1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Ang Pagtawag sang Dios kay Abram
1 Ang GINOO nagsiling kay Abram, “Halin ka sa imo kaugalingon nga duta, sa imo mga himata, kag sa puloy-an sang imo amay, kag magkadto ka sa isa ka duta nga igapakita ko sa imo.
2 Hatagan ko ikaw sing madamo nga mga kaliwat kag mangin-isa sila ka daku nga pungsod. Bendisyunan ko ikaw kag himuon ko nga manginbantog ang imo ngalan, agod nga paagi sa imo madamo ang makabaton sing mga kaayuhan.
3 Hatagan ko sing mga kaayuhan ang mga maayo sa imo. Pero pakamalauton ko ang mga nagapakamalaut sa imo. Ang tanan nga mga pungsod sa duta magapangayo sa akon nga bendisyunan ko subong sang akon pagbendisyon sa imo.”y
4 Sang si Abram nagaedad sing 75 ka tuig, naghalin sia sa Haran, suno sa ginsiling sang GINOO sa iya, kag si Lot nag-upod sa iya.
5 Gindala ni Abram ang iya asawa nga si Sarai, ang iya hinablos nga si Lot, ang tanan nga manggad kag ang tanan nga mga ulipon nga ila nakuha sa Haran, kag naglakat sila pakadto sa duta sang Canaan. Sang pag-abot nila sa Canaan,
6 si Abram naglatas sa duta tubtob nakalambot sia sa balaan nga kahoy sang More sa balaan nga duog sa Siquem. (Sa sadto nga panahon ang mga Canaanhon nagapuyo pa sa sadto nga duta.)
7 Ang GINOO nagpakita kay Abram kag nagsiling sa iya, “Amo ining duta nga ihatag ko sa imo mga kaliwat.” Dayon si Abram nagpatindog didto sing altar para sa GINOO nga nagpakita sa iya.
8 Sa tapos sini, nagsaylo sia sa bagatnan didto sa bukid sa sidlangan sang siyudad sang Betel kag didto nagpatindog sia sang iya tolda sa gin-utlan sang Betel kag Ai. Ang Betel sa nakatundan kag ang Ai sa sidlangan. Didto naghimo man sia sang altar kag nagsimba sa GINOO.
9 Sang ulihi si Abram nagpadayon sa pagsaylusaylo pakadto sa bagatnan sang Canaan.
Si Abram sa Egipto
10 Karon nag-abot ang tama nga tiggulotom sa sadto nga duta, gani si Abram nagpabagatnan pa gid tubtob sa Egipto, sa pagpuyo didto.
11 Sang nagahinampot na sila sa dulonan pakadto sa Egipto, nagsiling si Abram sa iya asawa, “Sarai, matahom ikaw nga babayi.
12 Kon makita ikaw sang mga Egiptohanon magasiling sila, ‘Asawa sia ni Abram,’ kag pagapatyon nila ako kag hilwayon nila ikaw.
13 Maayo pa nga singganon mo sila nga utod ko ikaw. Dayon tungod sa imo indi nila ako pagpatyon kag ayuhan nila ako.”
14 Sang makaabot na sila sa Egipto, nakita matuod sang mga Egiptohanon nga ang iya asawa matahom.
15 May mga opisyales sang hari nga nakakita sa iya kag ginsugiran nila ang hari kon daw ano katahom sa iya, gani gindala sia sa palasyo sang hari.
16 Tungod kay Sarai, gin-ayuhan sang hari si Abram kag ginhatagan sia sing mga karnero kag mga kanding, mga baka, mga asno, mga ulipon kag mga kamelyo.
17 Tungod kay ginkuha sang hari si Sarai, ang GINOO naghatag sing mga makangilidlis nga balatian sa hari kag sa iya mga ginsakpan sa palasyo.
18 Gani ginpatawag sang hari si Abram kag ginpamangkot, “Ano ining ginhimo mo sa akon? Ngaa wala ka magsiling sa akon nga asawa mo sia?
19 Ngaa nagsiling ka nga utod mo sia kag imo ginpakuha sia sa akon subong akon asawa! Yari ang imo asawa! Kuhaa sia kag maghalin kamo diri!”
20 Ang hari nagmando sa iya mga tinawo nga kuhaon si Abram, gani ginkuha nila si Abram kag ginpahalin sia sa sadto nga duta upod sang iya asawa kag sang tanan nila nga mga pagkabutang.
ymagapangayo . . . sa imo; ukon kag paagi sa imo pagabendisyunan ko ang tanan nga mga pungsod.
No comments:
Post a Comment