Enero 16, 2021, Sabado, Nahauna nga Semana sang Tuig

Liturhiya sang Pulong

Nahauna nga Balasahon - Hebreo 4:12-16

Salmo sa Pagsabat - Mga Salmo 19:7, 8, 9, 10, 15

Aleluya - Lucas 4:18

Ebanghelyo - Marcos 2:13-17

Ang Pagbasa gikan sa Sulat sa mga:

Hebreo 4:12-16

    Kay ang pulong sang Dios buhi kag gamhanan, kag matalom pa sa espada nga duha sing sulab. Nagadulot ini tubtob sa gin-utlan sang kalag kag espiritu, kag sa ginkitaan sang mga lutalotahan kag utok sa tul-an. Ini nagatungkad sang mga panghunahona kag mga handom sang tagipusoon sang mga tawo. Wala gid sing bisan ano nga sarang matago sa Dios. Ang tanan nga butang hayag kag bukas sa iya atubangan, kag sa iya kita tanan magahatag sing husay nahanungod sang aton kaugalingon. Gani magmalig-on kita sa aton pagtuo. Kay may daku kag pinakamataas kita nga pari nga didto sa atubangan sang Dios—si Jesus, ang Anak sang Dios. Ang aton pinakamataas nga pari nagabatyag man sang aton mga kaluyahon, kay sia man ginsulay sa tanan nga bagay pareho sa aton, pero wala sia magpakasala. Gani indi kita magkahadlok sa pagpalapit sa trono sang Dios, sa diin yara ang grasya. Didto magabaton kita sing kaluoy kag grasya nga makabulig sa tion nga ginakinahanglan naton ini.

Salmo sa Pagsabat:

Mga Salmo 19:7, 8, 9, 10, 15

(S) Ang imo nga pulong, O Ginoo, amo ang Espiritu kag ang kabuhi.

Matarong ang mga pagsulondan sang Ginoo, kag ang mga nagatuman sini malipayon, matarong gid ang Iya mga sugo, kag nagahatag sing paghangop sa hunahuna. (S) 

Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; Wala ini sing may ginapasulabi. (S) 

Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sadugos, bisan pa sang sa wala simbog nga dugos. (S)

Kabay pa nga mabaton mo ang Akon mga pulong kag panghunahona, O Ginoo nga akon dalangpan kag Manunobos! (S) 

Aleluya:

San Lucas 4:18

Ginpili ako sang Ginoo sa pagwali sang Maayong Balita sa mga imol, ginpadala Niya ako sa pagbantala sang kahilwayan sang mga bihag.

Ang Pagbasa sang Santos nga Ebanghelyo suno kay:

San Marcos 2:13-17

Sadto nga panahon: Si Jesus nagbalik liwat sa higad sang Linaw sang Galilea. Nagpalapit sa iya ang madamo nga mga tawo kag nagsugod sia sa pagpanudlo sa ila. Sang nagapadayon sia sa paglakat, nakita niya ang isa ka manugsokot sang buhis, si Levi nga anak ni Alfeo, nga nagapungko sa iya opisina. Si Jesus nagsiling sa iya, “Sunod ka sa akon.” Nagtindog si Levi kag nagsunod sa iya. Sang ulihi nagkaon si Jesus sa balay ni Levi. May madamo nga mga manugsokot sang buhis kag mga makasasala nga nagsunod kay Jesus, kag ang iban sa ila nagkaon upod sa iya kag sa iya mga gintuton-an. May pila ka manunodlo sang Kasugoan nga mga Fariseo nga nakakita kay Jesus nga nagkaon upod sa mga makasasala kag mga manugsokot sang buhis. Gani ginpamangkot nila ang iya mga gintuton-an, “Ngaa bala nagakaon sia upod sa mga manugsokot sang buhis kag mga makasasala?” Nabatian sila ni Jesus kag nagsiling sia, “Ang mga tawo nga wala sing balatian wala nagakinahanglan sang manugbolong, kundi ang mga masakiton lang. Wala ako magkari sa pagtawag sang mga matarong kundi sang mga makasasala.”

Enero 15 | Enero 17