1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Ang Isa ka Anak nga Lalaki Ginsaad kay Abraham
1 Ang GINOO nagpakita kay Abraham sa balaan nga mga kahoy sang Mamre. Si Abraham nagapungko sa puwertahan sang iya tolda sang udto ang adlaw kag
2 sang magtungkaaw sia, nakita niya ang tatlo ka tawo nga nagatindog didto. Sang pagkakita niya sa ila, nagdalagan sia sa pagsugata sa ila. Nagluhod sia kag nagduko,
3 nga nagasiling, “Sir, ano ang mahimo ta sa inyo, kon mahimo indi pagligari ang akon puloy-an kundi maghapit gid kamo.
4 Makuha anay ako sing tubig agod makapanghinaw kamo sang inyo mga tiil. Pahuway kamo anay diri sa idalom sining kahoy.
5 Makuha man ako sing sarang ninyo makaon. Makahatag ini sa inyo sing kusog sa pagpadayon sang inyo pagpanglakaton. Nagkari kamo sa akon puloy-an, gani yari ako sa pag-alagad sa inyo.” Nagsabat sila, “Sigi, salamat gid.”
6 Si Abraham nagdalidali sa pagsulod sa tolda kag nagsiling kay Sara, “Dalidali ka kag magkuha sing isa ka sako sang imo labing maayo nga arina, kag magluto sing tinapay.”
7 Dayon nagdalagan sia pakadto sa iya mga baka kag nagpili sia sing isa ka tinday nga matambok kag ginhatag ini sa ulipon nga nagdalidali sa pag-aman sini.
8 Nagkuha sia sing kiso, gatas, karne, kag ginbutang ini sa atubangan sang mga tawo. Didto sa idalom sang kahoy ginpakaon niya sila.
9 Dayon nagpamangkot sila sa iya, “Diin ang imo asawa nga si Sara?” Nagsabat sia, “Yara sia sa sulod sang tolda.”
10 Ang isa sa ila nagsiling, “Sa tapos sang siyam ka bulan magabalik ako kag ang imo asawa nga si Sara magaanak sing lalaki.” Si Sara nagapamati didto sa puwertahan sang tolda sa likod nayon ni Abraham.
11 Si Abraham kag si Sara tigulang na gid kaayo, kag nag-untat na ang iya pamulanon.
12 Gani si Sara nagkadlaw sa iya kaugalingon kag nagsiling, “Karon nga tama na ako ka tigulang, magakalipay pa bala ako sa pagpatandog sa akon bana? Wala labot sini, ang akon bana tigulang na man.”
13 Dayon ang GINOO nagpamangkot kay Abraham, “Ngaa nagkadlaw si Sara kag nagsiling, ‘Makabata pa bala ako nga tigulang na ako?’
14 May butang bala nga tama kabudlay para sa GINOO? Suno sa ginsiling sa nagakaigo nga tion, sa tapos sang siyam ka bulan, magabalik ako sa imo kag si Sara magaanak sing lalaki.”
15 Tungod kay nahadlok si Sara, ginpanghiwala niya ini nga nagasiling, “Wala ako magkadlaw.” Ang GINOO nagsabat, “Nagkadlaw ka gid!”
Si Abraham Nagpakiluoy para sa Sodoma
16 Dayon ang mga tawo naglakat kag nagkadto sa isa ka duog sa diin makita nila ang Sodoma, kag si Abraham nagdul-ong sa ila.
17 Ang GINOO nagsiling sa iya kaugalingon, “Indi ko pagtaguon kay Abraham ang akon pagahimuon.
18 Ang iya mga kaliwat mangindaku kag gamhanan nga pungsod, kag ang tanan nga mga pungsod sa duta magapangayo nga bendisyunan ko sila subong sang akon pagbendisyon sa iya.
19 Ginpili ko sia agod iya sugoon ang iya mga anak nga lalaki kag mga kaliwat sa pagtuman sang akon mga sugo paagi sa ila paghimo sang husto kag matarong. Dayon pagahimuon ko para sa iya ang tanan nga akon ginsaad.”
20 Dayon ang GINOO nagsiling kay Abraham, “Tama gid ang mga panumbongon batok sa Sodoma kag sa Gomorra, kag ang ila sala tama gid.
21 Kinahanglan kadtuan ko kag tan-awon kon ang mga panumbongon batok sa ila matuod ukon indi.”
22 Dayon ang duha ka tawo naglakat pakadto sa Sodoma, pero ang GINOO nagpabilin upod kay Abraham.
23 Si Abraham nagpalapit sa GINOO kag nagpamangkot, “Pagalaglagon mo gid bala ang mga matarong upod sa mga malaut?
24 Kon may yara nga 50 ka matarong nga mga tawo sa siyudad, pagalaglagon mo bala ang bilog nga siyudad? Indi mo bala pag-ipaiway ang siyudad agod maluwas ang 50?
25 Sa pagkamatuod indi mo pagpatyon ang mga matarong upod sa mga malaut. Indi ina mahimo! Indi mo ina paghimuon. Kay kon amo ina, ang matarong pagasilutan pareho sang mga malaut. Indi ina mahimo. Ang Hukom sang bug-os nga kalibutan dapat maghukom sing matarong.”
26 Ang GINOO nagsabat, “Kon makakita ako sing 50 ka matarong nga mga tawo sa Sodoma, indi ko paglaglagon ang bug-os nga siyudad tungod sa ila.”
27 Si Abraham naghambal liwat, “Kon mahimo, O Ginoo, patawara ako sang akon kaisog sa pagpadayon sa pagpakighambal sa imo. Tawo lamang ako, kag wala ako kinamatarong sa paghambal sini.
28 Abi may 45 lamang ka matarong nga mga tawo. Laglagon mo bala ang bug-os nga siyudad tungod kay kulang sing lima?” Ang Ginoo nagsabat, “Indi ko paglaglagon ang siyudad kon may makita ako nga 45 ka matarong nga mga tawo.”
29 Si Abraham naghambal liwat, “Abi may 40 lang.” Nagsabat sia, “Indi ko paglaglagon ang siyudad kon may yara nga 40.”
30 Si Abraham nagsiling, “Indi ka lang magkaakig sa akon, O Ginoo, kay indi ko mapunggan ang paghambal liwat. Ti, abi kon may 30 lang?” Nagsabat sia, “Indi ko paglaglagon ini kon may makita ako nga 30.”
31 Si Abraham nagsiling, “Ginoo, kon mahimo, patawara ako sa akon kaisog sa pagpadayon sa pagpakighambal sa imo. Abi kon may 20 lang?” Nagsabat sia, “Indi ko paglaglagon ang siyudad kon may makita ako nga 20.”
32 Si Abraham nagsiling, “Abaw, Ginoo, indi ka magkaakig, kag magahambal ako sing kaisa na lang. Abi kon may napulo lang?” Nagsiling sia, “Indi ko paglaglagon ini kon may yara nga napulo.”
33 Sa tapos ang GINOO makapakighambal kay Abraham naglakat sia kag si Abraham nagpauli.
No comments:
Post a Comment