GENESIS - Kapitulo 25

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

Ang Iban nga mga Kaliwat ni Abraham

1 Si Abraham nagpangasawa liwat kag ang ngalan sang iya asawa amo si Cetura.
2 Ang iya mga anak kay Abraham amo sanday Zimram, Jocsan, Medan, Midian, Isbac, kag Sua.
3 Si Jocsan amo ang amay ni Seba kag ni Dedan, kag ang mga anak ni Dedan amo ang mga Asurim, Letusim kag Leumim.
4 Ang mga anak nga lalaki ni Midian amo sanday Efa, Efer, Hanoc, Abida, kag Eldaa. Ini sila tanan mga kaliwat ni Cetura.
5 Ginbilin ni Abraham ang tanan niya nga pagkabutang kay Isaac.
6 Pero sang wala pa sia mapatay ginhatagan niya sing mga regalo ang iban niya nga mga anak sa iban niya nga mga asawa, kag ginpalakat sila sa duta sa Sidlangan, palayo sa iya anak nga si Isaac.

Ang Pagkapatay kag ang Paglubong kay Abraham

7-8 Si Abraham nagkabuhi sing 175 ka tuig kag napatay sia nga tigulang na kaayo.
9 Ginlubong sia sang iya mga anak nga lalaki nga si Isaac kag si Ismael sa kuweba sang Macpela, sa duta nga iya anay ni Efron, ang anak ni Zohar nga Hethanon, sa sidlangan sang Mamre.
10 Amo ini ang duta nga ginbakal ni Abraham sa mga Hethanon. Si Abraham kag si Sara nga iya asawa ginlubong diri.
11 Sang patay na si Abraham, ginbendisyunan sang Dios si Isaac nga iya anak nga nagpuyo sa luyo sang “Bubon sang Nagakabuhi nga Nagatan-aw sa Akon.”

Ang mga Kaliwat ni Ismael

12 Amo ini ang mga kaliwat ni Ismael nga anak ni Abraham sa kay Agar, ang ulipon nga Egiptohanon ni Sara.
13 Amo ini ang mga ngalan sang mga anak nga lalaki ni Ismael halin sa magulang pakadto sa manghod. Ang panganay nga bata ni Ismael amo si Nebayot. Ang madason amo sanday Cedar, Adbeel, Mibsam,
14 Misma, Duma, Masa,
15 Hadad, Tema, Jetur, Nafis, kag Kedema.
16 Amo ini ang mga anak nga lalaki ni Ismael, 12 ka mga katigulangan sang mga tribo, kag ang mga baryo kag mga kampamento nga ila ginpuy-an ginhingalanan sa ila mga ngalan.
17 Si Ismael nagaedad sing 137 ka tuig sang pagkapatay niya kag ginlubong sia sa lulobngan sang iya mga himata.
18 Ang mga kaliwat ni Ismael nagpuyo sa duta sa gin-utlan sang Havila kag Sur, sa sidlangan sang Egipto, sa alagyan pa Asiria. Nagpain sila sa iban nga mga kaliwat ni Abraham.

Ang Pagkatawo ni Esau kag ni Jacob

19 Amo ini ang maragtas ni Isaac nga anak ni Abraham.
20 Si Isaac nagaedad sing 40 ka tuig sang pagpangasawa niya kay Rebeca nga bata ni Betuel nga Arameanhon sang Mesopotamia, kag utod ni Laban nga Arameanhon.
21 Tungod kay si Rebeca wala sing kabataan, nagpangamuyo si Isaac sa GINOO para sa iya. Ang GINOO nagsabat sang iya pangamuyo, kag si Rebeca nagbusong.
22 Kapid ang iya ginabusong kag nagadis-uganay sila sa iya tiyan. Nagsiling sia, “Ngaa matabo sa akon ang kaangay sini?” Gani nagpangamuyo sia sa GINOO sing sabat.
23 Ang GINOO nagsiling sa iya: “Duha ka mga pungsod ang yara sa imo tiyan. Magabata ka sang duha ka nasyon nga wala nagahibaot, ang isa makusog sang sa isa, kag ang magulang mangin-ulipon sang manghod.”
24 Ang tion sang iya inugbata nag-abot kag nagbata sia sing kapid.
25 Ang nahauna nga bata nga lalaki nga natawo mapulapola, kag ang iya panit pareho sang panapton nga bulbolon, gani ginhingalanan nila sia kay Esau.^m
26 Sang matawo ang iya utod nga lalaki, ang iya sini kamot nagauyat sing hugot sa tikod ni Esau, gani ginhingalanan sia kay Jacob.ⁿ Sang pagkatawo nila si Isaac nagaedad sing 60 ka tuig.

Si Esau Nagbaligya sang Iya mga Kinamatarong subong nga Panganay

27 Ang duha ka bata nagdaku, kag si Esau nanginsampaton nga mangangayam, kag permi lang sa latagon, pero si Jacob mahipos kag pirme lang sa balay.
28 Si Isaac nagpasulabi kay Esau kay naluyag sia magkaon sang iya sini pinangayaman, pero si Rebeca iya nagpasulabi kay Jacob.
29 Isa ka adlaw sang si Jacob nagalaga sing balatong, si Esau nag-abot halin sa iya pagpangayam.
30 Nagutom gid sia, gani nagsiling sia kay Jacob, “Daw mapatay na ako sa kagutom. Pakauna ako sinang mapula nga linaga.” (Amo ina ang kabangdanan nga ginhingalanan sia kay Edom.^o)
31 Pero si Jacob nagsabat, “Hatagan ko ikaw sini, kon ihatag mo sa akon ang imo mga kinamatarong subong nga panganay.”
32 Si Esau nagsiling, “Sigi, total daw mapatay na ako. Ano ang pulos sining mga kinamatarong ko sa akon?”
33 Si Jacob nagsabat, “Magsumpa ka anay nga ihatag mo ang imo mga kinamatarong sa akon.” Si Esau nagsumpa, kag ginhatag niya kay Jacob ang iya mga kinamatarong subong panganay.
34 Dayon ginhatagan ni Jacob si Esau sing tinapay kag linaga nga balatong. Nagkaon sia kag nag-inom kag naglakat. Amo lang yadto ang pagkabig niya sang iya mga kinamatarong subong panganay.

^mESAU: Ini nga ngalan napatuhoy sa Seir, ang lugar nga ginpuy-an sang mga kaliwat ni Esau; ang Seir kon ihambal sa Hebreo daw pareho sang Hebreo nga pulong nga kon sayuron "bulbolon.”

ⁿJACOB: Ini nga ngalan kon ihambal sa Hebreo daw pareho sang Hebreo nga mga pulong nga kon sayuron "tikod" kag “pagdaya."

^oEDOM: Ini nga ngalan kon ihambal sa Hebreo daw pareho sang Hebreo nga pulong nga kon sayuron “mapula."

GENESIS - Kapitulo 24 <<<   >>> GENESIS - Kapitulo 26