"Higugmaa ang Ginoo sa Bug-os mo nga Tagipusoon, Kalag, Hunahona, kag Kusog"

Liturhiya sang Pulong

(Domingo, Nobyembre 4, 2018)

1. Ang Pagbasa gikan sa Libro sang:

Deuteronomio 6:2-6

Samtang nagakabuhi kamo, kamo kag ang inyo mga kaliwat dapat magkahadlok sa GINOO nga inyo Dios kag magtuman sang tanan niya nga mga kasugoan nga akon ginahatag sa inyo, agod magpuyo kamo didto sing malawig. Mga tawo sang Israel, pamatii kag tumana ninyo ini! Dayon ang tanan manginmaayo para sa inyo kag mangingamhanan kamo nga pungsod kag magpuyo sa maayo kag mapatubason nga duta suno sa ginsaad sang Ginoo nga Dios sang aton mga katigulangan. “O Israel, dumdoma ninyo ini! Ang Ginoo, amo lamang ang aton Dios. Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga kusog. Indi mo pagkalimtan ini nga mga sugo nga akon ginahatag sa imo karon nga adlaw.

Salmo sa Pagsabat:

Mga Salmo 18:2-3, 3-4, 47, 51

(S) Ginahigugma ko Ikaw, O Ginoo, nga akon kabakod.

O Ginoo, daw ano ang akon paghigugma sa imo! Ikaw ang akon mangangapin. Ang Ginoo amo ang akon manluluwas; sia amo ang akon malig-on nga pamakod. (S)
Ang Dios ko amo ang akon mangangapin, kag upod sa iya indi ako maano. Sia amo ang akon taming, ginaapinan niya ako agod indi ako maano. Nagpanawag ako sa Ginoo kag iya ako ginluwas sa akon mga kaaway. Dayawon ang Ginoo! (S)
Buhi ang Ginoo! Dayawon ang akon mangangapin! Ang Dios amo ang akon manluluwas! Ibantala ang iya pagkagamhanan! Dalagku nga mga pagdaog ang ginahatag sang Dios sa iya hari, ginapakita Niya ang Iya mapinadayunon nga gugma sa iya pinili. (S)

2. Ang Pagbasa gikan sa Sulat sa mga:

Hebreo 7:23-28

May isa pa ka kinatuhay: yadtong iban nga mga pari madamo, kay nagakalamatay sila kag indi makapadayon sang ila mga bulohaton. Pero si Jesus nagakabuhi sa walay katapusan, kag ang iya bulohaton subong pari wala ginasaylo sa iban. Gani makasarang sia sa pagluwas, karon kag sa gihapon, sang mga nagakari sa Dios paagi sa iya, kay nagakabuhi sia sa gihapon sa pagpakiluoy sa Dios tungod sa ila. Gani si Jesus amo ang Pinakamataas nga Pari nga nagahatag sang aton mga kinahanglanon! Balaan sia; wala sing sayop ukon sala sa iya; ginpain sia sa mga makasasala kag ginbayaw pakadto sa ibabaw pa sang mga langit. Indi sia kaangay sang iban nga pinakamataas nga mga pari, kay indi sia kinahanglan magdulot sing mga halad adlaw-adlaw, nahauna para sa iya mga sala, kag dason para sa mga sala sang mga tawo. Nagdulot sia sang isa ka halad, sing makaisa gid lang, sang paghalad niya sang iya kaugalingon. Ang Kasugoan ni Moises nagapili sang mga tawo nga indi himpit nga manginpinakamataas nga mga pari, pero ang saad sang Dios nga may panumpa nga nag-abot sing ulihi lang sang sa Kasugoan, nagpili sang Anak nga nahimpit sa walay katapusan.

Aleluya:

Juan 14:23

Ang nagahigugma sa akon nagatuman sang akon pulong, siling sang Ginoo; wala sing may nagakadto sa Amay kon indi paagi sa Akon.

Ang Pagbasa sang Santos nga Ebanghelyo suno kay:

San Marcos 12:28-34

May isa ka manunodlo sang Kasugoan didto nga nakabati sang ila pagbinaisay. Natalupangdan niya nga si Jesus nagsabat sa ila sing nagakaigo. Gani, nagpamangkot man sia sa iya, “Ano gid bala ang labing importante nga sugo sa tanan?” Si Jesus nagsabat, “Amo ini ang labing importante nga sugo, ‘Pamati ka, O Israel, ang Ginoo nga aton Dios amo lamang ang Ginoo. Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga hunahona, kag sa bug-os mo nga kusog.’ Ang ikaduha amo ini, ‘Higugmaa ang imo isigkatawo subong sang imo kaugalingon.’ Wala na sing sugo nga labi pa ka importante sa sining duha.” Ang manunodlo sang Kasugoan nagsiling sa iya, “Husto gid, Manunodlo! Matuod ang siling mo, nga isa lamang ang Dios, kag wala na gid sing iban pa luas sa iya. Kag dapat higugmaon sang tawo ang Dios sa bug-os niya nga tagipusoon, sa bug-os niya nga hunahona, kag sa bug-os niya nga kusog, kag dapat niya higugmaon ang iya isigkatawo subong sang iya kaugalingon. Labi pa ka importante ang pagtuman sining duha ka sugo sang sa tanan nga halad nga sinunog kag halad nga inihaw.” Kag sang pagkahibalo ni Jesus nga maayo ang iya sabat, iya sia ginsingganan, “Indi ka malayo sa Ginharian sang Dios.” Sa tapos sadto, wala na gid sing may nangahas sa pagpamangkot kay Jesus. 

Nobyembre 3 | Nobyembre 5