Nobyembre 3, 2020, Martes sang Ika-31 nga Semana sang Tuig

 Liturhiya sang Pulong

San Martin de Porres, Relihiyoso

Nahauna nga Balasahon - Filipos 2:5-11

Salmo sa Pagsabat - Mga Salmo 22:26B-27, 28-30AB, 30E, 31-32

Aleluya - Mateo 11:28

Ebanghelyo - Lucas 14:15-24

"Pangagda sang Punsyon sa Lamisa sang Hari"

Ang Pagbasa gikan sa Sulat ni San Pablo nga Apostol, sa mga:

Taga-Filipos 2:5-11

    Mga Utod: Hupti ninyo ini nga panghunahona nga iya man ni Cristo Jesus: 

        Ang kinaugali sang Dios

        Yara sa iya gihapon, 

        Pero wala sia maghunahona 

        Nga sa pakusog 

        Dapat sia magtinguha 

        Nga manginkaangay sa Dios. 

        Sa baylo 

        Sa iya kaugalingon nga kabubot-on 

        Ginpaiway niya ini tanan, 

        Kag nagsuklob sia 

        Sang kinaugali sang isa ka ulipon. 

        Nagpakatawo sia, 

        Kag nagpakita sa dagway sang tawo. 

        Nagpaubos siya sang iya kaugalingon 

        Kag nagmasinulondon 

        Tubtob sa kamatayon, 

        Bisan pa ang kamatayon sa krus. 

        Tungod sini 

        Ginbayaw sia sang Dios sa kahitaasan, 

        Kag ginhatagan sia sing ngalan 

        Nga labaw sa tanan nga ngalan. 

        Gani sa ngalan ni Jesus, 

        Ang tanan nga mga tinuga, 

        Sa langit kag sa duta, 

        Kag sa idalom sang duta 

        Magaluhod, 

        Kag ang tanan magkilala sing dayag 

        Nga si Jesu-Cristo amo ang Ginoo, 

        Sa himaya sang Dios nga Amay. 

Salmo sa Pagsabat:

Mga Salmo 22:26B-27, 28-30AB, 30E, 31-32

(S) O Ginoo, sa daku nga katilingban dayawon ko ikaw.

Magadulot ako sing mga halad nga akon ginsaad sa atubangan sang mga nagatuman sa imo. Ang mga imol magakaon kag mabusog, ang mga nagakari sa Ginoo magadayaw sa iya. Kabay pa nga mag-uswag sila sa walay katubtoban! (S)

Ang tanan nga mga kapungsoran magadumdom sa Ginoo, halin sa tagsa ka bahin sang kalibutan magabalik sila sa iya, ang tanan nga mga rasa magasimba sa iya. Ang Ginoo hari, kag iya ginagamhan ang mga kapungsoran. Ang mga bugalon magayaub sa iya. (S)

Ang palaabuton nga mga kaliwatan magaalagad sa iya, ang mga tawo magahambal nahanungod sa Ginoo sa palaabuton nga kaliwatan. Pagaisugid sa mga tawo nga wala pa matawo: “Ang Ginoo nagluwas sang iya mga tawo!” (S)

Aleluya:

San Mateo 11:28

   Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Lucas 14:15-24

   Ang isa sang mga tawo nga nagakaon upod kay Jesus sa lamisa nakabati sini kag nagsiling sa iya, “Bulahan yadtong magakaon sa Ginharian sang Dios.”

   Si Jesus nagsiling sa iya, “May isa ka tawo nga naghiwat sing daku nga punsyon kag madamo ang iya mga inagda. Sang inugkaon na, ginpadala niya ang iya suloguon sa pagsiling sa iya mga inagda, ‘Kari kamo, ang tanan nahanda na.’ Pero ang tagsatagsa sa ila nagpamalibad. Ang nahauna nagsiling sa suloguon, ‘Nakataba ako sing duta kag kinahanglan nga kadtuan ko kag tan-awon ini. Kon mahimo, pasayluhon mo ako.’ Ang ikaduha nagsiling, ‘Nakabakal ako sing lima ka paris nga mga baka kag magakadto ako sa pagtan-aw kon maayo man sila. Kon mahimo pasayluhon mo ako.’ Ang ikatlo nagsiling, ‘Bag-o lang ako makasal, gani indi ako makakadto.’ Ang suloguon nagpauli kag nagsugid sini tanan sa iya agalon. Ang agalon sang panimalay naakig kag nagasiling sa iya suloguon, ‘Dalidali ka sa pagkadto sa mga dalan kag sa mga hilithilit sang banwa kag dalha diri ang mga imol, ang mga pingkaw, ang mga bulag kag ang mga piang.’ Sa wala madugay ang suloguon nag-abot kag nagsiling, ‘Amoy, ang imo sugo natuman na, pero may lugar pa.’ Gani ang agalon nagsiling sa iya suloguon, ‘Kadto ka sa malapad kag makitid nga mga dalan sa gwa sang banwa kag pilita ang mga tawo sa pagkari agod nga mapuno ang akon balay. Kay nagasiling ako sa inyo, nga walay isa sadtong mga tawo nga gin-agda nga makatilaw sang akon pagkaon sa punsyon.’ ” 

Nobyembre 2 | Nobyembre 4