1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Si Abraham kag si Abimelec
1 Si Abraham naghalin sa Mamre kag nagsaylo sa nabagatnan nga bahin sang Canaan, kag nagpuyo sa gin-utlan sang Cades kag Sur. Sang ulihi sang nagapuyo sila sa Gerar,
2 nagsiling sia nga si Sara nga iya asawa utod niya. Gani si Abimelec nga hari sang Gerar nagsugo nga dalhon si Sara iya.
3 Isa ka gab-i ang Dios nagpakita kay Abimelec sa damgo nga nagasiling, “Mapatay ka, tungod kay ginkuha mo ini nga babayi nga may bana na.”
4 Pero si Abimelec wala pa makatandog kay Sara, gani nagsiling sia, “Ginoo, wala ako sing sala! Patyon mo bala ako kag ang akon mga tinawo?
5 Si Abraham gid nagsiling nga utod niya si Sara kag si Sara man nagsiling nga utod niya si Abraham. Ginhimo ko ini nga may matinlo nga konsyensya, kag wala ako makasala.”
6 Ang Dios nagsabat paagi sa iya damgo, “Huo, nakahibalo ako nga may matinlo ka nga konsyensya, gani wala ko ikaw pagtugoti sa pagtandog sa iya agod indi ka makapakasala batok sa akon.
7 Pero karon, iuli ang babayi sa iya bana. Isa ka propeta ang iya bana kag magapangamuyo sia para sa imo agod indi ka mapatay. Pero kon indi mo sia pag-iuli, ginapaandaman ko ikaw nga mapatay ka, ikaw kag ang tanan mo nga mga tinawo.”
8 Aga pa gid sang madason nga adlaw, ginpatawag ni Abimelec ang tanan niya nga mga opisyales kag ginsugiran niya sila sang mga nagkalatabo, kag hinadlukan gid sila.
9 Dayon gintawag ni Abimelec si Abraham kag ginpamangkot, “Ano ining ginhimo mo sa amon? Ano ang sala nga nahimo ko sa imo nga gindalhan mo ako kag ang akon ginharian sini nga kalalat-an? Wala sing bisan sin-o nga dapat maghimo sining imo ginhimo sa akon.
10 Ngaa bala ginhimo mo ini?”
11 Si Abraham nagsabat, “Naghunahona ako nga wala gid sing bisan isa diri nga nagakahadlok sa Dios, gani nga pagapatyon nila ako agod makuha nila ang akon asawa.
12 Sa pagkamatuod utod ko sia nga babayi. Bata sia sang akon amay, pero indi sang akon iloy, kag ginpangasawa ko sia.
13 Gani sang ginpalakat ako sang Dios halin sa balay sang akon amay sa pagkadto sa iban nga mga duta, nagsiling ako sa iya, ‘Mapakita mo ang imo pag-unong sa akon sa imo pagsiling bisan diin kita magkadto nga utod mo ako.’”
14 Dayon gin-uli ni Abimelec si Sara kay Abraham, kag ginhatagan man niya si Abraham sing mga karnero, mga baka, kag mga ulipon.
15 Nagsiling sia kay Abraham, “Amo ini ang akon duta, magpuyo ka bisan diin nga luyag mo.”
16 Nagsiling sia kay Sara, “Hatagan ko ang imo utod sing 1,000 ka bilog nga pilak sa pagpamatuod sa mga upod ninyo nga wala kamo sing sala. Ang tanan makahibalo nga wala kamo makahimo sing sala.”
17-18 Tungod sang natabo kay Sara nga asawa ni Abraham, ginbuot sang GINOO nga indi na makapamata ang tanan nga mga babayi sa panimalay ni Abimelec. Gani si Abraham nagpangamuyo para kay Abimelec kag gin-ayo sia sang Dios. Gin-ayo man sang Dios ang asawa ni Abimelec kag ang iya mga ulipon nga babayi, agod nga makapamata sila.
No comments:
Post a Comment