"Magkalipay kag Maghinugyaw Kamo, tungod kay Daku ang inyo balos sa Langit"

Liturhiya sang Pulong

(Biyernes, Nobyembre 1, 2019)

Ang Tanan nga mga Santos

1. Ang Pagbasa gikan sa Libro sang:

Bugna kay Juan 7:2-4, 9-14

   Kag nakita ko ang isa pa ka anghel nga nagakari gikan sa sidlangan nga may selyo sang Dios nga buhi. Gintawag niya sa mabaskog nga tingog ang apat ka mga anghel nga ginhatagan sang Dios sing gahom sa paghalit sang duta kag sang dagat. Ang anghel nagsiling, “Indi paghaliti ang duta, ukon ang dagat ukon ang mga kahoy, tubtob nga mamarkahan namon sang selyo ang mga agtang sang mga alagad sang aton Dios.” Kag ginsugiran ako sang kadamuon sadtong ginpangmarkahan sang selyo sang Dios sa ila mga agtang. Ang ila kadamuon, 144,000, halin sa tanan nga mga tribo sang Israel. Sa tapos sini nagtan-aw ako, kag may madamo nga mga tawo, nga wala sing isa nga sarang makaisip sa ila. Nagikan sila sa tagsa ka rasa, tribo, pungsod, kag linggwahe, kag nagtindog sila sa atubangan sang trono kag sang Cordero. Nagabayu sila sing puti kag malaba, kag may mga palma sila nga ginauyatan. Nagsinggit sila sing mabaskog, “Ang amon kaluwasan nagagikan sa amon Dios, nga nagalingkod sa trono, kag gikan sa Cordero!” Ang tanan nga mga anghel nagtindog sa palibot sang trono, sang mga katigulangan kag sang apat ka buhi nga mga tinuga. Dayon nagluhod sila sa atubangan sang trono, kag nagsimba sa Dios, nga nagasiling, “Kabay pa! Ang pagdayaw, ang himaya, ang kaalam, ang mga pagpasalamat, ang kadungganan, ang gahom, kag ang kusog iya sang aton Dios sa walay katapusan! Kabay pa!” Ang isa sang mga katigulangan nagpamangkot sa akon, “Sin-o ina nga mga tawo nga nagabayu sing puti, kag diin bala sila maghalin?” Nagsabat ako, “Tiyoy, wala ako makahibalo. Ikaw ang nakahibalo.” Nagsiling sia sa akon, “Amo ini ang mga tawo nga nakaluwas sa daku nga paghingabot. Ginlabhan nila ang ila mga bayu kag ginpaputi nila sa dugo sang Cordero.

Salmo sa Pagsabat:

Mga Salmo 24:1-2, 3-4, 5-6

(S) Amo ini ang mga tawo nga nagapangita sa pagtan-aw sang imo nawong, O Ginoo. 

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)

Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag panghunahona, nga wala nagasimba sa mga dios-dios. (S)

Pagabendisyunan sia sang Ginoo, kag ang Dios nga iya Manluluwas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

2. Ang Pagbasa gikan sa Nahauna nga Sulat ni:

Juan 3:1-3

   Talupangda ninyo kon daw ano ang paghigugma sang Amay sa aton! Ang iya gugma para sa aton tama ka daku sa bagay nga ginatawag kita nga mga anak sang Dios, kag matuod gid man nga amo kita. Gani ang kalibutan wala makakilala sa aton, kay wala ini nakakilala sa Dios. Mga hinigugma ko, karon mga anak na kita sang Dios, ugaling indi pa maathag kon mangin-ano kita sa ulihi. Pero nakahibalo kita nga kon magpahayag si Cristo, manginkaangay kita niya, kay makita naton ang iya matuod nga kinaugali. Ang tagsatagsa nga may iya sini nga paglaom kay Cristo nagapaputli sang iya kaugalingon subong nga si Cristo putli. 

Aleluya:

Mateo 11:28

   Kari kamo sa akon, tanan kamo nga ginabudlayan kag ginabug-atan, kay papahuwayon ko kamo, siling sang Ginoo.

"Kari kamo sa akon, tanan kamo nga ginabudlayan . . ." (11:28)

Ang Pagbasa sang Santos nga Ebanghelyo suno kay:

San Mateo 5:1-12

   Sang makita ni Jesus ang mga nagadinugok nga mga tawo nagtaklad sia sa bakulod. Nagpalapit sa iya ang iya mga gintuton-an kag naglingkod sia sa pagtudlo sa ila sang masunod: “Bulahan ang mga nagakilala Sang kinahanglanon sang ila mga kalag, Kay ila ang Ginharian sang langit! “Bulahan ang mga nagakasubo, Kay pagalipayon sila sang Dios! “Bulahan ang mga mapainuboson, Kay magabaton sila Sang ginsaad sang Dios! “Bulahan ang may daku nga handom Nga magmatarong Suno sa ginapaabot sang Dios, Kay ang Dios Magahatag sing katumanan Sina nga handom! “Bulahan ang mga maluloy-on, Kay pagakaluoyan man sila sang Dios! “Bulahan ang may putli nga tagipusoon, Kay makita nila ang Dios! “Bulahan ang nagapaluntad Sang paghidait Sa tunga sang mga tawo, Kay ang Dios magatawag sa ila Nga iya mga anak! “Bulahan ang mga ginahingabot Tungod kay ginatuman nila Ang ginapaabot sang Dios sa ila, Kay ila ang Ginharian sang langit! “Bulahan kamo kon ang mga tawo magpasipala kag maghingabot kag magbutangbotang sa inyo tungod kay kamo sumolunod ko. Magkalipay kag maghinugyaw kamo, tungod kay daku ang inyo balos sa langit.

Oktubre 31 | Nobyembre 2

1 MGA CRONICA - Kapitulo 5

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Kaliwat ni Ruben 

1 Amo ini ang mga kaliwat ni Ruben, ang kamagulangan sang mga anak nga lalaki ni Israel. (Tungod kay nagpakighilawas sia sa isa sang mga babayi sang iya amay, nadula niya ang mga kinamatarong sang pagkapanganay, kag ginhatag ini sa kay Jose.
2 Ang tribo ni Juda amo ang nanginlabing gamhanan kag ang ginhalinan sang isa ka pangulo para sa tanan nga mga tribo, pero ang kinamatarong sang pagkapanganay nga anak nga lalaki nangin-iya ni Jose.)
3 Si Ruben, ang kamagulangan sang mga anak ni Israel, may apat ka mga anak nga lalaki nga amo sanday Hanoc, Fallu, Hezron, kag Carmi.
4-6 Amo ini ang mga kaliwat ni Joel halin sa isa ka kaliwatan pakadto sa isa: Semaya, Gog, Simei, Mica, Reaya, Baal, Beera. Ang emperador sang Asiria, nga si Tiglat Pileser, nagbihag kay Beera, isa ka pangulo sang tribo kag gintapok sia.
7 Sa listahan sang panimalay makita ang masunod nga mga pangulo sang tribo ni Ruben: Jeiel, Zacarias,
8 Bela, anak nga lalaki ni Azaz kag apo ni Sema, sang kabaranggayan ni Joel. Ini sila nagpuyo sa Aroer kag sa kadutaan sa aminhan pakadto sa Nebo kag Baal Meon.
9 May madamo sila nga mga kahayupan sa duta sang Galaad, gani ginpanag-iyahan nila ang duta tubtob sa sidlangan nga malambutan sang desierto pakadto sa suba sang Eufrates.
10 Sang panahon ni Haring Saul, ang tribo ni Ruben nagsalakay sang mga Agarnon, ginpamatay sila sa inaway, kag ginpanag-iyahan ang ila duta sa nasidlangan nga bahin sang Galaad.

Ang mga Kaliwat ni Gad 

11 Ang tribo ni Gad nagpuyo sa naaminhan ni Ruben sa duta sang Basan, tubtob sa sidlangan sa Salca.
12 Si Joel amo ang pangulo sang daku nga kabaranggayan, kag si Safam amo ang pangulo sang ikaduha nga kabaranggayan nga daku man. Si Janai kag si Safat amo ang mga pangulo sang iban nga mga kabaranggayan sa Basan.
13 Ang iban nga mga katapo sang tribo nagikan sa masunod nga pito ka mga kabaranggayan: Micael, Mesulam, Zeba, Jorai, Jacan, Zia, kag Eber.
14 Ini sila mga kaliwat ni Abihail, anak nga lalaki ni Huri, nga ang ila mga katigulangan nga ginhalinan amo ang masunod: Abihail, Huri, Jaroa, Galaad, Micael, Jesisai, Jahdo, kag Buz.
15 Si Ahi, anak nga lalaki ni Abdiel kag apo ni Guni, amo ang pangulo sini nga mga kabaranggayan.
16 Nagpuyo sila sa kadutaan sang Basan kag Galaad, sa mga banwa didto, kag sa bug-os nga halalban sang kadutaan sang Saron.
17 (Ini nga listahan ginhimo sang panahon ni Haring Jotam sang Juda kag ni Haring Jeroboam sang Israel.)
18 Sa mga tribo nanday Ruben, Gad, kag sang nasidlangan nga Manases may 44,760 ka mga soldado nga nahanas sa paggamit sang mga taming, mga espada kag mga pana.
19 Nagpakig-away sila sa mga Agarnon nga mga tribo nanday Jetur, Nafis, kag Nodab.
20 Nagsalig sila sa Dios kag nagpangayo sing bulig, kag ang Dios nagsabat sang ila mga pangamuyo kag ginpadaog sila sa mga Agarnon kag sa mga nagaapin sini.
21 Nakaagaw sila sa ila mga kaaway sing 50,000 ka mga kamelyo, 250,000 ka mga karnero, kag 2,000 ka mga asno. Gindala nila ang 100,000 ka mga bihag sa inaway
22 kag ginpamatay ang madamo nga mga kaaway, kay ang inaway kabubot-on sang Dios. Nagpadayon sila sa pagpuyo sa sadto nga duta tubtob sang Pagbihag.^g

Ang mga Tawo sa Nasidlangan nga Manases 

23 Ang mga tawo sa nasidlangan nga Manases nagpuyo sa kadutaan sang Basan, tubtob sa naaminhan pakadto sa Baal Hermon, Senir, kag sa bukid sang Hermon, kag ang mga pumoluyo nagdamo.
24 Ang masunod amo ang mga pangulo sang ila mga kabaranggayan: Efer, Isi, Eliel, Azriel, Jeremias, Jodabias, kag Jadiel. Ini sila tanan isganan nga mga soldado, bantog nga mga pangulo sang ila kabaranggayan.

Ang Nasidlangan nga mga Tribo Gintapok 

25 Pero ang mga tawo nagdimatutom sa Dios sang ila mga katigulangan kag ginsikway nila sia, kag nagsimba sa mga dios sang mga kapungsoran nga gintabog sang Dios pa gwa sa duta.
26 Gani ginpagubat sang Dios sa Emperador sang Asiria nga si Pul (nga amo man si Tiglat Pileser) ang ila duta. Gintapok niya ang mga tribo nanday Ruben, Gad, kag sang Nasidlangan nga Manases kag ginpapuyo sila sa Hala, sa Habor, sa Hara, kag sa higad sang suba sang Gosan.


^gPAGBIHAG: Sang mga 733 B.C. ang mga Asiriahanon nag-agaw sang naaminhan nga Israel kag sang duta sang mga Israelinhon sa Sidlangan sang suba sang Jordan kag gintapok nila ang mga tawo (tan-awa man ang 2 Hari 15:29).

1 MGA CRONICA - Kapitulo 4 <<<   >>> 1 MGA CRONICA - Kapitulo 6