1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Ang Tore sang Babilonia
1 Sang una, ang mga tawo sa bug-os nga kalibutan may isa lang ka linggwahe kag pareho nga mga pulong ang ila ginagamit.2 Samtang nagapakadto sila sa sidlangan, nakalambot sila sa patag sang duta sang Babilonia kag didto nagpuyo sila.
3 Dayon nagsiling sila sa isa kag isa, “Dali kamo, mahimo kita sing mga tisa kag aton ini pagbahon.” Gani may tisa sila nga inugpatindog, kag aspalto sa pagpatapik sang mga tisa.
4 Dayon nagsiling sila, “Mahimo kita sing isa ka siyudad nga may tore nga lambot sa langit, agod manginbantog kita kag indi kita maglapta sa bug-os nga duta.”
5 Karon ang GINOO nagpanaog sa pagtan-aw sang siyudad kag sang tore nga ginpatindog sadto nga mga tawo.
6 Kag nagsiling sia, “Karon, ini nga mga tawo may pag-isa kag isa lang ang ila linggwahe. Pamuno pa lang ini sang ila pagahimuon. Sa indi madugay magahimo sila sang bisan ano nga luyag nila.
7 Dali, manaog kita didto kag tublagon ta ang ila panghambal agod nga indi sila mag-intiyendihanay.”
8 Gani ginpaalaplaag sila sang GINOO sa bug-os nga duta, kag nauntat ang ila paghimo sang siyudad.
9 Ang siyudad gintawag Babilonia,x kay didto gingumon sang GINOO ang linggwahe sang mga tawo, kag gikan didto ginpalapta niya sila sa bug-os nga kalibutan.
Ang mga Kaliwat ni Sem
10 Amo ini ang mga kaliwat ni Sem. Duha ka tuig sa tapos sang anaw, sang si Sem nagaedad sing 100 ka tuig, natawo ang iya anak nga lalaki nga si Arfaxad.11 Sa tapos sini, nagkabuhi sia sing 500 pa ka tuig kag may iban pa sia nga mga kabataan.
12 Sang si Arfaxad nagaedad na sing 35 ka tuig, natawo ang iya anak nga lalaki nga si Sela.
13 Sa tapos sini, nagkabuhi sia sing 403 pa ka tuig kag may iban pa sia nga mga kabataan.
14 Sang si Sela nagaedad na sing 30 ka tuig, natawo ang iya anak nga lalaki nga si Heber.
15 Sa tapos sini, nagkabuhi sia sing 403 pa ka tuig kag may iban pa sia nga mga kabataan.
16 Sang si Heber nagaedad sing 34 ka tuig, natawo ang iya anak nga lalaki nga si Peleg.
17 Sa tapos sini, nagkabuhi sia sing 430 pa ka tuig kag may iban pa sia nga mga kabataan.
18 Sang si Peleg nagaedad sing 30 ka tuig, natawo ang iya anak nga lalaki nga si Reu.
19 Sa tapos sini, nagkabuhi sia sing 209 pa ka tuig kag may iban pa sia nga mga kabataan.
20 Sang si Reu nagaedad sing 32 ka tuig, natawo ang iya anak nga lalaki nga si Serug.
21 Sa tapos sini, nagkabuhi sia sing 207 pa ka tuig kag may iban pa sia nga mga kabataan.
22 Sang si Serug nagaedad sing 30 ka tuig, natawo ang iya anak nga lalaki nga si Nahor.
23 Sa tapos sini, nagkabuhi sia sing 200 pa ka tuig kag may iban pa sia nga mga kabataan.
24 Sang si Nahor nagaedad sing 29 ka tuig, natawo ang iya anak nga lalaki nga si Tera.
25 Sa tapos sini, nagkabuhi sia sing 119 pa ka tuig kag may iban pa sia nga mga kabataan.
26 Sa tapos makaedad si Tera sing 70 ka tuig, natawo ang iya mga anak nga amo sanday Abram, Nahor, kag Haran.
27 Amo ini ang mga kaliwat ni Tera. Si Tera amay nanday Abram, Nahor, kag Haran. Si Haran amay ni Lot.
28 Si Haran napatay sa iya kaugalingon nga banwa sang Ur sakop sang Babilonia sang buhi pa ang iya amay.
29 Si Abram nagpangasawa kay Sarai, kag si Nahor nagpangasawa kay Milca, ang bata nga babayi ni Haran nga amay ni Isca.
30 Si Sarai wala makapamata.
31 Gindala ni Tera ang iya anak nga lalaki nga si Abram, ang iya apo nga lalaki nga si Lot nga anak nga lalaki ni Haran, kag ang iya umagad nga babayi nga si Sarai, nga asawa ni Abram, kag naghalin sila sa siyudad sang Ur sang Babilonia sa pagkadto sa duta sang Canaan. Naglakat sila tubtob sa Haran kag didto nagpuyo sila.
32 Didto napatay si Tera sang nagaedad sia sang 205 ka tuig.
xBABILONIA: Ini nga ngalan kon ihambal sa Hebreo daw pareho sang Hebreo nga pulong nga kon sayuron "tublag."
No comments:
Post a Comment