"Maghatag - kag Magaangkon ka sang Manggad didto sa Langit"

Liturhiya sang Pulong

(Domingo, Oktubre 14, 2018)

1. Ang Pagbasa gikan sa Libro sang:

Kaalam ni Salomon 7:7-11

Tungod kay tawo lamang ako, nagpangamuyo ako kag ginbugayan ako sing paghangop. Ang espiritu sang Kaalam nag-abot sa akon. Ginahangad ko sia labaw pa sang sa trono kag korona. Ang manggad manginwala kon ipaanggid sa Kaalam. Ang malahalon nga mga alahas indi makatupong sa iya; ang tanan nga bulawan sa kalibutan mangin-isa ka hakop nga balas kag ang mga pilak manginkasubong sa lunang kon ipaanggid ini sila sa Kaalam. Ginahangad ko ini sia labaw sang sa maayo nga lawas kag kaambong. Ang iya kapawa wala nagapiraw kag ginapasulabi ko ini sang sa iban nga kasanag. Sang mag-abot sa akon ang Kaalam, ang tanan nga kaayuhan nag-upod sa iya. Nagdala sia sa akon dili masaysay nga manggad.

Salmo sa Pagsabat:

Mga Salmo 90:12-13, 14-15, 16-17

(S) O Ginoo, pun-a kami sang Imo mapinadayunon nga gugma, kag magakalipay kami. 
Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o Ikaw malugpayan? Kaluoyi man ang Imo mga alagad! (S)
Pun-a kami sa tagsa ka aga sang Imo mapinadayunon nga gugma agod nga magkanta kag magkalipay kami sa bug-os namon nga kabuhi. Hatagi kami karon sing kalipay subong sang ginhatag Mo sa amon nga kalisod, sa sadtong mga tinuig nga may palaligban kami. (S)
Ipakita sa amon nga Imo mga alagad ang Imo gamhanan nga mga buhat; sa amon mga kaliwat ipakita ang Imo mahimayaon nga gahom. Ginoo nga amon Dios, kabay nga bendisyunan Mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo! (S)

2. Ang Pagbasa gikan sa Sulat sa mga:

Hebreo 4:12-13

Kay ang pulong sang Dios buhi kag gamhanan, kag matalom pa sa espada nga duha sing sulab. Nagadulot ini tubtob sa gin-utlan sang kalag kag espiritu, kag sa ginkitaan sang mga lutalotahan kag utok sa tul-an. Ini nagatungkad sang mga panghunahona kag mga handom sang tagipusoon sang mga tawo. Wala gid sing bisan ano nga sarang matago sa Dios. Ang tanan nga butang hayag kag bukas sa iya atubangan, kag sa iya kita tanan magahatag sing husay nahanungod sang aton kaugalingon. 

Aleluya:

Mateo 5:3

Bulahan ang mga nagakilala sang kinahanglanon sang ila mga kalag, kay ila ang ginharian sang langit! 

Ang Pagbasa sang Santos nga Ebanghelyo suno kay:

San Marcos 10:17-30

Sang malakat na kuntani si Jesus, may isa ka tawo nga nagdalagan pakadto sa iya, nagluhod kag nagpamangkot, “Maayo nga Manunodlo, ano bala ang himuon ko agod akon maangkon ang kabuhi nga dayon?” Si Jesus nagpamangkot sa iya, “Ngaa ginatawag mo ako nga maayo? Wala gid sing bisan isa nga maayo kundi ang Dios lamang. Nahibaluan mo naman ang mga kasugoan: ‘Indi ka magpatay, indi ka magpanginbabayi ukon magpanginlalaki, indi ka magpangawat, indi ka magbutig, indi ka magdaya, tahura ang imo amay kag iloy.’” Ang tawo nagsiling sa iya, “Manunodlo, sugod sang lamharon pa ako natuman ko na ining mga kasugoan.” Gintulok sia ni Jesus sing mahigugmaon kag ginsingganan, “Isa pa ka butang ang kinahanglan para sa imo. Lakat ka kag ibaligya ang tanan mo nga pagkabutang, kag ihatag mo ang kuwarta sa mga imol, kag magaangkon ka sang manggad didto sa langit, kag dali sunod ka sa akon.” Sang pagkabati sini sang tawo, nahulog ang iya guya, kag naglakat sia nga masinulob-on, kay madamo ang iya mga pagkabutang. Si Jesus nagpanghulonghulong sa palibot niya kag nagsiling sa iya mga gintuton-an, “Daw ano kabudlay para sa mga manggaranon ang pagsulod sa Ginharian sang Dios!” Ang mga gintuton-an naurongan sa sini nga mga pulong, pero si Jesus nagpadayon sa pagsiling, “Mga anak ko, daw ano kabudlay ang pagsulod sa Ginharian sang Dios! Labi pa kabudlay para sa isa ka manggaranon ang pagsulod sa Ginharian sang Dios, sang sa paglapos sang isa ka kamelyo sa buho sang dagom.” Tungod sini, ang mga gintuton-an natingala gid kag nagpinamangkutanay, “Sin-o na lang bala ang maluwas?” Gintulok sila ni Jesus sing tadlong, kag ginsabat, “Para sa tawo indi ini mahimo, pero para sa Dios mahimo ini, kay ang tanan nga butang sarang mahimo sang Dios.” Dayon si Pedro nagsiling, “Tan-awa bala, ginbayaan namon ang tanan kag nagsunod kami sa imo.” Si Jesus nagsiling sa ila, “Huo matuod, kag tungod sini ginasiling ko sa inyo nga ang bisan sin-o nga nagabiya sang iya balay, ukon mga utod nga lalaki ukon babayi, ukon iloy, ukon amay, ukon mga kabataan, ukon mga kadutaan tungod sa akon kag sa Maayong Balita, magabaton sia sa sini nga panahon sing ginatos ka pilo: mga balay, mga utod nga lalaki ukon babayi, mga iloy, mga kabataan kag mga kadutaan, kag mga paghingabot man. Kag sa palaabuton nga panahon magabaton sia sang kabuhi nga dayon. 

Oktubre 13 | Oktubre 15