Ang Maayong Balita ni Jesu-Cristo suno kay MATEO

Panguna

     Ang Maayong Balita ni Jesu-Cristo suno kay Mateo nagasugid sang maayong balita nga si Jesus amo ang ginsaad nga Manlulowas nga paagi sa iya ang Dios nagtuman sang iya mga ginsaad sa iya mga tawo sa Daan nga Kasugtanan. Ining maayong balita indi lamang para sa mga Judio, sa diin sia nagpakatawo kag nagpuyo upod sa ila, kundi para sa bug-os nga kalibutan.

     Ang Mateo napasunod gid sing maayo. Nagasugod ini sang pagkatawo ni Jesus, nagasaysay sang iya pagbautiso kag ang pagsulay sa iya, kag dason nagpadayon ini sa pagsugid sang iya pagpangwali, pagpanudlo, kag pagpang-ayo sa Galilea. Sa tapos sini ang libro nagpadayon sa pagsugid sang pagpanglakaton ni Jesus halin sa Galilea pa Jerusalem kag ang mga hitabo sang katapusan nga simana kag nagatapos ini sa paglansang sa iya kag ang iya pagkabanhaw. 

     Ini nga libro nagapakilala kay Jesus nga kinilala nga Manunodlo nga may awtoridad sa pagsaysay sang Kasugoan sang Dios, kag nagatudlo sia nahanungod sang Ginharian sang Dios. Ang madamo sang iya ginpanudlo natipon sa lima ka grupo: (1) ang Wali sa Bukid, nahanungod sang pagginawi, katungdanan, pribilihiyo, kag padulongan sang mga katapo sang Ginharian sang langit (kapitulo 5—7); (2) mga wunugyan sa dose ka mga gintuton-an para sa ila misyon (kapitulo 10); (3) mga palaanggiran nahanungod sang Ginharian sang langit (kapitulo 13); (4) pagtudlo sang kahulogan sang pagkagintuton-an (kapitulo 18); kag (5) ang pagtudlo nahanungod sang panahon karon kag ang magaabot nga Ginharian sang Dios (kapitulo 24—25). 

Balayan sang Kaundan

     Ang mga kaliwatan nga gingikanan ni Jesu-Cristo 1:1—2:23

     Ang pag-alagad ni Juan Bautista 3:1-12

     Ang pagbautiso kag pagsulay kay Jesus 3:13—4:11

     Ang pag-alagad ni Jesus sa mga katawuhan 4:12—18:35

     Halin sa Galilea pa Jerusalem 19:1—20:34

     Ang katapusan nga semana sa Jerusalem kag sa kaingod nga mga duog 21:1-27:66 

     Ang pagkabanhaw kag mga pagpakita sang Ginoo 28:1-20