GENESIS - Kapitulo 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

1 Gintawag ni Isaac si Jacob kag sang matamyaw niya sia, ginsingganan sia, “Indi ka magpangasawa sang isa ka babayi nga taga-Canaan.
2 Maghimos ka kag magkadto sa Mesopotamia, sa puloy-an ni lolo mo Betuel, ang amay sang imo iloy. Pangasaw-a ang isa sang mga babayi didto, ang isa sang mga bata nga babayi sang imo tiyo nga si Laban.
3 Kabay nga ang Dios nga Makagagahom magbendisyon sang inyo pag-asawahay kag magahatag sa inyo sing madamo nga mga kabataan, agod mangin-amay ka sang madamo nga mga pungsod.
4 Kabay bendisyunan niya ikaw kag ang imo mga kaliwat subong sang iya pagbendisyon kay Abraham, kag kabay nga magapanag-iya ka sini nga duta nga imo ginapuy-an, nga ginhatag sang Dios kay Abraham.”
5 Ginpalakat ni Isaac si Jacob sa Mesopotamia, didto kay Laban, ang anak ni Betuel nga Arameanhon. Si Laban utod nga lalaki ni Rebeca, ang iloy ni Jacob kag ni Esau.

Si Esau Nagpangasawa liwat

6 Nahibaluan ni Esau nga ginbendisyunan ni Isaac si Jacob kag ginpakadto niya sia sa Mesopotamia sa pagpangasawa sing isa ka babayi didto. Nahibaluan man ni Esau nga sang pagbendisyon ni Isaac kay Jacob, ginsingganan niya sia nga indi magpangasawa sang isa ka babayi nga taga-Canaan.
7 Nahibaluan niya nga si Jacob nagtuman sa iya amay kag iloy, kag nagkadto sa Mesopotamia.
8 Didto nasat-uman ni Esau nga indi gali luyag sang iya amay ang mga babayi nga taga-Canaan.
9 Gani nagkadto sia kay Ismael nga anak ni Abraham, kag ginpangasawa niya si Mahalat nga anak nga babayi ni Ismael kag utod ni Nebayot.

Ang Damgo ni Jacob sa Betel

10 Naghalin si Jacob sa Beerseba kag nagpakadto sa Haran.
11 Sa pagtunod sang adlaw nag-abot sia sa isa ka duog kag nagdulog didto. Naghigda sia sa pagtulog kag nag-ulon sia sa isa ka bato.
12 Nagdamgo sia nga nakita niya ang isa ka hagdan nga nagalambot sa langit halin sa duta. Ang mga anghel sang Dios nagasaka kag nagapanaog sa sini nga hagdan.
13 Dayon nakita niya ang GINOO nga nagatindog sa luyo niya kag nagsiling, “Ako amo ang GINOO, ang Dios ni Abraham kag ni Isaac. Pagaihatag ko sa imo kag sa imo mga kaliwat ining duta nga imo ginahigdaan.
14 Ang imo mga kaliwat manginsubong kadamo sang yab-ok sa duta. Magalapad ang ila mga kadutaan pa aminhan, pa bagatnan, pa sidlangan kag pa nakatundan. Ang tanan nga mga pungsod sa duta magapangayo sa akon nga bendisyunan ko man sila subong sang akon pagbendisyon sa imo kag sa imo mga kaliwat.^r
15 Dumdoma nga magaupod ako sa imo kag magabantay sa imo bisan diin ikaw makadto, kag pabalikon ko ikaw sa sini nga duta. Indi ko ikaw pagbayaan tubtob mahimo ko ang tanan nga ginasiling ko sa imo.”
16 Si Jacob nagmata kag nagsiling, “Matuod gid, ang GINOO yari diri. Yari sia sa sini nga duog, kag wala ko ini mahibaloi.”
17 Hinadlukan sia kag nagsiling, “Daw ano ka makahaladlok ini nga duog! Sa walay duhadoha balay ini sang Dios kag puwertahan sang langit.”
18 Si Jacob nagbangon sing aga pa gid. Ginkuha niya ang bato nga iya gin-unlan kag ginpatindog subong isa ka haligi nga handumanan. Dayon ginbuboan niya ini sang lana kag ginhalad ini sa Dios.
19 Ginhingalanan niya ang duog Betel.^s (Luz ang ngalan sina nga banwa sang una.)
20 Dayon si Jacob nagsumpa sa GINOO nga Dios, “Kon mag-upod ka sa akon kag magbantay sa akon pagpanglakaton, kag maghatag sa akon sing pagkaon kag mga bayu,
21 kag kon makabalik ako nga indi maano sa puloy-an sang akon amay, ikaw mangin-akon Dios.
22 Ining bato nga akon ginpatindog subong isa ka haligi nga handumanan mangin-imo puloy-an, kag pagaihatag ko sa imo ang ikapulo sang tanan nga igahatag mo sa akon.”

^rAng tanan . . . mga kaliwat; ukon kag paagi sa imo kag sa imo mga kaliwat pagabendisyunan ko ang mga pungsod.
^sBETEL: Ini nga ngalan sa Hebreo nagakahulogan "balay sang Dios.”

GENESIS - Kapitulo 27 <<<   >>> GENESIS - Kapitulo 29