"Ngaa bala Nagakahadlok gid Kamo, Kadiutay sang Inyo Pagtuo?"

Liturhiya sang Pulong

(Martes, Hulyo 2, 2019)

Ang Pagbasa gikan sa Libro sang:

Genesis 19:15-29

   Sang kaagahon, ang mga anghel nagtinguha sa pagpadalidali kay Lot sa paggwa. Nagsiling sila, “Dalidali ka! Dalha ang imo asawa kag ang imo duha ka bata nga babayi kag maghalin diri, agod nga indi kamo mapatay kon laglagon ang siyudad.” Daw indi pa kuntani maglakat si Lot, pero ang Ginoo naluoy sa iya. Gani, sia, ang iya asawa kag ang iya duha ka anak nga babayi gindala sang duha ka lalaki kag ginpagwa nila sila sa siyudad. Sang napagwa na nila sila sa siyudad, ang isa sang mga anghel nagsiling, “Dalagan kamo agod indi kamo maano! Indi kamo magbulobalikid kag indi magdulog sa patag. Magdalagan kamo didto sa mga bakulod, agod indi kamo mapatay.”

   Pero si Lot nagsabat, “Sir, indi mahimo ina. Daku gid ang imo nahimo sa akon kag ginluwas mo ang akon kabuhi. Pero ang mga bakulod tama kalayo kag malambot pa ako sang kalaglagan sa wala pa ako makaabot didto. Nakita mo bala inang diutay nga banwa? Malapit ina nga lambuton ko.Papalagyuha ako didto. Makita mo nga diutay ina nga duog, kag indi ako maano didto.”

   Nagsabat sia, “Sigi, indi ko paglaglagon ina nga banwa. Hala, dalagan na! Wala ako sing mahimo tubtob makalambot ikaw didto.” 

   Tungod kay gintawag ni Lot ang banwa nga diutay, ginhingalanan ini nga Zoar.

   Nagabutlak gid ang adlaw sang pag-abot ni Lot sa Zoar. Sa hinali ginpaulan sang Ginoo ang nagadabdab nga asupre sa Sodoma kag Gomorra, kag ginlaglag sang Ginoo ini nga mga siyudad kag ang bug-os nga patag, upod ang mga tawo didto, kag ang tanan nga nagatubo sa sadto nga duta. Pero ang asawa ni Lot nagbalikid, kag nahimo sia nga daw haligi nga asin.

Ang asawa ni Lot nagbalikid. (19:26)

   Aga pa gid sang madason nga adlaw si Abraham nagdalidali sa pagkadto sa duog diin sia nagtindog sa atubangan sang Ginoo. Ginlantaw niya ang Sodoma kag Gomorra, kag ang bug-os nga kapatagan, kag nakita niya ang aso nga nagatub-ok halin sa duta, subong sang aso nga nagahalin sa isa ka daku nga hurnohan. Pero sang paglaglag sang Dios sang mga siyudad sang kapatagan sa diin si Lot nagpuyo gindumdom niya si Abraham kag ginpapalagyo niya si Lot agod indi sia maano.

Salmo sa Pagsabat:

Mga Salmo 26:2-3, 9-10, 11-12

(S) Ang imo mapinadayunon nga gugma nagatuytoy sa amon.

Usisaa kag tilawi ako, O Ginoo; hukmi ang akon mga handom kag mga hunahona. Ang imo mapinadayunon nga gugma nagatuytoy sa akon, ang imo pagkamatutom nagaubay sa akon sa gihapon. (S)

Indi man ako paglaglaga upod sa mga makasasala, ilikaw ako sa kapalaran sang mga manugpatay, mga tawo nga nagahimo sing malaut sa tanan nga tion, kag handa sa gihapon sa paghamham. (S)

Ako akon nagahimo sing matarong, kaluoyi man ako kag luwasa. Indi ako maano sa tanan nga mga katalagman, sa katilingban sang mga nagasimba dayawon ko ang Ginoo! (S)

Aleluya:

Mga Salmo 130:5

Nalangkag gid ako sa pagpaabot sang bulig sang Ginoo, kag sa iya mga pulong nagasalig ako.

Ang Pagbasa sang Santos nga Ebanghelyo suno kay:

San Mateo 8:23-27

   Nagsakay si Jesus sa sakayan kag ang iya mga gintuton-an nag-upod sa iya. Sa hinali nag-abot ang mabaskog nga bagyo sa linaw, sa bagay nga nagdalagku ang mga balod kag ang sakayan ginasudlan sang tubig. Pero si Jesus nagakatulog. Ginpalapitan sia sang iya mga gintuton-an kag ginpukaw nga nagasiling, “Ginoo, luwasa kami! Daw malumos kita!”

   Si Jesus nagsabat, “Ngaa bala nagakahadlok gid kamo? Kadiutay sang inyo pagtuo!” Dayon nagbangon sia, ginmanduan niya ang hangin kag ang balod nga mag-untat, kag naglinaw.

   Ang tanan natingala gid kag nagsiling, “Ano bala nga tawo ini? Bisan pa ang hangin kag ang balod nagatuman sa iya!”

Hulyo 1 | Hulyo 3

"Manunodlo, Handa Ako sa Pagsunod sa Imo bisan Diin ka Makadto"

Liturhiya sang Pulong

(Lunes, Hulyo 1, 2019)

Ang Pagbasa gikan sa Libro sang:

Genesis 18:16-33

   Dayon ang mga tawo naglakat kag nagkadto sa isa ka duog sa diin makita nila ang Sodoma, kag si Abraham nagdul-ong sa ila. Ang Ginoo nagsiling sa iya kaugalingon, “Indi ko pagtaguon kay Abraham ang akon pagahimuon. Ang iya mga kaliwat mangindaku kag gamhanan nga pungsod, kag ang tanan nga mga pungsod sa duta magapangayo nga bendisyunan ko sila subong sang akon pagbendisyon sa iya. Ginpili ko sia agod iya sugoon ang iya mga anak nga lalaki kag mga kaliwat sa pagtuman sang akon mga sugo paagi sa ila paghimo sang husto kag matarong. Dayon pagahimuon ko para sa iya ang tanan nga akon ginsaad.”

   Dayon ang Ginoo nagsiling kay Abraham, “Tama gid ang mga panumbongon batok sa Sodoma kag sa Gomorra, kag ang ila sala tama gid. Kinahanglan kadtuan ko kag tan-awon kon ang mga panumbongon batok sa ila matuod ukon indi.”

   Dayon ang duha ka tawo naglakat pakadto sa Sodoma, pero ang Ginoo nagpabilin upod kay Abraham. Si Abraham nagpalapit sa Ginoo kag nagpamangkot, “Pagalaglagon mo gid bala ang mga matarong upod sa mga malaut? Kon may yara nga 50 ka matarong nga mga tawo sa siyudad, pagalaglagon mo bala ang bilog nga siyudad? Indi mo bala pag-ipaiway ang siyudad agod maluwas ang 50? Sa pagkamatuod indi mo pagpatyon ang mga matarong upod sa mga malaut. Indi ina mahimo! Indi mo ina paghimuon. Kay kon amo ina, ang matarong pagasilutan pareho sang mga malaut. Indi ina mahimo. Ang Hukom sang bug-os nga kalibutan dapat maghukom sing matarong.”
   Ang Ginoo nagsabat, “Kon makakita ako sing 50 ka matarong nga mga tawo sa Sodoma, indi ko paglaglagon ang bug-os nga siyudad tungod sa ila.”

   Si Abraham naghambal liwat, “Kon mahimo, O Ginoo, patawara ako sang akon kaisog sa pagpadayon sa pagpakighambal sa imo. Tawo lamang ako, kag wala ako kinamatarong sa paghambal sini. Abi may 45 lamang ka matarong nga mga tawo. Laglagon mo bala ang bug-os nga siyudad tungod kay kulang sing lima?” 
   Ang Ginoo nagsabat, “Indi ko paglaglagon ang siyudad kon may makita ako nga 45 ka matarong nga mga tawo.”

   Si Abraham naghambal liwat, “Abi may 40 lang.” 
   Nagsabat sia, “Indi ko paglaglagon ang siyudad kon may yara nga 40.”

   Si Abraham nagsiling, “Indi ka lang magkaakig sa akon, O Ginoo, kay indi ko mapunggan ang paghambal liwat. Ti, abi kon may 30 lang?” 
   Nagsabat sia, “Indi ko paglaglagon ini kon may makita ako nga 30.”

   Si Abraham nagsiling, “Ginoo, kon mahimo, patawara ako sa akon kaisog sa pagpadayon sa pagpakighambal sa imo. Abi kon may 20 lang?” 
   Nagsabat sia, “Indi ko paglaglagon ang siyudad kon may makita ako nga 20.”

   Si Abraham nagsiling, “Abaw, Ginoo, indi ka magkaakig, kag magahambal ako sing ka isa na lang. Abi kon may napulo lang?” 
   Nagsiling sia, “Indi ko paglaglagon ini kon may yara nga napulo.” Sa tapos ang Ginoo makapakighambal kay Abraham naglakat sia kag si Abraham nagpauli.

Salmo sa Pagsabat:

Mga Salmo 103:1-2, 3-4, 8-9, 10-11

(S) Ang Ginoo maluloy-on kag mahigugmaon.

Dayawa ang Ginoo, O kalag ko! Dayawa ang iya balaan nga ngalan, bug-os ko nga tagipusoon! Dayawa ang Ginoo, O kalag ko, kag indi pagkalimti kon daw ano ang iya kaayo. (S)
Ginapatawad niya ang tanan ko nga mga sala kag ginaayo niya ang tanan ko nga mga balatian; Ginaluwas niya ako sa lulobngan kag ginalikupan niya ako sang gugma kag kaluoy. (S)
Ang Ginoo maluloy-on kag mahigugmaon indi madali mangakig, kag puno sing mapinadayunon nga gugma. Wala sia nagasaway sing dalayon; Ang iya pagpangakig wala nagapadayon. (S)
Ang iya silot kulang pa sang nagakabagay sa aton, ukon nagabalos sa aton tungod sang aton mga sala kag kasaypanan. Subong kataas sang langit sa ibabaw sang duta, amo man kadaku ang iya paghigugma sa mga nagapasidungog sa iya. (S)

Aleluya:

Mga Salmo 95:8

Kon karon nga adlaw mabatian ninyo ang tingog sang Ginoo, "Indi kamo magpakatig-a sang inyo tagipusoon.

Ang Pagbasa sang Santos nga Ebanghelyo suno kay:

San Mateo 8:18-22

   Sang matalupangdan ni Jesus ang madamo nga mga tawo sa iya palibot, nagsugo sia sa iya mga gintuton-an sa pagtabok sa pihak sang linaw. May isa ka manunodlo sang Kasugoan nga nagpalapit sa iya didto nga nagasiling, “Manunodlo, handa ako sa pagsunod sa imo bisan diin ka makadto.”

   Si Jesus nagsabat sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.”

   Ang isa pa gid nga iya gintuton-an nagsiling, “Ginoo, mapauli anay ako sa paglubong sang akon amay.”
   Pero si Jesus nagsabat, “Sunod ka sa akon kag pabay-i ang mga patay sa paglubong sang ila mga patay.”

Hunyo 30 | Hulyo 2

Ang Ikaduha nga Libro ni SAMUEL

Panguna

   Ang Ikaduha nga Samuel ang kasugpon sang Nahauna nga Samuel, maragtas sang paghari ni David, nahauna sa Juda sa bagatnan (kapitulo 1—4), kag dayon sa bug-os nga pungsod, lakip ang Israel sa aminhan (kapitulo 5—24). Nagasugid ini sing maathag sang iya pagpakig-away sa iya mga kaaway sa sulod kag sa gowa, sa pagpasangkad sang iya ginharian kag sa pagpapag-on sang iya paggahom. Labaw sini, matuod nga larawan ini sang tawo nga may mabakod nga pagtuo kag pag-alagad sa Dios kag isa sia nga nakadaog sang pag-unong sang iya mga tawo. Pero kon kaisa ginapakita sia nga wala sing kaluoy, handa sa paghimo sang dalagku nga mga sala sa paglambot sang iya mga handom. Pero kon ginapakilala sia sang iya mga sala sang propeta sang Ginoo nga si Natan, ginasugid niya ang iya mga sala kag ginabaton niya ang silot nga ginapadala sang Dios.

   Si David ginhangad gid sang mga tawo sa Israel tungod sang iya kabuhi kag hinimoan, gani sang ulihi sa tion sang pungsodnon nga kabudlayan naghandom sila sang isa ka hari nga "anak ni David," nga kon sa aton pa kaliwat ni David nga kaangay niya.

Balayan sang Kaundan

   Ang paghari ni David sa Juda 1:1—4:12

   Ang paghari ni David sa bug-os nga Israel 5:1—24:25

     a. Ang nahauna nga mga tinuig 5:1—10:19

     b. Si David kag si Batseba 11:1—12:25

     c. Mga kagamo kag mga kabudlayan 12:26—20:26

     d. Ang katapusan nga mga tinuig 21:1—24:25

☆☆☆ 2 SAMUEL ☆☆☆

1 2 3 4 5 6 7 8 9 10 
11 12 13 14 15 16 17 18 19 20 
21 22 23 24 

☆☆☆ 2 SAMUEL ☆☆☆

1 SAMUEL 《 | 》 1 MGA HARI

Ang Nahauna nga Libro ni SAMUEL

Panguna

   Ang Libro sang Nahauna nga Samuel nagasugid sang mga hitabo sang pagsaylo sang Israel halin sa paggahom sang mga hukom pakadto sa hari. Ini nga pagbaylo sa kabuhi nga pungsodnon sang Israel naangot sing kalabanan sa tatlo ka tawo: si Samuel, ang katapusan sang gamhanan nga mga hukom; si Saul, ang nahauna nga hari; si David, nga ang iya nahauna nga pagpasimpalad sa wala pa sia magsaka sa gahom nalakot sa mga hitabo nahanungod kay Samuel kag Saul.

   Ang ginasiling sini nga libro amo nga ang katutom sa Dios nagadala sing kauswagan, samtang ang indi pagtuman sa iya nagadala sing kalaglagan. Amo man ini ang ginasiling sang iban nga mga libro sa Daan nga Kasugtanan nga natuhoy sa maragtas sang Israel. Ginpahamtang ini sing maathag sa mga pulong sang Ginoo kay Eli sa 2:30: "Padunggan ko ang nagapadungog sa akon, pagatamayon ko ang nagatamay sa akon.”

   Nasulat sa sini nga libro ang nanglainlain nga balatyagon nahanungod sang pagpatindog sang ginharian. Ang Ginoo mismo amo ang ginkilala nga matuod nga hari sang Israel, pero sa pagsabat sang pangayo sang mga tawo ang Ginoo nagpili sing isa ka hari para sa ila. Ang importante nga kamatuoran amo nga ang hari kag ang mga tawo sang Israel nagpuyo sa idalom sang gahom kag paghukom sang Dios (2:7-10). Sa idalom sang Kasugoan sang Dios ang katarungan sang tanan nga mga tawo, imol kag manggaranon, pagakilalahon. 

Balayan sang Kaundan

   Si Samuel subong nga hukom sang Israel 1:1—7:17

   Si Saul nanginhari 8:1—10:27

   Ang nahauna nga mga tinuig sang paghari ni Saul 11:1—15:35

   Si David kag si Saul 16:1—30:31

   Ang kamatayon ni Saul kag sang iya mga anak nga lalaki 31:1-13

☆☆☆ 1 SAMUEL ☆☆☆

1 2 3 4 5 6 7 8 9 10 
11 12 13 14 15 16 17 18 19 20 
21 22 23 24 25 26 27 28 29 30 
31

☆☆☆ 1 SAMUEL ☆☆☆

RUT 《 | 》 2 SAMUEL