sing kasugtanan sa inyo: Indi ko na gid paglaglagon ang buhi nga mga tinuga paagi sa anaw. Indi na gid mag-anaw liwat sa paglaglag sang duta. Subong tanda sang walay katapusan nga kasugtanan nga akon ginahimo upod sa inyo kag sa tanan nga mga tinuga nga nagakabuhi, ginabutang ko ang akon balangaw sa mga panganod. Ini mangintanda sang akon kasugtanan sa kalibutan. Kon magpadala ako sing panganod sa ibabaw sang duta, kag ang balangaw magapakita sa mga panganod, dayon dumdomon ko ang akon saad sa imo kag sa tanan nga mga sapat, nga wala na sing anaw nga magalaglag sang tanan nga buhi nga mga tinuga.

Salmo sa Pagsabat:

Mga Salmo 25:4-5, 6-7, 8-9

(S) Ang imo mga dalan, O Ginoo, amo ang pagkaluoy kag pagkatarong para sa magatuman sang imo kasugtanan.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

2. Ang Pagbasa gikan sa Nahauna nga Sulat ni:

San Pedro 3:18-22

Mga utod: Kay si Cristo mismo nagpanginmatay tungod sa inyo. Nagpakamatay sia sing makaisa gid lang tungod sang mga sala, isa ka matarong nga tawo para sa mga di-matarong, agod nga madala niya kamo sa Dios. Ginpatay sia sa lawas, pero ginbuhi sa espiritu. Kag sa iya espiritu nagkadto sia kag nagwali sa binilanggo nga mga espiritu. Ini sila amo ang mga espiritu sang mga wala magtuman sa Dios, sang paghulat sang Dios sing mapainulobon sa sadtong mga adlaw sang si Noe nagahimo sang iya arka. Pila gid lang ang naluwas sa tubig, ang walo nga didto sa arka. Ini nga tubig amo ang halimbawa sang pagbautiso, nga karon nagaluwas sa inyo, indi sa paghugas sang mga higko sa lawas, kundi paagi sa saad nga ginhimo sa Dios gikan sa matinlo nga konsyensya. Ang pagbautiso nagaluwas sa inyo paagi sa pagkabanhaw ni Jesu-Cristo, nga nagpalangit kag nagalingkod sa tuo sang Dios, nga nagagahom sang tanan nga mga anghel kag sang langitnon nga mga awtoridad kag mga gahom.

Sa Wala pa ang Ebanghelyo:

San Mateo 4:4B

Ang tawo mabuhi indi lamang sa tinapay, kundi sa tagsa ka pulong nga ginhambal sang Dios.

Ang Pagbasa sang Santos nga Ebanghelyo suno kay:

San Marcos 1:12-15

Sa gilayon ginpakadto sia sang Espiritu Santo sa desierto. Nagtener sia didto sing 40 ka adlaw kag ginsulay sia ni Satanas. May mga sapat man nga talunon didto, pero nag-abot ang mga anghel kag nagbulig sa iya. Sang nabilanggo na si Juan, si Jesus nagkadto sa Galilea kag nagwali sang Maayong Balita gikan sa Dios. Nagsiling sia, “Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.” 

Pebrero 20 | Pebrero 22

Enero 24, 2021, Ika-3 nga Domingo sang Tuig

Liturhiya sang Pulong

Nahauna nga Balasahon - Jonas 3:1-5, 10

Salmo sa Pagsabat - Mga Salmo 25:4-5, 6-7, 8-9

Ika-2 nga Balasahon - 1 Corinto 7:29-31

Aleluya - Marcos 1:15

Ebanghelyo - Marcos 1:14-20    

1. Ang Pagbasa gikan sa Libro ni:

Jonas 3:1-5, 10

Sa liwat ang Ginoo nagsiling kay Jonas, “Magkadto ka sa Ninive, inang daku nga siyudad kag iwali sa mga tawo ang mga pulong nga ginhatag ko sa imo.” Gani si Jonas nagtuman sa Ginoo kag nagkadto sa Ninive. Ang isa ka daku nga siyudad nga ang iya kasangkaron nagakinahanglan sing tatlo ka adlaw nga paglakat, halin sa pihak pakadto sa pihak. Si Jonas nagsulod sa siyudad kag sang makalakat sia sing isa ka adlaw nagbantala sia, “Sa tapos ang 40 kaadlaw ang Ninive pagalaglagon!”

Ang mga tawo sang Ninive nagtuo sa pulong sang Dios, nagpamat-od sila nga ang tagsatagsa dapat magpuasa, kag ang tanan nga mga pumoluyo halin sa kadalagkuan tubtob sa labing kubos, magbayu sing sako, sa pagpakilala nga naghinulsol sila.

Nakita sang Dios ang ila ginhimo; nakita niya ang ila pagbiya sang ila malaut nga pagginawi. Gani nagbaylo sia sang iya hunahona kag wala niya sila pagsiluti suno sa iya ginsiling nga silutan sila.

Salmo sa Pagsabat:

Mga Salmo 25:4-5, 6-7, 8-9

(S) O Ginoo, ipakita sa amon ang Imo mga dalanon.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S) 

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S) 

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 7:29-31

Mga utod, amo ini ang buot ko silingon: diutay na lang ang tion nga nabilin. Sugod karon ang may mga asawa magkabuhi nga daw wala sing asawa, ang mga nagakalisod subong nga daw wala man sila sing kalisod, ang mga nagakalipay subong nga daw wala man sila sing kalipay, ang mga nagabakal subong nga daw wala man sila sing binaklan, kag ang nagagamit sang mga pagkabutang sining kalibutan magkabuhi subong nga daw wala man sila nagagamit sini. Kay ang kahimtangan karon nagapakita nga ining kalibutan indi na gid magdugay. 

Aleluya:

San Marcos 1:15

Ang Ginharian sang Dios malapit na; bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Marcos 1:14-20

Sang nabilanggo na si Juan, si Jesus nagkadto sa Galilea kag nagwali sang Maayong Balita gikan sa Dios. Nagsiling sia, “Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.” 

Sang nagalakat si Jesus sa higad sang Linaw sang Galilea, may nakita sia nga duha ka mangingisda, si Simon kag ang iya utod nga si Andres, nga nagapanahid sa linaw. Si Jesus nagsiling sa ila, “Upod kamo sa akon kay tudloan ko kamo sa pagpanahid sang mga tawo.” Sa gilayon ginbayaan nila ang ila sahid kag nag-upod sa iya. 

Nagpadayon si Jesus sa paglakat kag sa uloonhan may duha pa gid ka mag-utod nga nakita sia, si Santiago kag si Juan, nga mga anak ni Zebedeo. Didto sila sa ila sakayan nga nagaaman sang ila sahid. Sang pagkakita ni Jesus sa ila gilayon gintawag niya sila. Gani, ginbayaan nila ang ila amay nga si Zebedeo sa sakayan upod sang mga sinuholan nga mga tawo kag nag-upod sila kay Jesus. 

Enero 23 | Enero 25

Disyembre 14, 2020, Lunes sang Ika-3 nga Semana sang Adbiento

Liturhiya sang Pulong

San Juan Dela Cruz, Pari kag Doktor sang Simbahan

Nahauna nga Balasahon - Numeros 24:2-7, 15-17a

Salmo sa Pagsabat - Mga Salmo 25:4-5AB, 6 and 7BC, 8-9

Aleluya - Mga Salmo 85:8

Ebanghelyo - Mateo 21:23-27

Ginakilala nila si Juan nga Isa ka Propeta

Ang Pagbasa gikan sa Libro sang:

Numeros 24:2-7, 15-17a

Si Balaam nagliso pakadto sa deiserto kag nakita niya ang mga tawo sang Israel nga naghimo sing kampamento suno sa ila mga tribo. Gingamhan sia sang espiritu sang Dios, kag ginhambal niya ini nga tagna. 

        "Ang mensahi ni Balaam nga anak ni Beor, 

        ang mga pulong sang tawo nga makakita sing maathag,

        nga makabati sang ginasiling sang Dios. 

        Sa akon pagtulok sing masusi, 

        makita ko ang isa ka palanan-awon nga gikan sa Labing Makagagahom nga Dios.

        Ang mga tolda sang Israel matahom,

        kaangay sang nagakubay nga mga palma, 

        ukon subong sang mga hardin 

        sa luyo sang isa ka suba, 

        kaangay sang linaloes nga gintanom sang Ginoo, 

        ukon sang mga sedro sa luyo sang tubig.

        Ang mga hangaway sang Israel nagapakurog sang mga kapungsoran, 

        kag ang Israel nagagahom sa madamo nga mga tawo. 

        Ang ila hari mangingamhanan pa sa kay Agag, 

        kag ang iya paggahom magasangkad.

    Dayon ginhambal niya ini nga tagna: 

        "Ang mensahi ni Balaam nga anak ni Beor, 

        ang mga pulong sang tawo nga makakita sing maathag 

        nga makabati sang ginasiling sang Dios, 

        kag makabaton sang ihibalo gikan sa Labing Gamhanan. 

        Sa akon pagtulok sing masipat, 

        makita ko ang isa ka palanan-awon gikan sa Labing Makagagahom nga Dios. 

        Nagatulok ako sa palaabuton, 

        kag makita ko ang pungsod sang Israel.

Ang isa ka hari, kaangay sang isa ka masanag nga bituon, 

        magasubang sa sina nga pungsod. 

        Kaangay sang isa ka kometa nagagikan sia sa Israel.

Salmo sa Pagsabat:

Mga Salmo 25:4-5AB, 6 and 7BC, 8-9

(S) Ipakilala sa akon, O Ginoo, ang imo mga dalan.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

Aleluya:

Mga Salmo 85:8

   Ipakita sa amon ang imo kaluoy, O Ginoo, kag ihatag sa amon ang imo kaluwasan.

Ang Pagbasa sang Santos nga Ebanghelyo suno kay:

San Mateo 21:23-27

   Nagbalik si Jesus sa templo, kag sang nagapanudlo sia didto, ang pangulo nga mga pari kag ang mga katigulangan sang mga Judio nagpalapit sa iya kag nagpamangkot, “Ano bala ang imo awtoridad sa paghimo sini nga mga butang? Sin-o bala ang naghatag sa imo sini nga awtoridad?” 

Si Jesus nagsabat sa ila, “Ako man may isa ka pamangkot sa inyo, kag kon inyo masabat ini sugiran ko kamo sang akon awtoridad sa paghimo sini nga mga butang. Sa diin bala nagikan ang awtoridad ni Juan sa pagbautiso, sa Dios bala ukon sa tawo?” 

Kag nagbinaisay sila nga nagasiling, “Ano bala ang aton isabat? Kon magsiling kita, ‘Gikan sa Dios,’ masiling sia sa aton, ‘Ngaa wala kamo magpati kay Juan?’ Pero kon magsiling kita, ‘Gikan sa tawo,’ nahadlok man kita sa mga tawo kay ginakilala nila si Juan nga isa ka propeta.” 

Gani nagsabat sila kay Jesus, “Wala kami makahibalo.” 

Dayon nagsiling sia sa ila, “Ti, indi ko man kamo pagsugiran kon sa kay sin-o awtoridad ginahimo ko ini nga mga butang.”

Disyembre 13 | Disyembre 15

Setyembre 27, 2020, Ika-26 nga Domingo sang Tuig

Liturhiya sang Pulong

Nahauna nga Balasahon - Ezequiel 18:25-28

Salmo sa Pagsabat - Mga Salmo 25:4-5, 6-7, 8-9

Ikaduha nga Balasahon - Filipos 2:1-11

Aleluya - Juan 10:27

Ebanghelyo - Mateo 21:28-32

Diin nga Bata ang Nagtuman sang Sugo sang Amay?

1. Ang Pagbasa gikan sa Libro ni:

Ezequiel nga Propeta 18:25-28

“Pero nagasiling kamo, ‘Indi husto ang ginahimo sang Ginoo.’ Pamati kamo, mga Israelinhon. Nagahunahona bala kamo nga indi husto ang akon ginahimo? Kamo ang nagahimo sang indi husto. Kon ang matarong nga tawo mag-untat sa paghimo sing maayo, kag maghimo sing malain kag mapatay, tungod sang iya ginhimo nga malaut mapatay sia. Kon ang malaut nga tawo mag-untat sa pagpakasala kag maghimo sing matarong kag maayo, maluwas niya ang iya kabuhi. Kon matalupangdan niya ang iya ginahimo kag mag-untat sia sa pagpakasala, indi sia mapatay, kundi magakabuhi.

Salmo sa Pagsabat:

Mga Salmo 25:4-5, 6-7, 8-9

(S) Ginoo, dumdoma man ang Imo kaayo kag mapinadayunon nga gugma.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 2:1-11

Nagapalig-on bala sa inyo ang inyo kabuhi kay Cristo? Nagalipay bala sa inyo ang iya gugma? Nagahiusa bala kamo sa Espiritu? May kalulo bala kamo kag kaluoy sa isa kag isa? Ti karon, ginapangabay ko sa inyo, lipaya gid ninyo ako sing bug-os paagi sa inyo pag-isa sing hunahona, paghigugmaanay, kag paghiusa sa espiritu kag tinutoyo. Indi kamo magmaiyaiyahon ukon magpadayawdayaw sa inyo mga ginahimo, kundi magpaubos kamo sa isa kag isa kag indi kamo maghunahona nga labaw kamo sa iban. Pangitaa ninyo ang kaayuhan sang iban kag indi lang ang inyo kaugalingon nga kaayuhan. Hupti ninyo ini nga panghunahona nga iya man ni Cristo Jesus: 

Ang kinaugali sang Dios Yara sa iya gihapon, Pero wala sia maghunahona Nga sa pakusog Dapat sia magtinguha Nga manginkaangay sa Dios. Sa baylo Sa iya kaugalingon nga kabubot-on Ginpaiway niya ini tanan, Kag nagsuklob sia Sang kinaugali sang isa ka ulipon. Nagpakatawo sia, Kag nagpakita sa dagway sang tawo. Nagpaubos siya sang iya kaugalingon Kag nagmasinulondon Tubtob sa kamatayon, Bisan pa ang kamatayon sa krus. Tungod sini Ginbayaw sia sang Dios sa kahitaasan, Kag ginhatagan sia sing ngalan Nga labaw sa tanan nga ngalan. Gani sa ngalan ni Jesus, Ang tanan nga mga tinuga, Sa langit kag sa duta, Kag sa idalom sang duta Magaluhod, Kag ang tanan magkilala sing dayag Nga si Jesu-Cristo amo ang Ginoo, Sa himaya sang Dios nga Amay. 

Aleluya:

San Juan 10:27

Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon. 

Ang Pagbasa sang Santos nga Ebanghelyo suno kay:

San Mateo 21:28-32

“Karon, ano bala ini sa inyo? May isa ka tawo nga may duha ka anak nga lalaki. Ginkadtuan niya ang magulang kag ginsingganan, ‘Toto, kadto ka karon sa uma kag mag-obra.’ Nagsabat sia, ‘Indi ako!’ Pero sang ulihi nagbaylo ang iya hunahona kag nagkadto sia sa uma. Karon ang amay nagkadto man sa manghod kag nagsiling sing amo man. Ang bata nagsabat, ‘Huo, Tay,’ pero wala sia magkadto. Diin sini sa ila nga duha ang nagtuman sang sugo sang amay?”

Nagsabat sila, “Ang magulang.”

Si Jesus nagsiling sa ila, “Nagasiling ako sa inyo nga unahan pa kamo sang mga manugsokot sang buhis kag sang malain nga mga babayi sa pagsulod sa Ginharian sang Dios. Kay si Juan Bautista nagkari kag nagtudlo sa inyo sang husto nga dalan, kag wala kamo magpati sa iya, pero ang mga manugsokot sang buhis kag ang malain nga mga babayi nagpati sa iya. Bisan pa nakita ninyo ini, wala gid magliso ang inyo hunahona kag magpati sa iya.” 

Setyembre 26 | Setyembre 28