GENESIS - Kapitulo 40

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

Si Jose Nagsaysay sang Kahulogan sang mga Damgo sang mga Binilanggo

1 Sang ulihi ang manugtagay sang bino sang hari sang Egipto kag ang iya pangulo nga manugloto sang tinapay nakasala sa ila agalon.
2 Ang hari naakig gid sa sining duha niya ka opisyales,
3 gani, ginbilanggo niya sila sa balay sang kapitan sang gwardya, sa diin si Jose ginbilanggo.
4 Ang kapitan sang mga gwardya nagsugo kay Jose sa pag-alagad sa ila. Nagdugay sila sa bilangguan.
5 Isa ka gab-i, didto sa bilangguan, ang manugtagay sang bino sang hari sang Egipto kag ang iya pangulo nga manugloto sang tinapay nagdamgo. Ang tagsa sa ila nagdamgo kag ang tagsa nila ka damgo may kahulogan.
6 Pagkadto ni Jose sa ila sang pagkaaga, nakita niya nga natublag sila.
7 Ginpamangkot niya sila, “Ngaa daw kasubo gid sa inyo karon nga adlaw?”
8 Nagsabat sila, “Kada isa sa amon may damgo, kag wala sing isa diri nga makasaysay sang kahulogan sini.” Si Jose nagsiling, “Ang Dios amo ang nagahatag sang mga kahulogan. Kon mahimo sugiri ninyo ako sang inyo damgo.”
9 Gani, ang manugtagay sang bino nagsiling, “Sa akon damgo may balagon sang ubas sa atubangan ko
10 nga may tatlo ka mga sanga. Sang pagpanalingsing sini, nagpamulak dayon, kag ang bunga sang ubas naluto.
11 Nagauyat ako sang kupa sang hari, gani, ginkuha ko ang mga ubas kag ginpuga ini sa kupa, kag ginhatag ko ini sa iya.”
12 Si Jose nagsiling, “Amo ini ang kahulogan: ang tatlo ka mga sanga amo ang tatlo ka adlaw.
13 Sa tapos ang tatlo ka adlaw pagwaon ka sang hari, patawaron niya ikaw, kag pabalikon sa imo palangakuan. Magatagay ka sing bino sa hari subong sang imo ginahimo sang una sang nagaalagad pa ikaw sa iya.
14 Pero dumdoma man ako kon yara ka na sa kaayuhan, kag kon mahimo buligi man ako paagi sa paghinambit sa akon sa hari agod makagowa man ako sa sini nga bilangguan.
15 Kay sa pagkamatuod, paagi sa pakusog gindala ako diri gikan sa duta sang mga Hebreo, kag bisan diri wala ako sing may nahimo nga malain nga manginkabangdanan sang ila pagbilanggo sa akon.”
16 Sang pagkakita sang pangulo nga manugloto sing tinapay nga ang kahulogan nga ginhatag sa damgo maayo, nagsiling sia kay Jose, “Ako nagdamgo man. May tatlo ka alat nga sulodlan sang tinapay nga ginatus-on ko.
17 Sa naibabaw gid nga alat, yara ang tanan nga sari sang naluto nga pagkaon para sa hari, pero ginkaon ini sang mga pispis.”
18 Si Jose nagsabat, “Amo ini ang kahulogan sang damgo: ang tatlo ka alat amo ang tatlo ka adlaw.
19 Sa tapos ang tatlo ka adlaw pagwaon ka sang hari kag pugotan sing ulo. Dayon bitayon niya ang imo bangkay sa kahoy, kag ang mga pispis magakaon sang imo unod.”
20 Sa ikatlo ka adlaw, nga amo ang kaadlawan sang hari, naghatag sia sing punsyon para sa iya mga opisyales. Ginpagowa niya ang iya manugtagay sang bino kag ang pangulo sang manugloto sang tinapay kag ginpaatubang niya sa iya mga opisyales.
21 Ginpabalik niya ang manugtagay sang bino sa iya una nga palangakuan,
22 pero ginpabitay niya ang pangulo sang manugloto sang tinapay. Ang tanan nga natabo suno gid sa ginsiling ni Jose.
23 Pero ang manugtagay sang bino wala gid makadumdom kay Jose, kundi nalipatan gid niya sia.

GENESIS - Kapitulo 39 <<<   >>> GENESIS - Kapitulo 41