Ang mga Matarong Magasilak subong sang Adlaw sa Ginharian sang Ila Amay

Liturhiya sang Pulong

(Domingo, Hulyo 19, 2020)

Ika-16 nga Domingo sang Ordinaryo nga Panahon

1. Ang Pagbasa gikan sa Libro sang:

Kaalam ni Salomon 12:13, 16-19

   Ang tanan nga mga butang yara sa idalom sang imo pagtatap, kag wala na sing iban pa nga dios nga imo mahatagan katarungan ang imo mga pamat-od. Ang imo kusog amo ang ginagikanan sang imo katarungan. Mapakita mo ang kaluoy sa tanan tungod kay ikaw ang Ginoo sang tanan. Ginapahayag mo ang imo gahom kon ang tawo magpangduhadoha sang imo himpil nga masarangan, kag imo ginasilutan ang si sin-o man nga nakahibalo sang imo gahom pero wala niya ini ginasapak. Bisan matuod nga wala sing latid ang imo gahom, pero maluloy-on ikaw nga hukom. Sa imo luyag imo kami mahukman pero sa baylo imo kami ginagamhan nga naupdan sang daku nga pagpailob.

   Paagi sa imo mga buhat, gintudloan mo ang tawo nga ang matarong dapat nga maluloy-on. Ginhatagan mo sing dili mapatpat nga paglaom ang imo mga tawo dira sa pagtugot sa ila sa paghinulsol sang ila mga sala. 

Salmo sa Pagsabat:

Mga Salmo 86:5-6, 9-10, 15-16

(S) O Ginoo, maayo ka kag mapinatawaron.

O Ginoo, maayo ka kag mapinatawaron, puno sang mapinadayunon nga gugma sa tanan nga nagapangamuyo sa imo. Pamatii man, O Ginoo, ang akon pangamuyo, dungga ang akon pagpangayo sing bulig. (S)

Ang tanan nga mga kapungsoran nga imo gintuga magakari kag magaluhod sa imo. Magadayaw sila sang imo pagkagamhanan. Ikaw gamhanan kag nagahimo sang makatilingala nga mga butang; ikaw lamang amo ang Dios. (S)

Apang ikaw, O Ginoo, maluloy-on ka kag mahigugmaon nga Dios, indi madali mangakig, malulo kag matutom sa gihapon. Balik kag kaluoyi ako; pabakura kag luwasa ako, kay ako nagaalagad sa imo subong sang ginhimo sang akon iloy. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 8:26-27

   Sa amo man nga bagay, kita nga mga maluya ginabuligan sang Espiritu. Kay indi kita makahibalo kon paano magpangamuyo, kundi ang Espiritu amo ang nagapakiluoy sa Dios para sa aton sa mga pag-ugayong nga indi masaysay sa mga tinaga. Kag ang Dios nga nagausisa sang tagipusoon sang mga tawo nakahibalo man sang panghunahona sang Espiritu. Kay ang Espiritu nagapakiluoy sa Dios para sa iya mga tumoluo kag suno sa iya kabubot-on. 

Aleluya:

Mateo 11:25

    Bulahan ikaw, O Amay, Ginoo sang langit kag duta, kay ginpahayag mo sa mga di-maalam ang misteryo sang ginharian.

Ang Pagbasa sang Santos nga Ebanghelyo suno kay:

San Mateo 13:24-43

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang isa ka tawo nga nagsab-og sang maayo nga binhi sa iya uma. Isa ka gab-i, sang nagakatulog ang mga tawo, nag-abot ang iya kaaway kag ginsab-ugan man sang bugang ang iya uma kag naglakat. Sang nagtubo ang tanom, kag nagpamunga, ang mga bugang nagtubo man. Ang mga suloguon sang tawo nagkadto sa iya kag nagsiling, ‘Sir, maayo nga binhi ang imo ginsab-og sa imo nga uma, pero diin bala maghalin ining mga bugang?’ Nagsabat sia, ‘Ginsab-og ini sang kaaway.’ Nagpamangkot sila, ‘Luyag mo bala nga panggabuton namon ang mga bugang?’ Nagsabat sia, ‘Indi lang, kay basi may magabot man kamo nga mga trigo kaupod sa mga bugang. Pabay-i lang ninyo anay nga magpamuhi ang mga bugang kag ang mga trigo tubtob sa tig-alani, kay kon tig-alani na singganon ko ang mga mangangani: Gabuta anay ninyo ang mga bugang, bugkosa ini kag idap-ong sa kalayo. Dayon tipuna ninyo ang trigo kag isulod sa akon tambubo.’ ” 

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang binhi sang mostasa, nga ginkuha sang isa ka tawo kag ginpanggas sa iya uma. Ini labing diutay sa tanan nga binhi, pero kon magtubo ini magataas sia sa tanan nga kahuykahoy kag mangindaku nga kahoy, sa bagay nga ang mga pispis nagadapo kag nagapugad sa iya mga sanga.” 

   Si Jesus nagsugid sa ila sing isa pa gid ka palaanggiran, “Ang Ginharian sang langit kaangay sang lebadora. Ginakuha ini sang isa ka babayi kag ginalamas sa tatlo ka sukob nga arina, tubtob nga maghabok ang bug-os nga linamas.” 

   Si Jesus naggamit sang mga palaanggiran sa pagtudlo sini nga mga butang sa mga tawo. Wala sia sing may ginhambal sa ila nga indi paagi sa palaanggiran. Ginhimo niya ini agod matuman ang ginsiling sang propeta: 

     “Magahambal ako sa ila 

     Paagi sa mga palaanggiran,

     Magasugid ako sang mga butang

     Nga wala pa mahibal-i

     Halin sa pagtuga sang kalibutan.” 

   Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang.” 

   Si Jesus nagsiling sa ila, “Ang tawo nga nagsab-og sang maayo nga binhi amo ang Anak sang Tawo. Ang uma amo ang kalibutan. Ang maayo nga binhi amo ang mga anak sang Ginharian, kag ang mga bugang amo ang mga anak sang Yawa. Ang kaaway nga nagsab-og sang bugang amo si Satanas. Ang tig-alani amo ang katapusan sang panahon, kag ang mga mangangani amo ang mga anghel. Subong nga ang mga bugang gintipon kag ginsunog sa kalayo, amo man ang mahanabo sa katapusan sang panahon. Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala, kag ang tanan nga nagahimo sing malaut. Kag ini sila ihaboy sa nagadabadaba nga kalayo, sa diin magahibi sila kag magabagrot sang ila mga ngipon. Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may dulonggan kamo!” 

Hulyo 18 | Hulyo 20