GENESIS - Kapitulo 4

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

Si Cain kag si Abel

1 Karon si Adam naghiusa sa iya asawa, kag nagbusong sia. Nagbata sia sing lalaki kag nagsiling sia, “Nakabaton ako sing anak nga lalaki sa bulig sang GINOO.” Gani ginhingalanan niya ang iya bata kay Cain.^o

2 Sang ulihi nagbata sia kay Abel nga isa man ka lalaki. Si Abel nanginmanugbantay sang mga karnero, pero si Cain iya mangungoma.

3 Sang wala madugay, si Cain nagkuha sang isa ka bahin sang iya patubas kag ginhalad ini sa GINOO.

4 Dayon si Abel nagdala sang panganay sang isa sang iya mga hayop, gin-ihaw niya ini, kag ang pinakamaayo nga bahin ginhatag niya nga halad. Ang GINOO nalipay gid kay Abel kag sa iya halad,

5 pero wala niya pagbatuna si Cain kag ang iya halad. Si Cain nagsingkal sa kaakig kag nagpalamula ang iya guya.

6 Dayon ang GINOO nagsiling kay Cain, “Ngaa naakig ka? Ngaa nagakusmod ka?

"Ngaa nagakusmod ka?" (4:6)

7 Kon maayo ang ginhimo mo, kuntani manayanaya ang imo guya.^p Pero tungod nga malain ang ginhimo mo, ang sala pareho sang mabangis nga sapat nga nagahukmong sa imo puwertahan. Maluyag ini sa paggahom sa imo, pero kinahanglan dag-on mo sia.”

8 Dayon si Cain nagsiling sa iya utod nga si Abel, “Dali mamasyar kita.” Sang didto na sila sa latagon, ginpatay ni Cain ang iya utod.

9 Ang GINOO nagpamangkot kay Cain, “Diin ang imo utod nga si Abel?” Nagsabat sia, “Ambot! Ako bala ang manugbantay sang akon utod?”

10 Karon ang GINOO nagsiling, “Ngaa ginhimo mo ining makasiligni nga butang? Ang dugo sang imo utod nagasinggit sa akon gikan sa duta subong sang isa ka tingog nga nagapangayo sang pagtimalos.

11 Kag karon ginapakamalaut ka kag pagatabugon ka halin sa sini nga duta nga nagbuka sang iya baba sa pagbaton sang dugo sang imo utod gikan sa imo kamot.

12 Kon magpananom ikaw, ang duta indi magpatubas sing bisan ano para sa imo, kag mangintiyugtiyog ikaw nga wala sing puloy-an sa duta.”

13 Dayon si Cain nagsiling sa Ginoo, “Tama kabug-at ini nga silot.

14 Karon ginatabog mo ako halin sa sini nga duta kag halin sa imo atubangan. Mangintiyugtiyog ako nga wala sing puloy-an sa sini nga duta, kag ang bisan sin-o nga makakita sa akon magapatay sa akon.”

15 Pero ang GINOO nagsabat sa iya, “Indi, kay kon may magpatay sa imo, pito ka kabuhi ang itumbas sa imo kabuhi.” Gani ang GINOO nagbutang sing tanda kay Cain sa pagpaandam sa bisan kay sin-o nga masugata niya nga indi sia pagpatyon.

16 Kag si Cain nagpalayo sa GINOO kag nagpuyo sa nasidlangan sang Eden sa duta nga gintawag “Tiyugtiyog.”

Ang mga Kaliwat ni Cain

17 Si Cain kag ang iya asawa nagbata sing lalaki kag ginhingalanan nila ang bata kay Enoc. Sang ulihi si Cain nagpasad sing isa ka siyudad kag ginhingalanan niya ini sang ngalan sang iya bata nga si Enoc.

18 Si Enoc may bata nga lalaki nga ginhingalanan kay Irad. Si Irad amay ni Mehujael, si Mehujael amay ni Metusael; kag si Metusael amay ni Lamec.

19 Si Lamec nagpangasawa sing duha ka babayi nga amo sanday Ada kag Sila.

20 Si Ada nagbata kay Jabal nga amo ang ginhalinan sang mga manugbantay sang mga hayop kag nagapuyo sa mga tolda.

21 Ang iya utod nga lalaki amo si Jubal nga amo ang ginhalinan sang tanan nga mga musikero nga nagatukar sang arpa kag plawta.

22 Si Sila nagbata kay Tubal Cain nga ginhalinan sang tanan nga manugsala^q sang salsalon kag sang saway. Ang utod nga babayi ni Tubal Cain amo si Naama.

23 Si Lamec nagsiling sa iya mga asawa: “Ada kag Sila nga akon mga asawa, pamatii ninyo ako. Nakapatay ako sing pamatan-on nga lalaki kay ginsakit niya ako.
24 Kon may magpatay kay Cain pagatumbasan sing pito ka kabuhi; ang bisan sin-o nga magpatay sa akon pagatumbasan sing kapituan kag pito ka pilo.”

Si Set kag si Enos

25 Si Adam kag ang iya asawa nagbata liwat sing lalaki. Si Eva nagsiling, “Ang Dios naghatag sa akon sing isa ka anak nga lalaki sa pagtal-os kay Abel nga ginpatay ni Cain.” Gani ginhingalanan niya sia kay Set.^r

26 Si Set may anak nga lalaki nga ginhingalanan niya kay Enos. Amo yadto ang tion nga ang mga tawo nagsugod sa pagmitlang sang ngalan sang Ginoo sa ila pagsimba.

^oCAIN: Ini nga ngalan kon ihambal sa Hebreo daw pareho sang Hebreo nga pulong nga kon sayuron "nakuha.”
^pkuntani manayanaya ang imo guya; ukon kuntani ginbaton ko ang imo halad.
^qAng isa ka dumaan nga pagbadbad ginhalinan sang tanan nga manugsalsal; sa Hebreo manugsalsal sang tanan nga sahi sang galamiton.
^rSET: Ini nga ngalan kon ihambal sa Hebreo daw pareho sang Hebreo nga pulong nga kon sayuron "ginhatag."

GENESIS - Kapitulo 3 <<<   >>> GENESIS - Kapitulo 5