Liturhiya sang Pulong
Nahauna nga Balasahon - Exodo 20:1-17
Salmo sa Pagsabat - Mga Salmo 19:8, 9, 10, 11
Ika-2 nga Balasahon - 1 Corinto 1:22-25
Sa Wala pa ang Ebanghelyo - Juan 3:16
Ebanghelyo - Juan 2:13-25
1. Ang Pagbasa gikan sa Libro sang:
Exodo 20:1-17
Ang Dios naghambal sini nga mga pulong, “Ako amo ang Ginoo nga imo Dios, nga nagdala sa imo pagwa sa Egipto, sa diin gin-ulipon ka.
“Indi ka maghupot sang iban nga dios, luas sa akon.
“Indi ka maghimo para sa imo kaugalingon sang isa ka diosdios ukon isa ka larawan sang bisan ano nga tinuga sa langit, ukon sa duta, ukon sa tubig nga yara sa idalom sang duta. Indi ka magluhod ukon magsimba sa bisan ano nga diosdios, kay ako ang Ginoo nga imo Dios, kag maimon ako nga Dios. Sa mga nagadumot sa akon silutan ko ang ila mga kaanakan tubtob sa ikatlo kag ikaapat ka kaliwatan. Pero sa mga nagahigugma sa akon kag nagabantay sang akon mga sugo, ipakita ko sa ila ang akon malig-on nga paghigugma sa linibo nga mga kaliwatan.
“Indi mo paggamiton sa wala sing pulos ang ngalan sang Ginoo nga imo Dios, kay ako magasilot sang bisan sin-o nga maggamit sang akon ngalan sa wala sing kapuslanan.
“Dumdoma ang adlaw nga inugpahuway, kag pakabalaana ini sa Ginoo. Mag-obra ka sa sulod sang anom ka adlaw, pero ang ikapito nga adlaw amo ang adlaw nga inugpahuway nga imo pakabalaanon sa Ginoo nga imo Dios. Indi ka mag-obra sa sina nga adlaw, ikaw, ukon ang imo mga kaanakan, ukon imo mga ulipon, ukon imo mga kahayupan, ukon ang dumoluong nga nagapuyo sa imo mga banwa. Sa sulod sang anom ka adlaw ang Ginoo nagtuga sang langit kag duta, sang dagat, kag sang tanan nga yara sa ila, pero sa ikapito nga adlaw nagpahuway sia. Gani ako, ang Ginoo, nagbendisyon sang adlaw nga inugpahuway kag ginpakabalaan ini para sa akon kaugalingon.
“Tahura ang imo amay kag iloy, agod nga magkabuhi ka sing malawig sa duta nga ginhatag sang Ginoo nga imo Dios.
“Indi ka magpatay.
“Indi ka magpanginbabayi ukon magpanginlalaki.
“Indi ka magpangawat.
“Indi ka magsaksi sing binutig sa imo isigkatawo.
“Indi ka magkaibog sang balay sang imo isigkatawo. Indika magkaibog sang iya asawa, ukon sang iya mga ulipon, sang iya baka, ukon sang iya asno, ukon sang bisan ano niya nga butang!”
Salmo sa Pagsabat:
Mga Salmo 19:8, 9, 10, 11
(S) O Ginoo, yara sa imo ang mga pulong nga naghatag sang kabuhi nga dayon.
Ang kasugoan sang Ginoo himpit; nagahatag ini sing bag-o ngakabuhi, ang mga sugo sang Ginoo masaligan, kag nagahatag ini sing kaalam sa mga nakulangan. (S)
Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop sa hunahona. (S)
Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)
Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)
2. Ang Pagbasa gikan sa Nahauna nga Sulat ni San Pablo nga Apostol, sa mga:
Taga-Corinto 1:22-25
Ang mga Judio nagapangayo sing mga milagro, kag ang mga Griego iya nagapangita sing kaalam. Kami amon nagawali nahanungod kay Cristo nga ginlansang sa krus. Ini nga balita kontra sang mga Judio kag kabuangan para sa mga Gentil. Pero para sa mga tinawag sang Dios, mga Judio ukon mga Gentil, si Cristo amo ang gahom kag ang kaalam sang Dios. Kay ang kabuangan sang Dios mas maalam sang sa kaalam sang mga tawo, kag ang kaluyahon sang Dios mas makusog sang sa kusog sang mga tawo.
Sa wala pa ang Ebanghelyo:
San Juan 3:16
Ginhigugma gid sang Dios ang kalibutan sa bagay nga ginhatag niya ang iya bugtong nga Anak, ang tagsatagsa nga magtuo sa iya, may kabuhi nga wala sing katapusan.
Ang Pagbasa sang Santos nga Ebanghelyo suno kay:
San Juan 2:13-25
Nagahilapit na ang Piesta sang Pascua sang mga Judio, gani si Jesus nagpa-Jerusalem. May nakita sia nga mga tawo didto sa templo nga nagabaligya sang mga baka, mga karnero, kag mga pating, kag ang mga manugbaylo man sang kuwarta nga yara sa ila mga lamisa. Naghimo si Jesus sang inughanot nga lubid kag iya ginpanabog ang tanan nga mga sapat pa gwa sa templo, ang mga karnero kag mga baka. Ginpamaliskad niya ang mga lamisa sang mga manugbaylo sang kuwarta, kag ginwas-ag niya ang ila mga kuwarta; kag ginmanduan niya ang mga manugbaligya sang pating, “Kuhaa ninyo ina diri! Indi ninyo paghimoa nga balaligyaan ang balay sang akon Amay!” Nadumdoman sang iya mga gintuton-an nga ang kasulatan nagasiling, “Ang akon kabalaka sa imo balay, O Dios, nagadabdab sa sulod nakon subong sang kalayo.”
Ang mga pangulo sang mga Judio nagpamangkot sa iya, “Ano bala nga milagro ang imo mahimo sa pagpakita sa amon nga may katarungan ka sa paghimo sini?”
Si Jesus nagsabat, “Gub-a ninyo ining templo sang Dios kag sa sulod sang tatlo ka adlaw patindugon ko ini liwat.”
Namangkot sila sa iya, “Ini nga templo ginpatindog sa sulod sang 46 ka tuig, kag patindugon mo bala ini sa sulod sang tatlo lamang ka adlaw?”
Pero ang templo nga ginsiling ni Jesus amo ang iya lawas. Gani sang nabanhaw sia, nadumdoman sang iya mga gintuton-an nga ginhambal niya ini, kag nagtuo sila sa kasulatan kag sa mga pulong nga ginhambal ni Jesus.
Sang didto si Jesus sa Jerusalem sa Piesta sang Pascua, madamo ang mga nagtuo sa iya sang makita nila ang gamhanan nga mga buhat nga ginhimo niya. Pero si Jesus wala magsalig sang iya kaugalingon sa ila, tungod kay nakilala gid niya sing maayo ang tanan nga mga tawo. Wala na sing kinahanglan nga sugiran sia nahanungod sang mga tawo, kay nahibaluan gid niya kon ano ang yara sa ila mga tagipusoon.
No comments:
Post a Comment