"Lakat kag Ibantala ang Maayong Balita sa Tanan nga mga Tawo"

Liturhiya sang Pulong

(Sabado, Abril 18, 2020)

Sabado sang Nahauna nga Semana sang Pagkabanhaw

Ang Pagbasa gikan sa mga:

Binuhatan sang mga Apostoles 4:13-21

   Natingala ang mga katapo sang Konsilyo sang kaisog ni Pedro kag ni Juan kay nahibaluan nila nga ini sila ordinaryo nga mga tawo kag wala sing alam. Dayon natalupangdan nila nga ini sila mga kaupdanan anay ni Jesus. Pero sang makita nila ang tawo nga gin-ayo nga nagatindog sa tupad ni Pedro kag ni Juan, wala na sila sing may mahambal pa. Gani ginpagwa nila sila sa ginatipunan sang Konsilyo kag gilayon naghinun-anon sila. Nagpamangkot sila, “Ano bala ang himuon naton sa sini nga mga tawo? Ang tanan nga pumoluyo diri sa Jerusalem nakahibalo nga ini sila nakahimo sang tumalagsahon nga milagro kag indi naton ini mahimutig. Pero aton sila paandaman nga indi na sila maghambal sa bisan kay sin-o sa ngalan ni Jesus, agod nga indi na ini maglapnag sa iban nga mga tawo.” 

   Gani ginpatawag nila sila liwat kag ginhambalan nga indi na gid sila maghambal ukon magpanudlo sa ngalan ni Jesus. Pero si Pedro kag si Juan nagsabat sa ila, “Binagbinaga ninyo kon diin sini ang matarong sa atubangan sang Dios: ang pagtuman sa inyo ukon ang pagtuman sa Dios. Kay indi kami makapugong sang amon kaugalingon sa pagsugid sang amon nakita kag nabatian.” Gani ginpaandaman pa gid sila sang Konsilyo kag ginbuy-an dayon sila, kay wala sila sing nakita nga kabangdanan agod silutan sila. Ang tanan nga mga tawo nagdayaw sa Dios tungod sang nahanabo.

Salmo sa Pagsabat:

Mga Salmo 118:1 kag 14-15, 16-18, 19-21

(S) Ginadayaw ko ikaw, O Ginoo, kay ginpadaog mo ako. 

Magpasalamat sa Ginoo kay maayo sia, kag ang iya gugma nagapadayon sa gihapon. Ang Ginoo nagahimo sa akon nga gamhanan kag makusog, sia amo ang akon manluluwas! Pamatii ang paghinugyaw sang pagdaog sa tolda sang mga tawo sang Dios: “Ang gamhanan nga kusog sang Ginoo naghimo sini! (S)

Ang iya gahom nagpadaog sa aton, ang iya gamhanan nga kusog sa inaway, indi ako mapatay, kundi magakabuhi, kag isugid ko ang ginhimo sang Ginoo. Ginsilutan ako sang Ginoo sing tama gid, pero wala niya pag-itugot nga mapatay ako. (S)

Buksi ang mga puwerta sang Templo para sa akon; magasulod ako kag magadayaw sa Ginoo! Amo ini ang puwerta sang Ginoo; ang mga matarong lamang ang makasulod! Ginadayaw ko ikaw, O Ginoo, kay ginpamatian kag ginpadaog mo ako! (S)

Aleluya:

Mga Salmo 118:24

   Daw ano katahom sini nga adlaw nga ginhatag sa aton sang Ginoo; magkalipay kita kag maghinugyaw.

Ang Pagbasa sang Santos nga Ebanghelyo suno kay:

San Marcos 16:9-15

   Aga pa gid sang nahauna nga adlaw sang simana, sang pagkabanhaw ni Jesus, nagpakita sia sing una kay Maria Magdalena nga gintabugan niya sadto anay sang pito ka yawa. Naglakat si Maria Magdalena kag nagpanugid sini nga balita sa mga kaupdanan anay ni Jesus. Nagpangalisod sila kag nagahinibi, kag sang pagkabati nila sang iya panugiron nga si Jesus buhi kag nakit-an niya, wala sila magpati sa iya. 

   Sa tapos sini, nagpakita si Jesus sa lain nga paagi sa duha ka gintuton-an samtang nagapakadto sila sa uma. Nagbalik sila kag ginsugiran nila ang iban nga mga gintuton-an, pero indi sila magpati. 

   Sang ulihi, nagpakita si Jesus sa onse ka mga apostoles sang nagakaon sila. Ginsabdong niya sila, kay wala sila sing pagtuo kag tungod sang katig-a sang ila tagipusoon sa pagpati sa mga nakakita sa iya nga nabanhaw sia. Nagsiling sia sa ila, “Lakat kamo sa bug-os nga kalibutan kag ibantala ang Maayong Balita sa tanan nga mga tawo.

Abril 17 | Abril 19

"Si Jesus Nagpakita liwat sa Iya mga Gintuton-an"

Liturhiya sang Pulong

(Biyernes, Abril 17, 2020)

Biyernes sang Nahauna nga Semana sang Pagkabanhaw

Ang Pagbasa gikan sa mga:

Binuhatan sang mga Apostoles 4:1-12

   Sang nagahambal pa si Pedro kag si Juan sa mga tawo, ginpalapitan sila sang mga pari kag sang mga Saduceo kag sang pangulo sang mga gwardya sa templo. Natublag sila tungod kay ang duha ka apostoles nagatudlo nga si Jesus ginbanhaw, kag ini nagapamatuod nga ang mga patay pagabanhawon. Tungod sini ila gindakop si Pedro kag si Juan, kag ginbilanggo nila sila tubtob sa madason nga adlaw, kay hapon na. Pero madamo sang mga nakabati sa ila mensahi ang nagtuo, kag ang kadamuon nila mga 5,000. 

   Sang madason nga adlaw nagtipon sa Jerusalem ang mga pangulo nga Judio, ang mga katigulangan sang mga Judio kag ang mga manunodlo sang Kasugoan. Nagpakigsapol sila sa Pinakamataas nga Pari nga si Anas, kay Caifas, kay Juan, kay Alejandro kag sa iban pa nga mga katapo sang panimalay sang Pinakamataas nga Pari. Ila ginpaatubang ang mga apostoles sa ila kag ginpamangkot, “Sa ano bala nga gahom kag sa kay sin-o ngalan ginahimo ninyo ini?” 

   Si Pedro nga puno sang Espiritu Santo nagsabat sa ila, “Mga pangulo sang banwa kag mga katigulangan sang mga Judio, kon ginausisa ninyo kami nahanungod sang pag-ayo sining piang nga tawo, dapat mahibaluan ninyo tanan kag sang bug-os nga Israel, nga ini nga tawo nga nagatindog sa inyo atubangan, nag-ayo sa gahom sang ngalan ni Jesu-Cristo nga taga-Nazaret, nga inyo ginlansang sa krus kag ginbanhaw sang Dios. Si Jesus amo ang ginsiling sang kasulatan: 

     ‘Ang bato nga ginsikway ninyo 

     Nga mga manunokod 

     Nanginpamakod nga bato.’ 

Ang kaluwasan maagom paagi sa iya lamang, kay wala na sing iban nga ngalan sa bilog nga kalibutan nga ginhatag sang Dios sa mga tawo nga makaluwas sa aton.”

Salmo sa Pagsabat:

Mga Salmo 118:1-2 kag 4, 22-24, 25-27

(S) Ang bato nga ginsikway sang mga manunokod, nangin pamakod nga bato. 

Magpasalamat sa Ginoo kay maayo sia, kag ang iya gugma nagapadayon sa gihapon. Magsiling ang mga tawo sa Israel, "Ang iya gugma nagapadayon sa gihapon." Magsiling ang tanan nga nagakahadlok sa iya," Ang iya gugma nagapadayon sa gihapon." (S)

Ang bato nga ginsikway sang mga manunokod nanginpamakod nga bato. Ang Ginoo amo ang naghimo, daw ano ka makatilingala ini nga tan-awon! Daw ano katahom sini nga adlaw nga ginhatag sa aton sang Ginoo; magkalipay kita kag maghinugyaw! (S)

Luwasa kami, O Ginoo, luwasa kami, hatagi kami sing kauswagan, O Ginoo, ang Dios magbendisyon sa iya nga nagakari sa ngalan sang Ginoo! Gikan sa Templo sang Ginoo nagdayaw kami sa imo! Ang Ginoo amo ang Dios; nangin maayo sia sa aton. (S)

Aleluya:

Mga Salmo 118:24

   Daw ano katahom sini nga adlaw nga ginhatag sa aton sang Ginoo; magkalipay kita kag maghinugyaw.

Ang Pagbasa sang Santos nga Ebanghelyo suno kay:

San Juan 21:1-14

   Sa tapos sini nga mga hitabo si Jesus nagpakita liwat sa iya mga gintuton-an didto sa Linaw sang Tiberias. Amo ini ang paagi sang iya pagpakita. Si Simon Pedro, si Tomas nga gintawag ang Kapid, si Natanael nga taga-Cana sa Galilea, ang mga anak ni Zebedeo, kag ang duha pa gid ka mga gintuton-an ni Jesus nagatilipon didto. Si Simon Pedro nagsiling sa ila, “Mangisda ako.” 

   Nagsiling sila sa iya, “Maupod kami sa imo.” Gani naglakat sila kag nagsakay sa sakayan, pero sa sadto nga gab-i wala gid sila sing may nakuha. Sang nagabutlak na ang adlaw, si Jesus didto nagatindog sa baybayon, pero ang mga gintuton-an wala makakilala nga si Jesus yadto. Dayon nagsiling sia sa ila, “Mga anak, may kuha bala kamo?” 

   “Wala gid,” sabat nila. 

   Nagsiling sia sa ila, “Iladlad ninyo ang inyo sahid sa tuo nayon sang sakayan, kag may makuha kamo.” Gani ginladlad nila ang sahid kag indi sila makasarang sa pagbatak, kay sa pagkadamo sang ila nakuha nga isda. 

   Ang gintuton-an nga hinigugma ni Jesus nagsiling sa kay Pedro, “Ang Ginoo ini!” Sang pagkabati ni Simon Pedro nga ang Ginoo yadto, gintampi niya ang iya bayu (kay gin-uba niya ini) kag nagsugbo sa tubig. Ang iban nga mga gintuton-an nga yadto sa sakayan nagdungka nga nagabutong sang sahid nga puno sang mga isda, kay ang ila kalayuon sa baybayon mga 50 man lang ka dupa. Sang pagtakas nila, may nakita sila nga nagatumpok nga baga nga may ginasugba nga isda kag may tinapay nga natungtong didto. Dayon si Jesus nagsiling sa ila, “Dala kamo diri sang isda nga bag-o lang ninyo nakuha.” 

   Si Simon Pedro nagsaka sa sakayan kag ginbutong niya ang sahid pa higad nga puno sang dalagku nga mga isda nga ang kadamuon 153 ka bilog. Wala magisi ang sahid bisan tama ini kadamo. Si Jesus nagsiling sa ila, “Dali kamo kag magpamahaw.” Wala gid sing isa sang mga gintuton-an nga nangahas sa pagpamangkot sa iya kon sin-o sia, kay nakilala nila nga sia amo ang Ginoo. Gani nagpalapit si Jesus, nagkuha sang tinapay, kag ginhatagan sila. Amo man ang ginhimo niya sa isda. 

   Ikatlo na ini nga pagpakita ni Jesus sa iya mga gintuton-an sa tapos sia mabanhaw.

Abril 16 | Abril 18

Ginbuksan ni Jesus ang ila mga Hunahona sa Paghangop sang mga Kasulatan

Liturhiya sang Pulong

(Huwebes, Abril 16, 2020)

Huwebes sang Nahauna nga Semana sang Pagkabanhaw

Ang Pagbasa gikan sa mga:

Binuhatan sang mga Apostoles 3:11-26

   Samtang nagauyat ang tawo kay Pedro kag kay Juan, natingala ang tanan nga mga tawo kag nagdinaguso sila sa duog nga ginatawag “Portico ni Salomon.” Sang makita ni Pedro ang mga tawo, nagsiling sia sa ila, “Mga taga-Israel, ngaa bala natingala kamo sini? Ngaa nga ginatulok gid ninyo kami? Nagahunahona bala kamo nga napalakat namon ini nga tawo paagi sa amon gahom ukon pagkadiosnon? Ang Dios ni Abraham, ni Isaac kag ni Jacob, ang Dios sang aton mga katigulangan naghimaya sa iya Alagad nga si Jesus. Inyo sia gintugyan sa mga awtoridad sang banwa kag inyo sia ginsikway sa atubangan ni Pilato bisan pa nga buy-an kuntani sia ni Pilato. Balaan kag maayo sia nga tawo, pero ginsikway ninyo sia kag ginpangabay gid ninyo si Pilato nga sa baylo kay Jesus, buy-an niya ang isa ka tawo nga manugpatay. Gani inyo ginpatay ang nagatuytoy sang mga tawo pa kabuhi, pero ginbanhaw sia sang Dios, kag kami tanan mga saksi sini. Ang gahom sang iya ngalan amo ang nag-ayo sini nga tawo. Ining inyo nakita kag nahibal-an nahimo tungod sa pagtuo sa iya ngalan, kag ini nga pagtuo sa kay Jesus amo ang nag-ayo sa iya sing bug-os nga inyo karon nakita.
   “Kag karon, mga utod, nakahibalo ako nga kamo kag ang inyo mga pangulo naghimo sini kay Jesus, tungod kay wala kamo makahibalo. Madugay na nga ginpahayag sang Dios paagi sa tanan nga mga propeta nga ang Cristo kinahanglan mag-antos, kag ini iya gintuman. Gani maghinulsol kamo kag magbalik sa Dios agod mapanas niya ang inyo mga sala, agod mag-abot ang panahon sang espirituhanon nga kabakod halin sa atubangan sang Ginoo kag iya ipadala si Jesus nga amo ang Cristo nga iya na nga daan napilian para sa inyo. Kinahanglan magpabilin sia sa langit tubtob mag-abot ang tion nga pagabag-uhon ang tanan nga mga butang suno sa ginpabutyag sang Dios sang una pa paagi sa iya balaan nga mga propeta. Kay si Moises nagsiling, ‘Ang Ginoo nga inyo Dios magapadala sang isa ka propeta nga inyo kasimanwa, subong nga ginpadala niya ako. Dapat ninyo pamatian ang tanan nga ginasiling niya sa inyo. Ang indi magpamati sang ginasiling sang amo nga propeta pagapainon sa banwa sang Dios kag pagalaglagon.’ Kag ang mga propeta, lakip si Samuel kag ang mga naulihi pa sa iya, nga may mensahi, tanan sila nagtagna man sini nga panahon. Ang mga ginsaad sang Dios paagi sa iya mga propeta para gid sa inyo, kag may bahin kamo sa kasugtanan nga ginhimo sang Dios sa inyo mga katigulangan. Nagsiling sia kay Abraham, ‘Paagi sa imo mga kaliwat pagabendisyunan ko ang tanan nga tawo sa kalibutan.’ Gani ginpili sang Dios ang iya Alagad kag ginpadala sing una sa inyo, sa pagbendisyon sa inyo agod nga bayaan ninyo ang inyo malaut nga mga pagginawi.”

Salmo sa Pagsabat:

Mga Salmo 8:2 kag 5, 6-7, 8-9

(S) O Ginoo, Ginoo namon, ang imo pagkahalangdon makita sa bug-os nga kalibutan.

O Ginoo, Ginoo namon, ang imo himaya nagalambot tubtob sa ibabaw sang kalangitan: Ano gid bala ang tawo nga imo sia dumdumon ang ahaw nga tawo nga imo sia sapakon? (S)
Pero ginhimo mo sia nga kubos-kubos lamang sa imo, ginkoronahan mo sia sing himaya kag kadungganan, ginpagahom mo sia sa tanan nga imo gintuga, ginpadumala mo sia sa tanan nga mga butang. (S)
Sa mga karnero kag mga baka, kag sa talunon nga mga sapat, sa mga pispis kag mga isda, kag sa tanan nga mga tinuga sa kadagatan. (S)

Aleluya:

Mga Salmo 118:24

   Daw ano katahom sini nga adlaw nga ginhatag sang Ginoo: magkalipay kita kag maghinugyaw.

Ang Pagbasa sang Santos nga Ebanghelyo suno kay:

San Lucas 24:35-48

   Dayon ang duha nagsaysay sa ila sang nahanabo sa dalanon, kag kon paano nga nakilala nila ang Ginoo sang pagpamihakpihak niya sang tinapay.
   Sang nagapanugid sila sini sa ila, sa hinali nagpakita si Jesus sa tunga nila nga nagatindog kag nagsiling sa ila, “Ang paghidait sa inyo.”
   Hinadlukan kag kinulbaan gid sila, kay naghunahona sila nga nakakita sila sang kalag. Pero nagsiling sia sa ila, “Ngaa bala natublag kamo? Ngaa nagapangduhadoha kamo? Tan-awa ninyo ang akon mga kamot kag mga tiil, kay ako gid ini. Hikapa ninyo ako kag mahibal-an ninyo, kay ang kalag wala sing unod kag tul-an subong sang ginatan-aw ninyo nga ako may unod kag tul-an.”
   Sang pagsiling niya sini ginpakita niya ang iya mga kamot kag mga tiil. Daku gid ang ila kalipay kag katingala nga daw indi sila makapati. Dayon si Jesus nagpamangkot sa ila, “May pagkaon bala kamo diri?” Ginhatagan nila sia sing sinugba nga isda, nga iya ginbaton kag ginkaon sa atubangan nila.
   Dayon nagsiling sia sa ila, “Amo ini nga mga butang ang ginsiling ko sa inyo sang kaupod pa ako ninyo: ang tanan nga nasulat nahanungod sa akon sa Kasugoan ni Moises, sa mga sinulat sang mga propeta, kag sa mga Salmo dapat nga matuman.”
   Dayon ginbuksan niya ang ila mga hunahona sa paghangop sang mga Kasulatan. Nagsiling sia sa ila, “Amo ini ang nasulat: ang Cristo dapat mag-antos kag pagabanhawon sa ikatlo nga adlaw, kag sa iya ngalan ang mensahi nahanungod sang paghinulsol kag kapatawaran sang sala dapat iwali sa tanan nga kapungsoran, sugod sa Jerusalem. Kamo ang mga saksi sini nga mga butang.

Abril 15 | Abril 17

"Indi bala nga Nagdabdab subong sang Kalayo ang Aton Balatyagon sang Nagsaysay sang mga Kasulatan sa Aton"

Liturhiya sang Pulong

(Miyerkules, Abril 15, 2020)

Miyerkules sang Nahauna nga Semana sang Pagkabanhaw

Ang Pagbasa gikan sa mga:

Binuhatan sa mga Apostoles 3:1-10

   Isa sadto ka adlaw nagkadto si Pedro kag si Juan sa templo sang mga alas tres ang takna sa hapon, nga amo ang tion sa pagpangamuyo. Didto sa ginatawag “Matahom nga Puwerta,” may isa ka tawo nga piang halin sa iya pagkatawo. Ginayayungan sia adlaw-adlaw kag ginabilin sa sini nga puwerta sa pagpakilimos sa mga tawo nga nagasulod sa templo. Sang pagkakita niya nga nagapasulod si Pedro kag si Juan, nagpangayo sia sing limos. 

. . . nagpangayo sia sing limos. (3:3)

Gintulok nila sia kag nagsiling si Pedro sa iya, “Tulok ka sa amon!” Kag gintulok niya sila nga nagapaabot nga may pagabatunon sia. Nagsiling si Pedro sa iya, “Wala gid ako sing kuwarta, pero ihatag ko sa imo ang yari sa akon: sa ngalan ni Jesu-Cristo nga taga-Nazaret, tindog ka kag maglakat!” Kag gin-uyatan niya sia sa tuo nga kamot kag ginpatindog. Sa gilayon nagbakod ang iya mga tiil kag bukobuko kag nagtumbo sia. Nagtindog sia kag naglakatlakat. Dayon nag-upod sia sa ila sa pagsulod sa templo nga nagalakat kag nagatumbo kag nagadayaw sa Dios. Nakita sang tanan nga mga tawo nga nagalakat sia kag nagadayaw sa Dios, kag sang namulalongan nila nga ini sia amo ang nagapakilimos anay sa “Matahom nga Puwerta” sang templo, natingala sila kag naurongan sang natabo sa iya.

Salmo sa Pagsabat:

Mga Salmo 105:1-2, 3-4, 6-7, 8-9

(S) Magkalipay ang tagipusoon sang mga nagapangita sa Ginoo.

Magpasalamat kamo sa Ginoo, ibantala ninyo ang iya pagkagamhanan kag ipakilala sa mga kapungsoran ang iya mga binuhatan! Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya! (S)

Magkalipay kamo kay iya kita; ang tanan nga nagaalagad sa Ginoo magkalipay! Magdangop kamo sa Ginoo agod buligan; magpabilin kamo sa iya atubangan sa gihapon. (S)

Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili. Ang Ginoo amo ang aton Dios, ang iya mga sugo para sa bug-os nga kalibutan. (S)

Pagatumanon niya sa gihapon ang iya kasugtanan, ang iya mga saad tubtob sa isa ka libo ka mga kaliwatan. Ang kasugtanan nga iya ginhimo kay Abraham, kag ang iya saad kay Isaac. (S)

Aleluya:

Mga Salmo 118:24

   Daw ano katahom sini nga adlaw nga ginhatag sang Ginoo; magkalipay kita kag maghinugyaw.

Ang Pagbasa sang Santos nga Ebanghelyo suno kay:

San Lucas 24:13-35

   Sa sadto gid nga adlaw ang duha sa ila nagapakadto sa baryo nga ginatawag Emaus, mga onse ka kilometro halin sa Jerusalem, kag nagasugilanon sila nahanungod sang mga butang nga nagkahanabo. Sang nagahambalanay sila kag nagapamangkutanay, si Jesus nagpalapit kag naglakat upod sa ila. Nakita nila sia, pero wala nila sia makilal-i. Si Jesus nagsiling sa ila, “Ano ang ginahambalan ninyo samtang nagalakat kamo?” 

   Kag nagdulog sila nga nagapangasubo. Ang isa sa ila nga ginahingalanan kay Cleofas nagsiling sa iya, “Ikaw lang ang nagapuyo sa Jerusalem nga wala gid makahibalo sang nagkatabo didto sa sining mga inadlaw.” 

   Nagpamangkot sia, “Ano nga mga hitabo?” 

   Nagsabat sila, “Ang mga nahanabo kay Jesus nga taga-Nazaret. Ini nga tawo propeta nga gamhanan sa pulong kag sa buhat sa atubangan sang Dios kag sang mga tawo. Ang amon pangulo nga mga pari kag mga manugdumala nagtugyan sa iya nga pagapatyon, kag ginlansang nila sia sa krus. Kag naglaom kami nga sia amo ang magatubos sang Israel. Wala labot sini tanan, karon ikatlo na nga adlaw halin sang matabo ini. May kaupdanan kami nga mga babayi nga nagpatingala sa amon. Nagkadto sila sa lulobngan sing aga pa, pero wala nila makita ang bangkay ni Jesus. Gani, nagbalik sila nga nagasiling nga nakakita sila sing palanan-awon sang mga anghel nga nagasiling sa ila nga buhi sia. May mga kaupdanan kami nga nagkadto sa lulobngan kag nakita nila ang ginsugid sang mga babayi, pero wala nila makita sia.” 

   Dayon si Jesus nagsiling sa ila, “Daw ano ka buangboang sa inyo, kag daw ano kahinay sa inyo sa pagpati sang tanan nga ginhambal sang mga propeta! Indi bala kinahanglan nga ang Cristo mag-antos sining mga butang kag ugaling pagahimayaon sia?” Kag ginsaysay ni Jesus sa ila ang tanan nga ginhambal sang mga Kasulatan nahanungod sa iya, sugod sa mga libro ni Moises kag sa mga sinulat sang tanan nga mga propeta. 

   Sang nagahinampot sila sa baryo nga ila ginapakadtuan, nagpakita si Jesus nga daw mapadayon kuntani sia sa paglakat, pero ginhawiran nila sia nga nagasiling, “Upod ka na lang diri sa amon, kay hapon na ini kag dugaydogay gab-i na.” Gani nagpabilin sia upod sa ila. Nagpungko sia upod sa ila sa pagkaon, nagkuha sang tinapay, kag nagpasalamat. Dayon ginpamihakpihak niya ang tinapay kag ginhatag ini sa ila. Karon nakamarasmas sila kag nakilala nila sia, pero sa hinali lang nadula sia. Nagsinilingay sila, “Indi bala nga nagdabdab subong sang kalayo ang aton balatyagon sang maghambal sia sa aton sa dalanon kag nagsaysay sang mga Kasulatan sa aton?” 

   Sa gilayon nagtindog sila kag nagbalik sa Jerusalem sa diin nakita nila ang onse ka mga apostoles nga nagatipon upod sa iban nga mga gintuton-an kag nagasiling, “Matuod gid nga ang Ginoo nabanhaw! Nagpakita sia kay Simon!” 

   Dayon ang duha nagsaysay sa ila sang nahanabo sa dalanon, kag kon paano nga nakilala nila ang Ginoo sang pagpamihakpihak niya sang tinapay.

Abril 14 | Abril 16

"Nakita ko ang Ginoo!"

Liturhiya sang Pulong

(Martes, Abril 14, 2020)

Martes sang Nahauna nga Semana sang Pagkabanhaw

Ang Pagbasa gikan sa mga:

Binuhatan sang mga Apostoles 2:36-41

   “Gani dapat gid kilalahon sang tanan nga mga taga-Israel, nga ini gid nga Jesus nga inyo ginlansang sa krus, amo ang ginhimo sang Dios nga Ginoo kag Cristo!” 

   Natublag gid ang mga tawo sang pagkabati nila sini. Gani nagsiling sila kay Pedro kag sa iban nga mga apostoles, “Ano ang himuon namon, mga utod?” 

   Si Pedro nagsiling sa ila, “Magbiya kamo sa inyo mga sala kag magpabautiso sa ngalan ni Jesu-Cristo, agod nga mapatawad ang inyo mga sala, kag mabaton ninyo ang ginhatag sang Dios nga amo ang Espiritu Santo. Kay ginsaad ini sang Dios sa inyo kag sa inyo mga anak, kag sa tanan nga mga tawo sa malayo, ang tanan nga ginatawag sang Ginoo nga aton Dios nga mangin-iya.” 

   Madamo pa ang ginhambal ni Pedro sa pagpamatuod sa ila kag ginlaygayan niya sila nga nagasiling, “Luwasa ang inyo kaugalingon sa silot nga magaabot sa sining malaut nga mga tawo!” Madamo ang nagtuo sang iya mensahi kag nagpabautiso sila. Sa sadto nga adlaw may mga 3,000 ka mga tawo nga gindugang sa ila grupo. 

Salmo sa Pagsabat:

Mga Salmo 33:4-5, 18-19, 20 kag 22

(S) Ang mapinadayunon nga gugma sang Ginoo nagapuno sang duta. 

Ang mga pulong sang Ginoo matuod, kag ang tanan niya nga mga binuhatan masaligan. Ang Ginoo nagahigugma sang matarong kag nagakabagay, ang iya mapinadayunon nga gugma nagapuno sang duta. (S) 

Ang Ginoo nagabantay sa mga nagakahadlok sa iya, sa mga nagasalig sa iya mapinadayunon nga gugma. Ginaluwas niya sila sa kamatayon; ginabuhi niya sila sa tion sang tiggulotom. (S) 

Ang aton paglaum yara sa Ginoo, sia ang aton manugbulig kag mangangapin, kabay nga ang imo mapinadayunon nga gugma magpabilin sa amon, O Ginoo, kay ang amon paglaum yara sa imo. (S)

Aleluya:

Mga Salmo 118:24

   Daw ano katahom sini nga adlaw nga ginhatag sang Ginoo; magkalipay kita kag maghinugyaw.  

Ang Pagbasa sang Santos nga Ebanghelyo suno kay:

San Juan 20:11-18

   Karon si Maria nagtindog nga nagahilibion sa gwa sang lulobngan. Samtang nagahibi sia, nagduko kag nagsid-ing sia sa lulobngan, kag nakita niya nga may duha ka anghel didto nga nagabayu sing puti. Nagalingkod sila sa duog nga ginhamyangan sang bangkay ni Jesus. Ang isa sa tiilan kag ang isa sa ulohan. Ginpamangkot nila sia, “Babayi, ngaa bala nagahibi ka?” 

   Nagsabat sia, “Ginkuha nila ang akon Ginoo kag wala ako makahibalo kon diin nila sia ginbutang!” 

   Sang makasiling sia sini, nagliso sia kag iya nakita si Jesus nga nagatindog didto, pero wala niya makilala nga si Jesus yadto. Si Jesus nagpamangkot sa iya, “Babayi, ngaa bala nagahibi ka? Sin-o bala ang imo ginapangita?” 

   Naghunahona si Maria nga hardinero sia, gani nagsiling sia sa iya, “Tyoy, kon ikaw ang nagkuha sa iya, sugiri ako kon diin mo sia ginbutang, kay kuhaon ko sia.” 

   Si Jesus nagsiling sa iya, “Maria!” Nagliso si Maria sa pag-atubang kay Jesus kag nagsiling sa Hebreo, “Rabboni!” (Kon sayuron, “Manunodlo.”) Si Jesus nagsiling sa iya, “Indi ka anay mag-uyat sa akon, kay wala pa ako makakayab sa Amay. Pero kadtoi ang akon mga utod kag sugiri sila nga magakayab ako sa akon Amay kag inyo Amay, sa akon Dios kag inyo Dios.” 

   Gani si Maria Magdalena nagsugid sa mga gintuton-an nga nakita niya ang Ginoo, kag ginsilingan niya sila sini nga mga butang. 

Abril 13 | Abril 15

Balita sang Pagkabanhaw

Liturhiya sang Pulong

(Lunes, Abril 13, 2020)

Lunes sang Nahauna nga Semana sang Pagkabanhaw

Ang Pagbasa gikan sa mga:

Binuhatan sang mga Apostoles 2:14, 22-33 

Dayon nagtindog si Pedro upod sa onse ka mga apostoles, kag sa mabaskog nga tingog naghambal sa mga tawo, “Mga kasimanwa ko nga mga Judio, kag tanan kamo nga nagapuyo sa Jerusalem, pamatii ninyo ako kag tugoti ako sa pagsugid sa inyo sang kahulogan sini.

"Mga kasimanwa ko nga mga Judio . . . pamatii ninyo ako." (2:14)

   “Mga taga-Israel, pamatii ninyo ako! Si Jesus nga taga-Nazaret isa ka tawo nga may diosnon nga hilikuton. Ginpamatud-an ini sing maathag paagi sa mga milagro kag makatilingala nga mga buhat kag mga tanda nga ginhimo sang Dios paagi sa iya. Nakahibalo gid kamo sini kay diri ini matabo. Ginpat-od sang Dios suno sa iya kaugalingon nga kabubot-on kag tinutoyo nga itugyan si Jesus sa inyo mga kamot kag inyo sia ginpatay paagi sa makasasala nga mga tawo nga naglansang sa iya sa krus. Pero ginbanhaw sia sang Dios kag ginhilway sia sa mga kasakitan sang kamatayon, kay ang kamatayon wala sing gahom sa iya. Nahanungod sa iya si David nagsiling: 

   ‘Nakita ko ang Ginoo 

   Sa akon atubangan sa tanan nga tion, 

   Yara sia sa akon tuo, 

   Gani wala sing may makatublag sa akon. 

   Tungod sini 

   Malipayon ang akon tagipusoon 

   Kag puno sang kasadya 

   Ang akon mga ginapanghambal. 

   Kag bisan mamalatyon ako, 

   Magapadayon ako nga may paglaom, 

   Kay indi mo pagpabay-an 

   Ang akon kalag 

   Sa kalibutan sang mga patay, 

   Ukon pahanugotan mo 

   Nga madunot 

   Ang imo matutom nga alagad. 

   Gintudloan mo ako 

   Sang mga dalanon sang kabuhi, 

   Kag sa imo atubangan 

   Pun-on mo ako sing kalipay.’ 

   “Mga utod, dapat ko kamo paathagan nahanungod sa aton patriarka nga si David. Napatay sia kag ginlubong, kag yara pa gani ang iya lulobngan tubtob karon. Isa sia ka propeta kag nahibaluan niya ang ginsaad sang Dios sa iya. Ginsaad sang Dios nga himuon niya nga hari ang isa sang mga kaliwat ni David subong sa iya. Ginpanan-aw ni David ang pagahimuon sang Dios, gani naghambal sia nahanungod sang pagkabanhaw ni Cristo: 

   ‘Wala sia ginpabay-i 

   Sa kalibutan sang mga patay, 

   Wala madunot ang iya lawas.’ 

   Ginbanhaw sang Dios ini gid nga Jesus kag kami tanan mga saksi sini. Ginbayaw sia sa tuo sang Dios, kag nagbaton sia sang Espiritu Santo nga ginsaad sang Amay, kag karon ang inyo nakita kag nabatian amo ang mga bugay nga nagikan sa iya. 

Salmo sa Pagsabat:

Mga Salmo 16:1-2, kag 5, 7-8, 9-10, 11

(S) Apini ako, O Dios, kay nagadangop ako sa imo. 

Apini ako, O Dios, kay nagadangop ako sa imo agod indi maano, Nagasiling ako sa Ginoo, "Ikaw ang akon Ginoo, ikaw, O Ginoo ang tanan para sa akon, kag imo ako ginahatagan sang tanan ko nga mga kinahanglanon, yara sa imo mga kamot ang akon kabuhi. (S) 

Nagadayaw ako sa Ginoo, kay ginatuytoyan niya ako, kag sa kagab-ihon ang akon konsyensya nagapaandam sa akon. Malapit ang Ginoo sa akon sa tanan nga tion, malapit sia kag wala gid sing may makatublag sa akon. (S)

Gani puno ako sing kalipay kag kasadya, kag pat-od gid nga indi ako maano sa tanan nga tion, kay indi mo ako pagpakadtuon sa kalibutan sang mga patay, indi mo pag-itugyan ang imo ginahigugma sa kadadalman. (S) 

Ipakita mo sa akon ang dalan sang kabuhi, kon yara ka sa luyo ko puno ako sing kalipay, kag ang imo bulig nagadala sa akon sang kasadya nga wala sing katapusan. (S) 

Aleluya:

Mga Salmo 118:24

   Daw ano katahom sini nga adlaw nga ginhatag sang Ginoo; magkalipay kita kag maghinugyaw. 

Ang Pagbasa sang Santos nga Ebanghelyo suno kay:

San Mateo 28:8-15

   Gani naghalin sila sa lulobngan nga nagadalidali nga may kahadlok, pero puno sing kalipay, kag nagdalagan sila sa pagsugid sa iya mga gintuton-an. Sa hinali ginsugata sila ni Jesus nga nagasiling, “Ang paghidait sa inyo.” Nagpalapit sila kay Jesus, ginhakos nila ang iya mga tiil kag nagsimba sila sa iya. Si Jesus nagsiling sa ila, “Indi kamo magkahadlok. Lakat kamo kag sugiri ninyo ang akon mga utod nga lalaki nga magkadto sila sa Galilea, kag didto makita nila ako.” Sang nakahalin ang mga babayi, ang iban sang mga gwardya sa lulobngan nagkadto sa siyudad kag nagpanugid sa pangulo nga mga pari sang mga nahanabo. Nagsinapol ang pangulo nga mga pari kag mga katigulangan sang mga Judio, kag naghisugot sila sa paghatag sing madamo nga kuwarta sa mga soldado, kag ginsingganan sila, “Isiling ninyo nga ang iya mga gintuton-an nagkari sang kagab-ihon kag ginkawat nila ang iya bangkay samtang nagakatulog kamo. Kon mabatian ini sang Gobernador, kami lang ang mahibalo agod magpati sia kag indi na kamo magpalibog.” Ginbaton sang mga gwardya ang kuwarta kag gintuman nila ang ginsiling sa ila. Halin sadto tubtob karon amo ini ang ginapalapnag nga sugid sa mga Judio. 

Abril 12 | Abril 14