1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
■■■■■
Si Jose kag ang Asawa ni Potifar
1 Si Jose gindala sa Egipto sang mga Ishmaelinhon kag didto ginbaligya sia kay Potifar, ang isa sang mga opisyales sang hari nga kapitan sang mga gwardya sa palasyo.2 Ang GINOO nag-ubay kay Jose kag nagpauswag sa iya. Nagpuyo sia sa balay sang iya agalon nga Egiptohanon.
3 Nakita sang iya agalon nga ginaubayan gid ang GINOO kaupod niya kag nagpauswag sang tanan nga iya ginhimo.
4 Si Potifar nalipay sang pag-alagad ni Jose sa iya. Gani ginhimo niya sia nga manugdumala sang iya balay kag sang tanan niya nga pagkabutang.
5 Sugod sadto, ang GINOO nagpauswag sang panimalay ni Potifar tungod kay Jose. Ang GINOO nagpauswag sang tanan nga yara sa iya balay kag sang iya mga uma.
6 Si Potifar nagtugyan sang bug-os niya nga pagkabutang sa pagdumala ni Jose, kag wala na sia magpalibog sang bisan ano, luas sang iya pagkaon. Si Jose mabukod sing lawas kag guwapo.
7 Sang wala madugay ang asawa ni Potifar naluyag kay Jose kag ginhagad niya si Jose sa paghulid sa iya.
8 Pero si Jose nagpangindi kag nagsiling sa iya, “Dumdoma bala, ang akon agalon wala nagapalibog sang bisan ano diri sa balay, kag yari ako. Ginpadumala niya ako sang tanan niya nga mga pagkabutang.
9 May awtoridad ako sa sini nga balay nga pareho sang sa iya, kag wala sia sing bisan ano nga gindumili sa akon, luas lang sa imo nga iya asawa. Ano karon ang pagkahimo ko sining malaut nga butang, kag magpakasala sa Dios?”
10 Bisan ginahagad niya si Jose adlaw-adlaw, pero si Jose wala magsapak sa iya kag wala maghiusa sa iya.
11 Pero, isa ka adlaw, sang si Jose nagsulod sa balay sa paghimo sang iya mga bulohaton, wala gid sing iban nga tawo didto.
12 Ginbuyotan sang asawa ni Potifar ang bayu ni Jose kag nagsiling, “Hulid ka sa akon.” Pero si Jose nagpanginpadlos kag nagdalagan pa gwa samtang ang iya bayu nabilin sa kamot sang asawa ni Potifar.
13 Sang pagkakita sang asawa ni Potifar nga nabilin ang bayu ni Jose kag nagdalagan sia pa gwa sa balay,
14 gintawag niya ang mga ulipon sa iya balay kag nagsiling, “Tan-awa ninyo ini! Ining Hebreo nga gindala sang akon bana sa balay nagapakahuya sa aton. Nagsulod sia sa akon kuwarto kag nagsiling sa akon nga mahulid sia, pero nagsiyagit ako sing tudo gid.
15 Sang pagkabati niya nga nagsiyagit ako, ginbayaan niya sa luyo nakon ang iya bayu kag nagdalagan pa gwa.”
16 Gintago niya ang bayu ni Jose tubtob ang agalon ni Jose nakapauli.
17 Dayon amo man ini ang ginsugid niya sa iya bana, “Inang ulipon nga Hebreo nga gindala mo diri nagsulod sa akon kuwarto sa pagpakahuya sa akon.
18 Pero sang magsiyagit ako, nagdalagan sia sa gwa kag nabilin ang iya bayu sa luyo nakon.”
19 Ang agalon ni Jose nagsilabo sa kaakig sang pagkabati niya sa iya asawa nga nagasiling, “Amo ini ang ginhimo sang imo ulipon sa akon.”
20 Ginpadakop niya si Jose kag ginbutang sa bilangguan sa diin ang mga binilanggo sang hari ginbilanggo, kag didto sia nagdugay.
21 Pero ang GINOO nag-upod kay Jose, kag nagmaluloy-on sa iya, gani ang manugbantay sang bilangguan maayo sa iya.
22 Ginhimo niya si Jose nga manugdumala sang tanan nga mga binilanggo. Sia ang nagdumala sang tanan nga ginahimo sa bilangguan.
23 Ang manugbantay sang bilangguan wala na nagaatipan sang mga butang nga gintugyan kay Jose, kay ang GINOO nag-upod kay Jose, kag nagpauswag sang tanan niya nga ginhimo.
No comments:
Post a Comment