Liturhiya sang Pulong
Nahauna nga Balasahon - Bugna 22:1-7
Salmo sa Pagsabat - Mga Salmo 95:1-2, 3-5, 6-7
Aleluya - Lucas 21:36
Ebanghelyo - Lucas 21:34-36
"Indi kamo Magpatuyang"
Ang Pagbasa gikan sa Libro sang:
Bugna kay San Juan nga Apostol 22:1-7
Ginpakita man sa akon sang anghel ang suba sang tubig sang kabuhi nga nagaigpat-igpat kaangay sang kristal nga nagagikan sa trono sang Dios, kag sang Cordero, kag nagailig sa tunga sang kalsada sang siyudad. Sa pihak kag pihak nga pangpang sang suba may kahoy sang kabuhi nga nagapamunga sing 12 ka beses sa sulod sang isa ka tuig, makaisa kada bulan. Ang iya mga dahon bulong para sa mga pungsod. Wala sing bisan ano nga ginpakamalaut sang Dios nga makita sa sini nga siyudad.
Ang trono sang Dios kag sang Cordero mangindidto sa sini nga siyudad, kag ang iya mga alagad magasimba sa iya. Makita nila ang iya guya, kag ang iya ngalan pagaisulat sa ila mga agtang. Wala na sing gab-i, kag wala na sila sing kinahanglan sang mga suga ukon sang kapawa sang adlaw, kay ang Ginoong Dios mangin-ila kapawa, kag magagahom sila subong mga hari sa walay katapusan.
Dayon ang anghel nagsiling sa akon, “Ini nga mga pulong matuod kag masaligan. Ang Ginoong Dios, nga naghatag sang iya Espiritu sa mga propeta, nagpadala sang iya anghel sa pagpahibalo sa iya mga alagad, kon ano ang dapat mahanabo sa labing madali.”
Si Jesus nagasiling, “Pamati kamo! Makari ako sa labing madali! Bulahan ang mga nagatuman sang mga pulong nga gintagna sa sini nga libro!”
Salmo sa Pagsabat:
Mga Salmo 95:1-2, 3-5, 6-7
(S) Maranata! Magkari ka, O Ginoong Jesus!
Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)
Kay ang Ginoo isa ka gamhanan nga Dios, gamhanan nga hari kag labaw sang tanan nga mga dios. Nagagahom sia sa bug-os nga duta, halin sa labing madalom nga mga kuweba tubtob sa labing mataas nga mga kabukiran. Nagagahom sia sa dagat nga iya ginhimo, sa duta man nga sia ang nagdihon. (S)
Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. (S)
Aleluya:
San Lucas 21:36
Magbantay kag magpangamuyo kamo pirme agod nga makatindog kamo sa atubangan sang Anak sang Tawo. Aleluya!
Ang Pagbasa sang Santos nga Ebanghelyo suno kay:
San Lucas 21:34-36
Sadto nga panahon, si Jesus nagsiling sa iya mga gintuton-an, “Magbantay kamo! Indi kamo magpatuyang, magpahuboghubog kag magpalibog sa sining kabuhi, basi yadtong Adlaw mag-abot sa inyo sing hinali. Kay yadto nga Adlaw magaabot subong sang isa ka siod sa tanan nga mga tawo sa bug-os nga duta. Magbantay kag magpangamuyo kamo pirme agod nga may kusog kamo kag indi maano kon ini nga mga butang mahanabo, kag makatindog kamo sa atubangan sang Anak sang Tawo.”
No comments:
Post a Comment