GENESIS - Kapitulo 36

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

Ang mga Kaliwat ni Esau

1 Amo ini ang mga kaliwat ni Esau nga ginatawag man Edom.
2 Si Esau nagpangasawa sing mga babayi nga Canaanhon nga amo ang masunod: si Ada nga bata ni Elon nga Hethanon, si Oholibama nga anak nga babayi ni Ana nga anak nga lalaki^r ni Zibeon nga Hebhanon,
3 kag si Basemat nga utod nga babayi ni Nebayot nga anak ni Ismael.
4 Si Ada nagbata kay Elifaz sa kay Esau. Si Basemat nagbata kay Reuel,
5 kag si Oholibama nagbata kay Jeus, kay Jalam, kag kay Core. Amo ini ang mga anak nga lalaki ni Esau sa Canaan.
6 Dayon gindala ni Esau ang iya mga asawa, mga anak nga lalaki kag mga anak nga babayi, kag ang tanan nga mga katapo sang iya panimalay, kag ang tanan niya nga mga baka kag mga pagkabutang nga iya natipon sa duta sang Canaan, kag nagpahilayo sia sa iya utod nga si Jacob pakadto sa iban nga duta.
7 Naghalin sia kay madamo na ang ila mga kabakahan kag indi na sila makaigo sa duta sa bagay nga indi na sila makapuyo sing tingob.
8 Gani si Esau nagpuyo sa kabakuloran sang Edom.
9 Amo ini ang mga kaliwat ni Esau nga amay sang mga Edomnon sa mga kabakuloran sang Edom.
10-13 Ang asawa ni Esau nga si Ada nagbata sing lalaki nga amo si Elifaz. Si Elifaz may lima ka mga anak nga lalaki nga amo sanday Teman, Omar, Zefo, Gatam kag Kenaz. Kag sa isa pa gid ka asawa ni Elifaz nga amo si Timna may anak sia nga lalaki nga si Amalec. Ang asawa ni Esau nga si Basemat nagbata sing lalaki nga amo si Reuel. Si Reuel may apat ka mga anak nga lalaki nga amo sanday Nahat, Zera, Sama, kag Miza.
14 Ang asawa ni Esau nga si Oholibama nga anak nga babayi ni Ana nga anak nga lalaki^s ni Zibeon nagbata sing tatlo ka lalaki nga amo sanday Jeus, Jalam kag Core.
15 Amo ini ang mga tribo nga mga kaliwat ni Esau. Ang panganay nga anak nga lalaki ni Esau nga si Elifaz amo ang amay sang masunod nga mga tribo: ang mga tribo ni Teman, ni Omar, ni Zefo, ni Kenaz,
16 ni Core, ni Gatam, kag ni Amalec. Ini sila tanan mga kaliwat sang asawa ni Esau nga si Ada.
17 Ang anak ni Esau nga si Reuel amo ang amay sang masunod nga mga tribo: ang mga tribo ni Nahat, ni Zera, ni Sama kag ni Miza. Ini sila tanan mga kaliwat sang asawa ni Esau nga si Basemat.
18 Ang masunod nga mga tribo kaliwat ni Esau sa iya asawa nga si Oholibama nga anak ni Ana: ang mga tribo ni Jeus, ni Jalam, kag ni Core.
19 Ini tanan nga mga tribo mga kaliwat ni Esau.

Ang mga Kaliwat ni Seir

20-21 Ang tumandok nga mga pumoluyo sang duta sang Edom nabahinbahin sa mga tribo nga ang ila mga katigulangan mga kaliwat ni Seir nga Horhanon nga amo ang masunod: si Lotan, si Sobal, si Zibeon, si Ana, si Dison, si Ezer, kag si Disan.
22 Si Lotan amo ang amay sang mga kabaranggayan ni Hori kag ni Heman. Si Lotan may utod nga babayi nga si Timna.
23 Si Sobal amo ang amay sang mga kabaranggayan ni Alvan, ni Manahat, ni Ebal, ni Sefo, kag ni Onam.
24 Si Zibeon may duha ka anak nga lalaki nga amo si Aya kag si Ana. (Amo ini nga Ana ang nakasapo sang tuboran sang mainit nga tubig sa desierto sang nagaatipan sia sang mga asno sang iya amay.)
25-26 Si Ana amo ang amay ni Dison nga amo ang ginhalinan sang mga kabaranggayan ni Hemdan, ni Esban, ni Etran, kag ni Ceran. Si Ana may anak man nga babayi nga si Oholibama.
27 Si Ezer amo ang ginhalinan sang mga kabaranggayan ni Bilhan, ni Zaavan, kag ni Acan.
28 Si Disan amo ang ginhalinan sang mga kabaranggayan ni Uz kag ni Aran.
29-30 Amo ini ang mga tribo nga Horhanon sa duta sang Edom: ang mga tribo ni Lotan, ni Sobal, ni Zibeon, ni Ana, ni Dison, ni Ezer, kag ni Disan.

Ang mga Hari sang Edom

(1 Cron. 1:43-54)

31-39 Sa wala pa sing mga hari ang Israel amo ini ang mga hari nga naggahom sa duta sang Edom sa sini nga paagisod: si Bela nga anak ni Beor, nga taga-Dinaba; si Jobab nga anak ni Zera, nga taga-Bozra; si Husam nga taga-Teman; si Hadad nga anak ni Bedad, nga taga-Avit (ginlutos niya ang mga Midianhon sa duta sang Moab); si Samla nga taga-Masreca; si Saul nga taga-Rehobot sa ubay sang Suba; si Baal Hanan nga anak ni Acbor; si Hadad nga taga-Pau (ang iya asawa si Mehetabel nga anak ni Matred kag apo ni Mezahab.)
40-43 Si Esau amo ang ginhalinan sang mga tribo nga Edomnon nga amo ang masunod: ang mga tribo ni Timna, ni Alva, ni Jetet, ni Oholibama, ni Ela, ni Pinon, ni Kenaz, ni Teman, ni Mibzar, ni Magdiel kag ni Iram. Ang duog nga ginpuy-an sini nga mga tribo ginhingalanan sa tagsa ka tribo.

^rAng iban nga dumaan nga pagbadbad Ialaki; sa Hebreo babayi; ukon apo nga babayi. 
^slalaki: tan-awa ang 36:2.

GENESIS - Kapitulo 35 <<<   >>> GENESIS - Kapitulo 37