Enero 22, 2021, Biyernes, Ika-2 nga Semana sang Tuig

Liturhiya sang Pulong

San Vicente, Diakono kag Martir

Nahauna nga Balasahon - Hebreo 8:6-13

Salmo sa Pagsabat - Mga Salmo 85:8, 10, 11-12, 13-14

Aleluya - Hebreo 8:13

Ebanghelyo - Marcos 3:13-19

Ang Pagbasa gikan sa Sulat sa mga:

Hebreo 8:6-13

Mga utod: Karon, si Jesus gintugyanan sang bulohaton sang pagkapari nga labaw pa sang sa ila, subong nga ang kasugtanan nga iya ginpatigayon sa tunga sang Dios kag sang mga tawo labi pa kaayo, kay napasad ini sa mga saad sang labi pa kaayo nga mga butang. 

Kon wala sing kakulangan ang nahauna nga kasugtanan, wala na kuntani sing kinahanglan sang ikaduha. Pero ang Dios may nakita nga kakulangan sa iya mga tawo sang iya pagsiling: 

“Magaabot ang mga inadlaw, 

Siling sang Ginoo, 

Nga ako magahimo 

Sing bag-o nga kasugtanan 

Sa mga tawo sang Israel, 

Kag sa tribo ni Juda. 

Ini nga kasugtanan 

Indi manginkaangay sang ginhimo ko 

Sa ila mga katigulangan 

Sadtong adlaw 

Nga gintuytoyan ko sila 

Sa paggwa sa duta sang Egipto. 

Indi sila matutom sa kasugtanan 

Nga ginhimo ko sa ila, 

Gani wala ako magsapak sa ila, 

Siling sang Ginoo. 

Karon, amo ini ang kasugtanan 

Nga akon himuon 

Sa mga tawo sang Israel 

Sa palaabuton nga mga inadlaw, 

Siling sang Ginoo: 

Itanom ko sa ila panghunahona 

Ang akon mga kasugoan, 

Kag akon ini isulat 

Sa ila tagipusoon. 

Ako mangin-ila Dios, 

Kag sila mangin-akon mga tawo. 

Wala sing isa sa ila 

Nga kinahanglan magtudlo 

Sang iya kasimanwa, 

Ukon magsiling sa iya mga kadugo, 

‘Kilalaha ang Ginoo.’ 

Kay sila tanan magakilala sa akon, 

Halin sa labing kubos 

Tubtob sa labing daku. 

Magakaluoy ako sa ila mga paglapas, 

Kag indi ko na pagdumdomon 

Ang ila mga sala.” 

Sa iya paghambal nahanungod sa bag-ong kasugtanan, ginpakadaan sang Dios ang nahauna. Karon ang bisan ano nga nagadaan kag nagakadunot madali madula.

 

Salmo sa Pagsabat:

Mga Salmo 85:8, 10, 11-12, 13-14

(S) Ang gugma kag katutom magaupdanay.

Nagapamati ako sa ginasiling sang Ginoong Dios; nagasaad sia sing paghidait sa aton nga iya mga tawo, kon kita indi magbalik sa aton nga kabuangan. (S) 

Ang gugma kag katutom magaupdanay, ang pagkamatarong kag paghidait magakitaay. (S)

Ang katutom sang tawo magalambot sa ibabaw halin sa duta, kag ang pagkamatarong sang Dios magatamod halin sa langit. Ang Ginoo magapauswag sa aton, kag ang aton duta magapatubas sing bugana. (S) 

Ang pagkamatarong magauna sa Ginoo, kag magaaman sing alagyan para sa iya. (S) 

Aleluya:

Hebreo 8:13

Sa iya paghambal nahanungod sa bag-ong kasugtanan, ginpakadaan sang Dios ang nahauna. Karon ang bisan ano nga nagadaan kag nagakadunot madali madula.

Ang Pagbasa sang Santos nga Ebanghelyo suno kay:

San Marcos 3:13-19

Sadto nga panahon: Dayon si Jesus nagtaklad sa isa kabakulod kag gintawag niya ang mga tawo nga iya naluyagan. Nagpalapit sila sa iya, kag nagpili sia sang dose nga gintawag niya nga mga apostoles. Si Jesus nagsiling sa ila, “Ginpili ko kamo nga mag-upod sa akon. Ipadala ko kamo sa pagwali, kag magaangkon kamo sang gahom sa pagtabog sang mga yawa.” Ang dose nga ginpili niya amo ang masunod: si Simon (nga ginhingalanan ni Jesus kay Pedro); si Santiago kag si Juan, mga anak ni Zebedeo (nga ginhingalanan ni Jesus nga Boanerges, nga kon sayuron “Mga Anak sang Daguob”); si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga patriota, kag si Judas Iscariote nga nangintraidor. 

Enero 21 | Enero 23