1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Si Jacob Nag-abot sa Puloy-an ni Laban
1 Si Jacob nagpadayon sang iya pagpanglakaton kag nagpadulong sa duta sang Sidlangan.2 Sa hinali nakita niya ang isa ka bubon sa latagon kag sa palibot sini may nagaluko nga tatlo ka panong sang mga karnero. Ang mga karnero ginapainom sa sini nga bubon ginatabunan sang daku nga bato.
3 Kon makatipon na gani ang tanan nga mga karnero didto, ginapaligid sang mga manugbantay ang bato gikan sa baba sang bubon kag ginahatagan sing tubig ang mga karnero. Pagkatapos, ginauli man nila ang bato.
4 Si Jacob nagpamangkot sa ila, “Mga abyan, tagadiin kamo?” Nagsabat sila, “Taga-Haran.”
5 Nagpamangkot sia, “Kilala bala ninyo si Laban nga bata ni Nahor?” Nagsabat sila, “Huo, kilala namon sia.”
6 Nagpamangkot sia, “Kamusta man sia?” Nagsabat sila, “Maayo man sia. Tan-awa, yara gani ang iya bata nga si Raquel nagapakari upod sa iya mga karnero.”
7 Si Jacob nagsiling, “Kay adlaw pa man kag indi pa tion sa pagpasulod sa toril sang mga karnero, ngaa indi na lang ninyo pagpaimnon sila kag pahalbon liwat?”
8 Nagsabat sila, “Indi namon mahimo ina tubtob ang tanan nga panong sang karnero makatipon kag mapaligid ang bato. Kon mapaligid na gani ang bato dayon mapainom na namon ang amon mga karnero.”
9 Sang nagahambal pa si Jacob sa ila, nag-abot si Raquel nga dala ang mga karnero ni tatay niya. Si Raquel amo ang nagaatipan sang mga karnero sang iya amay.
10 Sang pagkakita ni Jacob kay Raquel nga nagadala sang mga karnero sang iya tiyo nga si Laban, nagkadto sia sa bubon kag ginpaligid niya ang takop sini kag ginpainom ang mga karnero.
11 Ginhalukan niya dayon si Raquel kag naghibi sa kalipay.
12 Nagsiling sia kay Raquel, “Bata ako ni Rebeca, gani hinablos ako ni tatay mo.” Si Raquel nagdalagan kag ginsugiran ang iya amay,
13 kag pagkabati ni Laban sang sugid nahanungod kay Jacob nga iya hinablos, nagdalagan sia sa pagsugat sa iya, ginhakos niya sia kag ginhalukan, kag gindala sa iya balay. Dayon ginsugiran ni Jacob si Laban sang tanan nga nagkahanabo.
14 Si Laban nagsiling sa iya, “Huo, matuod gid nga ikaw kadugo ko.” Si Jacob nagpuyo didto sa sulod sang isa ka bulan.
Si Jacob Nagpangagad para kay Raquel kag kay Lea
15 Si Laban nagsiling kay Jacob, “Indi ka magpangabudlay para sa akon nga wala sing suhol tungod kay hinablos ko ikaw. Pila ang suhol nga luyag mo?”16 Si Laban may duha ka bata nga babayi. Ang magulang ginahingalanan kay Lea kag ang manghod kay Raquel.
17 Si Lea matahom sing mata, pero si Raquel maayo sing lawas kag may hitsura.
18 Si Jacob naluyag kay Raquel, gani nagsiling sia, “Magapangagad ako sa imo sing pito ka tuig kon ipaasawa mo sa akon si Raquel.”
19 Si Laban nagsiling, “Maayo pa nga ihatag ko sia sa imo sang sa iban nga lalaki. Mag-estar ka sa akon.”
20 Si Jacob nagpangagad sing pito ka tuig agod makuha niya si Raquel, kag ang kalawigon daw pareho lamang sang pila ka adlaw, tungod sang iya paghigugma sa iya.
21 Sang ulihi si Jacob nagsiling kay Laban, “Natapos na ang pito ka tuig, ihatag na sa akon ang imo bata agod mangin-asawa ko sia.”
22 Gani si Laban naghiwat sing punsyon sa kasal kag iya gin-agda ang tanan nga mga tawo sa sina nga duog.
23 Pero sina nga gab-i gindala niya kay Jacob si Lea sa baylo kay Raquel, kag si Jacob naghiusa kay Lea.
24 (Si Laban naghatag sang iya ulipon nga si Zilpa kay Lea.)
25 Sang pagkaaga nasapwan ni Jacob nga si Lea gali ang ginhatag sa iya. Gani nagsiling sia kay Laban, “Ngaa ginhimo mo ini sa akon? Nagpangagad ako para kay Raquel, ngaa gindayaan mo ako?”
26 Si Laban nagsabat, “Indi kinabatasan diri sa amon nga ang manghod magpamana sing una sa magulang.
27 Hulat lang tubtob matapos ang isa ka simana nga pagsaulog sang kasal, kag ihatag ko sa imo si Raquel, ina kon magpangagad ka sing pito pa gid ka tuig.”
28 Nagsugot si Jacob, kag sang matapos ang isa ka simana nga pagsaulog sang kasal, ginhatag ni Laban si Raquel kay Jacob nga mangin-iya asawa.
29 (Si Laban naghatag sang iya ulipon nga si Bilha sa pag-alagad kay Raquel nga iya bata.)
30 Gani si Jacob naghiusa man kay Raquel, kag ginhigugma niya sia sing labi kay Lea. Nagpangagad pa gid sia kay Laban sing pito ka tuig.
Ang mga Kabataan ni Jacob
31 Sang makita sang GINOO nga si Lea wala ginahigugma, ginbuot niya nga magpamata si Lea, pero si Raquel wala gid makapamata.32 Si Lea nagbusong kag nagbata sing lalaki. Nagsiling sia, “Ang GINOO nakakita sang akon kalisod, kag karon ang akon bana magahigugma sa akon.” Gani ginhingalanan niya sia kay Ruben.t
33 Nagbusong sia liwat kag nagbata sing isa na man ka lalaki. Nagsiling sia, “Ang GINOO naghatag sa akon sini nga anak, kay nakabati sia nga wala ako ginahigugma.” Gani ginhingalanan niya sia kay Simeon.u
34 Nagbusong sia liwat kag nagbata sing isa na man ka lalaki. Nagsiling sia, “Karon, ang akon bana manginmalapit gid sa akon, bangod nga nakapamata ako sa iya sing tatlo ka lalaki.” Gani ginhingalanan niya sia kay Levi.v
35 Nagbusong sia liwat kag nagbata sing isa na man ka lalaki. Nagsiling sia, “Karon dayawon ko ang GINOO.” Gani ginhingalanan niya sia kay Juda.w Dayon nag-untat sia sa pagpamata.
tRUBEN: Ini nga ngalan kon ihambal sa Hebreo daw pareho sang Hebreo nga pulong nga kon sayuron "tan-awa, isa ka lalaki" kag "nakakita sang akon kalisod.”
uSIMEON: Ini nga ngalan kon ihambal sa Hebreo daw pareho sang Hebreo nga pulong nga kon sayuron "nagapamati.”
vLEVI: Ini nga ngalan kon ihambal sa Hebreo daw pareho sang Hebreo nga pulong nga kon sayuron “manginmalapit."
wJUDA: Ini nga ngalan kon ihambal sa Hebreo daw pareho sang Hebreo nga pulong nga kon sayuron "pagdayaw.”
No comments:
Post a Comment