"Indi Sila Magpati sa kay Jesus"

Liturhiya sang Pulong

(Biyernes, Hulyo 31, 2020)

San Ignacio de Loyola, Pari

Ang Pagbasa gikan sa Libro ni:

Jeremias nga Propeta 26:1-9

   Sa tapos si Joaquim, anak ni Josias nanginhari sang Juda, ang Ginoo nagsiling sa akon, “Tindog ka sa pasiyuhan sang Templo kag ihambal ang tanan nga ginsugo ko sa imo sa mga tawo nga naggikan sa mga kabanwahanan sang Juda sa pagsimba didto. Indi pagkalimti bisan isa ka butang. Ayhan ang mga tawo magapamati kag magauntat sang ila malaut nga pagginawi. Kon mag-untat sila, dayon magabaylo ako sang akon hunahona nahanungod sa kalaglagan nga akon ginplano nga ipadala sa ila tungod sang ila malaut nga mga binuhatan.”

   Ang Ginoo nagsugo sa akon sa pagsiling sa mga tawo, "Ako, ang Ginoo, nagsiling nga dapat ninyo ako tumanon paagi sa pagsunod sang mga gintudlo ko sa inyo, kag sa pagpamati sa mga pulong sang akon mga alagad, ang mga propeta, nga akon ginpadala sa inyo sing padayon. Wala gid ninyo gintuman ang ila ginsiling. Kon magpadayon kamo sa paglapas sini nga mga butang, dayon, himuon ko sa sini nga Templo ang ginhimo ko sa Silo. Ang tanan nga mga kapungsoran sang kalibutan magagamit sang ngalan sining siyudad subong isa ka pagpakamalaut."

   Ang mga pari, ang mga propeta, kag ang tanan nga mga tawo nakabati sa akon nga nagahambal sini nga mga butang sa sulod sang Templo. Sa tapos ako makahambal gindakop nila ako kag nagsinggit sila, "Dapat ikaw patyon tungod sini! Ngaa nagsiling ka sa ngalan sang Ginoo nga ining Templo manginkaangay sang Silo, kag ini nga siyudad pagalaglagon, kag wala sing bisan sin-o nga magapuyo sa sini?" Dayon ginlibutan ako sang mga tawo.

Salmo sa Pagsabat:

Mga Salmo 69:5, 8-10, 14

(S) O Ginoo, tungod sang imo daku nga gugma, sabta ako.

Ang mga nagadumot sa akon sa wala sing kabangdanan, madamo pa sang sa mga buhok sa akon ulo; ang akon mga kaaway nagasugid sing butig batok sa akon; mga makusog sila kag luyag nila ako patyon. Ginapauli nila sa akon ang mga butang nga wala ko ginkawat. (S) 

Tungod sa imo ginapasipalahan ako, kag ginpakahuy-an gid ako. Kaangay ako sang dumoluong sa akon mga utod, daw sumalayo ako sa akon panimalay. Ang akon katutom sa imo Templo daw kalayo nga nagadabadaba sa sulod nakon, ang mga pagpasipala nga ginpatuhoy sa imo nagtupa sa akon. (S)

Pero ako akon, magapangamuyo ako sa imo, O Ginoo, sabta ako, O Dios, sa tion nga luyag mo, tungod sang imo daku nga gugma, tungod kay ginatuman mo ang imo saad sa pagluwas. (S)

Aleluya:

1 San Pedro 1:25

   Ang pulong sang Ginoo nagapadayon sa gihapon. Amo ini ang pulong nga gindala sa inyo sang Maayong Balita.

Ang Pagbasa sang Santos nga Ebanghelyo suno kay:

San Mateo 13:54-58

   Nagpauli sia sa iya kaugalingon nga banwa. Nagpanudlo sia sa ila sinagoga, kag ang mga nakabati sa iya natingala. Nagpamangkot sila, “Diin bala ini sia nagkuha sining pinasahi nga kaalam kag ngaa makahimo sia sining mga milagro? Indi bala sia ang anak sang panday? Indi bala si Maria ang iya iloy, kag ang iya mga utod amo sanday Santiago, Jose, Simon kag Judas? Indi bala ang iya mga utod nga babayi nagapuyo diri? Diin bala niya ginkuha ini tanan?” Gani indi sila magpati sa iya. 

   Si Jesus nagsiling sa ila, “Ang propeta ginatahod kag ginapati bisan diin, luas lamang sa iya kaugalingon nga banwa kag sa iya panimalay.” Wala sia maghimo didto sing madamo nga mga milagro tungod sang ila pagkadimatinuohon.

Hulyo 30 | Agosto 1

"Nangingintuton-an sang Ginharian sang Langit"

Liturhiya sang Pulong

(Huwebes, Hulyo 30, 2020)

San Pedro Crisologo, Obispo kag Doktor sang Simbahan

Ang Pagbasa gikan sa Libro ni:

Jeremias nga Propeta 18:1-6

   Ang Ginoo nagsiling sa akon, "Dulhog ka sa balay sang maninihon, kag didto ihatag ko sa imo ang akon inughambal." Gani nagkadto ako didto kag nakita ko ang maninihon nga nagaobra sa iya aliling. Kon ang lunang nga sulodlan nga iya ginahimo indi maayo ang korte, ginakuha niya ang lunang kag ginahimo nga iban nga sulodlan.

   Dayon ang Ginoo nagsiling sa akon, “Wala bala ako sing kinamatarong sa paghimo sa inyo nga mga tawo sang Israel sang ginhimo sang maninihon sa lunang? Yara kamo sa akon mga kamot, subong sang lunang sa kamot sang maninihon.

Salmo sa Pagsabat:

Mga Salmo 146:1-2, 3-4, 5-6

(S) Bulahan ang tawo nga ginabuligan sang Dios ni Jacob.

Dayawa ang Ginoo, O kalag ko! Dayawon ko sia samtang nagakabuhi pa ako; magakanta ako sa akon Dios sa bug-os ko nga kabuhi. (S) 

Indi kamo magsalig sa tawhanon nga mga pangulo, ukon sa bisan kay sin-o nga indi makaluwas sa inyo. Kon mapatay sila nagabalik sila sa yab-ok, sa sadto nga adlaw ang tanan nila nga mga plano maga-untat. (S)

Bulahan ang tawo nga ginabuligan sang Dios ni Jacob, kag nagasalig sia sa Ginoo nga iya Dios, nga nagtuga sang langit, duta, kag dagat, kag sang tanan nga yara sa ila. (S)

Aleluya:

Binuhatan 16:14

   Abrihi, O Ginoo ang amon tagipusoon agod mahangpan namon ang mga pulong sang imo anak.

Ang Pagbasa sang Santos nga Ebanghelyo suno kay:

San Mateo 13:47-53

   “Subong man, ang Ginharian sang langit kaangay sang isa ka sahid nga ginladlad sa dagat, kag nagakuha sang sarisari nga mga isda. Sang puno na ang sahid ginbutong ini sang mga mangingisda pa higad kag naglingkod sila sa pagpili sang mga isda. Ang mga maayo ginsulod sa batulang kag ang mga malain ginpilak. Manginsubong man ini sa katapusan sang panahon. Ang mga anghel sang Dios magakari kag magapain sang malaut nga mga tawo sa mga matarong, kag ang mga malaut ila itagbong sa kalayo nga nagadabadaba. Didto magahinibi sila kag magabagrot sang ila mga ngipon.”

   Si Jesus nagpamangkot sa ila, “Nahangpan bala ninyo ini tanan?”

   Nagsabat sila, “Huo.”

   Gani si Jesus nagsiling, “Ini nagakahulogan, nga ang tagsa ka manunodlo sang Kasugoan nga nangingintuton-an sang Ginharian sang langit kaangay sang tag-iya sang balay nga nagakuha sang bag-o kag daan nga mga butang sa iya talaguan.”

   Sa tapos si Jesus makahambal sini nga mga palaanggiran, nagpauli sia sa iya kaugalingon nga banwa..

Hulyo 29 | Hulyo 31

Nagapalibog Ka - Isa gid lang ang Kinahanglan

Liturhiya sang Pulong

(Miyerkules, Hulyo 29, 2020)

Santa Marta

1. Ang Pagbasa gikan sa Libro ni:

Jeremias nga Propeta 7:1-11

   Ginpadala ako sang Ginoo sa puwerta sang Templo, sa diin ang mga tawo sang Juda nagsulod sa pagsimba. Ang Ginoo nagsiling sa akon sa pagtindog didto kag sa pagbantala sang inugsiling sang Ginoo nga Makagagahom, ang Dios sang Israel, “Bayluhi ang inyo pagginawi kag ang mga butang nga inyo ginahimo, agod padayunon ko kamo sa pagkabuhi diri. Untati ninyo ang pagpati sa butig nga mga pulong, ‘Indi kami maano! Amo ini ang Templo sang Ginoo, ang Templo sang Ginoo, ang Templo sang Ginoo!’

   “Bayluhi ang inyo pagginawi kag ang mga butang nga inyo ginahimo. Magtratahay kamo sing husto. Indi na kamo magpamintaha sa mga dumoluong, mga ilo, kag mga balo. Indi kamo magpamatay sang mga tawo nga wala sing sala sa sining duta. Indi na kamo magsimba sa iban nga mga dios, kay ini magalaglag sa inyo. Kon magbaylo kamo padayunon ko kamo sa pagkabuhi sa duta nga akon ginhatag sa inyo mga katigulangan subong ila palanublion nga wala sing katapusan.

   “Tan-awa, nagasalig kamo sa mga pulong nga malimbungon. Nagapangawat kamo, nagapamatay, nagapanginbabayi kag nagapanginlalaki, nagasumpa sing butig, nagadulot sing mga halad kay Baal, kag nagasimba sa iban nga mga dios nga wala gani ninyo makilal-i. Ginahimo ninyo ang akon ginadumtan, kag dayon nagakari kamo kag nagatindog sa akon atubangan, sa akon Templo, kag nagasiling, ‘Indi kami maano!’ Nagahunahona bala kamo nga ang akon Templo palanaguan sang mga makawat? Nakit-an ko ang inyo ginahimo.

Salmo sa Pagsabat:

Mga Salmo 34:2-3, 4-5, 6-7, 8-9, 10-11

(S) Sa gihapon magapasalamat ako sa Ginoo.

Sa gihapon magapasalamat ako sa Ginoo; indi gid ako mag-untat sa pagdayaw sa iya. Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! (S)

Ibantala ta ang pagkadaku sang Ginoo; dayawon ta sing tingob ang iya ngalan! Nagpangamuyo ako sa Ginoo kag ginsabat niya ako; ginkuha niya ang tanan ko nga mga kahadlok. (S)

Ang mga ginapigos nagasalig sa iya kag nagakalipay sila; indi gid sila mapaslawan. Ang mga makalulooy nagapanawag sa iya, kag nagasabat sia sa ila; ginaluwas niya sila sa tanan nila nga mga kalalat-an. (S)

Ang anghel sang Ginoo nagabantay sa tanan nga nagatahod sa iya, kag iya sila ginaluwas sa katalagman. Tilawi kag tan-awon ninyo kon daw ano kaayo ang Ginoo! Bulahan ang tawo nga nagadangop sa iya. (S)

Tahura ninyo ang Ginoo, tanan kamo nga iya mga tawo, kay ang mga nagatahod sa iya indi mawad-an sang tanan nila nga mga kinahanglanon. Bisan pa ang mga leon ginakulangan sing pagkaon kag ginagutman, pero ang nagatuman sa Ginoo indi gid makulangan sang maayo nga mga butang. (S)

2. Ang Pagbasa gikan sa Nahauna nga Sulat ni:

San Juan 4:7-16

   Mga hinigugma, maghigugmaanay kita, kay ang gugma nagagikan sa Dios. Ang nagahigugma anak sang Dios kag nakakilala sa Dios. Ang wala nagahigugma wala makakilala sa Dios, kay ang Dios gugma. Sa sini nga paagi ginpahayag sang Dios ang iya gugma sa aton: ginpadala niya ang iya bugtong nga Anak sa kalibutan agod nga may kabuhi kita paagi sa iya. Amo ini ang gugma: indi tungod kay naghigugma kita sa Dios, kundi nga ang Dios naghigugma sa aton kag nagpadala sang iya Anak agod nga paagi sa iya mapatawad ang aton mga sala. 

   Sa sini nga paagi aton mapat-od nga kita nagakabuhi sa Dios, kag sia nagakabuhi sa aton, kay ginhatag niya sa aton ang iya Espiritu.  Kag nakita naton kag nagasugid kita sa iban nga ang Amay nagpadala sang iya Anak nga mangin-Manlulowas sang kalibutan. Ang nagakilala nga si Jesus amo ang Anak sang Dios, ang Dios nagakabuhi sa iya, kag sia nagakabuhi sa Dios. Kag kita nakakilala kag nagatuo nga ang Dios nagahigugma sa aton.

   Ang Dios gugma, kag ang nagakabuhi sa gugma, nagakabuhi sa Dios kag ang Dios nagakabuhi sa iya. 

Aleluya:

San Juan 8:12

   Ako amo ang kapawa sang kalibutan, siling sang Ginoo; ang nagasunod sa akon may kapawa sang kabuhi.

Ang Pagbasa sang Santos nga Ebanghelyo suno kay:

San Lucas 10:38-42

   Sang nagpadayon si Jesus kag ang iya mga gintuton-an sang ila pagpanglakaton, nakaabot sia sa isa ka baryo. Didto ginbaton sia sang isa ka babayi nga ginahingalanan kay Marta sa iya balay. Si Marta may utod nga babayi nga ginahingalanan kay Maria nga naglingkod sa tiilan sang Ginoo sa pagpamati sang iya pagpanudlo. Si Marta indi na makaarapal sang madamo nga mga hilikuton, gani nagpalapit sia kay Jesus kag nagsiling, “Ginoo, wala ka bala nagakabalaka nga ginapabayaan lang ako sang akon utod sa mga hilimuson? Singgana sia nga magbulig sia sa akon.” 

   Ang Ginoo nagsabat sa iya, “Marta, Marta, nagapalibog ka, kag indi ka mapahamtang tungod sang madamo nga mga butang, pero isa gid lang ang kinahanglan. Husto ang ginpili ni Maria, kag ina indi makuha sa iya.”

Hulyo 28 | Hulyo 30

"Ang mga Matarong Magasilak subong sang Adlaw sa Ginharian sang ila Amay"

Liturhiya sang Pulong

(Martes, Hulyo 28, 2020)

Martes sang Ika-17 nga Semana sang Ordinaryo nga Panahon

Ang Pagbasa gikan sa Libro ni:

Jeremias nga Propeta 14:17-22

   Ang Ginoo nagmando sa akon nga sugiran ko ang mga tawo sang akon kalisod kag magsiling:

     “Kabay nga mag-ilig ang mga luha sa akon

     Mga mata sa adlaw kag sa gab-i,

     Kabay nga indi ako mag-untat sa paghibi,

     Kay ang akon mga tawo napilasan gid sing madalom,

     Kag nasakit gid sila.

     Kon magkadto ako sa mga kaumhan,

     Makita ko ang mga bangkay sang mga tawo nga

     Nagkalamatay sa inaway.

     Kon magkadto ako sa mga kabanwahanan,

     Makita ko ang mga tawo nga nagkalamatay sa gutom.

     Ang mga propeta kag ang mga pari nagapadayon sa

     Ila bulohaton,

     Pero wala sila makahibalo sang ila ginahimo!”

     O Ginoo, ginsikway mo na gid bala ang Juda?

     Ginadumtan mo bala ang mga tawo sang Sion?

     Ngaa bala nga ginhalitan mo gid kami sing tama

     Sa bagay nga indi na kami mag-ayo?

     Nagpangita kami sang paghidait,

     Pero wala kami sing nakuha nga maayo.

     Naglaom kami nga ayuhon,

     Sa baylo nag-abot ang kakugmat.

     Nagpakasala kami batok sa imo, O Ginoo,

     Ginkilala namon ang amon mga sala,

     Kag ang sala sang amon mga katigulangan.

     Dumdoma ang imo mga saad, kag indi kami pagtamaya,

     Indi pagpakahuy-i ang Jerusalem

     Ang duog sang imo mahimayaon nga trono.

     Tumana ang kasugtanan nga imo ginhimo sa amon,

     Kag indi ini paglapasa.

     Wala sing bisan isa sang mga diosdios sang mga

     Kapungsoran ang sarang makapaulan,

     Wala sing bisan isa sa ila

     Ang makapatalithi halin sa langit.

     Naglaom kami sa imo, O Ginoo nga amon Dios,

     Kay ikaw ang nagahimo sini nga mga butang.”

Salmo sa Pagsabat:

Mga Salmo 79:8, 9, 11 kag 13

(S) Para sa imo kaugalingon nga kadungganan, O Ginoo, luwasa kami.

Indi kami pagsiluti tungod sang mga sala sang amon mga katigulangan, sa baylo kaluoyi kami karon, kay nawad-an kami sang tanan nga paglaom. (S)

Buligi kami, O Dios nga amon manlulowas, tungod sa imo kaugalingon nga kadungganan. Luwasa kami kag patawara ang amon mga sala, agod ang mga tawo magadayaw sa imo. (S)

Pamatii ang mga pag-ugayong sang mga binilanggo, kag sa imo daku nga gahom hilwaya yadtong ginpamatbatan nga pagapatyon. Kag kami nga imo mga tawo, ang mga karnero sang imo panong, magapasalamat sa imo sing dayon kag magadayaw sa imo sa tanan nga tion nga palaabuton. (S)

Aleluya:

   Ang Pulong sang Dios amo ang binhi, si Kristo ang manugsab-og; ang bisan sin-o nga nakakita sa iya, nagakabuhi sing walay katapusan.

Ang Pagbasa sang Santos nga Ebanghelyo suno kay:

San Mateo 13:36-43

   Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang.”

   Si Jesus nagsiling sa ila, “Ang tawo nga nagsab-og sang maayo nga binhi amo ang Anak sang Tawo. Ang uma amo ang kalibutan. Ang maayo nga binhi amo ang mga anak sang Ginharian, kag ang mga bugang amo ang mga anak sang Yawa. Ang kaaway nga nagsab-og sang bugang amo si Satanas. Ang tig-alani amo ang katapusan sang panahon, kag ang mga mangangani amo ang mga anghel. Subong nga ang mga bugang gintipon kag ginsunog sa kalayo, amo man ang mahanabo sa katapusan sang panahon. Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala, kag ang tanan nga nagahimo sing malaut. Kag ini sila ihaboy sa nagadabadaba nga kalayo, sa diin magahibi sila kag magabagrot sang ila mga ngipon. Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may dulonggan kamo!”

Hulyo 27 | Hulyo 29

Ano Kaangay ang Ginharian sang Langit

Liturhiya sang Pulong

(Lunes, Hulyo 27, 2020)

Lunes sang Ika-17 nga Semana sang Ordinaryo nga Panahon

Ang Pagbasa gikan sa Libro ni:

Jeremias nga Propeta 13:1-11

   Ang Ginoo nagsugo sa akon sa paglakat kag sa pagbakal sang karsonsilyo nga lino para sa akon kaugalingon kag isuksok ini. Pero ginsingganan niya ako nga indi ini pag-itum-oy sa tubig. Gani nagbakal ako sing karsonsilyo, kag ginsuksok ko ini. Dayon naghambal liwat ang Ginoo sa akon, kag nagsiling, “Kadto ka sa Suba sang Eufrates. Dalha ang karsonsilyo nga imo ginasuksok, kag tagoa ini sa isa ka gikab sa mga bato.” Gani naglakat ako kag gintago ini malapit sa Eufrates.

   Sang makaligad ang pila ka adlaw, ang Ginoo nagsugo sa akon sa pagbalik sa Eufrates kag sa pagkuha sang karsonsilyo. Gani nagbalik ako sa Eufrates. Ginpangita ko ang duog nga akon gintaguan sang karsonsilyo kag akon sila nakita. Nakita ko nga gabok, kag indi na mapuslan.

   Dayon ang Ginoo naghambal sa akon liwat. Nagsiling sia, “Sa sini nga paagi pagalaglagon ko ang bugal sang Juda kag ang daku nga bugal sang Jerusalem. Ining malaut nga mga tawo indi luyag magtuman sang akon mga pulong, kag sila matig-a sing ulo kag malaut sa gihapon. Ginsimba nila kag gin-alagad ang iban nga mga dios. Gani, manginkaangay sila sa sining karsonsilyo nga indi na mapuslan. Subong nga ang karsonsilyo nagahugot sa hawak sang isa ka tawo, amo man ini ang luyag ko sa tanan nga mga tawo sang Israel kag sa tanan nga mga tawo sang Juda nga mag-uyat sila sing hugot sa akon. Ginhimo ko ini agod nga sila mangin-akon mga tawo, kag sila magdayaw kag maghimaya sang akon ngalan, pero indi sila magtuman sa akon.”

Kalantahon sa Pagsabat:

Deuteronomio 32:18-19, 20, 21

(S) Nalimtan nila ang Dios nga naghatag sa ila sing kabuhi.

Nalimtan nila ang ila Dios, ang ila gamhanan nga manlulowas, ang isa nga naghatag sa ila sing kabuhi. “Sang makita ini sang Ginoo, naakig sia, kag ginsikway niya ang iya mga anak nga lalaki kag babayi. (S)

Nagsiling sia, ‘Indi ko na sila pagbuligan, dayon tan-awon ko kon ano ang maabutan nila, yadtong malimbungon kag indi masaligan nga mga tawo. (S)

Ginpaakig nila ako sang ila mga diosdios, ginpaimon nila ako sang ila di-matuod nga mga dios. Gani, paakigon ko sila sa isa ka pungsod nga mga buangboang, paimunon ko sila sa isa ka pungsod nga walawala gid. (S)

Aleluya:

Santiago 1:18

   Sa iya kaugalingon nga kabubot-on, ginhimo niya kita nga iya mga anak paagi sa pulong sang kamatuoran, agod nga manginnahauna kita sa tanan niya nga mga tinuga. 

Ang Pagbasa sang Santos nga Ebanghelyo suno kay:

San Mateo 13:31-35

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang binhi sang mostasa, nga ginkuha sang isa ka tawo kag ginpanggas sa iya uma. Ini labing diutay sa tanan nga binhi, pero kon magtubo ini magataas sia sa tanan nga kahuykahoy kag mangindaku nga kahoy, sa bagay nga ang mga pispis nagadapo kag nagapugad sa iya mga sanga.” 

   Si Jesus nagsugid sa ila sing isa pa gid ka palaanggiran, “Ang Ginharian sang langit kaangay sang lebadora. Ginakuha ini sang isa ka babayi kag ginalamas sa tatlo ka sukob nga arina, tubtob nga maghabok ang bug-os nga linamas.” 

   Si Jesus naggamit sang mga palaanggiran sa pagtudlo sini nga mga butang sa mga tawo. Wala sia sing may ginhambal sa ila nga indi paagi sa palaanggiran. Ginhimo niya ini agod matuman ang ginsiling sang propeta: 

     “Magahambal ako sa ila

     Paagi sa mga palaanggiran,

     Magasugid ako sang mga butang

     Nga wala pa mahibal-i

     Halin sa pagtuga sang kalibutan.” 

Hulyo 26 | Hulyo 28

Ang Manggad sang Ginharian sang Dios

Liturhiya sang Pulong

(Domingo, Hulyo 26, 2020)

San Joaquin kag Santa Ana, Ginikanan sang Mahal nga Birhen Maria

1. Ang Pagbasa gikan sa Nahauna nga Libro sang:

Mga Hari 3:5, 7-12

   Sadto nga gab-i ang Ginoo nagpakita sa iya sa isa ka damgo kag ginpamangkot sia, “Ano ang luyag mo nga ihatag ko sa imo?”

   O Ginoong Dios, ginpabulos mo ako sa akon amay subong nga hari, bisan pamatan-on pa ako kag indi pa makahibalo maggahom. Yari ako upod sa mga tawo nga ginpili mo nga mangin-imo, mga tawo nga madamo gid nga indi sarang maisip. Gani, hatagi ako sing kaalam sa paggahom sing matarong kag sa paghibalo sang maayo kag sang malain. Kay kon indi mo ako paghatagan, ano bala ang paggahom ko sining imo mga tawo nga tama kadamo?”

   Ang Ginoo nalipay nga si Salomon nagpangayo sini, gani nagsiling sia sa iya, “Tungod kay nagpangayo ka sing kaalam sa paggahom sing matarong, sa baylo sang malawig nga kabuhi para sa imo kaugalingon, ukon kamanggaran, ukon kamatayon sang imo mga kaaway, ihatag ko ang ginapangayo mo. Hatagan ko ikaw sing kaalam kag paghangop labaw sa bisan kay sin-o sang una ukon sa ulihi man.

Salmo sa Pagsabat:

Mga Salmo 119:57, 72, 76-77, 127-128, 129-130

(S) O Ginoo, daw ano ang paghigugma ko sang imo kasugoan!

Ikaw gid lang, O GINOO, ang akon ginahandom; nagasaad ako sa pagtuman sang imo mga kasugoan. Ang kasugoan nga imo ginahatag labi pa sa akon sang sa tanan nga pilak sa kalibutan. (S)

Lipaya ako sang imo mapinadayunon nga gugma, suno sa imo ginsaad sa akon nga imo alagad. Kaluoyi ako, kag ako magakabuhi, kay nagakalipay ako sa imo kasugoan. (S)

Ginahigugma ko ang imo mga sugo sing labi pa sa bulawan, labi pa sa pinakapuraw nga bulawan. Gani ginasunod ko ang tanan mo nga mga pagtudlo, kag ginapakalain ko ang di-matarong nga mga pagginawi. (S)

Ang imo mga pagtulon-an maayo gid; ginatuman ko ini sa bug-os ko nga tagipusoon. Ang kasaysayan sang imo mga pagtulon-an nagahatag sing kapawa, kag nagahatag sing kaalam sa mga wala sing tinun-an. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 8:28-30

   Kay nakahibalo kita nga ang tanan nga mga butang ginahimo sang Dios para sa kaayuhan sang mga nagahigugma sa iya, kag sa mga gintawag niya suno sa iya tinutoyo. Kay ang mga ginpili na sang Dios, iya man ginpain, agod manginkaangay sila sang iya Anak, agod nga ang Anak manginpanganay sang madamo nga mga kautoran. Gani, gintawag sang Dios ang iya mga ginpain; kag ang iya mga gintawag, iya man sila ginpakamatarong; kag ang iya ginpakamatarong iya man ginpaambit sang iya himaya. 

Aleluya:

Mateo 11:25

   Bulahan ikaw, O Amay, Ginoo sang langit kag duta, kay ginpahayag mo sa mga di-maalam ang misteryo sang ginharian.

Ang Pagbasa sang Santos nga Ebanghelyo suno kay:

San Mateo 13:44-52

   “Ang Ginharian sang langit kaangay sang manggad nga ginlubong sa uma. Nasapwan ini sang isa ka tawo kag iya liwat gintampukan. Sa daku nga kalipay naglakat sia kag ginbaligya niya ang tanan niya nga mga pagkabutang, kag nagbalik sa pagbakal sadto nga uma.”

   “Subong man, ang Ginharian sang langit kaangay sang isa ka negosyante nga nagpangita sang malahalon nga perlas. Sang pagkakita niya sang isa ka perlas nga malahalon, naglakat sia kag ginbaligya niya ang tanan niya nga mga pagkabutang kag ginbakal ang perlas.” 

   “Subong man, ang Ginharian sang langit kaangay sang isa ka sahid nga ginladlad sa dagat, kag nagakuha sang sarisari nga mga isda. Sang puno na ang sahid ginbutong ini sang mga mangingisda pa higad kag naglingkod sila sa pagpili sang mga isda. Ang mga maayo ginsulod sa batulang kag ang mga malain ginpilak. Manginsubong man ini sa katapusan sang panahon. Ang mga anghel sang Dios magakari kag magapain sang malaut nga mga tawo sa mga matarong, kag ang mga malaut ila itagbong sa kalayo nga nagadabadaba. Didto magahinibi sila kag magabagrot sang ila mga ngipon.” 

   Si Jesus nagpamangkot sa ila, “Nahangpan bala ninyo ini tanan?” 

   Nagsabat sila, “Huo.” 

   Gani si Jesus nagsiling, “Ini nagakahulogan, nga ang tagsa ka manunodlo sang Kasugoan nga nangingintuton-an sang Ginharian sang langit kaangay sang tag-iya sang balay nga nagakuha sang bag-o kag daan nga mga butang sa iya talaguan.” 

Hulyo 25 | Hulyo 27

"Wala Magkari agod Alagaron kundi sa Pag-alagad"

Liturhiya sang Pulong

(Sabado, Hulyo 25, 2020)

Santiago, Apostoles

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 4:7-15

   Pero kami nga may espirituhanon nga manggad kaangay sang tibod nga duta, sa pagpakita nga ang labing daku nga gahom indi amon, kundi iya sang Dios. Masunson kami ginaipit-ipit sang palaligban, pero wala kami maligsa. Kon kaisa nagapangduhadoha kami, pero wala kami mawad-i sing paglaom. Madamo ang amon mga kaaway, pero wala man kami mawad-i sing abyan. Kag bisan nga kon kaisa nasakit gid kami, pero wala man kami malaglag. Sa tanan nga tion ginadala namon sa amon lawas nga mamalatyon ang kamatayon ni Jesus, agod nga ang iya kabuhi makita man sa amon lawas. Sa bug-os namon nga pagkabuhi yara kami pirme sa katalagman sang kamatayon tungod kay Jesus, agod nga ang iya kabuhi makita sa sining amon mamalatyon nga lawas. Ini nagakahulogan nga ang kamatayon nagapanghikot sa amon, pero ang kabuhi nagapanghikot sa inyo.

   Ang kasulatan nagasiling, “Naghambal ako kay nagtuo ako.” Sa amo man nga espiritu sang pagtuo, nagahambal man kami kay nagatuo kami. Kay nakahibalo kami nga ang Dios, nga nagbanhaw kay Ginoong Jesus, magabanhaw man sa amon upod kay Jesus kag magadala sa amon upod sa inyo sa iya atubangan. Ini tanan para sa inyo, kag sa nagadamo kag nagadamo ang mga tawo nga ginalambot sang grasya sang Dios, magadamo pa gid ang ila pagpangamuyo sang pagpasalamat, sa himaya sang Dios.

Salmo sa Pagsabat:

Mga Salmo 126:1-2, 2-3, 4-5, 6

(S) Ang nagatanom nga nagahilibion, nagatipon sang patubas nga may kasadya.

Sang ginpabalik kita sang Ginoo sa Sion, daw isa lang yadto ka dalamguhanon! Daw ano ang aton pagkinadlaw kag pagkinanta sa kalipay! (S)

Dayon ang iban nga mga pungsod nagsiling nahanungod sa aton,“Ang Ginoo naghimo sing dalagku nga mga butang sa ila!” Matuod gid naghimo sia sing dalagku nga mga butang sa aton, daw ano kita sadto ka malipayon! (S)

O Ginoo, dalha kami pabalik sa amon duta, subong nga ang imo ulan nagadala sang tubig pabalik sa mamala nga mga suba. Himoa man nga yadtong nagtanom nga nagahilibion, magtipon sang patubas nga may kasadya! (S)

Yadtong mga naghibi samtang nagagowa sila nga nagadala sing binhi magabalik nga nagakanta sa kalipay, nga nagadala sang ila patubas! (S)

Aleluya:

Juan 15:16

   Ako ang nagpili sa inyo gikan sa sining kalibutan agod maglakat sa pagpamunga, ang sahi sang bunga nga nagapadayon, siling sang Ginoo.

Ang Pagbasa sang Santos nga Ebanghelyo suno kay:

San Mateo 20:20-28

   Dayon nagpalapit kay Jesus ang asawa ni Zebedeo upod sa iya mga anak nga lalaki, nagluhod sa iya atubangan, kag may ginpangabay.

   Si Jesus nagpamangkot sa iya, “Ano bala ang luyag mo?” 

   Ang babayi nagsabat, “Ginapangabay ko nga kon maghari ka na, papungkoa ining duha ko ka anak, ang isa sa imo tuo kag ang isa sa imo wala.”

   Si Jesus nagsabat sa ila, “Wala kamo makahibalo sang inyo ginapangayo. Sarang bala kamo makainom sa kupa nga akon pagaimnan sa indi na lang madugay?” 

   Nagsabat sila, “Huo, sarang kami.”

   Nagsiling si Jesus sa ila, “Sarang kamo matuod makainom sa kupa nga akon pagaimnan. Pero ang pagpapungko sa akon tuo ukon sa akon wala, indi ako ang magahatag sina. Ini nga mga pulongkoan para lamang sa ila nga gin-amanan sang akon Amay.”

   Sang pagkabati sini sang napulo ka mga gintuton-an naakig sila sa duha ka mag-utod. Gani gintawag sila tanan ni Jesus kag ginsingganan, “Inyo nahibaluan nga ang mga pangulo may gahom sa ila mga tinawo kag nagapagusto lang sila sang ila himuon sa ila mga tinawo. Pero lain iya ang para sa inyo. Kay kon may isa sa inyo nga luyag magpangulo, dapat sia magmanginsuloguon ninyo. Kag kon may isa sa inyo nga luyag mangin-una, dapat sia mangin-ulipon ninyo. Subong nga ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.”

Hulyo 24 | Hulyo 26

Ang Bisan Sin-o nga Nagapamati sang Mensahi kag Nagahangop Sini

Liturhiya sang Pulong

(Biyernes, Hulyo 24, 2020)

San Sarbelio Makhluf, Pari

Ang Pagbasa gikan sa Libro ni:

Jeremias nga Propeta 3:14-17

   “Balik kamo, O maluibon nga mga tawo; ako ang inyo Ginoo. Magakuha ako sing isa sa inyo gikan sa tagsa ka banwakag duha gikan sa tagsa ka baranggay, kag pabalikon ko kamo sa Bukid sang Sion. Hatagan ko kamo sing mga pangulo nga nagatuman sa akon, kag magagahom sila sa inyo nga may kaalam kag ihibalo. Dayon kon magdamo na kamo sa sadto nga duta, ang mga tawo indi na maghambal nahanungod sang Kaban sang Kasugtanan. Indi na sila maghunahona nahanungod sini ukon madumdoman pa nila ini. Wala na sila sini sing kinahanglan, ukon maghimo pa sila sing isa. Kon mag-abot yadto nga tion, ang Jerusalem pagatawgon nga ‘trono sang Ginoo,’ kag ang tanan nga mga kapungsoran magatipon didto sing tingob sa pagsimba sa akon. Indi na sila maghimo suno sa ginasiling  sang ila matig-a kag malaut nga mga tagipusoon. 

Kalantahon sa Pagsabat:

Jeremias 31:10, 11-12, 13

(S) Ang Ginoo magabantay sa ila subong sang pagbantay sang isa ka manugbantay sa iya mga panong.

Ang Ginoo nagasiling, “Mga kapungsoran magpamati kamo sa akon kag ibantala ang akon mga pulong sa malayo nga mga baybayon. Ginpaalaplaag ko ang akon mga tawo, pero pagatiponon ko sila, kag magabantay sa ila subong sang pagbantay sang isa ka manugbantay sa iya mga panong. (S) 

Ginhilway ko ang mga tawo sang Israel, kag ginluwas sila gikan sa isa ka gamhanan nga pungsod. Magakari sila kag magaamba tungod sa kalipay sa Bukid sang Sion, kag malipay sila sang akon mga regalo, nga trigo, bino, kag lana sang olivo, nga karnero kag baka. (S)

Dayon ang mga dalaga magasaot kag magakinalipay, kag ang mga lalaki, pamatan-on kag tigulang, magahinugyaw. Lipayon ko sila kag bayluhan ko ang ila kalisod sa kalipay, ang ila kasubo sa kasadya. (S) 

Aleluya:

Lucas 8:15

   Bulahan ang nagatipig sang pulong sa maayo kag masinulondon nga tagipusoon kag nagapadayon tubtob nga magpamunga sila. 

Ang Pagbasa sang Santos nga Ebanghelyo suno kay:

San Mateo 13:18-23

   “Gani, pamatii ninyo kag tun-i kon ano ang kahulogan sang palaanggiran nahanungod sang manugsab-og. Ang mga nagapamati sang mensahi nahanungod sang Ginharian pero wala makahangop, kaangay sila sang binhi nga nagtupa sa alagyan. Nagaabot ang Yawa kag nagaagaw sang ginsab-og sa ila tagipusoon. Ang binhi nga nagtupa sa batuhon nga duta amo ang mga nagapamati kag nagabaton sing malipayon sang pulong. Pero wala ini nagatudok kag nagadugay sa ila. Gani kon mag-abot ang kapipit-an ukon paghingabot tungod sang mensahi nagabiya sila gilayon. Ang binhi nga nagtupa sa mga talungon amo ang nagapamati sang mensahi, pero ang mga palaligban sang pangabuhi, kag ang paghigugma sang manggad nagalumos sang mensahi, kag wala ini nagapamunga. Ang binhi nga nagtupa sa maayo nga duta, amo ang mga nagapamati sang mensahi kag nagahangop sini. Nagapatubas sila sing 100 ka pilo, ang iban 60 ka pilo, kag ang iban 30 ka pilo.”

Hulyo 23 | Hulyo 25

Madamo ang Naghandom Magpamati sa Inyo Ginapamatian

Liturhiya sang Pulong

(Huwebes, Hulyo 23, 2020)

San Brigida, Relihiyosa

Ang Pagbasa gikan sa Libro ni:

Jeremias nga Propeta 2:1-3, 7-8, 12-13

   Ang GINOO nagsugo sa akon sa pagsugid sa tagsatagsa sa Jerusalem sang iya mensahi:

     “Nadumdoman ko kon daw ano katutom sa imo 

     Sang pamatan-on pa ikaw, 

     Kon daw ano ang paghigugma mo sa akon 

     Sang bag-o pa lang kita makasal. 

     Ginsunod mo ako sa desierto, 

     Sa duta nga wala pa matamni.

     O Israel, akon lamang ikaw, 

     Ikaw ang labing matinggas sa akon patubas. 

     Ginpaantos ko ang tanan nga nagpintas sa imo, 

     Kag ginpadalhan ko sila sing kalisdanan. 

     Ako, ang GINOO, naghambal sini.”

     Gindala ko sila sa mapatubason nga duta, 

     Sa pagpulos sang iya sini patubas 

     Kag sang iban pa nga maayo nga mga butang. 

     Pero sa baylo ginlaglag nila ang akon duta. 

     Gindagtaan nila ang duta nga akon ginhatag sa ila. 

     Ang mga pari wala magpamangkot, ‘Diin na bala ang GINOO?’ 

     Ang akon kaugalingon nga mga pari wala makakilala sa akon. 

     Ang mga pangulo nagpamatok sa akon, 

     Ang mga propeta nagpanagna sa ngalan ni Baal 

     Kag nagsimba sa mga diosdios nga wala sing pulos.” 

     Gani, nagasugo ako nga ang langit 

     Mag-uyog sa kahadlok, 

     Nga magkahangawa kag magkatingala.

     Kay ang akon mga tawo nakahimo sing duha ka sala: 

     Ginbayaan nila ako, 

     Nga tuboran sang mabugnaw nga tubig. 

     Nagkutkot sila sing mga bubon, 

     Sing mga bubon nga indi matiniran sang tubig.” 

Salmo sa Pagsabat:

Mga Salmo 36:6-7, 8-9, 10-11

(S) lkaw ang ginahalinan sang tanan nga kabuhi, O Ginoo.

Ang imo mapinadayunon nga gugma, O Ginoo, nagalambot sa kalangitan, ang imo pagkamatutom tubtob sa kahawaan. Ang imo pagkamatarong malig-on kaangay sang dalagku nga mga bukid, ang imo mga paghukom kaangay sang kadadalman sang dagat. (S) 

Daw ano ka bilidhon, O Dios, sang imo mapinadayunon nga gugma! Ang mga tawo makapanago sa landong sang imo mga pakpak. Nagapaayaw-ayaw sila sang bugana nga pagkaon sa imo balay; ginapainom mo sila sa suba sang imo kaayo. (S)

lkaw ang ginahalinan sang tanan nga kabuhi, kag tungod sang imo kapawa makakita kami sing kapawa. Padayuna man ang paghigugma mo sa mga nakakilala sa imo, kag ang paghimo sang maayo sa mga matarong. (S) 

Aleluya:

Mateo 11:25

   Bulahan ikaw, O Amay, Ginoo sang langit kag duta, kay ginpahayag mo sa mga di-maalam ang misteryo sang ginharian.

Ang Pagbasa sang Santos nga Ebanghelyo suno kay:

San Mateo 13:10-17

   Dayon ang mga gintuton-an nagpalapit kay Jesus kag nagpamangkot sa iya, “Ngaa nagahambal ka sa mga tawo paagi sa mga palaanggiran?” 

   Si Jesus nagsabat, “Ang paghibalo sang mga tinago sang Ginharian sang langit ginhatag sa inyo kag indi sa ila. Kay ang tawo nga may iya pagahatagan pa gid, agod nga magsulobra ang iya; pero ang wala iya bisan ang diutay nga yara sa iya pagakuhaon pa. Naghambal ako sa ila paagi sa mga palaanggiran, tungod kay nagatulok sila pero indi makakita, kag nagapamati sila pero indi makabati ukon makahangop. Gani natuman sa ila ining tagna ni Isaias: 

     ‘Magapamati lang kamo nga pamati,

     Pero indi kamo makahangop, 

     Magatulok lang kamo nga tulok, 

     Pero indi kamo makakita. 

     Kay ini nga mga tawo matig-a sing ulo,

     Gintakpan nila ang ila mga dulonggan,

     Kag ginpiyong nila ang ila mga mata.

     Kay kon indi nila paghimuon ini,

     Basi makakita ang ila mga mata, 

     Makabati ang ila mga dulonggan

     Makahangop ang ila mga panghunahona

     Kag magaliso sila sa akon,

     Siling sang Dios,

     Kag ako magaayo sa ila.’ 

“Kamo inyo bulahan gid! Kay ang inyo mga mata makakita kag ang inyo mga dulonggan makabati. Dumdoma ninyo ini! Madamo nga mga propeta kag mga tawo sang Dios ang naghandom sa pagtan-aw sang inyo nakita, pero indi sila makakita, kag luyag magpamati sa inyo ginapamatian pero wala sila iya makabati.” 

Hulyo 22 | Hulyo 24

"Nakit-an Ko ang Ginoo!"

Liturhiya sang Pulong

(Miyerkules, Hulyo 22, 2020)

Santa Maria Magdalena

Ang Pagbasa gikan sa Sulat ni San Pablo nga Apostol, sa mga:

Taga-Corinto 5:14-17

   Kay ginagamhan kami sang gugma ni Cristo, karon nga nakilala namon nga may isa ka tawo nga nagpanginmatay para sa tanan nga mga tawo, kag ini nagakahulogan nga ang tanan nga mga tawo nagpakig-ambit sa iya kamatayon. Nagpanginmatay sia para sa tanan nga mga tawo, agod nga ang nagakabuhi indi na magkabuhi para sa ila kaugalingon, kundi para lang sa iya nga napatay kag ginbanhaw tungod sa ila. 

   Gani, wala na kami nagahukom sa bisan kay sin-o suno sa tawuhanon nga talaksan. Bisan nga sang una naghukom kami kay Cristo suno sa tawuhanon nga talaksan, karon wala na kami nagahimo sina. Ang bisan sin-o nga nahiusa kay Cristo bag-o na sia nga tinuga—ang daan wala na, ang tanan bag-o na.

Salmo sa Pagsabat:

Mga Salmo 63:2, 3-4, 5-6, 8-9 

(S) Ang akon kalag ginahidlaw sa imo, O Dios ko.

O Dios, ikaw ang akon Dios, ginahidlaw ako sa imo.Ang akon bug-os nga kaugalingon nagahandom gid sa imo, ang akon kalag ginauhaw sa imo, kaangay sang kigas, lamgod, kag namalhan nga duta. (S) 

Tugoti ako nga makita ko ikaw sa santuaryo, ipakita sa akon ang imo pagkagamhanan kag pagkamahimayaon. Ang imo mapinadayunon nga gugma maayo pa sang sa kabuhi, gani dayawon ko ikaw. (S)

Tubtob nga buhi ako magapasalamat ako sa imo; bayawon ko ang akon mga kamot sa pagpangamuyo sa imo. Ang akon kalag magapaayaw-ayaw kag mabusog,kag magakanta ako sa imo sang masadya nga mga ambahanon  sa pagdayaw. (S) 

Tungod kay ikaw ang nagabulig sa akon sa gihapon. Sa landong sang imo mga pakpak nagakanta ako sa kalipay. Nagakapyot ako sa imo, kag gina-uyatan mo ako sing malig-on agod indi ako maano. (S) 

Aleluya:

   Isiling sa amon O Maria, ano bala ang nakita mo sa dalanon? Ang lulobngan ni Kristo nga nabuhi, kag nakita ko ang himaya sang nagkalabanhaw.

Ang Pagbasa sang Santos nga Ebanghelyo suno kay:

San Juan 20:1-2, 11-18

   Aga pa gid sang nahauna nga adlaw sang simana sang madulomdulom pa, si Maria Magdalena nagkadto sa lulobngan, kag nakita niya nga nakuha na ang bato sa puwertahan sang lulobngan. Nagdalagan sia kag nagkadto kay Simon Pedro kag sa gintuton-an nga hinigugma ni Jesus, kag ginsugiran sila, “Ginkuha nila ang Ginoo sa lulobngan, kag wala kami makahibalo kon diin nila sia ginbutang!” 

   Karon si Maria nagtindog nga nagahilibion sa gwa sang lulobngan. Samtang nagahibi sia, nagduko kag nagsid-ing sia sa lulobngan, kag nakita niya nga may duha ka anghel didto nga nagabayu sing puti. Nagalingkod sila sa duog nga ginhamyangan sang bangkay ni Jesus. Ang isa sa tiilan kag ang isa sa ulohan. Ginpamangkot nila sia, “Babayi, ngaa bala nagahibi ka?” 

   Nagsabat sia, “Ginkuha nila ang akon Ginoo kag wala ako makahibalo kon diin nila sia ginbutang!” 

    Sang makasiling sia sini, nagliso sia kag iya nakita si Jesus nga nagatindog didto, pero wala niya makilala nga si Jesus yadto. Si Jesus nagpamangkot sa iya, “Babayi, ngaa bala nagahibi ka? Sin-o bala ang imo ginapangita?” 

   Naghunahona si Maria nga hardinero sia, gani nagsiling sia sa iya, “Tyoy, kon ikaw ang nagkuha sa iya, sugiri ako kon diin mo sia ginbutang, kay kuhaon ko sia.” 

   Si Jesus nagsiling sa iya, “Maria!” Nagliso si Maria sa pag-atubang kay Jesus kag nagsiling sa Hebreo, “Rabboni!” (Kon sayuron, “Manunodlo.”) 

   Si Jesus nagsiling sa iya, “Indi ka anay mag-uyat sa akon, kay wala pa ako makakayab sa Amay. Pero kadtoi ang akon mga utod kag sugiri sila nga magakayab ako sa akon Amay kag inyo Amay, sa akon Dios kag inyo Dios.” 

   Gani si Maria Magdalena nagsugid sa mga gintuton-an nga nakita niya ang Ginoo, kag ginsilingan niya sila sini nga mga butang. 

Hulyo 21 | Hulyo 23

Sin-o bala ang Akon mga Utod?

Liturhiya sang Pulong

(Martes, Hulyo 21, 2020)

Martes sang Ika-16 nga Semana sang Ordinaryo nga Panahon

Ang Pagbasa gikan sa Libro ni:

Miqueas nga Propeta 7:14-15, 18-20

   Magmanugbantay ka sa imo mga tawo, O Ginoo, ang mga tawo nga imo ginpili. Nagakabuhi sila nga silahanon lamang sa desierto nga ginalibutan sang maayo nga duta. Tugoti sila sa pagkadto kag maghalab sa matambok nga halalban sang Basan kag Galaad, subong sang ila ginhimo sang una nga mga panahon.

   Maghimo ka sing mga milagro para sa amon, O Ginoo, subong sang imo ginhimo sadtong mga adlaw sang imo pagpagwa sa amon gikan sa Egipto.

   O Ginoo, wala sing iban nga dios nga kaangay sa imo. Ginapatawad mo ang mga sala sang imo nabilin nga mga tawo. Wala ka nagakaakig sing dayon, kundi nagapakita ka sang imo malig-on nga paghigugma. Magamaluloy-on ka sa amon liwat. Pagatasakon mo ang amon mga sala, kag itagbong ini sa kadadalman sang dagat. Magapakita ka sang imo katutom kag malig-on nga paghigugma sa imo mga tawo nga Israelinhon nga mga kaliwat ni Abraham suno sa imo ginsumpa sa amon mga katigulangan sadtong una nga panahon.

Salmo sa Pagsabat:

Mga Salmo 85:2-4, 5-6, 7-8

(S) O Ginoo, ipakita sa amon ang imo mapinadayunon nga kaluoy kag gugma.

O Ginoo, nanginmaayo ka sa imo duta; ginpauswag mo liwat ang Israel. Ginpatawad mo ang mga sala sang imo mga tawo kag ginpasaylo mo ang ila mga sayop. Wala na ikaw nagakaakig sa ila kag ginpaiway mo ang imo kasingkal. (S)

Pabalika kami, O Dios nga amon manlulowas, kag indi ka na magkaakig sa amon! Magakaakig bala ikaw sing dayon sa amon? Indi na gid bala mag-untat ang imo kaakig? (S)

Nagapakiluoy kami, kon mahimo, bag-uha ang amon kusog, kag kami, nga imo mga tawo, magadayaw sa imo. Ipakita sa amon ang imo mapinadayunon nga gugma, O Ginoo, kag luwasa kami. (S)

Aleluya:

Juan 14:23

    Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya. 

Ang Pagbasa sang Santos nga Ebanghelyo suno kay:

San Mateo 12:46-50

   Nagahambal pa si Jesus sa mga tawo, sang mag-abot ang iya iloy kag mga utod nga lalaki. Naghulat sila sa gwa kag nagpangabay nga makapakighambal sa iya. Gani ang isa sa mga tawo didto nagsiling kay Jesus, “Yara sa gwa nagahulat ang imo iloy kag mga utod nga lalaki. Luyag sila magpakighambal sa imo.” 

   Si Jesus nagsabat, “Sin-o bala ang akon iloy? Sin-o bala ang akon mga utod?” Dayon gintudlo niya ang iya mga gintuton-an kag nagsiling, “Tan-awa ninyo, yari ang akon iloy kag mga utod. Kay ang bisan sin-o nga nagatuman sang kabubot-on sang akon Amay sa langit amo ang akon utod nga lalaki, utod nga babayi, kag akon iloy.”

Hulyo 20 | Hulyo 22

Ang Di-diosnon nga mga Tawo karon nga Panahon Nagapangayo sing Milagro

Liturhiya sang Pulong

(Lunes, Hulyo 20, 2020)

San Apolinario, Obispo kag Martir

Ang Pagbasa gikan sa Libro ni:

Miqueas nga Propeta 6:1-4, 6-8

   Pamatii ninyo ang ginasiling sang Ginoo batok sa Israel. Magtindog ka, O Ginoo, kag ihambal ang imo panumbong samtang nagsaksi ang mga bukid. Pabatia ang mga bakulod sang imo ginahambal.

   Mga bukid, kamo nga mga sadsaran sang duta sa walay katubtoban, pamatii ninyo ang panumbongon sang Ginoo. Ang Ginoo may panumbongon batok sa iya mga tawo. Isumbong niya ang Israel.

   Ang Ginoo nagasiling, “Mga tawo ko, ano bala ang nahimo ko sa inyo? Tungod sa ano nanginpalas-anon ninyo ako? Sabta ninyo ako. Gindala ko kamo pagwa halin sa Egipto. Ginluwas ko kamo sa pagkaulipon. Ginpadala ko si Moises, si Aaron kag si Miriam sa pagpangulo sa inyo.

   Ano bala ang dalhon ko sa Ginoo, ang Dios sang langit, kon magkadto ako sa pagsimba sa iya? Magadala bala ako sang labing matambok nga mga tinday sang baka nga sunogon subong halad sa iya? Malipay bala ang Ginoo kon dalhan ko sia sing linibo nga mga karnero, ukon wala nagauntat nga pag-ilig sang lana nga olivo? Ihalad ko bala ang akon panganay nga anak sa pagbayad sang akon mga sala?” Kamo nga mga tawo bisan diin, ang Ginoo nagsiling sa inyo kon ano ang maayo. Amo ini ang ginapangayo niya sa inyo: himoa ninyo ang matarong, maghigugma sing malig-on, kag magtuman sa inyo Dios sing mapainuboson.

Salmo sa Pagsabat:

Mga Salmo 50:5-6, 8-9, 16-17, 21 kag 23

(S) O Ginoo, maayo ka kag mapinatawaron.

“Tipona sa akon ang matutom ko nga mga tawo, ang mga naghimo sing kasugtanan sa akon paagi sa isa ka halad.” Ginapahayag sang kalangitan nga ang Dios matarong, nga sia gid amo ang hukom! (S)

Wala ako nagasaway sa imo tungod sang imo mga halad kag sang mga halad nga sinunog nga imo pirme ginahalad sa akon. Wala ako kinahanglan sang toro nga mga baka gikan sa inyo mga pastuhan, ukon mga kanding gikan sa inyo mga kahayupan. (S)

Ngaa bala ginapabutyag mo ang akon mga sugo? Ngaa bala nagahambal ka nahanungod sang akon kasugtanan? Indi ka magpatudlo sa akon, ginasikway mo ang akon mga sugo. (S)

Ini tanan ginhimo mo, kag naghipos lang ako, gani nagpanghunahona ka nga kaangay ako sa imo. Pero karon sabdungon ko ikaw, kag ipaathag ini nga butang sa imo. Ang mga pagpasalamat amo ang halad nga nagapadungog sa akon, kag luwason ko gid ang tanan nga nagatuman sa akon.” (S)

Aleluya:

Mga Salmo 95:8

    Karon nga adlaw indi ninyo pagpatig-aha ang inyo mga kasingkasing; kundi pamatii ninyo ang ginasiling sang Ginoo.

Ang Pagbasa sang Santos nga Ebanghelyo suno kay:

San Mateo 12:38-42

   Dayon may mga manunodlo sang Kasugoan kag mga Fariseo nga nagsiling kay Jesus, “Manunodlo, luyag kami makakita sa imo nga nagahimo sing milagro.” 

   Si Jesus nagsabat, “Daw ano kalaut kag di-diosnon sang mga tawo karon nga panahon! Nagapangayo bala kamo sa akon sing milagro? Wala sing milagro nga ihatag sa inyo luas sang milagro nga natabo sa kay Jonas nga propeta. Subong nga si Jonas nagpabilin didto sa tiyan sang daku nga isda sa sulod sing tatlo ka adlaw kag tatlo ka gab-i, subong man ang Anak sang Tawo magapabilin sa kadadalman sang duta sa sulod sing tatlo ka adlaw kag tatlo ka gab-i. Sa Adlaw sang Paghukom ang mga tawo sa Ninive magasumbong sa inyo tungod kay naghinulsol sila sang ila mga sala sang pagkabati nila kay Jonas nga nagawali. Karon may isa diri nga labaw pa kay Jonas! Sa Adlaw sang Paghukom ang Rayna sa Bagatnan magasumbong sa inyo, tungod kay nagkari sia halin pa sa malayo gid nga lugar sa pagpamati sang kaalam ni Salomon kag yari karon nagasiling ako sa inyo, may isa diri nga labaw pa kay Salomon!” 

Hulyo 19 | Hulyo 21

Ang mga Matarong Magasilak subong sang Adlaw sa Ginharian sang Ila Amay

Liturhiya sang Pulong

(Domingo, Hulyo 19, 2020)

Ika-16 nga Domingo sang Ordinaryo nga Panahon

1. Ang Pagbasa gikan sa Libro sang:

Kaalam ni Salomon 12:13, 16-19

   Ang tanan nga mga butang yara sa idalom sang imo pagtatap, kag wala na sing iban pa nga dios nga imo mahatagan katarungan ang imo mga pamat-od. Ang imo kusog amo ang ginagikanan sang imo katarungan. Mapakita mo ang kaluoy sa tanan tungod kay ikaw ang Ginoo sang tanan. Ginapahayag mo ang imo gahom kon ang tawo magpangduhadoha sang imo himpil nga masarangan, kag imo ginasilutan ang si sin-o man nga nakahibalo sang imo gahom pero wala niya ini ginasapak. Bisan matuod nga wala sing latid ang imo gahom, pero maluloy-on ikaw nga hukom. Sa imo luyag imo kami mahukman pero sa baylo imo kami ginagamhan nga naupdan sang daku nga pagpailob.

   Paagi sa imo mga buhat, gintudloan mo ang tawo nga ang matarong dapat nga maluloy-on. Ginhatagan mo sing dili mapatpat nga paglaom ang imo mga tawo dira sa pagtugot sa ila sa paghinulsol sang ila mga sala. 

Salmo sa Pagsabat:

Mga Salmo 86:5-6, 9-10, 15-16

(S) O Ginoo, maayo ka kag mapinatawaron.

O Ginoo, maayo ka kag mapinatawaron, puno sang mapinadayunon nga gugma sa tanan nga nagapangamuyo sa imo. Pamatii man, O Ginoo, ang akon pangamuyo, dungga ang akon pagpangayo sing bulig. (S)

Ang tanan nga mga kapungsoran nga imo gintuga magakari kag magaluhod sa imo. Magadayaw sila sang imo pagkagamhanan. Ikaw gamhanan kag nagahimo sang makatilingala nga mga butang; ikaw lamang amo ang Dios. (S)

Apang ikaw, O Ginoo, maluloy-on ka kag mahigugmaon nga Dios, indi madali mangakig, malulo kag matutom sa gihapon. Balik kag kaluoyi ako; pabakura kag luwasa ako, kay ako nagaalagad sa imo subong sang ginhimo sang akon iloy. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 8:26-27

   Sa amo man nga bagay, kita nga mga maluya ginabuligan sang Espiritu. Kay indi kita makahibalo kon paano magpangamuyo, kundi ang Espiritu amo ang nagapakiluoy sa Dios para sa aton sa mga pag-ugayong nga indi masaysay sa mga tinaga. Kag ang Dios nga nagausisa sang tagipusoon sang mga tawo nakahibalo man sang panghunahona sang Espiritu. Kay ang Espiritu nagapakiluoy sa Dios para sa iya mga tumoluo kag suno sa iya kabubot-on. 

Aleluya:

Mateo 11:25

    Bulahan ikaw, O Amay, Ginoo sang langit kag duta, kay ginpahayag mo sa mga di-maalam ang misteryo sang ginharian.

Ang Pagbasa sang Santos nga Ebanghelyo suno kay:

San Mateo 13:24-43

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang isa ka tawo nga nagsab-og sang maayo nga binhi sa iya uma. Isa ka gab-i, sang nagakatulog ang mga tawo, nag-abot ang iya kaaway kag ginsab-ugan man sang bugang ang iya uma kag naglakat. Sang nagtubo ang tanom, kag nagpamunga, ang mga bugang nagtubo man. Ang mga suloguon sang tawo nagkadto sa iya kag nagsiling, ‘Sir, maayo nga binhi ang imo ginsab-og sa imo nga uma, pero diin bala maghalin ining mga bugang?’ Nagsabat sia, ‘Ginsab-og ini sang kaaway.’ Nagpamangkot sila, ‘Luyag mo bala nga panggabuton namon ang mga bugang?’ Nagsabat sia, ‘Indi lang, kay basi may magabot man kamo nga mga trigo kaupod sa mga bugang. Pabay-i lang ninyo anay nga magpamuhi ang mga bugang kag ang mga trigo tubtob sa tig-alani, kay kon tig-alani na singganon ko ang mga mangangani: Gabuta anay ninyo ang mga bugang, bugkosa ini kag idap-ong sa kalayo. Dayon tipuna ninyo ang trigo kag isulod sa akon tambubo.’ ” 

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang binhi sang mostasa, nga ginkuha sang isa ka tawo kag ginpanggas sa iya uma. Ini labing diutay sa tanan nga binhi, pero kon magtubo ini magataas sia sa tanan nga kahuykahoy kag mangindaku nga kahoy, sa bagay nga ang mga pispis nagadapo kag nagapugad sa iya mga sanga.” 

   Si Jesus nagsugid sa ila sing isa pa gid ka palaanggiran, “Ang Ginharian sang langit kaangay sang lebadora. Ginakuha ini sang isa ka babayi kag ginalamas sa tatlo ka sukob nga arina, tubtob nga maghabok ang bug-os nga linamas.” 

   Si Jesus naggamit sang mga palaanggiran sa pagtudlo sini nga mga butang sa mga tawo. Wala sia sing may ginhambal sa ila nga indi paagi sa palaanggiran. Ginhimo niya ini agod matuman ang ginsiling sang propeta: 

     “Magahambal ako sa ila 

     Paagi sa mga palaanggiran,

     Magasugid ako sang mga butang

     Nga wala pa mahibal-i

     Halin sa pagtuga sang kalibutan.” 

   Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang.” 

   Si Jesus nagsiling sa ila, “Ang tawo nga nagsab-og sang maayo nga binhi amo ang Anak sang Tawo. Ang uma amo ang kalibutan. Ang maayo nga binhi amo ang mga anak sang Ginharian, kag ang mga bugang amo ang mga anak sang Yawa. Ang kaaway nga nagsab-og sang bugang amo si Satanas. Ang tig-alani amo ang katapusan sang panahon, kag ang mga mangangani amo ang mga anghel. Subong nga ang mga bugang gintipon kag ginsunog sa kalayo, amo man ang mahanabo sa katapusan sang panahon. Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala, kag ang tanan nga nagahimo sing malaut. Kag ini sila ihaboy sa nagadabadaba nga kalayo, sa diin magahibi sila kag magabagrot sang ila mga ngipon. Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may dulonggan kamo!” 

Hulyo 18 | Hulyo 20

Tubtob nga Magapangibabaw ang Katarungan

Liturhiya sang Pulong

(Sabado, Hulyo 18, 2020)

Sabado sang Ika-kinse nga Semana sang Ordinaryo nga Panahon

Ang Pagbasa gikan sa Libro ni:

Miqueas nga Propeta 2:1-5

   Kailo ang mga nagahigda nga wala nagakatulog kag nagaplano sing kalautan! Pagkaaga, kon may kahigayunan lang sila, ginahimo nila ang kalautan nga ila ginplano. Kon luyag sila sing mga duta, ginaagaw nila ini. Kon luyag sila sing mga balay, ginaagaw man nila ini. Ginaagaw nila ang mga balay kag ang mga pagkabutang sang mga tawo.

   Gani ang Ginoo nagasiling, “Nagaplano ako sa pagpadala sing kalalat-an sa inyo, kag indi kamo makapalagyo. Indi na kamo makalakat nga may bugal, kay manginmalain ini nga panahon para sa inyo. Kon mag-abot ina nga panahon, ang mga tawo magagamit sang inyo inagihan subong mga halimbawa sang kalalat-an, kag magakanta sila sining masubo nga kalantahon:

     Nalaglag kami sing bug-os!

     Ang Ginoo nagkuha sang amon duta.

     Ginhatag niya ini sa mga nagbihag sa amon.’”

   Gani wala sing isa sa inyo nga pagahatagan sing duta sa adlaw nga partihon ini liwat sa mga tawo sang Dios.

Salmo sa Pagsabat:

Mga Salmo 10:1-2, 3-4, 7-8, 14

(S) Indi pagkalimti ang ginapigos, O Ginoo.

Ngaa bala kalayo sa imo, O GINOO? Ngaa bala nagapanago ka sa tion sang kinagamo? Ang mga malaut bugalon kag nagahingabot sang mga imol; kabay nga masiod gid sila sang mga siod nga ila ginhimo. (S)

Ginapabugal sang malaut nga tawo ang iya malaut nga mga handom, ang dalok nagapasipala kag nagasikway sa GINOO. Ang malaut nga tawo wala nagasapak sa GINOO; sa iya pagpabugal nagahunahona sia nga ang Dios bali wala. (S)

Ang iya hambal puno sing mga pasipala, kabutigan kag pamahog, madali sia maghambal sang malaut kag malain nga mga pulong. Didto sia sa mga puongpuong nagapanago; nagahulat sia didto kag nagapamatay sang mga tawo nga wala sing sala. Ginabantayan gid niya ang iya palatyon nga wala sing makatabang. (S)

Pero nagatan-aw ka; makita mo ang pag-antos kag kalisod, kag handa ka gihapon sa pagbulig. Sa imo ginatugyan sang maluya ang iya kaugalingon, tungod kay nagabulig ka sa gihapon sa mga nawad-an. (S)

Aleluya:

2 Corinto 5:19

   Ang Dios nagahimo sang tanan nga mga tawo nga iya mga abyan paagi kay Cristo, kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Mateo 12:14-21

   Ang mga Fariseo naglakat kag naghimbon sila sa pagpatay kay Jesus. 

   Sang mahibaluan ini ni Jesus, naghalin sia sa sadto nga duog kag ginsunod sia sang madamo nga mga tawo. Gin-ayo niya ang tanan nga masakiton, kag ginpaandaman nga indi sila magpanugid bisan kay sin-o nahanungod sa iya, agod matuman ang ginsiling ni Isaias nga propeta: 

     “Yari ang akon alagad

     Nga akon ginpili,

     Siling sang Dios,

     Ang akon hinigugma

     Nga sa iya nahamuot ako.

     Ang akon espiritu ibutang ko sa iya,

     Kag sia magapahibalo

     Sang akon paghukom

     Sa mga kapungsoran. 

     Pero indi sia magbais

     Ukon magsinggit,

     Ukon mabatian ang iya hambal

     Sa mga dalan. 

     Indi sia magbali

     Bisan sang luma na nga tigbaw,

     Ukon magpatay sang nagapiraw nga suga,

     Tubtob nga magapangibabaw

     Ang katarungan, 

     Kag ang tanan nga mga tawo

     Magasalig sa iya.”

Hulyo 17 | Hulyo 19

Indi mga Halad nga Sapat ang Luyag Ko kundi ang Pagkaluoy

Liturhiya sang Pulong

(Biyernes, Hulyo 17, 2020)

Biyernes sang Ika-kinse nga Semana sang Ordinaryo nga Panahon

Ang Pagbasa gikan sa Libro ni:

Isaias nga Propeta 38:1-6, 21-22, 7-8

   Sa sadto man nga tion, si Haring Ezequias nagmasakit kag diutayan lang mapatay. Ang propeta nga si Isaias nga anak ni Amoz nagduaw sa iya kag ginsingganan sia, “Ang Ginoo nagasiling nga ipahamtang mo sing nagakaigo ang tanan nga mga butang kay indi na ikaw mag-ayo. Maghanda ka kay ikaw mapatay.”

   Si Ezequias nag-atubang sa dingding kag nagpangamuyo: “Dumdoma, O Ginoo, nga nag-alagad ako sa imo sing matutom kag mainunongon, kag nagtinguha gid ako sa paghimo sang imo luyag nga himuon ko.” Kag nagsugod sia sa paghibi sing tudo gid.

   Dayon ang Ginoo nagsugo kay Isaias sa pagbalik kay Ezequias kag singganon sia, “Ako, ang Ginoong Dios sang inyo amay nga si David, nakabati sang imo pangamuyo kag nakakita sang imo mga luha; palawigon ko sing 15 pa ka tuig ang imo kabuhi. Luwason ko ikaw kag ini nga siyudad sang Jerusalem gikan sa hari sang Asiria, kag padayunon ko ang pag-apin sa siyudad.

   Si Isaias nagsiling sa hari nga hampulan niya ang iya hubag sang panit sang higos, agod nga mag-ayo sia. Dayon si Haring Ezequias nagpamangkot, “Ano bala ang tanda sa pagpamatuod nga sarang na ako makakadto sa Templo?”

Kalantahon sa Pagsabat:

Isaias nga Propeta 38:10, 11, 12, 16

(S) Ginluwas mo ang akon kabuhi, O Ginoo, indi ako mapatay.

Naghunahona ako nga samtang nagahingurosgan pa ako magakadto ako sa kalibutan sang mga patay nga indi na maglawig ang akon kabuhi. (S)

Naghunahona ako nga sa sining kalibutan sang mga buhi indi ko makita liwat ang Ginoo, ukon ang bisan sin-o nga buhi. (S)

Ang akon kabuhi gin-utod kag natapos, kaangay sang tolda nga ginguba, kaangay sang panapton nga gin-utod sa iya tiral. (S)

O Ginoo, magakabuhi ako tungod sa imo tungod sa imo lamang; ayuha ako, kag tugoti nga magkabuhi.(s)

Aleluya:

Juan 10:27

   Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 12:1-8

   Isa sadto ka tion sa Adlaw nga Inugpahuway, si Jesus nag-agi sa tunga sang kaumhan sang trigo. Ginutom ang iya mga gintuton-an, gani nagpangutol sila sang mga uhay kag ginkaon. Sang makita ini sang mga Fariseo nagsiling sila kay Jesus, “Tan-awa bala, ang ginhimo sang imo mga gintuton-an batok sa Kasugoan sa Adlaw nga Inugpahuway!” 

   Si Jesus nagsabat, “Wala gid bala ninyo mabasahi ang ginhimo ni David sang sia kag ang iya mga kaupdanan ginutom? Nagsulod sia sa balay sang Dios, kag ginkaon niya upod sang iya mga tinawo ang tinapay nga nahalad sa Dios, bisan pa batok sa Kasugoan para sa ila ang pagkaon sadto nga tinapay. Kay yadto nga tinapay para lamang sa mga pari. Kag wala man bala ninyo mabasahi sa Kasugoan ni Moises nga sa Adlaw nga Inugpahuway, ang mga pari sa templo nagalapas sang Kasugoan sa tagsa ka Adlaw nga Inugpahuway, pero wala man sila makasala? Nagasiling ako sa inyo, may yari diri nga daku pa sa templo. Kon inyo lamang nahibaluan kon ano ang kahulogan sini nga kasulatan, ‘Indi mga halad nga sapat ang luyag ko, kundi ang pagkaluoy,’ wala ninyo kuntani paghukmi ang mga wala sing sala. Kay ang Anak sang Tawo amo ang Ginoo sang Adlaw nga Inugpahuway.” 

Hulyo 16 | Hulyo 18

Itakod ang Akon Gota sa Inyo kag Magtuon Kamo sa Akon

Liturhiya sang Pulong

(Huwebes, Hulyo 16, 2020)

Ang Mahal nga Birhen Maria sang Carmelo

Ang Pagbasa gikan sa Libro ni:

Isaias nga Propeta 26:7-9, 12, 16-19

   O Ginoo, ginapahapos mo ang dalan sang maayo nga mga tawo; ang dalan nga ila ginaagyan matapan.Ginatuman namon ang imo kabubot-on kag nagasalig kami sa imo; ikaw lamang ang amon ginahandom.Sa kagab-ihon ginahandom ko ikaw sa bug-os ko nga tagipusoon; kon maghukom ka sa kalibutan kag sa iya mga pumoluyo sila tanan magakilala sang pagkamatarong.

   O Ginoo, imo kami pauswagon, kay ang tanan namon nga mga binuhatan nahimo namon tungod sang imo bulig. O Ginoo, ginsilutan mo ang imo mga tawo, kag sa daku nga kalisod nagpangamuyo sila sa imo. O Ginoo, ikaw ang nagpahibi sa amon, subong sang isa ka babayi nga manugbata nga ginasakitan.Kami ginasakitan kag nagaugayong, pero wala man kami sing ginbun-ag. Wala kami sing gindaog para sa amon duta; wala kami sing nahimo.

   Yadtong amon mga tawo nga nagkalamatay mabuhi liwat! Ang ila mga bangkay mabanhaw! Yadtong mga nagakatulog sa ila mga lulobngan magabangon kag magakanta sa kalipay! Kaangay sang nagaigpat nga tun-og nga nagapabugnaw sang duta, amo man ang Ginoo magabuhi sadtong dugay na nga nagkalamatay.

Salmo sa Pagsabat:

Mga Salmo 102:13-14 kag 15, 16-18, 19-21

(S) Gikan sa langit ang Ginoo nagtamod sa duta.

Pero ikaw, O Ginoo, hari sa walay katapusan, ang tanan nga mga kaliwatan magadumdom sa imo. Magatindog ka kag magakaluoy sa Sion; nag-abot na ang tion sa pagkaluoy sa iya; Ang imo mga alagad nagahigugma sa iya, bisan nga nalaglag na sia; naluoy sila sa iya bisan nga naguba na sia. (S)

Ang mga pungsod magakahadlok sa Ginoo; ang tanan nga mga hari sang duta magakahadlok sa iya gahom. Kon ang Ginoo magpatindog liwat sang Sion, ipakita niya ang iya pagkagamhanan. Magapamati sia sa iya mga tawo nga ginpatumbayaan kag pagasabton niya ang ila pangamuyo. (S)

Isulat para sa palaabuton nga kaliwatan ang ginhimo sang Ginoo, agod ang mga tawo nga wala pa mabun-ag magadayaw sa iya. Ang Ginoo nagtamod halin sa iya balaan nga duog sa kahitaasan, nagtamod sia sa duta gikan sa langit, sa pagpamati sang mga ugayong sang mga binilanggo, kag sa paghilway sang mga ginpamatbatan sing kamatayon. (S)

Aleluya:

Mateo 11:28

   Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Mateo 11:28-30

   “Kari kamo sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo kag magtuon kamo sa akon, kay ako malulo kag mapainuboson sing tagipusoon, kag makapahuway kamo. Ang akon gota mahapos, kag ang akon karga mamag-an.”

Hulyo 15 | Hulyo 17

Ang Langitnon nga Butang Ginpahayag sa mga Di-maalam

Liturhiya sang Pulong

(Miyerkules, Hulyo 15, 2020)

San Buenaventura, Obispo kag Doktor sang Simbahan

Ang Pagbasa gikan sa Libro ni:

Isaias nga Propeta 10:5-7, 13-16

   Ang Ginoo nagsiling, “Ginagamit ko ang Asiria subong sang balakol sa pagsilot sang akon mga ginaakigan.Ginpadala ko ang Asiria sa pagsalakay sa isa ka pungsod nga indi diosnon, nga nagpaakig sa akon. Ginpadala ko sila sa pagpang-ati, pagpangawat kag pagtasak sang mga tawo kaangay sang lunang sa mga dalan.”

   Pero ang hari sang Asiria may malain nga tuyo. Nagpamat-od sia sa paglaglag sang madamo nga mga pungsod.

   Ang hari nagsiling, “Ako gid sini ang naghimo. Gamhanan ako, maalam kag maabtik. Ginkuha ko ang mga dulonan sa tunga sang mga pungsod kag ginkuha ko ang ila mga pagkabutang nga ila natipon. Kaangay sang isa ka toro nga baka gintasak ko ang mga nagapuyo didto. Ang mga kapungsoran sa kalibutan kaangay sang pugad sang pispis, kag ginkuha ko ang ila mga manggad kaangay sang pagkuha ko sang mga itlog. Wala sing pakpak nga nagkapakapa sa pagpahadlok sa akon, ukon nag-iyagak sa akon!”

   Pero ang Ginoo nagasiling, “Makasiling bala ang wasay nga gamhanan pa sia sang sa nagagamit sa iya? Labi pa bala ang lagari sang sa nagagamit sini? Ang balakol wala nagadala sang tawo kundi ang tawo nagadala sang balakol.”

   Ang Ginoo nga Makagagahom magapadala sing balatian sa pagsilot sa mga matambok. Sa ila mga lawas may kalayo nga nagapadayon sa pagdabdab.

Salmo sa Pagsabat:

Mga Salmo 94:5-6, 7-8, 9-10, 14-15

(S) Ang Ginoo indi magbiya sang iya mga tawo.

Ginahingabot nila ang imo mga tawo, O Ginoo, ginapigos nila ang imo kaugalingon nga mga tawo. Ginapamatay nila ang mga babayi nga balo kag ang mga ilo, kag ginapamatay man nila ang mga dumoluong nga nagapuyo sa amon duta. (S)

Nagasiling sila, “Ang Ginoo indi makakita sa aton; ang Dios sang Israel wala nagasapak!” O mga tawo ko, daw ano gid kabuangboang sa inyo? San-o pa bala kamo makatuon? (S)

Ang Dios ang naghimo sang aton mga dulonggan, indi bala sia makabati? Sia ang naghimo sang aton mga mata,indi bala sia makakita? Sia ang nagagahom sa mga kapungsoran, indi bala sia magsilot sa ila? Sia ang manunodlo sang tanan nga mga tawo, indi bala sia makahibalo? (S)

Ang Ginoo indi magbiya sang iya mga tawo, indi niya sila pagsikwayon. Ang katarungan makita liwat sa mga hukmanan, kag pagasakdagon ini sang tanan nga matarong nga mga tawo. (S)

Aleluya:

Mateo 11:25

   Bulahan ikaw, O Amay, Ginoo sang langit kag duta, kay ginpahayag mo sa mga di-maalam ang misteryo sang ginharian.

Ang Pagbasa sang Santos nga Ebanghelyo suno kay:

San Mateo 11:25-27

   Sa sadto nga tion si Jesus nagsiling, “O Amay, Ginoo sang langit kag duta! Nagapasalamat ako sa imo tungod kay ginpahayag mo sa mga di-maalam, ang ginlipdan mo sa mga maalam kag may mataas nga tinun-an. Huo, O Amay, kay amo ini ang imo nahamut-an. “Ang akon Amay nagtugyan sa akon sang tanan nga butang. Wala sing nakakilala sa Anak luas ang Amay, kag wala man sing nakakilala sa Amay luas ang Anak kag ang bisan sin-o nga luyag ipahayag sang Anak ang Amay. 

Hulyo 14 | Hulyo 16

Luyag Ka bala nga Bayawon pa Langit?

Liturhiya sang Pulong

(Martes, Hulyo 14, 2020)

Martes sang Ika-kinse nga Semana sang Ordinaryo nga Panahon

1. Ang Pagbasa gikan sa Libro ni:

Isaias nga Propeta 7:1-9

   Sang si Acaz nga anak ni Jotam kag apo ni Uzias amo ang hari sang Juda, si Rezin nga hari sang Siria upod kay Peca nga anak ni Remalias nga hari sang Israel, naggubat sang Jerusalem, pero wala nila ini maagaw.

   Sang pagkabati sang hari sang Juda nga ang mga hangaway sang Siria yara na sa duta sang Israel, sia kag ang iya mga tinawo hinadlukan gid sa bagay nga nagkulorog sila kaangay sang mga kahoy nga ginauyog sang hangin.

   Ang Ginoo nagsiling kay Isaias, “Dalha ang imo anak nga si Sear Jasub kag maglakat ka sa pagsugata kay Haring Acaz. Makita mo sia sa dalan sa diin nagaobra ang mga manughabol, sa punta sang kanal nga ginailigan sang tubig halin sa punong sa naibabaw. Singgana sia nga mag-andam, magkalma, kag indi magkahadlok ukon magsalasala. Ang kaakig ni Haring Rezin kag sang iya mga tinawo nga taga-Siria, kag ni Haring Peca wala sing katalagman pareho sang aso halin sa duha ka dungkolan. Ang Siria, upod sa Israel kag sang iya hari naghimbon. Ang tuyo nila amo ang paggubat sang Juda, sa pagpahadlok sa mga tawo agod mag-upod sa ila, kag dayon himuon ang anak ni Tabeel nga hari.

   “Pero ako, ang Ginoo, nagasiling nga indi ini matabo. Tungod kay ang Siria indi magbakod sang sa Damasco, kag ang Damasco indi magbakod sang sa kay Haring Rezin. Nahanungod sa Israel, sa sulod sang 65 ka tuig malaglag ini kag indi na makatindog subong isa ka pungsod. Ang Israel indi magbakod sang sa siyudad sang Samaria, kag ang Samaria indi magbakod sang sa kay Haring Peca.

   “Kon ang inyo pagtuo indi mabakod, indi kamo makapadayon.’”

Salmo sa Pagsabat:

Mga Salmo 48:2-3, 3-4, 5-6, 7-8

(S) Ang Dios magabantay sang siyudad nga indi maano sa wala sing katapusan.

Gamhanan ang Ginoo, kag dapat gid dayawon sa siyudad sang aton Dios, sa iya balaan nga bukid mataas kag matahom; nagadala sing kalipay sa bug-os nga kalibutan! (S)

Ang Sion, ang bukid sang Dios, ang siyudad sang gamhanan nga hari. Ang Dios nagapakita nga upod sa iya wala sing katalagman sa sulod sang mga pamakod sang siyudad. (S)

Nagtipon ang mga hari kag nagkari sa pagsalakay sang bukid sang Sion. Sang pagkakita nila sini, natingala sila; hinadlukan sila kag nagpalagyo. (S)

Didto gindakop sila sang kahadlok kag kasakit, subong sang isa ka babayi nga manugbata. Ginapangguba sang Dios ang dalagku nga mga sakayan sa hangin nga timog. (S)

Aleluya:

Mga Salmo 95:8

   Karon nga adlaw indi ninyo pagpatig-aha ang inyo mga kasingkasing; kundi pamatii ninyo ang ginasiling sang Ginoo.

Ang Pagbasa sang Santos nga Ebanghelyo suno kay:

San Mateo 11:20-24

   Dayon ginpangbasol ni Jesus ang mga banwa sa diin naghimo sia sang kalabanan sang iya mga milagro kay ang mga tawo didto wala maghinulsol sang ila mga sala. “Kailo ka man Corazin! Kailo ka man Betsaida! Kay kon ang mga milagro nga ginhimo sa inyo ginhimo sa Tiro kag Sidon, dugay na kuntani ang mga tawo didto nagbayu sang sako kag nagbutang sing abo sa ila ulo sa pagpakita nga nagbiya sila sa ila mga sala! Gani dumdoma ninyo nga sa Adlaw sang Paghukom, sobra pa ang silot nga inyo pagabatunon sang sa Tiro kag Sidon. Kag ikaw man Capernaum luyag ka bala nga bayawon pa langit? Itagbong ka sa impiyerno! Kay kon ang mga milagro nga nahimo sa imo ginhimo sa Sodoma, kuntani ang Sodoma ara pa tubtob karon! Gani, dumdoma ninyo nga sa Adlaw sang Paghukom sobra pa ang silot nga batunon mo sang sa Sodoma!”

Hulyo 13 | Hulyo 15