Enero 31, 2021, Ika-4 nga Domingo sang Tuig

Liturhiya sang Pulong

Nahauna nga Balasahon - Deuteronomio 18:15-20

Salmo sa Pagsabat - Mga Salmo 95:1-2, 6-7, 7-9

Ika-2 nga Balasahon - 1 Corinto 7:32-35

Aleluya - Lucas 4:18

Ebanghelyo - Marcos 1:21-28

1. Ang Pagbasa gikan sa Libro sang:

Deuteronomio 18:15-20

Sa baylo, magapadala sia sa inyo sang mga propeta kaangay sa akon gikan sa inyo kaugalingon nga mga tawo, kag tumanon ninyo sila.

“Sang adlaw nga nagtipon kamo sa bukid sang Sinai, nagpakiluoy kamo nga indi na makabati liwat sa  tingog sang Ginoo, ukon makakita sang iya nagadabdab nga presensya, kay kon mahanabo ini mapatay kamo. Gani ang Ginoo nagsiling sa akon, ‘Maayo ang ila pangabay. Padalhan ko sila sing mga propeta pareho sa imo halin sa ila kaugalingon nga mga tawo. Singganon ko sila kon ano ang ila ihambal, kag sugiran nila ang mga tawo sang tanan nga akon ginasugo. Kon ang isa ka propeta maghambal sa akon ngalan, silutan ko ang bisan sin-o nga indi magtuman sa iya. Pero ang bisan sin-o nga propeta nga magpangahas sa paghambal sa akon ngalan nga wala ko ginsugo dapat sia mapatay, kay amo man ini ang dapat himuon sa bisan sin-o nga propeta nga nagahambal sa ngalan sang iban nga mga dios.’

Salmo sa Pagsabat:

Mga Salmo 95:1-2, 6-7, 7-9

(S) Kabay nga mabatian ninyo ang tingog sang Ginoo: Indi kamo magpakatig-a sang inyo tagipusoon.

Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)

Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. (S)

Karon pamatii ninyo ang iya ginasiling. “Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa. Didto gintilawan kag ginsulay  nila ako, bisan nakita na nila ang akon ginhimo para sa ila. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 7:32-35

Mga utod: Luyag ko nga mahilway kamo sa libog. Ang wala sing asawa nagakabalaka nahanungod sa mga hilikuton sang Ginoo, kay nagatinguha sia sa paglipay sa Ginoo. Pero ang may asawa nagakabalaka sa mga butang sining kalibutan, kay luyag sia maglipay sang iya asawa. Gani, ang may asawa nabutang sa tungatonga. Ang dalaga ukon ang wala sing bana nagakabalaka nahanungod sa mga hilikuton sang Ginoo, kay luyag niya ihalad ang iya lawas kag espiritu. Pero ang may bana nagakabalaka sa mga butang sining kalibutan, kay luyag sia maglipay sang iya bana. 

Nagasiling ako sini, kay luyag ako magbulig sa inyo. Wala ako nagapugong sa inyo, kundi luyag ko nga himuon ninyo kon ano ang husto kag nagakabagay, kag ihalad ninyo ang inyo kaugalingon sing bug-os sa pag-alagad sa Ginoo nga wala sing ginaulikdan.

Aleluya:

San Lucas 4:18

Ginpadala ako sang Ginoo sa pagwali sang Maayong Balita sa mga imol, kag sa pagbantala sang kahilwayan sa mga bihag.

Ang Pagbasa sang Santos nga Ebanghelyo suno kay:

San Marcos 1:21-28

   Nag-abot sila sa banwa sang Capernaum, kag sang Adlaw nga Inugpahuway nagsulod si Jesus sa sinagoga kag nagpanudlo. Ang mga tawo nga nakabati sa iya natingala sang iya pagpanudlo kay nagpanudlo sia nga may awtoridad kag indi sia pareho sang mga manunodlo sang Kasugoan.

   Sa amo gid nga tion nagsulod sa sinagoga ang isa ka tawo nga may malaut nga espiritu kag nagsinggit, “Ano ang luyag mo himuon sa amon, Jesus nga taga-Nazaret? Nagkari ka bala sa paglaglag sa amon? Nahibal-an ko kon sin-o ka. Ikaw ang Balaan nga ginpadala sang Dios!” 

   Ginmanduan ni Jesus ang espiritu: “Maghipos ka kag maggwa sa tawo.” 

   Ginpakurog sang malaut nga espiritu ang tawo, nagsinggit sing tudo kag naggwa sa tawo. Ang mga tawo natingala gid, sa bagay nga nagpinamangkutanay sila, “Ano ini? Bag-o bala ini nga pagtulon-an? Ini nga tawo may gahom bisan pa sa pagsugo sang malaut nga mga espiritu, kag nagatuman sila sa iya.” 

   Gani, ang balita nahanungod kay Jesus naglapnag sing madali sa bug-os nga probinsya sang Galilea.

Enero 30 | Pebrero 1

Enero 30, 2021, Sabado, Ika-3 nga Semana sang Tuig

Liturhiya sang Pulong

Nahauna nga Balasahon - Hebreo 11:1-2, 8-19

Kalantahon sa Pagsabat - Lucas 1:69-70, 71-72, 73-75

Aleluya - Juan 3:16

Ebanghelyo - Marcos 4:35-41

Ang Pagbasa gikan sa Sulat sa mga:

Hebreo 11:1-2, 8-19

Mga utod: Ang pagtuo amo ang pagsalig sang mga butang nga aton ginalauman, ang kasigurohan sang mga butang nga indi naton makita. Tungod sang ila pagtuo, ang mga tawo sadtong una nga mga panahon ginpakamaayo sang Dios. 

Tungod sa pagtuo, si Abraham nagtuman sang pagtawag sang Dios, kag nagkadto sia sa duta nga ginsaad sang Dios nga ihatag sa iya. Ginbayaan niya ang iya kaugalingon nga duta nga wala makahibalo kon diin sia makadto. Paagi sa pagtuo nagpuyo sia sa duta nga ginsaad sang Dios sa iya, nga daw isa ka dumoluong. Nagpuyo sia sa mga tolda upod kay Isaac kag kay Jacob nga nagbaton sang amo man nga saad gikan sa Dios. Kay si Abraham nagpaabot sang isa ka siyudad nga ginplano kag ginpatindog sang Dios, ang siyudad nga ang iya mga sadsaran malig-on. 

Tungod sa pagtuo, si Abraham nangin-amay, bisan pa nga tigulang na gid sia kag si Sara indi naman makapamata. Nagsalig sia nga ang Dios magatuman sang iya ginsaad. Bisan nga makabig sia nga daw patay na, sa sini nga tawo nagikan ang mga kaliwat nga subong kadamo sang mga bituon sa langit, kag subong man kadamo sang mga balas nga indi maisip sa baybayon. \

Ini tanan nga mga tawo nagkalamatay sa pagtuo. Wala nila mabaton ang mga ginsaad sang Dios sa ila, pero gikan sa malayo ila nakita kag ginpaabot ini, kag ginkilala nila nga mga dumoluong sila kag mga umalagi dira sa duta. Ang mga nagahambal sini nagapahayag sing maathag nga ginapangita nila ang banwa nga ila gid kaugalingon. Wala na nila pagdumdoma ang banwa nga ila ginbayaan, kay kon amo ini ang ila ginhimo, kuntani may kahigayunan pa sila sa pagbalik. Sa baylo, naghandom sila sang labi pa kaayo nga banwa, ang langitnon nga banwa. Gani ang Dios wala mahuya nga tawgon nila sia nga ila Dios, kay nakaaman sia para sa ila sang isa ka siyudad. 

Tungod sa pagtuo, si Abraham naghalad sang iya anak nga si Isaac, sang gintilawan sia sang Dios. Bisan sia ang ginsaaran sang Dios, si Abraham handa sa paghalad sang iya bugtong nga anak. Ang Dios nagsiling sa iya, “Paagi kay Isaac magagikan ang imo mga kaliwat.” Nagpati si Abraham nga ang Dios makasarang sa pagbanhaw kay Isaac—gani, kon hambalon gid man si Abraham nagbaton liwat kay Isaac gikan sa kamatayon. 

Kalantahon sa Pagsabat:

San Lucas 1:69-70, 71-72, 73-75

(S) Dayawon ta ang Ginoo, ang Dios sang Israel! Kay Iya ginduaw kag gintubos ang mga tawo.

Ginbangon niya Ang isa ka gamhanan nga Manlulowas Para sa aton, Ang isa nga kaliwat ni David Nga iya alagad. Amo ini ang iya ginsiling sang una Paagi sa iya balaan nga mga propeta. (S)

Nagsaad sia sa pagluwas sa aton Gikan sa aton mga kaaway, Kag sa gahom sang tanan Nga nagadumot sa aton. Nagsiling sia nga kaluoyan niya Ang aton mga ginikanan, Kag dumdomon niya Ang iya balaan nga kasugtanan. (S)

Nagsaad sia sa aton amay Nga si Abraham, Kag nagsumpa nga luwason niya kita Sa aton mga kaaway, Kag tugotan kita sa pag-alagad sa iya Nga walay kahadlok, Nga mangin balaan kag matarong Sa iya atubangan, Sa tanan nga mga inadlaw Sang aton kabuhi. (S)

Aleluya:

San Juan 3:16

Ginhigugma gid sang Dios ang bug-os nga kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan.

Ang Pagbasa sang Santos nga Ebanghelyo suno kay:

San Marcos 4:35-41

   Sadto nga panahon: Sang sirom na sang amo nga adlaw, nagsiling si Jesus sa iya mga gintuton-an, “Dali, matabok kita sa pihak sang linaw." Gani ginbayaan nila ang madamo nga mga tawo. Dayon ang mga gintuton-an nagsakay sa sakayan nga ginasakyan ni Jesus, kag gindala nila sia upod sa ila. May iban man nga mga sakayan didto. Sa hinali nagmadlos ang hangin kag ang mga balod nagsulod sa sakayan sa bagay nga madali na lang ini makapan. Pero si Jesus didto sa ulin nga nagaulon sa ulonan kag nagakatulog. Ginpukaw sia sang mga gintuton-an, kag nagsiling sila sa iya, “Manunodlo, wala ka bala nagakabalaka nga daw malumos na kita?” Nagbangon si Jesus kag ginmanduan niya ang hangin, “Mag-untat ka!” kag nagsiling sia sa mga balod, “Maglinaw ka!” Nag-untat ang hangin kag may daku nga kalinaw. Dayon si Jesus nagsiling sa ila, “Ngaa bala nahadlok gid kamo? Ano, wala pa bala kamo sing pagtuo?”

   Pero tama gid ang ila kahadlok, kag nagpamangkutanay sila: “Sin-o bala ini nga tawo? Bisan pa ang hangin kag ang mga balod nagatuman sa iya!”

Enero 29 | Enero 31

Enero 29, 2021, Biyernes, Ika-3 nga Semana sang Tuig

Liturhiya sang Pulong

Nahauna nga Balasahon - Hebreo 10:32-39

Salmo sa Pagsabat - Mga Salmo 37:3-4, 5-6, 23-24, 39-40

Aleluya - Mateo 11:25

Ebanghelyo - Marcos 4:26-34

Ang Pagbasa gikan sa Sulat sa mga:

Hebreo 10:32-39

Dumdoma ang inyo nagligad nga mga panahon. Sa sadto nga mga inadlaw, sa tapos kamo maiwagan sang Dios, nag-antos kamo sing madamo, pero wala kamo madaog sang mga pag-antos. Kon kaisa ginapakahuy-an kag ginasakit kamo sa atubangan sang mga tawo, kag kon kaisa handa kamo sa pagpakig-unong sa mga ginatratar sing subong sini. Nag-ambit kamo sang mga pag-antos sang mga binilanggo, kag sang agawon sa inyo ang tanan ninyo nga mga pagkabutang ginbatas ninyo ini sing malipayon, kay nahibaluan ninyo nga may mga pagkabutang pa kamo nga labi pa kaayo kag nagapadayon sa walay katapusan. Gani indi ninyo pagdulaa ang inyo pagsalig, kay may daku ini nga balos. Kinahanglan magpailob kamo, agod nga matuman ninyo ang kabubot-on sang Dios kag mabaton ninyo ang iya ginasaad. Kay ang kasulatan nagasiling: “Sa indi na lang madugay, Ang manugkari magaabot na, Indi sia magpadugay. Pero ang akon matarong nga mga tawo Magatuo kag magakabuhi, Pero kon may yara sa ila Nga magbiya, Indi ako malipay sa iya.” Indi kita mga tawo nga nagabiya kag nagakawala, kundi nagatuo kita kag nagakaluwas.

Salmo sa Pagsabat:

Mga Salmo 37:3-4, 5-6, 23-24, 39-40

(S) Ang Ginoo nagaluwas sang matarong nga mga tawo.

Magsalig ka sa Ginoo, kag maghimo sing maayo; magkabuhi ka sa duta kag indi ka maano. Pangitaa ang imo kalipay sa Ginoo, kag ihatag niya sa imo ang imo gid ginahandom. (S)

Itugyan ang imo kaugalingon sa Ginoo; magsalig ka sa iya, kag sia magabulig sa imo. Iya pasigahon ang imo kaayo subong kapawa, kag ang imo pagkamatarong subong sa udto nga adlaw. (S)

Ang Ginoo nagatuytoy sa tawo nga indi maano sa iya dapat pagaagyan, kag nagakalipay sia sa iya pagginawi. Kon mapukan sia, makabangon pa sia, kay ang Ginoo magabulig sa iya. (S)

Ang Ginoo nagaluwas sang matarong nga mga tawo, kag iya sila ginaapinan sa tion sang kagamo. Iya sila ginabuligan kag ginatabangan, ginaluwas niya sila sa mga malaut, kay nagadangop sila sa iya agod apinan. (S)

Aleluya:

San Mateo 11:25

Dayawon ka, O Amay Ginoo sang langit kag sang duta, kay ginpahayag mo sa mga kubos ang mga misteryo sang imo ginharian.

Ang Pagbasa sang Santos nga Ebanghelyo suno kay:

San Marcos 4:26-34

Sadto nga panahon: Si Jesus nagsiling sa mga tawo, “Ang Ginharian sang Dios kaangay sang tawo nga nagsab-og sang binhi sa iya uma. Nagatulog sia kon gab-i, kag kon adlaw nagaobra sia, samtang ang binhi nagaulhot kag nagatubo, pero wala sia kahibalo kon paano ang pagkahimo sini. Ang duta mismo nagapatubo kag nagapabunga sang mga tanom: nahauna ang dahon, madason ang uhay, kag sa ulihi ang matinggas nga bunga. Kon ang bunga gulang na, nagapadala sia sing manuggarab, kay ang tig-alani nag-abot na.” Si Jesus nagpamangkot, “Sa ano bala mapaanggid ang Ginharian sang Dios? Ano nga palaanggiran ang aton gamiton sa pagpaathag sini? Kaangay ini sang isa ka binhi sang mostasa, ang labing diutay nga binhi sa kalibutan. Ginakuha ini sang tawo kag ginatanom sa duta. Dayon nagatubo ini kag nagadaku sing labaw sa mga kahuykahoy. Ang iya mga sanga nagadalagku sa bagay nga ang mga pispis nagapugad sa iya sanga nga mahandong.” Paagi sa mga palaanggiran nga kasubong sini, nagwali si Jesus sa mga tawo. Naghambal sia sa ila suno sa ila mahangpan. Indi sia maghambal sa ila kon indi paagi sa mga palaanggiran. Pero kon silahanon lang sang iya mga gintuton-an, ginasaysay niya ang tanan sa ila.

Enero 28 | Enero 30

Enero 28, 2021, Huwebes, Ika-3 nga Semana sang Tuig

Liturhiya sang Pulong

Santo Tomas de Aquino, Pari kag Doktor sang Simbahon

Nahauna nga Balasahon - Hebreo 10:19-25

Salmo sa Pagsabat - Mga Salmo 24:1-2, 3-4, 5-6

Aleluya - Mga Salmo 119:105

Ebanghelyo - Marcos 4:21-25

Ang Pagbasa gikan sa Sulat sa mga:

Hebreo 10:19-25

Gani, mga kautoran, may bug-os kita nga kahilwayan sa pagsulod sa Labing Balaan nga Duog paagi sa kamatayon ni Jesus. Ginbuksan niya para sa aton ang isa ka bag-o kag buhi nga dalan, paagi sa kurtina, nga amo ang iya kaugalingon nga lawas. May gamhanan kita nga pari nga nagadumala sa balay sang Dios. Gani magpalapit kita sa Dios, nga may sinsero nga tagipusoon kag malig-on nga pagtuo, nga may konsyensya nga natinluan sa malaut nga panghunahona, kag mga lawas nga nahugasan sang tubig nga matinlo. Magmalig-on kita sa paglaom nga aton ginahuptan, kay masaligan naton ang Dios sa pagtuman sang iya saad. Magkabalaka kita sa isa kag isa, nga nagabinuligay sa pagpakita sang gugma kag sa paghimo sing maayo. Indi naton pagbayaan ang aton kinabatasan nga pagtililipon, subong sang ginahimo sang iban. Sa baylo, maglinaygayay ang isa kag isa, kapin pa kay nahibaluan ninyo nga malapit na ang Adlaw sang Ginoo.

Salmo sa Pagsabat:

Mga Salmo 24:1-2, 3-4, 5-6

(S) Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob.

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)

Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag panghunahona, nga wala nagasimba sa mga diosdios, kag wala nagasaad sang kabutigan. (S)

Pagabendisyunan sia sang Ginoo, kag ang Dios nga lya Manluluwas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

Aleluya:

Mga Salmo 119:105

Ang Imo pulong isa ka suga nga nagatuytoy sa akon mga tiil, kag kapawa sa akon alagyan.

Ang Pagbasa sang Santos nga Ebanghelyo suno kay:

San Marcos 4:21-25

Sadto nga panahon: Si Jesus nagpadayon: “May nagadala bala sing suga kag nagabutang sini sa idalom sang isa ka sulodlan, ukon sa idalom sang katre? Wala bala niya ini ginabutang sa tulongtongan? Ang bisan ano nga ginatago, igapahayag kag ang bisan ano nga ginatabunan, pagabuksan. Gani, kon sin-o ang luyag magpamati, magpamati sia!” Kag si Jesus nagsiling pa gid sa ila, “Talupangda gid ang inyo ginapamatian! Ang talaksan nga inyo ginagamit sa paghukom sa iban amo man ang pagagamiton sang Dios sa paghukom sa inyo, kag sobra pa sini ang pagahimuon sa inyo. Ang tawo nga may iya na pagahatagan pa gid, kag ang tawo nga wala sing iya, bisan ang diutay nga yara sa iya pagakuhaon pa.”

Enero 27 | Enero 29

Enero 27, 2021, Miyerkules, Ika-3 nga Semana sang Tuig

Liturhiya sang Pulong

Nahauna nga Balasahon - Hebreo 10:11-18

Salmo sa Pagsabat - Mga Salmo 110:1 ,2, 3, 4

Ebanghelyo - Marcos 4:1-20

Ang Pagbasa gikan sa Sulat sa mga:

Hebreo 10:11-18

Ang tagsa ka pari nga Judio nagatindog kag nagahimo sang iya hilikuton adlaw-adlaw kag nagadulot sang amo man gihapon nga mga halad sing makapila ka beses. Pero ini nga mga halad indi gid makakuha sang mga sala. Pero si Cristo nagdulot sang isa ka halad tungod sa mga sala, isa ka halad nga maayo kag wala sing katapusan, kag dayon naglingkod sia sa tuo sang Dios. Karon didto sia nagahulat tubtob nga himuon sang Dios ang iya mga kaaway nga tulongtongan sang iya mga tiil. Gani paagi sa isa ka halad, ginhimpit niya sing dayon ang mga natinluan sa sala. Kag ang Espiritu Santo nagasaksi man sa aton. Sa nahauna nagasiling sia: “Amo ini ang kasugtanan Nga akon himuon sa ila Sa palaabuton nga mga inadlaw, Siling sang Ginoo: Itanom ko ang akon mga kasugoan Sa ila mga tagipusoon, Kag isulat ko ini Sa ila mga panghunahona.” Kag nagasiling pa gid sia, “Indi ko na gid pagdumdomon ang ila mga sala kag ang ila malaut nga mga binuhatan.” Gani kon ini tanan napatawad na, indi na kinahanglan ang isa ka halad sa pagkuha sang mga sala. 

Salmo sa Pagsabat:

Mga Salmo 110:1 ,2, 3, 4

(S) Manginpari ikaw sa walay katubtoban suno sa sulondan sang pagkapari ni Melquisedec.

Ang Ginoo nagsiling sa akon Ginoo nga hari, "Lingkod ka diri sa akon tuo, tubtob mabutang ko ang imo mga kaaway sa idalom sang imo mga tiil." (S) 

Gikan sa Sion ang Ginoo magapasangkad sang imo harianon nga gahom, nagasiling sia, "Magagahom ka sa imo mga kaaway." (S) 

Sa adlaw nga awayon mo ang imo mga kaaway ang imo mga tawo magabulig sing kinabubut-on. Kaangay sang tun-og sa kaagahon, ang imo pamatan-on nga mga lalaki magakadto sa imo sa balaan nga mga bakulod. (S) 

Ang Ginoo nagsumpa, kag indi Niya ini pagbawion; "Manginpari ikaw sa walay katubtoban, suno sa sulondan sang pagkapari ni Melquisedec." (S)

Aleluya:

Ang binhi amo ang pulong sang Dios, si Kristo ang manugsab-og; ang bisan sin-o nga nagadangop sa Iya may kabuhi nga walay katapusan. 

Ang Pagbasa sang Santos nga Ebanghelyo suno kay:

San Marcos 4:1-20

Sadto nga panahon: Sa liwat si Jesus nagpanudlo sa higad sang Linaw sang Galilea. Tama gid kadamo ang mga tawo nga nagdulogok sa palibot niya sa bagay nga nagsakay sia sa isa ka sakayan nga nagalutaw sa tubig kag naglingkod sia didto samtang ang madamo nga mga tawo nagpabilin sa bibi sang linaw. Si Jesus naggamit sang mga palaanggiran sa pagtudlo sa ila sang madamo nga mga butang, kag sa iya pagpanudlo nagsiling sia sa ila: 

    “Magpamati kamo! May isa ka tawo nga naglakat sa pagsab-og. Sang pagsab-og niya sang binhi, ang iban nagtupa sa dalan, kag ang mga pispis nagdapo kag nagtuka sini. Ang iban nagtupa sa batuhon nga mga duog, sa diin hapaw lamang ang duta. Sa wala lang madugay nag-ulhot ang binhi tungod kay manabaw ang duta. Sang udto na ang adlaw nalayong ang bag-ong tubo nga binhi, kag bangod kay indi gid madalom ang gamot sini, ang tanom madali nga nalaya. Ang iban nga binhi nagtupa sa mga talungon. Nagtubo ang mga talungon kag naglumos sang tanom, kag wala ini magpamunga. Pero ang iban nga binhi nagtupa sa maayo nga duta, namuhi, nagtubo kag nagpamunga: ang iban sini nagpatubas sing 30 ka pilo, ang iban sini 60 ka pilo, kag ang iban sini 100 ka pilo.” 

    Kag si Jesus nagsiling “Gani, kon sin-o ang luyag magpamati, magpamati sia!” 

    Sang isahanon na lang si Jesus, ang iban nga nakabati sa iya nagpalapit upod sa dose ka mga apostoles kag nagpangabay nga ipaathag niya ang mga palaanggiran. Si Jesus nagsabat sa ila, “Ginhatagan kamo sang tinago sang Ginharian sang Dios, pero ang iban nga yara sa gwa magapamati sini tanan paagi sa mga palaanggiran, agod nga, 

        ‘Magatulok nga magatulok sila, 

        Pero indi makakita, 

        Magapamati nga magapamati sila, 

        Pero indi makahangop, 

        Kay kon makahangop sila 

        Basi magliso sila sa Dios 

        Kag patawaron niya sila.’” 

    Dayon si Jesus nagpamangkot sa ila, “Indi bala kamo makahangop sini nga palaanggiran? Karon, paano abi ang pagkahangop ninyo sang bisan ano nga palaanggiran? Ang manugsab-og nagsab-og sang pulong sang Dios. Ang mga binhi nga nagatupa sa dalan amo ang pulong sang Dios nga sang pagkabati sang mga tawo, sa gilayon nagaabot si Satanas kag nagaagaw sang pulong nga ginsab-og sa ila tagipusoon. Amo man ang ginasab-og sa batuhon nga duta. Kasubong ini sang pulong sang Dios nga sang pagkabati sang mga tawo, sa gilayon ginabaton nila sing malipayon. Pero wala ini nagatudok sa ila tagipusoon, kag wala nagapabilin sing madugay. Gani wala na sila nagapadayon kon mag-abot ang mga kalalat-an ukon mga paghingabot tungod sang pulong sang Dios. Kag ang mga nagatupa sa mga talungon amo ang pulong sang Dios nga nabatian sang mga tawo. Pero ang palaligban sang pangabuhi, ang paghigugma sa manggad, kag ang iban pa gid nga mga handom nagaginutok sa ila mga hunahona kag nagalumos sang pulong sang Dios, kag wala ini nagapamunga. Pero ang nagtupa sa maayo nga duta amo ang pulong sang Dios nga sang pagkabati sang mga tawo ginbaton nila ini, kag nagapamunga: ang iban 30 ka pilo, ang iban 60 ka pilo, kag ang iban 100 ka pilo.”

Enero 26 | Enero 28

Enero 26, 2021, San Timoteo kag San Tito, mga Obispo

Liturhiya sang Pulong

Nahauna nga Balasahon - 2 Timoteo 1:1-8

Salmo sa Pagsabat - Mga Salmo 96:1-2, 2-3, 7-8, 10

Aleluya - 2 Timoteo 1:10

Ebanghelyo - Marcos 3:31-35

Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 1:1-8

Pag-abiabi halin kay Pablo, isa ka apostol ni Cristo Jesus suno sa kabubot-on sang Dios, nga ginpadala sa pagbantala sang ginsaad nga kabuhi nga nangin-aton sa aton paghiusa kay Cristo Jesus— Sa kay Timoteo, ang hinigugma ko nga anak: Kabay nga ang Dios nga Amay kag si Cristo Jesus nga aton Ginoo maghatag sa imo sing grasya, kaluoy kag paghidait. Nagapasalamat ako sa Dios nga akon ginaalagad sa matinlo nga konsyensya, subong sang ginhimo sang akon mga katigulangan. Ginapasalamatan ko sia samtang ginadumdom ko ikaw sa gihapon sa akon mga pangamuyo sa adlaw kag sa gab-i. Ginadumdom ko ang imo mga luha kag luyag gid ako magpakigkita sa imo, agod nga mapuno ako sing kalipay. Ginadumdom ko man ang imo tunay nga pagtuo, ang pagtuo nga iya man anay sang imo lola nga si Loida, kag sang imo iloy nga si Eunice. Pat-od gid ako nga amo man ini ang imo pagtuo. Tungod sini ginpahanumdom ko ikaw sa pagpadabdab sang bugay nga ginhatag sang Dios sa imo, sang pagtungtong ko sang akon mga kamot sa imo ulo. Kay ang Espiritu nga ginhatag sang Dios sa aton wala nagapatalaw sa aton, kundi nagapuno sa aton sing gahom kag paghigugma kag pagpugong sang kaugalingon. Gani, indi ka magkahuya sa pagpanaksi tungod sa aton Ginoo, kag indi ka man magkahuya tungod sa akon nga binilanggo tungod sa iya. Sa baylo, magpakigbahin ka sa mga pag-antos tungod sang Maayong Balita, suno sa kusog nga ginahatag sang Dios sa imo para sini.

Salmo sa Pagsabat:

Mga Salmo 96:1-2, 2-3, 7-8, 10

(S) Ibantala ang gamhanan nga mga binuhatan sang Ginoo sa tanan nga katawohan.

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Magkanta kamo sa Ginoo, kag dayawa ninyo sia! (S) 

Isugid adlaw-adlaw ang maayong balita nga sia nagluwas sa aton! Ibantala ang iya himaya sa mga kapungsoran, ang iya gamhanan nga mga binuhatan sa tanan nga katawohan. (S) 

Dayawa ninyo ang Ginoo, tanan kamo nga katawohan sang duta! Dayawa ninyo ang iya himaya kag gahom! Dayawa ninyo ang mahimayaon nga ngalan sang Ginoo, magdala kamo sing dulot magsulod sa iya Templo. (S) 

Singgana ang tanan nga mga kapungsoran, "Ang Ginoo amo ang hari! Ang duta napahamtang sing malig-on kag indi mauyog; Sia nagahukom sang tanan nga katawohan sa katarungan." (S)  

Aleluya:

2 Timoteo 1:10

Ang aton Manluluwas nga si Jesukristo naglaglag sang kamatayon, kag ginpahayag Niya ang kabuhi paagi sa Maayong Balita. 

Ang Pagbasa sang Santos nga Ebanghelyo suno kay:

San Marcos 3:31-35

Dayon ang iloy kag ang mga utod nga lalaki ni Jesus nag-abot. Nagtindog lang sila sa gwa sang balay kag nagpahibalo nga gusto sila magpakigkita kay Jesus. May madamo nga mga tawo nga nagalingkod sa palibot ni Jesus, kag nagsiling sila sa iya, “Hoy, ang iloy mo kag ang imo mga utod yara sa gwa, kag gusto sila magpakigkita sa imo.” 

    Nagsabat si Jesus, “Sin-o bala ang akon iloy? Sin-o bala ang akon mga utod?” Gintulok niya ang mga tawo nga nagalingkod sa palibot niya, kag nagsiling, “Tan-awa ninyo, yari ang akon iloy kag mga utod! Kay ang nagabuhat sang luyag sang Dios, amo ang akon utod nga lalaki, ang akon utod nga babayi, kag ang akon iloy.”

Enero 25 | Enero 27

Enero 25, 2021, Sa Pagkonbertir kay San Pablo, Apostol

Liturhiya sang Pulong

Nahauna nga Balasahon - Binuhatan 22:3-16

Salmo sa Pagsabat - Mga Salmo 117:1, 2

Aleluya - Juan 15:16

Ebanghelyo - Marcos 16:15-18

Ang Pagbasa gikan sa mga:

Binuhatan sang mga Apostoles 22:3-16

   Sadto nga mga inadlaw, si Pablo nagsiling sa mga tawo: “Isa ako ka Judio nga natawo sa Tarso sang Cilicia, pero diri ako nagdaku sa Jerusalem kag nagtuon ako sa idalom sang pagtudlo ni Gamaliel. Natun-an ko sing maid-id ang Kasugoan sang aton mga katigulangan, kag kaangay sa inyo karon nagmaukod ako sa mga bulohaton sang Dios. Ginhingabot ko kag ginpamatay ang nagasunod sa sini nga Dalan. Ginpangdakop ko ang mga lalaki kag mga babayi kag ginpabilanggo sila. Sarang makapamatuod ang Pinakamataas nga Pari kag ang tanan nga katapo sang Konsilyo nga nagahambal ako sing matuod. Ginhatagan nila ako sing mga sulat nga akon gindala sa mga utod nga Judio sa Damasco agod nga makapangdakop ako sini nga mga tawo kag madala ko sila pabalik sa Jerusalem nga nagapos sang kadena agod silutan.” 

   “Nagahingudto gid ang adlaw sang nagapanglakaton ako kag nagahilapit na sa Damasco, kag sa hinali may masilaw nga silak halin sa langit nga naglikop sa akon. Natumba ako sa duta kag may nabatian ako nga tingog nga nagasiling sa akon, ‘Saulo, Saulo! Ngaa ginahingabot mo ako?’ Nagpamangkot ako, ‘Sin-o ka bala, Ginoo?’ Nagsiling sia sa akon, ‘Ako amo si Jesus nga taga-Nazaret, nga imo ginahingabot.’ Nakita sang akon mga kaupdanan ang silak, pero wala sila makabati sang tingog nga nagahambal sa akon. Nagpamangkot ako, ‘Ano ang himuon ko, Ginoo?’ kag ang Ginoo nagsabat sa akon, ‘Bangon ka kag magkadto sa Damasco, kag pagasugiran ka didto sang tanan nga ginpat-od sang Dios nga ipahimo sa imo.’ Nabulag ako tungod sang kasilaw, gani gintuytoyan ako sang akon mga kaupdanan pakadto sa Damasco. 

   “May isa didto ka tawo nga ginahingalanan kay Ananias. Isa sia ka tawo nga matinumanon sa aton Kasugoan. Ini sia ginatahod gid sang tanan nga mga Judio nga nagapuyo sa Damasco. Nagkadto sia sa akon kag nagtindog sa luyo ko kag nagsiling sia, ‘Utod Saulo, makakita ka na liwat!’ Kag sadto gid nga tion nakakita ako kag gintulok ko sia. Nagsiling sia, ‘Ang Dios sang aton mga katigulangan nagpili sa imo agod mahibaluan mo ang iya kabubot-on, kag makita mo ang iya matarong nga Alagad, kag makabati ka sang iya kaugalingon nga tingog. Kay manginsaksi ka niya sa pagsugid sa tanan nga mga tawo sang imo nakita kag nabatian. Kag karon, ano pa ang ginahulat mo? Tindog ka kag magpabautiso, kag hugasi ang imo mga sala paagi sa pagpanawag sa iya ngalan.’ ” 

Salmo sa Pagsabat:

Mga Salmo 117:1, 2

(S) Lakat kamo sa bug-os nga kalibutan kag ibantala ang Maayong Balita.

Dayawa ninyo ang Ginoo, tanan nga mga kapungsoran! Dayawa ninyo sia, tanan nga mga katawohan! (S) 

Ang iya mapinadayunon nga gugma para sa aton malig-on, kag ang lya katutom wala sing katapusan. Dayawa ang Ginoo! (S) 

Aleluya:

San Juan 15:16

   Ako ang nagpili sa inyo gikan sa kalibutan agod nga maglakat sa pagpamunga sing madamo, ang sahi sang bunga nga nagapadayon. 

Ang Pagbasa sang Santos nga Ebanghelyo suno kay:

San Marcos 16:15-18

   Sadto nga panahon: Si Jesus nagsiling sa onse ka mga gintuton-an, “Lakat kamo sa bug-os nga kalibutan kag ibantala ang Maayong Balita sa tanan nga mga tawo. Ang bisan sin-o nga magtuo kag mabautisohan, maluwas; ang indi magtuo, kondenahon. Ang mga tumoluo pagahatagan sining masunod nga mga gahom: magatabog sila sang mga yawa sa akon ngalan, magahambal sila sang iban nga mga hambal, kag kon mag-uyat sila sang mga man-og ukon makainom sang bisan ano nga hilo, indi sila mahalitan. Magatungtong sila sang ila mga kamot sa mga masakiton, kag ini sila magaayo.” 

Enero 24 | Enero 26

Enero 24, 2021, Ika-3 nga Domingo sang Tuig

Liturhiya sang Pulong

Nahauna nga Balasahon - Jonas 3:1-5, 10

Salmo sa Pagsabat - Mga Salmo 25:4-5, 6-7, 8-9

Ika-2 nga Balasahon - 1 Corinto 7:29-31

Aleluya - Marcos 1:15

Ebanghelyo - Marcos 1:14-20    

1. Ang Pagbasa gikan sa Libro ni:

Jonas 3:1-5, 10

Sa liwat ang Ginoo nagsiling kay Jonas, “Magkadto ka sa Ninive, inang daku nga siyudad kag iwali sa mga tawo ang mga pulong nga ginhatag ko sa imo.” Gani si Jonas nagtuman sa Ginoo kag nagkadto sa Ninive. Ang isa ka daku nga siyudad nga ang iya kasangkaron nagakinahanglan sing tatlo ka adlaw nga paglakat, halin sa pihak pakadto sa pihak. Si Jonas nagsulod sa siyudad kag sang makalakat sia sing isa ka adlaw nagbantala sia, “Sa tapos ang 40 kaadlaw ang Ninive pagalaglagon!”

Ang mga tawo sang Ninive nagtuo sa pulong sang Dios, nagpamat-od sila nga ang tagsatagsa dapat magpuasa, kag ang tanan nga mga pumoluyo halin sa kadalagkuan tubtob sa labing kubos, magbayu sing sako, sa pagpakilala nga naghinulsol sila.

Nakita sang Dios ang ila ginhimo; nakita niya ang ila pagbiya sang ila malaut nga pagginawi. Gani nagbaylo sia sang iya hunahona kag wala niya sila pagsiluti suno sa iya ginsiling nga silutan sila.

Salmo sa Pagsabat:

Mga Salmo 25:4-5, 6-7, 8-9

(S) O Ginoo, ipakita sa amon ang Imo mga dalanon.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S) 

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S) 

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 7:29-31

Mga utod, amo ini ang buot ko silingon: diutay na lang ang tion nga nabilin. Sugod karon ang may mga asawa magkabuhi nga daw wala sing asawa, ang mga nagakalisod subong nga daw wala man sila sing kalisod, ang mga nagakalipay subong nga daw wala man sila sing kalipay, ang mga nagabakal subong nga daw wala man sila sing binaklan, kag ang nagagamit sang mga pagkabutang sining kalibutan magkabuhi subong nga daw wala man sila nagagamit sini. Kay ang kahimtangan karon nagapakita nga ining kalibutan indi na gid magdugay. 

Aleluya:

San Marcos 1:15

Ang Ginharian sang Dios malapit na; bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Marcos 1:14-20

Sang nabilanggo na si Juan, si Jesus nagkadto sa Galilea kag nagwali sang Maayong Balita gikan sa Dios. Nagsiling sia, “Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.” 

Sang nagalakat si Jesus sa higad sang Linaw sang Galilea, may nakita sia nga duha ka mangingisda, si Simon kag ang iya utod nga si Andres, nga nagapanahid sa linaw. Si Jesus nagsiling sa ila, “Upod kamo sa akon kay tudloan ko kamo sa pagpanahid sang mga tawo.” Sa gilayon ginbayaan nila ang ila sahid kag nag-upod sa iya. 

Nagpadayon si Jesus sa paglakat kag sa uloonhan may duha pa gid ka mag-utod nga nakita sia, si Santiago kag si Juan, nga mga anak ni Zebedeo. Didto sila sa ila sakayan nga nagaaman sang ila sahid. Sang pagkakita ni Jesus sa ila gilayon gintawag niya sila. Gani, ginbayaan nila ang ila amay nga si Zebedeo sa sakayan upod sang mga sinuholan nga mga tawo kag nag-upod sila kay Jesus. 

Enero 23 | Enero 25

Enero 23, 2021, Sabado, Ika-2 nga Semana sang Tuig

Liturhiya sang Pulong

Nahauna nga Balasahon - Hebreo 9:2-3, 11-14

Salmo sa Pagsabat - Mga Salmo 47:2-3, 6-7, 8-9

Aleluya - Binuhatan 16:14B

Ebanghelyo - Marcos 3:20-21

Ang Pagbasa gikan sa Sulat sa mga:

Hebreo 9:2-3, 11-14

Mga utod: May ginpatindog nga isa ka tolda, ang nagwa nga bahin nga ginatawag ang Balaan nga Duog. Yara dira ang kandilerohan, ang lamisa, kag ang tinapay nga nahalad sa Dios. Sa likod sang ikaduha nga kurtina yara ang tolda nga ginatawag ang Labing Balaan nga Duog.

Pero si Cristo nakaabot na subong Pinakamataas nga Pari sang maayo nga mga butang nga yari na. Ang tolda diin sia nagaalagad labi pa ka daku kag himpit. Indi mga tawo ang naghimo sini, kon sayuron, indi iya sining tinuga nga kalibutan. Sang pagsulod ni Jesus sa tolda nagsulod sia sing makaisa gid lang sa Labing Balaan nga Duog, indi sa paghalad sang dugo sang mga kanding kag tinday nga mga baka, kundi, sang iya kaugalingon nga dugo kag natigayon niya ang wala sing katapusan nga kaluwasan para sa aton. Ang dugo sang mga kanding kag toro nga mga baka, kag ang abo sang sinunog nga tinday nga baka nga babayi ginawisik sa mga tawo nga nadagtaan, kag ini nagatinlo sa ila dagta nga lawasnon. Kon matuod ini, daw ano pa gid ang nahimo sang dugo ni Cristo! Paagi sa Espiritu nga wala sing katapusan ginhalad niya ang iya kaugalingon subong himpit nga halad sa Dios. Ang iya dugo magatinlo sang aton mga konsyensya sa wala sing pulos nga mga buhat, agod nga makaalagad kita sa Dios nga buhi. 

Salmo sa Pagsabat:

Mga Salmo 47:2-3, 6-7, 8-9

(S) Ang Dios nagapasaka sa Iya trono sa mga sininggit sang kalipay kag tunog sang mga trumpeta.

Ang Ginoo, ang Labing Mataas, dapat kahadlukan, gamhanan sia nga hari, nga nagagahom sa bug-os nga kalibutan. Ginpadaog niya kita batok sa mga katawuhan, ginapagahom niya kita sa mga kapungsoran. (S) 

Magkanta kamo sing mga pagdayaw sa Dios, mag-amba sing pagdayaw sa aton hari! Ang Dios hari sa bug-os nga duta, dayawa ninyo sia sa mga ambahanon! (S)

Ang Dios nagalingkod sa iya balaan nga trono, nagagahom sia sa mga kapungsoran. Ang mga pangulo sang mga pungsodnagatipon upod sa mga tawo sang Dios ni Abraham. Ang mga taming sang tanan nga mga hangaway iya sang Dios; nagagahom sia sa tanan! (S) 

Aleluya:

Binuhatan sang mga Apostoles 16:14B

Abrihi ang amon tagipusoon, O Ginoo, agod amon mahangpan ang mga pulong sang Imo Anak.

Ang Pagbasa sang Santos nga Ebanghelyo suno kay:

San Marcos 3:20-21

Sadto nga panahon: Si Jesus nagpauli upod ang iya mga gintuton-an. Sa liwat nagdulogok sa iya ang madamo nga mga tawo sa bagay nga sia kag ang iya mga gintuton-an wala na sing tion sa pagkaon. Sang mabatian ini sang iya pamilya, naglakat sila sa pagkuha sa iya, tungod kay ang mga tawo nagsiling, “Nagbuang sia!” 

Enero 22 | Enero 24

Enero 22, 2021, Biyernes, Ika-2 nga Semana sang Tuig

Liturhiya sang Pulong

San Vicente, Diakono kag Martir

Nahauna nga Balasahon - Hebreo 8:6-13

Salmo sa Pagsabat - Mga Salmo 85:8, 10, 11-12, 13-14

Aleluya - Hebreo 8:13

Ebanghelyo - Marcos 3:13-19

Ang Pagbasa gikan sa Sulat sa mga:

Hebreo 8:6-13

Mga utod: Karon, si Jesus gintugyanan sang bulohaton sang pagkapari nga labaw pa sang sa ila, subong nga ang kasugtanan nga iya ginpatigayon sa tunga sang Dios kag sang mga tawo labi pa kaayo, kay napasad ini sa mga saad sang labi pa kaayo nga mga butang. 

Kon wala sing kakulangan ang nahauna nga kasugtanan, wala na kuntani sing kinahanglan sang ikaduha. Pero ang Dios may nakita nga kakulangan sa iya mga tawo sang iya pagsiling: 

“Magaabot ang mga inadlaw, 

Siling sang Ginoo, 

Nga ako magahimo 

Sing bag-o nga kasugtanan 

Sa mga tawo sang Israel, 

Kag sa tribo ni Juda. 

Ini nga kasugtanan 

Indi manginkaangay sang ginhimo ko 

Sa ila mga katigulangan 

Sadtong adlaw 

Nga gintuytoyan ko sila 

Sa paggwa sa duta sang Egipto. 

Indi sila matutom sa kasugtanan 

Nga ginhimo ko sa ila, 

Gani wala ako magsapak sa ila, 

Siling sang Ginoo. 

Karon, amo ini ang kasugtanan 

Nga akon himuon 

Sa mga tawo sang Israel 

Sa palaabuton nga mga inadlaw, 

Siling sang Ginoo: 

Itanom ko sa ila panghunahona 

Ang akon mga kasugoan, 

Kag akon ini isulat 

Sa ila tagipusoon. 

Ako mangin-ila Dios, 

Kag sila mangin-akon mga tawo. 

Wala sing isa sa ila 

Nga kinahanglan magtudlo 

Sang iya kasimanwa, 

Ukon magsiling sa iya mga kadugo, 

‘Kilalaha ang Ginoo.’ 

Kay sila tanan magakilala sa akon, 

Halin sa labing kubos 

Tubtob sa labing daku. 

Magakaluoy ako sa ila mga paglapas, 

Kag indi ko na pagdumdomon 

Ang ila mga sala.” 

Sa iya paghambal nahanungod sa bag-ong kasugtanan, ginpakadaan sang Dios ang nahauna. Karon ang bisan ano nga nagadaan kag nagakadunot madali madula.

 

Salmo sa Pagsabat:

Mga Salmo 85:8, 10, 11-12, 13-14

(S) Ang gugma kag katutom magaupdanay.

Nagapamati ako sa ginasiling sang Ginoong Dios; nagasaad sia sing paghidait sa aton nga iya mga tawo, kon kita indi magbalik sa aton nga kabuangan. (S) 

Ang gugma kag katutom magaupdanay, ang pagkamatarong kag paghidait magakitaay. (S)

Ang katutom sang tawo magalambot sa ibabaw halin sa duta, kag ang pagkamatarong sang Dios magatamod halin sa langit. Ang Ginoo magapauswag sa aton, kag ang aton duta magapatubas sing bugana. (S) 

Ang pagkamatarong magauna sa Ginoo, kag magaaman sing alagyan para sa iya. (S) 

Aleluya:

Hebreo 8:13

Sa iya paghambal nahanungod sa bag-ong kasugtanan, ginpakadaan sang Dios ang nahauna. Karon ang bisan ano nga nagadaan kag nagakadunot madali madula.

Ang Pagbasa sang Santos nga Ebanghelyo suno kay:

San Marcos 3:13-19

Sadto nga panahon: Dayon si Jesus nagtaklad sa isa kabakulod kag gintawag niya ang mga tawo nga iya naluyagan. Nagpalapit sila sa iya, kag nagpili sia sang dose nga gintawag niya nga mga apostoles. Si Jesus nagsiling sa ila, “Ginpili ko kamo nga mag-upod sa akon. Ipadala ko kamo sa pagwali, kag magaangkon kamo sang gahom sa pagtabog sang mga yawa.” Ang dose nga ginpili niya amo ang masunod: si Simon (nga ginhingalanan ni Jesus kay Pedro); si Santiago kag si Juan, mga anak ni Zebedeo (nga ginhingalanan ni Jesus nga Boanerges, nga kon sayuron “Mga Anak sang Daguob”); si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga patriota, kag si Judas Iscariote nga nangintraidor. 

Enero 21 | Enero 23

Enero 21, 2021, Huwebes, Ika-2 nga Semana sang Tuig

Liturhiya sang Pulong

Santa Ines, Birhen kag Martir

Nahauna nga Balasahon - Hebreo 7:25—8:6

Salmo sa Pagsabat - Mga Salmo 40:7-8, 8-9, 10, 17

Aleluya - 2 Timoteo 1:10

Ebanghelyo - Marcos 3:7-12

Ang Pagbasa gikan sa Sulat sa mga:

Hebreo 7:25—8:6

Mga utod: Si Jesus makasarang sia sa pagluwas, karon kag sa gihapon, sang mga nagakari sa Dios paagi sa iya, kay nagakabuhi sia sa gihapon sa pagpakiluoy sa Dios tungod sa ila. Gani si Jesus amo ang Pinakamataas nga Pari nga nagahatag sang aton mga kinahanglanon! Balaan sia; wala sing sayop ukon sala sa iya; ginpain sia sa mga makasasala kag ginbayaw pakadto sa ibabaw pa sang mga langit. Indi sia kaangay sang iban nga pinakamataas nga mga pari, kay indi sia kinahanglan magdulot sing mga halad adlaw-adlaw, nahauna para sa iya mga sala, kag dason para sa mga sala sang mga tawo. Nagdulot sia sang isa ka halad, sing makaisa gid lang, sang paghalad niya sang iya kaugalingon. Ang Kasugoan ni Moises nagapili sang mga tawo nga indi himpit nga manginpinakamataas nga mga pari, pero ang saad sang Dios nga may panumpa nga nag-abot sing ulihi lang sang sa Kasugoan, nagpili sang Anak nga nahimpit sa walay katapusan. 

    Amo ini ang buot silingon sang amon ginahambal: may pinakamataas kita nga pari subong gid sang nasiling na, nga nagalingkod sa tuo sang trono sang Diosnon nga Pagkahalangdon sa langit. Nagaalagad sia subong pinakamataas nga pari sa Labing Balaan nga Duog, nga amo ang matuod nga tolda nga ginpatindog sang Ginoo, kag indi sang tawo. Ang tagsa ka pinakamataas nga pari ginapili sa paghalad sa Dios sing mga dulot kag mga halad nga sapat. Gani ang aton pinakamataas nga pari dapat nga may ihalad man. Kon yari sia sa duta, kuntani indi gid sia manginpari, kay may mga pari na nga nagahalad sang mga dulot suno sa Kasugoan sang mga Judio. Ang bulohaton nila subong mga pari larawan kag landong lamang sang yara sa langit. Kaangay man ini sang iya ni Moises. Sang manugpatindog na sia sang tolda, ang Dios nagsiling sa iya, “Pat-ura nga mahimo mo ang tanan suno gid sa sulondan nga ginpakita sa imo didto sa bukid.” Pero karon, si Jesus gintugyanan sang bulohaton sang pagkapari nga labaw pa sang sa ila, subong nga ang kasugtanan nga iya ginpatigayon sa tunga sang Dios kag sang mga tawo labi pa kaayo, kay napasad ini sa mga saad sang labi pa kaayo nga mga butang. 

Salmo sa Pagsabat:

Mga Salmo 40:7-8, 8-9, 10, 17

(S) Daw ano ang kaluyag ko sa pagtuman sang imo kabubot-on, O Ginoo.

Nagsabat ako, “Yari ako! Ang imo mga mando para sa akon yara sa Libro sang Kasugoan. Daw ano ang kaluyag ko sa pagtuman sang imo kabubot-on. (S) 

O Dios ko! Ginahuptan ko ang imo pagtulon-an sa akon tagipusoon. Sa mga pagtililipon sang tanan nimo nga mga tawo, O Ginoo, ginsugid ko ang Maayong Balita nga Ikaw nagaluwas. Ikaw nakahibalo nga indi ako mag-untat sa pagsugid sini. (S) 

Wala ko gintago ang balita sang kaluwasan sa akon kaugalingon; ang imo pagkamatutom kag pagbulig ginasugid ko sa gihapon. Sa pagtililipon sang tanan nimo nga mga tawo, wala ako maghipos nahanungod sang imo mapinadayunon nga gugma kag pagkamainunongon. (S) 

Maluya ako kag wala sing mahimo, pero ginadumdom mo ako, O Ginoo, ikaw ang akon Manugbulig kag Manluluwas, indi ka magpadugay, O Dios ko! (S) 

Aleluya:

2 Timoteo 1:10

Gindula ni Kristo ang gahom sang kamatayon, kag paagi sa Maayong Balita Iya ginpahayag ang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Marcos 3:7-12

Sadto nga panahon: Si Jesus kag ang iya mga gintuton-an nagkadto sa Linaw sang Galilea, kag ginsunod sia sang madamo nga mga tawo. Ini sila halin sa Galilea, sa Judea, sa Jerusalem, sa kadutaan sang Idumea, sa kadutaan sa tabok sang Jordan kag sa palibot sang mga siyudad sang Tiro kag Sidon. Ini nga mga tawo nagdugok kay Jesus, kay nakabati sila sang mga butang nga iya ginapanghimo. Tungod sang tama kadamo nga mga tawo, si Jesus nagsugo sa iya mga gintuton-an sa pag-aman sang sakayan para sa iya, agod indi sia maipit sang mga tawo. Madamo nga mga tawo ang iya gin-ayo, kag tungod sini ang tanan nga may balatian nagpanagil-ot sa pagpalapit kay Jesus, agod makatandog sa iya. Kag kon makita sia sang mga tawo nga may malaut nga mga espiritu, nagahapa sila sa atubangan niya kag nagasinggit, “Ikaw ang Anak sang Dios!” Ginpaandaman gid ni Jesus ang malaut nga mga espiritu nga indi magpanugid kon sin-o sia. 

Enero 20 | Enero 22

Enero 20, 2021, Miyerkules, Ika-2 nga Semana sang Tuig

 Liturhiya sang Pulong

San Sebastian, Martir

Nahauna nga Balasahon - Hebreo 7:1-3, 15-17

Salmo sa Pagsabat - Mga Salmo 110:1, 2, 3, 4

Aleluya - Mateo 4:23

Ebanghelyo - Marcos 3:1-6

Ang Pagbasa gikan sa Sulat sa mga:

Hebreo 7:1-3, 15-17

Mga utod: Ini si Melquisedec amo ang hari sang Salem kag pari sang Dios nga Labing Makagagahom. Sang nagapauli na si Abraham halin sa pakig-awayan sa diin ginpamatay niya ang mga hari, si Melquisedec nagsugata sa iya kag nagbendisyon sa iya. Ginhatag ni Abraham kay Melquisedec ang ikanapulo nga bahin sang tanan nga pagkabutang nga iya naagaw. (Ang nahauna nga kahulogan sang ngalan ni Melquisedec amo ang “Hari sang Katarungan.” Kag tungod kay hari sia sang Salem, ang iya ngalan nagakahulogan man nga “Hari sang Paghidait.”) Wala sing may nasulat nahanungod sa iya amay ukon iloy, ukon sang iya mga katigulangan. Wala man sing may nasulat nahanungod sang iya pagkatawo ukon kamatayon. Kaangay sia sang Anak sang Dios, kag nagapadayon sia nga pari sa walay katapusan. Nagaathag pa gid ini nga butang, kay nagpakita ang isa ka pari nga kaangay ni Melquisedec. Wala sia ginhimo nga pari tungod sang tawuhanon nga mga kasugoan kag mga pagsulondan, kundi tungod sang gahom sang kabuhi nga wala sing katapusan. Kay ang kasulatan nagasiling, “Manginpari ikaw nga wala sing katapusan, suno sa linya sang pagkapari ni Melquisedec.” 

Salmo sa Pagsabat:

Mga Salmo 110:1, 2, 3, 4

(S) Mangin pari ikaw sa walay katubtoban, suno sa sulondan sang pagkapari ni Melquisedec.

Ang Ginoo nagsiling sa akon Ginoo nga hari, "Lingkod ka diri sa akon tuo, tubtob mabutang ko ang imo mga kaaway sa idalom sang imo mga tiil." (S) 

Gikan sa Sion ang Ginoo magapasangkad sang imo harianon nga gahom. Nagasiling sia, "Magagahom ka sa imo mga kaaway." (S)

Sa adlaw nga awayon mo ang imo mga kaaway ang imo mga tawo magabulig sing kinabubot-on. Kaangay sang tun-og sa kaagahon, ang imo  pamatan-on nga mga lalaki nagakadto sa imo balaan nga bakulod. (S) 

Ang Ginoo nagsumpa, kag indi niya ini pagbawion; "Manginpari ikaw sa walay katubtoban suno sa sulondan ni Melquisedec. (S) 

Aleluya:

San Mateo 4:23

Si Jesus nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo.

Ang Pagbasa sang Santos nga Ebanghelyo suno kay:

San Marcos 3:1-6

Sadto nga panahon: Si Jesus nagbalik sa sinagoga sa diin may tawo nga may naitus nga kamot. May mga tawo didto nga nagabantay kay Jesus kon ayuhon niya ang tawo sa Adlaw nga Inugpahuway, agod may isumbong sila batok sa iya. Si Jesus nagsiling sa tawo nga naitus ang kamot, “Magpalapit ka diri sa atubangan.” Dayon nagpamangkot sia sa mga tawo: “Ano ang ginatugot sang aton Kasugoan nga himuon ta sa Adlaw nga Inugpahuway? Ang magbulig bala ukon ang maghalit? Ang magluwas bala sang kabuhi sang isa ka tawo ukon ang magpatay?” Pero naghipos sila. Gintulok sila ni Jesus nga may kaakig, pero nagkasubo sia tungod sang katig-a sang ila tagipusoon. Dayon nagsiling sia sa tawo nga naitus ang kamot, “Untaya ang imo kamot.” Gin-untay niya kag nag-ayo ini. Gani ang mga Fariseo naggwa sa sinagoga kag naghimbon kaupod sa mga sumolunod ni Herodes kon paano mapatay nila si Jesus. 

Enero 19 | Enero 21

Enero 19, 2021, Martes, Ika-2 nga Semana sang Tuig

Liturhiya sang Pulong

Nahauna nga Balasahon - Hebreo 6:10-20

Salmo sa Pagsabat - Mga Salmo 111:1-2, 4-5, 9 kag 10

Aleluya - Efeso 1:17-18

Ebanghelyo - Marcos 2:23-28

Ang Pagbasa gikan sa Sulat sa mga:

Hebreo 6:10-20

Mga utod: Ang Dios matarong, kag indi niya pagkalimtan ang inyo mga binuhatan, ukon ang inyo gugma sa iya nga ginpakita ninyo paagi sa inyo na nabulig kag sa inyo padayon gihapon nga pagbulig sa kasubong ninyo nga mga Cristianos. Daku gid ang amon handom nga magmaukod ang tagsatagsa sa inyo tubtob sa katapusan, agod matuman ang inyo ginalauman. Indi kami luyag nga magtinamad kamo, kundi nga manginsubong kamo sadtong mga nagatuo kag mapainulobon, agod mabaton ninyo ang ginsaad sang Dios. Sang pagsaad sang Dios kay Abraham, nagpanumpa sia nga iya gid tumanon ang iya ginsaad. Tungod kay wala na sing gamhanan pa sa iya, nagsumpa sia sa iya kaugalingon nga ngalan. Nagsiling sia, “Ginasaad ko sa imo nga ako magabendisyon sa imo kag magahatag sa imo sing madamo nga mga kaliwat.” Naghulat si Abraham sing mapainulobon, gani nabaton niya ang ginsaad sang Dios. Kon ang isa ka tawo magsumpa, nagapanumpa sia sa ngalan sang isa nga gamhanan pa sa iya, kag ang sumpa nagapauntat sang mga pagsinuay sa tunga sang mga tawo. Ang Dios luyag magpaathag sa mga magabaton sang iya ginsaad nga indi gid magbalhin ang iya mga tinutoyo. Gani nagpanumpa sia sa iya pagsaad. Gani, may duha ka butang nga indi gid magbalhin, kag nahanungod sini ang Dios indi makabutig. Gani kita nga nakadangop sa iya ginapaisog pa gid nga magmalig-on sa paglaom nga ginbutang sa aton atubangan. Ini nga paglaom subong sang angkla sang aton kabuhi. Malig-on ini kag indi mahulag, kag nagasulod sa kurtina sang langitnon nga templo kag nagalambot sa nasulod nga santuaryo. Si Jesus nagsulod didto sing una tungod sa aton. Sia nanginpinakamataas nga pari sa walay katapusan, suno sa linya sang pagkapari ni Melquisedec.

Salmo sa Pagsabat:

Mga Salmo 111:1-2, 4-5, 9 kag 10

(S) Ang Ginoo wala nagakalipat sang iya kasugtanan.

Sa bug-os ko nga tagipusoon magapasalamat ako sa Ginoo, sa pagtilipon sang Iya mga tawo. Daw ano ka makatilingala sang mga butang nga ginahimo sang Ginoo! Ang tanan nga nalipay sang Iya mga binuhatan naluyag maghangop sini. (S) 

Ang Ginoo nagapadumdom sa aton, sang iya makatilingala nga mga binuhatan, maayo sia kag maluloy-on. Nagahatag sia sing kalan-on sa mga nagatahod sa iya; wala sia nagakalipat sang iya kasugtanan. (S) 

Ginluwas niya ang iya mga tawo, kag naghimo sia sing walay katapusan nga kasugtanan sa ila. Balaan kag gamhanan Sia! Dapat sia dayawon sa walay katapusan! (S)

Ang pagtahod sa Ginoo amoang paagi nga magmaalam ang tawo; nagahatag siasing husto nga paghukom sa tanan nga nagatuman sang iya mga sugo. Dapat sia dayawon sa walay katapusan! (S)

Aleluya:

Taga-Efeso 1:17-18

Nagapangamuyo ako sa Dios sang aton Ginoong Jesukristo, ang mahimayaon nga Amay, nga Iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo Sia.

Ang Pagbasa sang Santos nga Ebanghelyo suno kay:

San Marcos 2:23-28

Sadto nga panahon: Sang isa ka Adlaw nga Inugpahuway, si Jesus nag-agi sa tunga sang kaumhan sang trigo. Sang nagalakat ang iya mga gintuton-an upod sa iya, nagsugod sila sa pagpangutol sang mga uhay. Gani ang mga Fariseo nagsiling kay Jesus, “Hoy, kontra sa aton Kasugoan ang ginahimo sang imo mga gintuton-an sa Adlaw nga Inugpahuway!” Si Jesus nagsabat sa ila, “Wala gid bala ninyo mabasahi ang ginhimo ni David sang nagkinahanglan sia sing pagkaon? Sia kag ang iya mga tinawo gingutom, gani nagsulod sia sa balay sang Dios kag nagkaon sang tinapay nga nahalad sa Dios. Natabo ini sang si Abiatar ang Pinakamataas nga Pari. Suno sa aton Kasugoan ang mga pari lang amo ang makakaon sini nga tinapay, pero si David nagkaon sini, kag ginhatagan pa niya ang iya mga tinawo.” Kag si Jesus nagsiling pa gid, “Ang Adlaw nga Inugpahuway ginhimo para sa kaayuhan sang tawo kag ang tawo wala paghimoa para sa Adlaw nga Inugpahuway. Gani, ang Anak sang Tawo amo ang Ginoo bisan pa sang Adlaw nga Inugpahuway.”

Enero 18 | Enero 20

Enero 18, 2021, Lunes, Ika-2 nga Semana sang Tuig

 Liturhiya sang Pulong

Nahauna nga Balasahon - Hebreo 5:1-10

Salmo sa Pagsabat - Mga Salmo 110:1, 2, 3, 4

Aleluya - Hebreo 4:12

Ebanghelyo - Marcos 2:18-22

Ang Pagbasa gikan sa Sulat sa mga:

Hebreo 5:1-10

Mga utod: Ang tagsa ka pinakamataas nga pari ginapili gikan sa mga tawo sa pag-alagad sa Dios tungod sa ila, sa paghalad sing mga dulot kag mga halad tungod sang mga sala. Tungod kay sia maluya sa madamo nga mga bagay, sarang sia makapasensya sa mga wala makahibalo kag mga nagasayop. Kag tungod kay sia mismo maluya man, dapat sia magdulot sing mga halad indi lamang para sa mga sala sang mga tawo, kundi para man sa iya kaugalingon nga mga sala. Wala sing tawo nga nagapili sang kadungganan sang pagkapinakamataas nga pari para sa iya kaugalingon. Ang tawo manginpinakamataas nga pari paagi lamang sa pagtawag sang Dios, subong sang pagtawag kay Aaron. 

Sa amo man nga bagay, si Cristo wala magkuha sang kadungganan sang pagkapinakamataas nga pari para sa iya kaugalingon. Sa baylo, ang Dios nagsiling sa iya: 

“Ikaw ang akon Anak, 

Karon nga adlaw 

Ako nangin-imo Amay.” 

Sa isa pa gid ka bahin nagsiling man ang Dios: 

“Manginwalay katapusan 

Ang imo pagkapari, 

Sa linya sang pagkapari 

Ni Melquisedec.” 

Sang si Jesus nagakabuhi pa diri sa duta, nagpangamuyo sia kag nag-ampo sa mabaskog nga tingog nga nagahilibion sa Dios nga sarang makaluwas sa iya sa kamatayon. Ginpamatian sia sang Dios, tungod kay mapainuboson sia kag mainampuon. Pero bisan Anak sia sang Dios, nagtuon sia sa pagkamatinumanon paagi sa iya mga pag-antos. Sang nahimpit na sia, nahimo sia nga ginagikanan sang walay katapusan nga kaluwasan para sa tanan nga nagatuman sa iya, kag ang Dios naghimo sa iya nga pinakamataas nga pari, sa linya sang pagkapari ni Melquisedec. 

Salmo sa Pagsabat:

Mga Salmo 110:1, 2, 3, 4

(S) Manginpari ikaw sa walay katubtoban, suno sa sulondan sang pagkapari ni Melquisedec.

Ang Ginoo nagsiling sa akon Ginoo nga hari, "Lingkod ka diri sa akon tuo, tubtob mabutang ko ang imo mga kaaway sa idalom sang imo mga tiil."(S) 

Gikan sa Sion ang Ginoo magapasangkad sang imo harianon nga gahom. Nagasiling sia, "Maggahom ka sa imo mga kaaway." (S)

Sa adlaw nga awayon mo ang imo mga kaaway, Ang imo mga tawo magabulig sing kinabubut-on. Kaangay sang tun-og sa kaagahon, ang Imo pamatan-on nga mga lalaki magakadto sa Imo sa balaan nga mga bakulod. (S) 

Ang Ginoo nagsumpa, kag indi Niya ini pagbawion: "Manginpari ikaw sa walay katubtoban, suno sa sulondan sang pagkapari ni Melquisedec." (S)

Aleluya:

Hebreo 4:12

Ang pulong sang Dios buhi kag gamhanan; kag nagausisa sang mga hunahuna kag mga tinotuyo sang tagipusoon.

Ang Pagbasa sang Santos nga Ebanghelyo suno kay:

San Marcos 2:18-22

Sadto nga panahon: Isa ka bes ang mga sumolunod ni Juan Bautista kag ang mga Fariseo nagapuasa. May mga tawo nga nagpalapit kay Jesus kag nagpamangkot sa iya, “Ngaa bala nga nagapuasa ang mga gintuton-an ni Juan Bautista kag ang mga gintuton-an sang mga Fariseo, pero ang imo mga gintuton-an wala nagapuasa?” 

Si Jesus nagsabat, “Nagapaabot bala kamo nga ang mga inagda sa kasal magapuasa samtang yara pa ang nobyo kaupod nila? Indi sila makahimo sina! Pero magaabot ang adlaw nga ang nobyo pagakuhaon sa ila, kag amo na yadto ang ila pagpuasa. 

“Wala sing bisan sin-o nga nagagamit sing bag-o nga panapton sa pagtukap sa daan nga bayu. Kon himuon niya ini, ang bag-o nga tukap magagisi sang daan nga bayu kag mangindaku pa gid ang tulokapan. Wala man sing bisan sin-o nga nagasulod sing bag-o nga bino sa daan nga sulodlan nga panit. Kon himuon niya ini, ang bino magabusdik sang daan nga panit, kag ang bino kag ang panit nga sulodlan indi na mapuslan. Pero ang bag-o nga bino ginasulod sa bag-o nga sulodlan!” 

Enero 17 | Enero 19

Enero 17, 2021, Piesta ni Señor Santo Niño

Liturhiya sang Pulong

Nahauna nga Balasahon - Isaias 9:1-6

Salmo sa Pagsabat - Mga Salmo 97:1, 2-3, 3-4, 5-6

Ika-2 nga Balasahon - Efeso 1:3-6, 15-18

Ebanghelyo - Marcos 10:13-16

1. Ang Pagbasa gikan sa Libro ni:

Isaias nga Propeta 9:1-6

Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong. 

        Ang mga tawo nga nagalakat sa kadudolman 

        nakakita sing daku nga kapawa! 

        Nagapuyo sila sa duta sang mga landong, 

        pero karon ang kapawa nagasilak sa ila. 

        O Ginoo, ginhatagan mo sila sing daku nga kalipay; 

        ginhimo mo nga magmalipayon sila. 

        Magahugyaw sila sa imo ginhimo,

        subong sang paghinugyaw sang mga tawo nga nagaani, 

        ukon magpartida sila sang inagaw nga mga manggad. 

        Kay ginbali mo ang gota nga nagapabug-at sa ila 

        kag ang baston nga naghanot sang ila mga abaga. 

        Ikaw, O Ginoo, ang naglutos sang pungsod nga nagpigos kag nagpamintaha sang imo mga tawo 

        subong sang imo paglutos sadto anay sang mga hangaway sang Midian. 

        Ang mga botas sang nagpanggubat nga mga hangaway, 

        kag ang tanan nila nga mga bayu nga nabulit sang dugo, pagasunogon sa kalayo! 

        Ang isa ka bata matawo sa aton! 

        Ang isa ka anak ginhatag sa aton! 

        Kag sia ang aton manginpangulo. 

        Pagatawgon sia, “Maalam nga Manuglaygay,” 

        “Gamhanan nga Dios,” “Amay nga wala sing Katubtoban,” 

        “Amay sang Paghidait.”

Salmo sa Pagsabat:

Mga Salmo 97:1, 2-3, 3-4, 5-6 

(S) Ang Ginoo amo ang hari! Magkalipay ka, O duta!

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! (S) 

Ang mga panganod kag kadudohnan yara sa palibot niya; ang iya ginharian napasad sa katarungan kag hustisya. (S) 

Ang kalayo nagauna sa iya, kag nagasunog sa iya mga kaaway sa palibot niya. Ang iya kilat nagapasanag sang kalibutan; ang duta nakakita sini kag nagakurog. (S) 

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. Ang kalangitan nagabantala sang iya pagkamatarong, kag ang tanan nga katawohan nakakita sang iya himaya. (S) 

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 1:3-6, 15-18

    Magpasalamat kita sa Dios kag Amay sang aton Ginoong Jesu-Cristo! Kay iya kita ginbugayan sa aton paghiusa kay Cristo, paagi sa paghatag sa aton sang tagsa ka espirituhanon nga mga bugay gikan sa kalangitan. Sa wala pa matuga ang kalibutan, ginpili na kita sang Dios nga mangin-iya sa kay Cristo, agod manginbalaan kita kag wala sing kasawayan sa iya atubangan. 

    Tungod sang iya gugma, ang Dios nagpat-od na nga daan nga paagi kay Jesu-Cristo, kita mangin-iya mga anak. Amo ini ang iya nahamut-an kag kabubot-on. Dayawon ta ang Dios tungod sang iya mahimayaon nga grasya, nga iya ginhatag sa aton paagi sa iya hinigugma nga Anak!     

    Sa sini nga kabangdanan, halin sang pagkabati ko nahanungod sang inyo pagtuo kay Ginoong Jesus kag sang inyo gugma sa mga tumoluo, wala ako mag-untat sa pagpasalamat sa Dios tungod sa inyo. Ginadumdom ko kamo sa akon mga pangamuyo, kag nagapangayo ako sa Dios sang aton Ginoong Jesu-Cristo, ang mahimayaon nga Amay, nga iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo sia. Nagapangayo ako nga ang inyo mga hunahona mabuksan kag makita ninyo ang iya kapawa, agod inyo mahibaluan kon ano ang paglaom sang iya pagtawag sa inyo, kon daw ano ka bugana ang makatilingala nga mga panublion nga iya ginasaad sa iya mga tumoluo.

Aleluya:

Dayawon ang Imo labing santos nga ngalan; himaya-on kag bansagon Ikaw sa gihapon.

Ang Pagbasa sang Santos nga Ebanghelyo suno kay:

San Marcos 10:13-16

May mga tawo nga nagdala sing mga bata sa kay Jesus agod iya sila matandog, pero ginsaway sang mga gintuton-an ang mga tawo nga nagdala sa ila. Sang matalupangdan ini ni Jesus, naakig sia kag nagsiling sa iya mga gintuton-an, “Pabay-i ninyo ang mga kabataan nga magpalapit sa akon, kag indi ninyo sila pagpunggi, kay ang Ginharian sang Dios iya sang mga kaangay nila. Dumdoma ninyo ini! Ang bisan sin-o nga indi magbaton sang Ginharian sang Dios subong sang isa ka bata indi gid makasulod sa amo nga Ginharian.” Dayon ginkugos ni Jesus ang mga kabataan, iya gintungtong ang iya mga kamot sa tagsatagsa sa ila, kag iya sila ginbendisyunan.

Enero 16 | Enero 18