1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Si Abram Nagluwas kay Lot
1 Si Amrafel nga hari sang Babilonia, si Arioc nga hari sang Elasar, si Kedorlaomer nga hari sang Elam, kag si Tidal nga hari sang Goim
2 nagpakig-away batok kanday Bera nga hari sang Sodoma, Birsa nga hari sang Gomorra, Sinab nga hari sang Adma, Semeber nga hari sang Zeboim, kag sa hari sang Bela (ukon Zoar).
3 Ining lima ka mga hari nagdampiganay kag nagtingob sang ila kusog sa nalupyakan sang Sidim nga amo karon ang Patay nga Dagat.
4 Gingamhan sila ni Kedorlaomer sa sulod sang 12 ka tuig, pero sang ika-13 ka tuig nagbato sila sa iya.
5 Sang ika-14 ka tuig si Kedorlaomer kag ang iya mga kadampig nag-abot nga may mga soldado kag gindaog nila ang mga Refaimnon sa Astarot Carnaim, ang mga Zuzimnon sa Ham, ang mga Emimnon sa kapatagan sang Kiryataim,
6 kag ang mga Horhanon sa mga bukid sang Edom tubtob sa Elparan, nga yara sa higad sang desierto.
7 Sang ulihi nagbalik sila sa Cades (nga ginatawag sadto nga Enmispat), kag gin-agaw nila ang tanan nga kadutaan sang mga Amalecnon, kag ginlutos nila ang mga Amornon nga nagpuyo sa Hasason Tamar.
8 Dayon ang mga hari sang Sodoma, Gomorra, Adma, Zeboim, kag Bela nagtipon sang ila mga soldado para sa inaway sa nalupyakan sang Sidim kag nagpakig-away sila
9 batok kay Kedorlaomer nga hari sang Elam, kay Tidal nga hari sang Goim, kay Amrafel nga hari sang Babilonia, kag kay Arioc nga hari sang Elasar, lima ka hari batok sa apat.
10 Karon ang nalupyakan sang Sidim may madamo nga buho nga may aspalto, kag sang magpalagyo sa inaway ang mga hari sang Sodoma kag Gomorra nadagdag sila sa sini nga mga buho. Ang tatlo ka hari nagpalagyo pakadto sa kabukiran.
11 Ang apat ka hari nagkuha sang tanan nga makuha nila sa Sodoma kag Gomorra, lakip ang mga kalan-on, kag naglakat sila.
12 Gindala man nila si Lot kag ang iya tanan nga pagkabutang tungod kay nagapuyo sia sa Sodoma.
13 Pero may isa ka tawo nga nakapalagyo kag nagpanugid kay Abram nga Hebreo nahanungod sining natabo. Si Abram nagapuyo sadto malapit sa balaan nga mga kahoy ni Mamre nga Amornon nga utod ni Escol kag ni Aner. Ini sila mga kadampig ni Abram.
14 Pagkabati ni Abram nga ang iya hinablos ginbihag, gintawag niya sing tingob ang mga mainunongon nga mga tawo dira sa iya kampo nga may kadamuon nga 318, kag ginlagas nila ang mga hari tubtob sa Dan.
15 Didto gintunga niya ang iya mga tinawo sa duha ka grupo, kag gin-atake nila ang mga hari sang gab-i kag ginlutos nila sila. Ginlagas nila sila tubtob sa Hoba, sa aminhan sang Damasco,
16 kag nabawi nila ang tanan nga mga pagkabutang nga inagaw. Gindala man niya pabalik ang iya hinablos nga si Lot kag ang iya tanan nga mga pagkabutang, upod ang mga babayi kag ang iban nga mga binilanggo.
Si Melquisedec Nagbendisyon kay Abram
17 Sang pagbalik ni Abram sa iya pagdaog kay Kedorlaomer kag sa iban pa nga mga hari, ang hari sang Sodoma nagsugata sa iya sa nalupyakan sang Save (nga ginatawag man nga Kapatagan sang Hari).
18 Kag si Melquisedec nga hari sang Salem kag pari sang Labing Mataas nga Dios, nagdala sing kalan-on kag bino kay Abram,
19 kag ginbendisyunan niya kag nagsiling, “Kabay nga ang Labing Mataas nga Dios nga naghimo sang langit kag duta magbendisyon kay Abram.
20 Kabay nga pagdayawon ang Labing Mataas nga Dios nga nagpadaog sa imo batok sa imo mga kaaway.” Kag si Abram naghatag sa iya sang ikapulo nga bahin sang tanan nga iya nakuha.
21 Karon ang hari sang Sodoma nagsiling kay Abram, “Imo na lang ang mga butang nga napanguha mo, pero iuli sa akon ang tanan ko nga mga tinawo.”
22 Si Abram nagsabat, “Ginasumpa ko sa atubangan sang GINOO, ang Labing Mataas nga Dios, nga manunoga sang langit kag duta,
23 nga indi ako magkuha sing bisan ano sang imo pagkabutang, indi ako magkuha bisan hilo lang ukon higot sang sandalyas, agod nga indi ka makasiling nga ikaw ang nagpamanggad sa akon.
24 Indi ako magkuha bisan ano para sa akon kaugalingon. Ang akon lamang batunon amo ang gingamit na sang akon mga tinawo kag ang parti nga iya sang akon mga kadampig. Si Aner, si Escol, kag si Mamre magakuha sang ila parti.”
No comments:
Post a Comment