Nobyembre 5, 2020, Huwebes sang Ika-31 nga Semana sang Tuig

Liturhiya sang Pulong

Nahauna nga Balasahon - Filipos 3:3-8A

Salmo sa Pagsabat - Mga Salmo 105:2-3, 4-5, 6-7

Aleluya - Mateo 11:28

Ebanghelyo - Lucas 15:1-10

Ang mga Makasasala ang Nagpalapit sa kay Jesus

Ang Pagbasa gikan sa Sulat ni San Pablo nga Apostol, sa mga:

Taga-Filipos 3:3-8A

    Mga Utod: Kay kita ang nakabaton sang matuod nga pagkatinuli kag indi sila, kay kita nagasimba sa Dios paagi sa iya Espiritu, kag nagakalipay sa aton pagkabuhi kay Cristo Jesus. Wala kita nagasalig sa mga seremoniya nga makita. Kon sa bagay ako makasalig man sa sini nga mga butang. Kon may nagahunahona nga makasalig sia sa sini nga mga seremoniya nga makita, labi pa gid ako. Gintuli ako sang walo pa lang ka adlaw. Natawo ako nga Israelinhon, sa tribo ni Benjamin, isa ka tunay nga Hebreo. Kon nahanungod sa pagtuman sang Kasugoan sang mga Judio, isa ako ka Fariseo, kag sa akon kakugi akon pa gani ginhingabot ang mga katapo sang iglesia. Nahanungod sang pagkamatarong sang tawo paagi sa pagtuman sang Kasugoan, wala sing nakulang sa akon. Pero yadto tanan nga mga butang nga makabig kuntani nakon nga kadalag-an, ginbilang ko karon nga kapiyerdihan tungod kay Cristo. Indi lamang yadto nga mga butang, kundi ang tanan ginakabig ko nga kapiyerdihan tungod sa labi pa gid ka malahalon nga butang, nga amo ang pagkilala ko kay Cristo Jesus nga akon Ginoo.

Salmo sa Pagsabat:

Mga Salmo 105:2-3, 4-5, 6-7

(S) Ang tanan nga nagaalagad sa Ginoo magkalipay! 

Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya! Magakalipay kamo kay iya kita; ang tanan nga nagaalagad sa Ginoo magkalipay! (S)

Magdangop kamo sa Ginoo agod buligan; magpabilin kamo sa iya atubangan sa gihapon dumdoma ninyo ang iya gamhanan kag makatilingala nga mga milagro, kag ang mga paghukom sa iya ginhatag. (S)

Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili, ang Ginoo amo ang aton Dios; ang iya mga sugo para sa bug-os nga kalibutan. (S)

Aleluya:

San Mateo 11:28

    Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Lucas 15:1-10

   Sang isa ka tion madamo nga mga manugsokot sang buhis kag mga makasasala ang nagpalapit sa pagpamati kay Jesus. Ang mga Fariseo kag ang mga manunodlo sang Kasugoan nagkulomuron, “Ini nga tawo nagabaton sang mga makasasala kag nagakaon pa gani upod sa ila.” Gani si Jesus naghambal sa ila sining palaanggiran:

   “Abi kon ang isa sa inyo may 100 ka karnero kag madula ang isa sa ila, ano bala ang iya himuon? Bayaan niya ang 99 sa halalban kag magalakat sia sa pagpangita sang nadula nga karnero tubtob makita niya ini. Kon makita niya ini malipayon gid sia sa pagpas-an kag sa pagdala pauli. Dayon tipunon niya ang iya mga abyan kag mga kaingod kag magasiling sa ila, ‘Magkalipay kamo upod sa akon kay nakita nakon ang nadula ko nga karnero!’ Nagasiling ako sa inyo, nga sa amo man nga bagay, may labi pa nga kalipay sa langit tungod sa isa ka makasasala nga nagahinulsol, sang sa 99 nga matarong nga wala nagakinahanglan sing paghinulsol.”

   “Ukon abi ang isa ka babayi nga may napulo ka salapion madulaan sang isa. Ano ang himuon niya? Magasindi sia sang suga, magasilhig sia sang iya balay, kag magapangita gid sia sing maayo bisan diin tubtob nga makita niya ini. Kon makita na niya ini, tipunon niya ang iya mga abyan kag mga kaingod kag magasiling sa ila, ‘Magkalipay kamo upod sa akon, kay nakita ko ang nadula ko nga salapi!’ Sa amo man nga bagay, nagasiling ako sa inyo, ang mga anghel sang Dios nagakalipay tungod sa isa ka makasasala nga nagahinulsol.”

Nobyembre 4 | Nobyembre 6

Nobyembre 1, 2020, Ang Tanan nga mga Santos

 Liturhiya sang Pulong

Nahauna nga Balasahon - Bugna 7:2-4, 9-14

Salmo sa Pagsabat - Mga Salmo 24:1-2, 3-4, 5-6

Ikaduha nga Balasahon - 1 Juan 3:1-3

Aleluya - Mateo 11:28

Ebanghelyo - Mateo 5:1-12

"Magkalipay kag Maghinugyaw Kamo, tungod kay Daku ang inyo balos sa Langit"

1. Ang Pagbasa gikan sa:

Bugna kay Juan 7:2-4, 9-14

   Kag nakita ko ang isa pa ka anghel nga nagakari gikan sa sidlangan nga may selyo sang Dios nga buhi. Gintawag niya sa mabaskog nga tingog ang apat ka mga anghel nga ginhatagan sang Dios sing gahom sa paghalit sang duta kag sang dagat. Ang anghel nagsiling, “Indi paghaliti ang duta, ukon ang dagat ukon ang mga kahoy, tubtob nga mamarkahan namon sang selyo ang mga agtang sang mga alagad sang aton Dios.” Kag ginsugiran ako sang kadamuon sadtong ginpangmarkahan sang selyo sang Dios sa ila mga agtang. Ang ila kadamuon, 144,000, halin sa tanan nga mga tribo sang Israel. 

    Sa tapos sini nagtan-aw ako, kag may madamo nga mga tawo, nga wala sing isa nga sarang makaisip sa ila. Nagikan sila sa tagsa ka rasa, tribo, pungsod, kag linggwahe, kag nagtindog sila sa atubangan sang trono kag sang Cordero. Nagabayu sila sing puti kag malaba, kag may mga palma sila nga ginauyatan. Nagsinggit sila sing mabaskog, “Ang amon kaluwasan nagagikan sa amon Dios, nga nagalingkod sa trono, kag gikan sa Cordero!” Ang tanan nga mga anghel nagtindog sa palibot sang trono, sang mga katigulangan kag sang apat ka buhi nga mga tinuga. Dayon nagluhod sila sa atubangan sang trono, kag nagsimba sa Dios, nga nagasiling, “Kabay pa! Ang pagdayaw, ang himaya, ang kaalam, ang mga pagpasalamat, ang kadungganan, ang gahom, kag ang kusog iya sang aton Dios sa walay katapusan! Kabay pa!” 

    Ang isa sang mga katigulangan nagpamangkot sa akon, “Sin-o ina nga mga tawo nga nagabayu sing puti, kag diin bala sila maghalin?” 

    Nagsabat ako, “Tiyoy, wala ako makahibalo. Ikaw ang nakahibalo.” 

    Nagsiling sia sa akon, “Amo ini ang mga tawo nga nakaluwas sa daku nga paghingabot. Ginlabhan nila ang ila mga bayu kag ginpaputi nila sa dugo sang Cordero.

Salmo sa Pagsabat:

Mga Salmo 24:1-2, 3-4, 5-6

(S) Amo ini ang mga tawo nga nagapangita sa pagtan-aw sang imo nawong, O Ginoo. 

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)

Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag panghunahona, nga wala nagasimba sa mga dios-dios. (S)

Pagabendisyunan sia sang Ginoo, kag ang Dios nga iya Manluluwas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

2. Ang Pagbasa gikan sa Nahauna nga Sulat ni:

San Juan 3:1-3

   Talupangda ninyo kon daw ano ang paghigugma sang Amay sa aton! Ang iya gugma para sa aton tama ka daku sa bagay nga ginatawag kita nga mga anak sang Dios, kag matuod gid man nga amo kita. Gani ang kalibutan wala makakilala sa aton, kay wala ini nakakilala sa Dios. Mga hinigugma ko, karon mga anak na kita sang Dios, ugaling indi pa maathag kon mangin-ano kita sa ulihi. Pero nakahibalo kita nga kon magpahayag si Cristo, manginkaangay kita niya, kay makita naton ang iya matuod nga kinaugali. Ang tagsatagsa nga may iya sini nga paglaom kay Cristo nagapaputli sang iya kaugalingon subong nga si Cristo putli. 

Aleluya:

San Mateo 11:28

   Kari kamo sa akon, tanan kamo nga ginabudlayan kag ginabug-atan, kay papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Mateo 5:1-12

   Sang makita ni Jesus ang mga nagadinugok nga mga tawo nagtaklad sia sa bakulod. Nagpalapit sa iya ang iya mga gintuton-an kag naglingkod sia sa pagtudlo sa ila sang masunod: 

    “Bulahan ang mga nagakilala 

    Sang kinahanglanon sang ila mga kalag, 

    Kay ila ang Ginharian sang langit! 

    “Bulahan ang mga nagakasubo, 

    Kay pagalipayon sila sang Dios! 

    “Bulahan ang mga mapainuboson, 

    Kay magabaton sila 

    Sang ginsaad sang Dios! 

    “Bulahan ang may daku nga handom 

    Nga magmatarong 

    Suno sa ginapaabot sang Dios, 

    Kay ang Dios 

    Magahatag sing katumanan 

    Sina nga handom! 

    “Bulahan ang mga maluloy-on, 

    Kay pagakaluoyan man sila sang Dios! 

    “Bulahan ang may putli nga tagipusoon, 

    Kay makita nila ang Dios! 

    “Bulahan ang nagapaluntad 

    Sang paghidait 

    Sa tunga sang mga tawo, 

    Kay ang Dios magatawag sa ila 

    Nga iya mga anak! 

    “Bulahan ang mga ginahingabot 

    Tungod kay ginatuman nila 

    Ang ginapaabot sang Dios sa ila, 

    Kay ila ang Ginharian sang langit! 

    “Bulahan kamo kon ang mga tawo magpasipala kag maghingabot kag magbutangbotang sa inyo tungod kay kamo sumolunod ko. Magkalipay kag maghinugyaw kamo, tungod kay daku ang inyo balos sa langit.

Oktubre 31 | Nobyembre 2 

Setyembre 17, 2020, Huwebes sang Ika-24 nga Semana sang Tuig

 Liturhiya sang Pulong

San Roberto Belarmino

Obispo kag Doktor sang Simbahan

Nahauna nga Balasahon - 1 Corinto 15:1-11

Salmo sa Pagsabat - Mga Salmo 118:1-2, 16-17, 28

Aleluya - Mateo 11:28

Ebanghelyo - Lucas 7:36-50

"Diin ang Magahigugma sing Labi"

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:1-11

   Karon, mga utod, luyag ko ipahanumdom sa inyo ang Maayong Balita nga ginwali ko sa inyo, nga inyo ginbaton kag sa sini ang inyo pagtuo napasad sing malig-on. Amo ina ang Maayong Balita nga ginwali ko sa inyo. Naluwas kamo paagi sa Maayong Balita kon ginhuptan ninyo ini sing malig-on, luas kon nagtuo kamo sing pasapayan. 
   Ginpaalinton ko sa inyo ang isa ka butang nga labi ka importante nga akon nabaton: si Cristo napatay tungod sang aton mga sala, suno sa mga Kasulatan. Ginlubong sia kag ginbanhaw sa ikatlo ka adlaw, suno sa mga Kasulatan. Nagpakita sia kay Pedro, kag sang ulihi sa dose ka mga apostoles. Sa tapos sini nagpakita sia sa sobra sa 500 sang iya mga sumolunod sing tingob, nga ang kalabanan sa ila buhi pa, kag ang iban patay na. Sang ulihi nagpakita sia kay Santiago kag dayon sa tanan nga mga apostoles. 
   Sa katapusan nagpakita man sia sa akon, bisan nga ako kasubong sang isa nga natawo sa wala pa ang tion. Kay ako ang labing kubos sa mga apostoles. Kon sa bagay, indi gani ako takos nga pagatawgon nga apostol, kay ginhingabot ko ang iglesia sang Dios. Pero sa kaluoy sang Dios nangin-amo ako sini karon, kag ang grasya nga ginhatag niya sa akon indi nanginwalay pulos. Sa baylo, nagpangabudlay ako sing labi pa sa tanan nga mga apostoles, bisan nga indi gid man ako ang nagpangabudlay, kundi ang grasya sang Dios nga yari sa akon. Gani, bisan kon naghalin ini sa akon ukon sa ila man, amo ini ang amon tanan ginawali, kag amo ini ang inyo ginatuohan. 

Salmo sa Pagsabat:

Mga Salmo 118:1-2, 16-17, 28

(S) Magpasalamat sa Ginoo kay maayo siya.

Magpasalamat sa Ginoo, kay maayo siya, kag ang iya gugma nagapadayon sa gihapon. Magsiling ang mga tawo sang Israel, “Ang iya gugma nagapadayon sa gihapon.” (S)
Ang iya gahom nagpadaog sa aton, ang iya gamhanan nga kusog sa inaway!” Indi ako mapatay, kundi magakabuhi, kag isugid ko ang ginhimo sang Ginoo. (S) 
Ikaw ang akon Dios, kag nagapasalamat ako sa imo; ibantala ko ang imo pagkagamhanan. (S)

Aleluya:

San Mateo 11:28

   Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Lucas 7:36-50

   Si Jesus gin-agda sang isa ka Fariseo nga magkaon upod sa iya. Nagkadto si Jesus sa balay sining Fariseo kag nagkaon didto. May isa ka makasasala nga babayi nga nagapuyo sa amo nga banwa. Nakabati sia nga si Jesus yara sa balay sang Fariseo nga nagakaon. Nagkadto sia didto nga may dala nga tibudtibod nga puno sang agwa. Nagtindog sia sa likod nayon ni Jesus malapit sa iya tiil nga nagahibi kag ginbasa niya ang mga tiil ni Jesus sang iya mga luha. Dayon ginpahiran niya ang mga tiil ni Jesus sang iya buhok, iya ginhalukan, kag ginbuboan sang agwa. Sang pagkakita sini sang Fariseo nga nag-agda kay Jesus nagsiling sia sa iya kaugalingon, “Kon matuod nga ining tawo propeta, kuntani nahibal-an niya kon sin-o ining babayi nga nagatandog sa iya kag kon ano kahigko ang iya kabuhi.”
   Si Jesus nagsiling sa iya, “Simon, may isugid ako sa imo.” 
   Si Simon nagsabat, “Huo, Manunodlo, sugiri ako.”
   Si Jesus nagsiling, “May duha ka tawo nga may utang sa isa ka manugpautang. Ang isa nakautang sa iya sing P500 kag ang isa P50. Sila nga duha indi gid makabayad, gani, wala na lang sila ginpabayad sang nagpautang sa ila. Diin sa ila nga duha ang magahigugma sing labi sa nagpautang sa ila?”
   Si Simon nagsabat, “Sa banta ko ang nakautang sing daku kag wala na pagpabayara.” 
   Si Jesus nagsiling, “Husto ang sabat mo.” Dayon ginbalikid niya ang babayi kag nagsiling kay Simon, “Nakita mo ining babayi? Nagsulod ako sa imo balay kag wala ka maghatag sa akon sing tubig para sa akon mga tiil, pero sia naghugas sang akon mga tiil sang iya gid mga luha kag ginpahiran niya sang iya buhok. Wala ka maghalok sa pag-abiabi sa akon, pero sia halin sang akon pag-abot, wala sia mag-untat sa paghalok sang akon mga tiil. Wala mo paghiboi sing lana ang akon ulo, pero sia naghaplas sang akon mga tiil sang agwa. Nagasiling ako sa imo, ang iya daku nga gugma nagapamatuod nga ang iya madamo nga mga sala napatawad na. Ang ginpatawad sing diutay nagahigugma sing diutay.”
   Dayon si Jesus nagsiling sa babayi, “Ang imo mga sala ginpatawad na.”
   Ang iban nga upod nila sa kalan-an nagsiling sa ila kaugalingon, “Sin-o bala sia, nga nagapatawad bisan pa sang mga sala?”
   Pero si Jesus nagsiling sa babayi, “Ang imo pagtuo nagluwas sa imo. Maglakat ka sa paghidait.”

Setyembre 16 | Setyembre 18

Itakod ang Akon Gota sa Inyo kag Magtuon Kamo sa Akon

Liturhiya sang Pulong

(Huwebes, Hulyo 16, 2020)

Ang Mahal nga Birhen Maria sang Carmelo

Ang Pagbasa gikan sa Libro ni:

Isaias nga Propeta 26:7-9, 12, 16-19

   O Ginoo, ginapahapos mo ang dalan sang maayo nga mga tawo; ang dalan nga ila ginaagyan matapan.Ginatuman namon ang imo kabubot-on kag nagasalig kami sa imo; ikaw lamang ang amon ginahandom.Sa kagab-ihon ginahandom ko ikaw sa bug-os ko nga tagipusoon; kon maghukom ka sa kalibutan kag sa iya mga pumoluyo sila tanan magakilala sang pagkamatarong.

   O Ginoo, imo kami pauswagon, kay ang tanan namon nga mga binuhatan nahimo namon tungod sang imo bulig. O Ginoo, ginsilutan mo ang imo mga tawo, kag sa daku nga kalisod nagpangamuyo sila sa imo. O Ginoo, ikaw ang nagpahibi sa amon, subong sang isa ka babayi nga manugbata nga ginasakitan.Kami ginasakitan kag nagaugayong, pero wala man kami sing ginbun-ag. Wala kami sing gindaog para sa amon duta; wala kami sing nahimo.

   Yadtong amon mga tawo nga nagkalamatay mabuhi liwat! Ang ila mga bangkay mabanhaw! Yadtong mga nagakatulog sa ila mga lulobngan magabangon kag magakanta sa kalipay! Kaangay sang nagaigpat nga tun-og nga nagapabugnaw sang duta, amo man ang Ginoo magabuhi sadtong dugay na nga nagkalamatay.

Salmo sa Pagsabat:

Mga Salmo 102:13-14 kag 15, 16-18, 19-21

(S) Gikan sa langit ang Ginoo nagtamod sa duta.

Pero ikaw, O Ginoo, hari sa walay katapusan, ang tanan nga mga kaliwatan magadumdom sa imo. Magatindog ka kag magakaluoy sa Sion; nag-abot na ang tion sa pagkaluoy sa iya; Ang imo mga alagad nagahigugma sa iya, bisan nga nalaglag na sia; naluoy sila sa iya bisan nga naguba na sia. (S)

Ang mga pungsod magakahadlok sa Ginoo; ang tanan nga mga hari sang duta magakahadlok sa iya gahom. Kon ang Ginoo magpatindog liwat sang Sion, ipakita niya ang iya pagkagamhanan. Magapamati sia sa iya mga tawo nga ginpatumbayaan kag pagasabton niya ang ila pangamuyo. (S)

Isulat para sa palaabuton nga kaliwatan ang ginhimo sang Ginoo, agod ang mga tawo nga wala pa mabun-ag magadayaw sa iya. Ang Ginoo nagtamod halin sa iya balaan nga duog sa kahitaasan, nagtamod sia sa duta gikan sa langit, sa pagpamati sang mga ugayong sang mga binilanggo, kag sa paghilway sang mga ginpamatbatan sing kamatayon. (S)

Aleluya:

Mateo 11:28

   Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Mateo 11:28-30

   “Kari kamo sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo kag magtuon kamo sa akon, kay ako malulo kag mapainuboson sing tagipusoon, kag makapahuway kamo. Ang akon gota mahapos, kag ang akon karga mamag-an.”

Hulyo 15 | Hulyo 17