1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Si Jacob Nagpalagyo kay Laban
1 Si Jacob nakabati nga ang mga anak nga lalaki ni Laban nagasiling, “Ginkuha ni Jacob ang tanan nga mga pagkabutang sang aton amay. Ang iya manggad nagikan sa pagkabutang sang aton amay.”2 Nakita man ni Jacob nga ang pagkabig sa iya ni Laban karon lain na gid sang sa una.
3 Dayon ang GINOO nagsiling sa iya, “Magbalik ka sa duta sang imo mga ginikanan kag sa imo mga himata kag ako manginkaupod mo.”
4 Gani ginpakadtuan ni Jacob si Raquel kag si Lea nga magkadto sila sa latagon sa diin yara ang iya mga hayop.
5 Nagsiling sia sa ila, “Natalupangdan ko nga ang pagkabig sang inyo amay sa akon lain na gid sang sa una. Pero wala ako pagpabay-i ang Dios sang akon amay nagaupod sa akon gihapon.
6 Kamo nga duha nakahibalo gid nga nagpangabudlay ako para sa inyo amay sa bug-os ko nga kusog.
7 Pero ginadayaan niya ako, kag kanapulo gid niya gin-ilis-ilisan ang akon suhol. Pero ang Dios wala magtugot nga mahalitan niya ako.
8 Kon magsiling gani sia, ‘Ang mga may pintukpintok manginsuhol mo,’ ang tanan nga mga hayop nagbata sing may pintukpintok. Kon magsiling sia, ‘Ang may mga guraygoray manginsuhol mo,’ ang tanan nga mga hayop nagbata sing may mga guraygoray.
9 Ang Dios nagkuha sang mga kahayupan sang inyo amay kag ginhatag sila sa akon.”
10 “Sa tion sang pagpahigal sang mga hayop, nagdamgo ako, kag nakita ko nga ang lalaki nga mga kanding nga nagapangasta may guraygoray, may pintukpintok kag kambang.
11 Ang anghel sang Dios nagtawag sa akon paagi sa damgo, ‘Jacob.’ Nagsabat ako, ‘Yari ako.’
12 Nagsiling sia, ‘Tan-awa, ang tanan nga mga kanding nga lalaki nga nagapangasta may guraygoray, may pintukpintok kag kambang. Ginahimo ko ini kay nakita ko ang tanan nga ginhimo sa imo ni Laban.
13 Ako ang Dios nga nagpakita sa imo sa Betel, sa diin ginhibuan mo sing lana kag ginhalad ang handumanan nga bato, kag sa diin nagsumpa ka. Karon maghimos ka kag maghalin sa sini nga duta kag magbalik sa imo duta nga natawuhan.’”
14 Si Raquel kag si Lea nagsabat kay Jacob, “Wala na sing nabilin nga mapanubli namon sa amon amay.
15 Wala bala niya kami ginakabig subong mga dumoluong? Ginbaligya niya kami, kag karon naubos na niya gasto ang bili namon.
16 Ini tanan nga mga manggad nga ginkuha sang Dios sa amon amay amon ina kag ila sang amon mga anak. Karon, himoa ang tanan nga ginsiling sa imo sang Dios.”
17-18 Gani si Jacob naghimos agod magbalik sa iya amay sa duta sang Canaan. Ginpasakay niya ang iya mga kabataan kag mga asawa sa mga kamelyo, kag ginpauna niya ang iya mga hayop sa iya, upod ang tanan nga pagkabutang nga iya natipon sa Mesopotamia.
19 Si Laban naglakat sa paggunting sang iya mga karnero, kag sang wala dira sia, ginkawat ni Raquel ang mga dios sa ila balay ng iya ni tatay niya.
20 Si Jacob naglimbong kay Laban paagi sa iya paglakat nga wala makahibalo si Laban.
21 Gindala ni Jacob ang iya tanan nga pagkabutang kag dalidali nga naglakat. Nagtabok sia sa Suba sang Eufrates kag nagpadulong sa bukid sang Galaad.
Ginlagas ni Laban si Jacob
22 Sang makaligad ang tatlo ka adlaw ginsugiran si Laban nga si Jacob nagpalagyo.23 Gindala niya ang iya mga tinawo kag ginlagas niya si Jacob sa sulod sang pito ka adlaw tubtob nalambot niya sia sa bukid sang Galaad.
24 Sa isa ka damgo sina nga gab-i ang Dios nagpakita kay Laban kag nagpaandam sa iya, “Indi mo pagpahugon si Jacob.”
25 Nalambot ni Laban si Jacob nga nagdulog kag naghimo sang iya kampamento sa kabakuloran. Si Laban naghimo sang iya kampamento sa bukid sang Galaad.
26 Si Laban nagsiling kay Jacob, “Ngaa ginlimbungan mo ako kag gindala mo ang akon mga bata nga babayi pareho sang mga babayi nga nadakpan sa inaway?
27 Ngaa nga ginlimbungan mo ako kag naglakat ka nga wala gid magsiling sa akon? Kon ginpahibalo mo ako, kuntani ginpalakat ko ikaw nga may kinasadya kag pagkinanta sa musika sang tambor kag arpa.
28 Wala mo gid ako pagpahaluka sa akon mga apo kag sa akon mga bata sang paglakat nila. Daw ano nga binuang ang ginhimo mo!
29 Makasarang ako sa paghalit sa imo, pero kagab-i ang Dios sang imo amay nagpaandam sa akon nga nagasiling, ‘Indi mo pagpahugon si Jacob.’
30 Nakahibalo ako nga nahidlaw ka na gid sa panimalay sang imo amay, amo ina nga naglakat ka, pero ngaa ginkawat mo ang akon mga dios?”
31 Si Jacob nagsabat, “Nahadlok ako, kay naghunahona ako nga bawion mo sa akon ang imo mga anak.
32 Pero kon makita mo sa bisan kay sin-o diri ang imo mga dios, pagapatyon sia. Sa atubangan sang aton mga tinawo subong mga saksi, pangitaa ang mga butang nga imo kag kuhaon mo.” Si Jacob wala makahibalo nga ginkawat ni Raquel ang mga dios ni Laban.
33 Si Laban nagkadto sa tolda ni Jacob, sa tolda ni Lea, kag sa tolda sang duha ka suloguon nga babayi, pero wala niya makita ang iya mga dios. Dayon nagkadto sia sa tolda ni Raquel.
34 Si Raquel nagkuha sang mga dios kag ginbutang niya sa siyasiya sang kamelyo kag ginpungkoan ini. Si Laban nag-usisa sang bug-os nga tolda, pero wala gid niya makita.
35 Si Raquel nagsiling sa iya amay, “Tatay, indi ka lang magkaakig kon indi ako makatindog sa imo atubangan, kay yari ang pamulanon ko.” Si Laban nagpangita sang iya mga dios, pero wala niya makita ini.
36 Dayon si Jacob nanginit kag naghambal nga may kaakig kay Laban, “Ano bala ang akon sala? Ano nga kasugoan ang akon ginlapas nga ginlagas mo ako nga may kaakig?
37 Karon nga nausisa mo ang tanan ko nga mga pagkabutang, ano bala nga pagkabutang ang nakita mo nga imo? Ibutang diri sa atubangan sang imo kag sang akon mga tinawo kag sila ang pahukma kon sin-o sa aton ang matarong.
38 Sa sulod sang 20 ka tuig nga nag-estar ako sa imo, ang imo mga karnero kag mga kanding wala gid mahar-asi kag wala gid ako makaihaw sang imo lalaki nga karnero.
39 Kon ang isa ka karnero mapatay sang talunon nga sapat wala ko ina ginaisip sa imo parti, kundi ginaisip ko ina nga akon parti. Ang ginakawat sa adlaw ukon sa gab-i man ginapabayran mo sa akon.
40 Sa madamo nga tion nag-antos ako sang tagiti sang init kon adlaw kag sang katugnaw kon gab-i nga wala tulog.
41 Amo ini ang inagihan ko sa sulod sang 20 ka tuig sang akon pag-estar sa imo. Nagpangagad ako sa imo sa sulod sang 14 ka tuig para sa duha mo ka anak nga babayi kag nag-alagad ako sing anom pa ka tuig para sa imo mga hayop kag kapulo mo liwatliwaton ang akon suhol.
42 Kon ang Dios sang akon amay, ang Dios ni Abraham, ang Dios nga ginsimba ni Isaac wala mag-upod sa akon, kuntani ginpalakat mo ako nga wala gid sing dala. Pero ang Dios nakakita sang akon pagpangabudlay kag pag-antos, kag kagab-i ginsabdong niya ikaw.”
Ang Kasugtanan ni Jacob kag ni Laban
43 Si Laban nagsabat kay Jacob, “Ini nga mga babayi anak ko, ang ila mga kabataan akon, kag ini nga mga hayop akon. Kon sa bagay, ang tanan nga gintan-aw mo akon. Pero karon, ano ang mahimo ko sa akon mga anak kag sa ila mga kabataan?44 Dali mahimo kita sing kasugtanan, kag magtumpok kita sang mga bato sa pagtanda sang aton kasugtanan.”
45 Gani si Jacob nagpatindog sang isa ka daku nga bato nga handumanan.
46 Ginsugo niya ang iya mga tinawo sa pagtipon sang mga bato kag sa pagtumpok sini. Dayon nagkaon sila sa luyo sang tinumpok nga bato.
47 Ginhingalanan ini ni Laban Jegar Sahaduta,g pero ginhingalanan ini ni Jacob Galeed.h
48 Si Laban nagsiling kay Jacob, “Ining tinumpok nga bato magapahanumdom sa aton nga duha.” Amo ini ang kabangdanan kon ngaa ang duog ginhingalanan Galeed.
49 Si Laban nagsiling man, “Kabay nga ang GINOO magbantay sa aton samtang nagahilayuay kita.” Gani ang duog ginhingalanan Mispa.i
50 Si Laban nagsiling pa gid, “Kon pintasan mo ang akon mga anak nga babayi, ukon magpangasawa ka sang iban nga mga babayi, bisan nga indi ako makahibalo sini, pero dumdoma nga ang Dios nga nagatan-aw sa aton.”
51 Yari ang mga bato nga gintumpok ko sa tunga naton, kag yari ang bato nga handumanan.
52 Ining tinumpok nga mga bato kag ining bato nga handumanan amo ang magapahanumdom sa aton. Indi ako maglabang sa sining tinumpok nga mga bato sa paggubat sa imo, kag indi ka maglabang sa sining bato nga handumanan sa paggubat sa akon.
53 Ang Dios ni Abraham kag ang Dios ni Nahorj magahukom sa tunga naton.” Dayon si Jacob nagsumpa sa ngalan sang Dios nga ginsimba sang iya amay nga si Isaac.
54 Nagpatay sia sing isa ka sapat kag ginhalad niya ini sa bukid, kag gin-agda niya ang iya mga tinawo sa pagkaon. Sa tapos sila makakaon nagtulog sila didto sa bukid.
55 Aga pa gid sang madason nga adlaw, ginhalukan ni Laban ang iya mga apo kag mga anak sa pagpaalam sa ila, kag naglakat sia pauli.
gJEGAR SAHADUTA: Ini nga ngalan sa hambal nga Aramiko nga kon sayuron "tinumpok nga magapahanumdom sa aton.”
hGALEED: Ini nga ngalan sa hambal nga Hebreo nga kon sayuron "tinumpok nga magapahanumdom sa aton.''
iMISPA: Ini nga ngalan kon ihambal sa Hebreo daw pareho sang Hebreo nga pulong nga kon sayuron "balantayan nga tore."
jABRAHAM . . . NAHOR: Si Abraham lolo ni Jacob kag si Nahor amay ni Laban.
No comments:
Post a Comment