Enero 19, 2021, Martes, Ika-2 nga Semana sang Tuig

Liturhiya sang Pulong

Nahauna nga Balasahon - Hebreo 6:10-20

Salmo sa Pagsabat - Mga Salmo 111:1-2, 4-5, 9 kag 10

Aleluya - Efeso 1:17-18

Ebanghelyo - Marcos 2:23-28

Ang Pagbasa gikan sa Sulat sa mga:

Hebreo 6:10-20

Mga utod: Ang Dios matarong, kag indi niya pagkalimtan ang inyo mga binuhatan, ukon ang inyo gugma sa iya nga ginpakita ninyo paagi sa inyo na nabulig kag sa inyo padayon gihapon nga pagbulig sa kasubong ninyo nga mga Cristianos. Daku gid ang amon handom nga magmaukod ang tagsatagsa sa inyo tubtob sa katapusan, agod matuman ang inyo ginalauman. Indi kami luyag nga magtinamad kamo, kundi nga manginsubong kamo sadtong mga nagatuo kag mapainulobon, agod mabaton ninyo ang ginsaad sang Dios. Sang pagsaad sang Dios kay Abraham, nagpanumpa sia nga iya gid tumanon ang iya ginsaad. Tungod kay wala na sing gamhanan pa sa iya, nagsumpa sia sa iya kaugalingon nga ngalan. Nagsiling sia, “Ginasaad ko sa imo nga ako magabendisyon sa imo kag magahatag sa imo sing madamo nga mga kaliwat.” Naghulat si Abraham sing mapainulobon, gani nabaton niya ang ginsaad sang Dios. Kon ang isa ka tawo magsumpa, nagapanumpa sia sa ngalan sang isa nga gamhanan pa sa iya, kag ang sumpa nagapauntat sang mga pagsinuay sa tunga sang mga tawo. Ang Dios luyag magpaathag sa mga magabaton sang iya ginsaad nga indi gid magbalhin ang iya mga tinutoyo. Gani nagpanumpa sia sa iya pagsaad. Gani, may duha ka butang nga indi gid magbalhin, kag nahanungod sini ang Dios indi makabutig. Gani kita nga nakadangop sa iya ginapaisog pa gid nga magmalig-on sa paglaom nga ginbutang sa aton atubangan. Ini nga paglaom subong sang angkla sang aton kabuhi. Malig-on ini kag indi mahulag, kag nagasulod sa kurtina sang langitnon nga templo kag nagalambot sa nasulod nga santuaryo. Si Jesus nagsulod didto sing una tungod sa aton. Sia nanginpinakamataas nga pari sa walay katapusan, suno sa linya sang pagkapari ni Melquisedec.

Salmo sa Pagsabat:

Mga Salmo 111:1-2, 4-5, 9 kag 10

(S) Ang Ginoo wala nagakalipat sang iya kasugtanan.

Sa bug-os ko nga tagipusoon magapasalamat ako sa Ginoo, sa pagtilipon sang Iya mga tawo. Daw ano ka makatilingala sang mga butang nga ginahimo sang Ginoo! Ang tanan nga nalipay sang Iya mga binuhatan naluyag maghangop sini. (S) 

Ang Ginoo nagapadumdom sa aton, sang iya makatilingala nga mga binuhatan, maayo sia kag maluloy-on. Nagahatag sia sing kalan-on sa mga nagatahod sa iya; wala sia nagakalipat sang iya kasugtanan. (S) 

Ginluwas niya ang iya mga tawo, kag naghimo sia sing walay katapusan nga kasugtanan sa ila. Balaan kag gamhanan Sia! Dapat sia dayawon sa walay katapusan! (S)

Ang pagtahod sa Ginoo amoang paagi nga magmaalam ang tawo; nagahatag siasing husto nga paghukom sa tanan nga nagatuman sang iya mga sugo. Dapat sia dayawon sa walay katapusan! (S)

Aleluya:

Taga-Efeso 1:17-18

Nagapangamuyo ako sa Dios sang aton Ginoong Jesukristo, ang mahimayaon nga Amay, nga Iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo Sia.

Ang Pagbasa sang Santos nga Ebanghelyo suno kay:

San Marcos 2:23-28

Sadto nga panahon: Sang isa ka Adlaw nga Inugpahuway, si Jesus nag-agi sa tunga sang kaumhan sang trigo. Sang nagalakat ang iya mga gintuton-an upod sa iya, nagsugod sila sa pagpangutol sang mga uhay. Gani ang mga Fariseo nagsiling kay Jesus, “Hoy, kontra sa aton Kasugoan ang ginahimo sang imo mga gintuton-an sa Adlaw nga Inugpahuway!” Si Jesus nagsabat sa ila, “Wala gid bala ninyo mabasahi ang ginhimo ni David sang nagkinahanglan sia sing pagkaon? Sia kag ang iya mga tinawo gingutom, gani nagsulod sia sa balay sang Dios kag nagkaon sang tinapay nga nahalad sa Dios. Natabo ini sang si Abiatar ang Pinakamataas nga Pari. Suno sa aton Kasugoan ang mga pari lang amo ang makakaon sini nga tinapay, pero si David nagkaon sini, kag ginhatagan pa niya ang iya mga tinawo.” Kag si Jesus nagsiling pa gid, “Ang Adlaw nga Inugpahuway ginhimo para sa kaayuhan sang tawo kag ang tawo wala paghimoa para sa Adlaw nga Inugpahuway. Gani, ang Anak sang Tawo amo ang Ginoo bisan pa sang Adlaw nga Inugpahuway.”

Enero 18 | Enero 20

Oktubre 11, 2020, Ika-28 nga Domingo sang Tuig

Liturhiya sang Pulong

Nahauna nga Balasahon - Isaias 25:6-10A

Salmo sa Pagsabat - Mga Salmo 23:1-3A, 3-4, 5, 6

Ikaduha nga Balasahon - Filipos 4:12-14, 19-20

Aleluya - Efeso 1:17-18

Ebanghelyo - Mateo 22:1-14

Ang mga Inagda Indi Magkadto sa Punsyon

1. Ang Pagbasa gikan sa Libro ni:

Isaias nga Propeta 25:6-10A

Diri sa bukid sang Sion ang Ginoo nga Makagagahom magaaman sang isa ka bangkite para sa tanan nga mga kapungsoran sang kalibutan—isa ka bangkite sang labing manamit nga pagkaon kag sang labing maayo nga bino. Diri panason niya ang tanan nga mga gal-om sang kasubo nga nagalikop sang tanan nga mga kapungsoran. Ang Ginoo magadula sang kamatayon sa walay katapusan! Pagapahiran niya ang mga luha sang tagsatagsa sa mga mata kag kuhaon niya ang kahuloy-an nga gin-antos sang iya mga tawo sa bug-os nga kalibutan. Ang Ginoo gid amo ang naghambal! Kon mahanabo ini, ang tagsatagsa magasiling, "Sia amo ang amon Dios! Nagsalig kami sa iya kag ginluwas niya kami. Sia amo ang Ginoo. Nagsalig kami sa iya, kag karon nagakasadya kami kag nagakalipay, kay ginluwas niya kami!” Ang Ginoo magaapin sang bukid sang Sion.

Salmo sa Pagsabat:

Mga Salmo 23:1-3A, 3-4, 5, 6

(S) Ang imo balay mangin-akon puloy-an sa walay katubtoban.

Ang Ginoo amo ang akon manugbantay; yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytoyan sa mga linaw sang matin-aw nga tubig. Ginahatagan niya ako sing bag-o nga kusog.  (S)

Ginatuytoyan niya ako sa husto nga dalan, suno sa iya ginsaad. Bisan pa nagaagi ako sa dalan nga tama kadulom, indi gid ako mahadlok, O Ginoo, kay ikaw nagaupod sa akon! Ang imo baston kag ang imo sungkod nagaapin sa akon. (S)

Ginabutangan mo ako sa lamisa sing madamo nga pagkaon, sa diin makit-an ako sang tanan ko nga mga kaaway, ginhisuan mo sing lana ang akon ulo sa pag-abiabi sa akon, kag ginpaawas mo ang akon kupa. (S)

Sa pagkamatuod, ang imo kaayo kag gugma mangin-akon samtang nga nagakabuhi pa ako, kag ang imo balay mangin-akon puloy-an sa walay katubtoban. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 4:12-14, 19-20

Nahibaluan ko ang pagpangabuhi nga mapiot kag ang pagpangabuhi nga hamungaya. Natun-an ko ini tanan, agod nga sa bisan diin kag sa bisan ano nga kahimtangan kuntento ako bisan busog ako ukon gutom, bisan sa kahamungayaan ukon sa kapiutan. Makasarang ako sa pag-atubang sang tanan nga kahimtangan paagi sa gahom nga ginahatag sa akon ni Cristo. Pero kaayo gid sa inyo, kay ginbuligan ninyo ako sa akon mga palaligban. Kag ang akon Dios, sa iya bugana nga manggad kay Cristo Jesus magahatag sa inyo sang tanan ninyo nga mga kinahanglanon. Sa aton Dios kag Amay ihatag ang himaya sa wala sing katubtoban. Kabay pa. 

Aleluya:

Taga-Efeso 1:17-18

Ang amay sang aton Ginoong Jesu-Cristo nagahatag sang kapawa sa inyo agod inyo mahibaluan kon ano ang paglaom sang iya pagtawag sa inyo.

Ang Pagbasa sang Santos nga Ebanghelyo suno kay:

San Mateo 22:1-14

Si Jesus naghambal liwat sa mga tawo paagi sa mga palaanggiran. “Ang Ginharian sang langit kaangay sa isa ka hari nga naghanda sang isa ka punsyon sa kasal sang iya anak. Ginpadala niya ang iya mga suloguon sa pagtawag sang mga inagda sa punsyon, pero ang mga inagda indi magkadto. Gani ginsugo niya ang iban niya nga mga suloguon kag ginsingganan, ‘Singgana ninyo ang mga inagda nga ang akon punsyon handa na, ang akon mga baka kag mga tinday nga pinatambok naihaw na, kag ang tanan handa na. Gani kari kamo kag mamunsyon!’ Pero ang mga inagda wala magsapak kundi naglakat sila: ang isa sa iya uma, ang isa sa iya baligyaan, samtang ang iban nga mga inagda nagdakop, nagbunal, kag nagpatay sa mga suloguon. Ang hari naakig gid, kag ginpadala niya ang iya mga soldado sa pagpamatay sa mga nagpatay sang iya suloguon, kag sa pagsunog sang ila banwa. Dayon gintawag niya ang iya mga suloguon kag ginsingganan, ‘Ang akon punsyon sa kasal handa na, ugaling ang mga inagda indi takos. Karon kadto kamo sa mga dalan kag agdaha ninyo sa punsyon ang tanan nga inyo masugata.’ Gani ang mga suloguon nagkadto sa mga dalan kag gintipon nila ang tanan nga ila nakita, malain kag maayo. Kag ang kalan-an sa punsyon napuno sang mga inagda. 

    “Nagsulod ang hari sa pagtan-aw sang mga inagda, kag nakita niya ang isa ka tawo nga wala makasuksok sang bayu para sa punsyon. Ginpamangkot sia sang hari, ‘Abyan, ngaa nga nakasulod ka diri nga wala makasuksok sang bayu para sa punsyon?’ Pero wala sia magsabat. Dayon ang hari nagsugo sa mga suloguon, ‘Gapusa ninyo ang iya kamot kag tiil kag ihaboy sa kadudolman sa gwa. Didto magahibi sia kag magabagrot sang iya mga ngipon.’” 

    Kag sa katapusan si Jesus nagsiling, “Kay madamo ang mga gin-agda, pero pila lamang ang mga ginpili.” 

Oktubre 10 | Oktubre 12

Magpas-an sang Imo Krus Adlaw-adlaw kag Magsunod sa Akon

Liturhiya sang Pulong

(Domingo, Agosto 30, 2020)

Ika-22 nga Domingo sang Tuig

Ang Pagbasa gikan sa Libro ni:

Jeremias nga Propeta 20:7-9

   O GINOO, imo ako ginlimbungan, Kag ako nalimbungan. Makusog ikaw sang sa akon, Kag imo ako gindaog. Ginyaguta ako sang tanan, Kag ginkadlawan nila ako sa bug-os nga adlaw. Kon ako maghambal, nagasinggit ako sing mabaskog “Palugosay! Laglaganay!” O GINOO, ginyagota ako kag gintamay sa tanan nga tion, Kay ginawali ko ang imo pulong. Pero kon magsiling ako, “Kalimtan ko ang GINOO, Kag indi na ako maghambal sa iya ngalan,” Dayon ang imo pulong nagdabdab subong kalayo Sa akon tagipusoon, Yara ini sa sulod sang akon mga tul-an. Ginakapuyan na ako sa pagtago sini, Kag indi ko na ini mapunggan.

Salmo sa Pagsabat:

Mga Salmo 63:2, 3-4, 5-6, 8-9

(S) Ang akon kalag ginauhaw sa Imo, O Ginoo nga akon Dios.

Tugoti ako nga makita ko ikaw sa santuaryo, ipakita sa akon ang imo pagkagamhanan kag pagkamahimayaon. (S)

Ang imo mapinadayunon nga gugma maayo pa sang sa kabuhi, gani dayawon ko ikaw. Tubtob nga buhi ako magapasalamat ako sa imo; bayawon ko ang akon mga kamot sa pagpangamuyo sa imo. (S)

Ang akon kalag magapaayaw-ayaw kag mabusog, kag magakanta ako sa imo sang masadya nga mga ambahanon sa pagdayaw. Samtang nagahigda ako ginadumdom ko ikaw, sa bilog nga gab-i yara ka sa akon panghunahona. (S)

Nagakapyot ako sa imo, kag ginauyatan mo ako sing malig-on agod indi ako maano. Ang nagatinguha sa pagpatay sa akon magapanaog sa duta sang mga patay. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 12:1-2

   Gani, mga utod, tungod sang daku nga kaluoy sang Dios sa aton, nagapakiluoy ako sa inyo nga ihalad ninyo ang inyo mga kaugalingon subong isa ka buhi nga halad sa Dios, nga natugyan sa pag-alagad sa iya kag iya nahamut-an. Amo ini ang matuod nga pagsimba nga dapat ninyo ihalad.  Indi kamo magsunod sa mga pagginawi sang mga tawo sa sini nga kalibutan, kundi itugyan ninyo ang inyo kaugalingon sa Dios agod nga iya kamo bag-uhon, paagi sa bug-os nga pagbaylo sang inyo panghunahona. Dayon mahibaluan ninyo ang kabubot-on sang Dios, kon ano ang maayo, ang iya nahamut-an, kag himpit. 

Aleluya:

Taga-Efeso 1:17-18

   Ang Amay sang aton Ginoong Jesu-Cristo nagahatag sing kapawa sa inyo agod inyo mahibaluan kon ano ang paglaom sang iya pagtawag sa inyo.

Ang Pagbasa sang Santos nga Ebanghelyo suno kay:

San Mateo 16:21-27

   Sugod sadto nga tion naghambal si Jesus sing maathag sa iya mga gintuton-an, “Dapat ako magkadto sa Jerusalem kag mag-antos sing tama sa mga katigulangan sang mga Judio, sa pangulo nga mga pari, kag sa mga manunodlo sang Kasugoan. Pagapatyon ako, kag sa ikatlo nga adlaw pagabanhawon ako.” Gindala sia ni Pedro sa uloonhan kag ginsaway, “Ginoo, ang Dios indi magtugot sini! Indi ini dapat mahanabo sa imo!” Nagbalikid si Jesus kay Pedro kag ginsingganan sia, “Palayo ka sa akon, Satanas! Ginabalabagan mo ako, kay ang imo mga panghunahona iya sang tawo, kag indi iya sang Dios!” Dayon si Jesus nagsiling sa iya mga gintuton-an, “Ang bisan sin-o nga luyag magsunod sa akon, dapat niya kalimtan ang iya kaugalingon, magpas-an sang iya krus kag magsunod sa akon. Kay ang tawo nga buot magluwas sang iya kaugalingon nga kabuhi madula sini, pero ang tawo nga nagadula sang iya kabuhi bangod sa akon makakita sini. Ano bala ang makuha sang tawo kon maangkon niya ang bug-os nga kalibutan kag madula niya ang iya kabuhi? Wala gid! Wala sing sarang mahatag ang tawo agod mabuhi sia liwat. Kay ang Anak sang Tawo madali na lang magkari sa himaya sang iya Amay kaupod sa iya mga anghel, kag dayon magahatag sia sing balos sa tagsa ka tawo suno sa iya mga binuhatan. 

Agosto 29 | Agosto 31

"Ihatag sa Dios ang Iya sang Dios"

Liturhiya sang Pulong

(Martes, Hunyo 2, 2020)

Martes sang Ikasiyam nga Semana sang Ordinaryo nga Adlaw

Ang Pagbasa gikan sa Ikaduha nga Sulat ni:

San Pedro 3:12-15, 17-18

   Samtang nagapaabot kamo sang Adlaw sang Dios. Buhata ninyo ang inyo masarangan sa pagpadali sini—ang Adlaw nga ang mga langit pagasunogon kag pagalaglagon, kag ang mga butang sa langit magakatunaw tungod sang kainit. Pero ang Dios nagsaad sang bag-o nga mga langit kag bag-o nga duta, sa diin magaluntad ang pagkamatarong, kag amon ini ginahulat. Gani, mga hinigugma ko, samtang ginahulat ninyo ina nga Adlaw, magmanginputli kamo kag wala sing dagta sa atubangan sang Dios, kag magpakighidait kamo sa iya. Kabiga ninyo nga ang pagpailob sang aton Ginoo isa ka kahigayunan nga iya ginahatag para sa inyo kaluwasan.

   Pero kamo, mga hinigugma ko, nakahibalo na sini. Gani magbantay kamo, agod nga indi kamo mapatalang sang mga sayop sang malinapason nga mga tawo kag madula ang inyo pagkalig-on. Sa baylo magpadayon kamo sa pagtubo sa grasya kag pagkilala sang aton Ginoo kag Manlulowas nga si Jesu-Cristo. Sa iya ang himaya, karon kag sa gihapon! Kabay pa.

Salmo sa Pagsabat:

Mga Salmo 90:2, 3-4, 10, 14 kag 16

(S) Sa kada panahon, O Ginoo, Ikaw ang amon dalangpan.

Sa wala pa matuga ang mga bukid, sa wala pa nimo mahimo ang kalibutan, ikaw Dios sa gihapon nga wala sing ginsugoran kag wala sing katapusan. (S)

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. (S)

Ang kalawigon sang amon kabuhi setenta ka tuig, kon mabakod kami, nagalambot sa otsenta ka tuig, pero ang ila ginadala sa amon kalisdanan kag palaligban gid lang, sa indi madugay ang kabuhi magataliwan, kag wala na kami. (S)

Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ipakita sa amon nga imo mga alagad ang imo gamhanan nga mga buhat; sa amon mga kaliwat ipakita ang imo mahimayaon nga gahom. (S)

Aleluya:

Efeso 1:17-18

   Nagapangayo ako nga ang mahimayaon nga Amay sang aton Ginoong Jesu-Cristo, magahatag sa aton sing kaalam, agod aton mahibaluan kon ano ang paglaom sang iya pagtawag.

Ang Pagbasa sang Santos nga Ebanghelyo suno kay:

San Marcos 12:13-17

  May mga Fariseo kag mga katapo sang partido ni Herodes nga ginpadala sa pagdakupdakop kay Jesus paagi sa mga pamangkot. Nagkadto sila sa iya kag nagpamangkot, “Manunodlo, amon nahibaluan nga ikaw nagasugid sing matuod. Wala ka sing may ginapasulabi kay wala ka sing pinilian, kundi imo lamang ginatudlo ang kabubot-on sang Dios para sa tawo. Sugiri kami, batok bala sa aton Kasugoan ang pagbayad sang buhis sa Emperador ukon indi? Magbayad bala kami sini ukon indi?”
   Pero nasat-uman ni Jesus ang ila kalag-it, gani nagsiling sia sa ila, “Ngaa bala nagatinguha gid kamo sa pagdakupdakop sa akon? Abi, dalhi ninyo ako diri sing salapion kay tan-awon ko.”
   Kag gindalhan nila sia sing isa ka salapi kag ginpamangkot niya sila, “Kay sin-o bala larawan kag ngalan ini?”
   Nagsabat sila, “Iya sang Emperador.”
   Gani si Jesus nagsiling sa ila, “Ti, kon amo, ihatag ninyo sa Emperador ang iya sang Emperador kag sa Dios ang iya sang Dios.”
   Kag natingala gid sila sa iya.  

Hunyo 1 | Hunyo 3