Disyembre 3, 2020, Huwebes sang Nahauna nga Semana sang Adbiento

Liturhiya sang Pulong

San Francisco Javier, Pari

Nahauna nga Balasahon - Isaias 26:1-6

Salmo sa Pagsabat - Mga Salmo 118:1 kag 8-9, 19-21, 25-27

Aleluya - Isaias 55:6

Ebanghelyo - Mateo 7:21, 24-27

"Sin-o Makasulod sa Ginharian sang Langit?"

Ang Pagbasa gikan sa Libro ni:

Isaias nga Propeta 26:1-6

    Ang adlaw magaabot nga ang mga tawo magakanta sini nga ambahanon sa duta sang Juda: 

     Ang amon siyudad mabakod! 

     Ang Dios gid amo ang magabantay sang iya mga pader! 

     Abrihi ang mga puwerta sang siyudad kag pasudla ang matutom nga mga pungsod, 

     ang pungsod nga ang iya mga tawo nagahimo sing matarong. 

     Ikaw, O Ginoo, ang magahatag sang paghidait 

     sa mga nagapadayon sing malig-on sang ila mga tinutoyo kag nagasalig sa imo. 

     Magsalig sa Ginoo sa walay katapusan; 

     sia magaapin sa aton sa gihapon. 

     Ginpaubos niya ang mga bugalon, ginguba niya ang malig-on nga mga siyudad nga ila ginapuy-an, 

     ginrumpag niya sa duta ang ila mga pader. 

     Ginaagyan na ini karon sang mga ginpigos sang una. 

     Kag ila na ini ginatapakan.

Salmo sa Pagsabat:

Mga Salmo 118:1 kag 8-9, 19-21, 25-27

(S) Dayawon ang nagakari sa ngalan sang Ginoo.

Magpasalamat sa Ginoo, kay maayo sia, kag ang iya gugma nagapadayon sa gihapon. Mas maayo ang magsalig sa Ginoo, sang sa magsalig sa mga tawo. Mas maayo ang magsalig sa Ginoo, sang sa magsalig sa mga tawhanon nga mga pangulo. (S)

Buksi ang mga pwerta sang Templo para sa akon, magasulod ako kag magadayaw sa Ginoo! Amo ini ang pwerta sang Ginoo, ang mga matarong lamang amo ang makasulod! Ginadayaw ko ikaw, O Ginoo, kay ginpamatian kag ginpadaog mo ako! (S)

Luwasa kami, O Ginoo, luwasa kami! Hatagi kami sing kauswagan, O Ginoo! Ang Dios magbendisyon sa iya nga nagakari sa ngalan sang Ginoo! Gikan sa Templo sang Ginoo nagadayaw kami sa imo! Ang Ginoo amo ang Dios, nanginmaayo sia sa aton. (S)

Aleluya:

Isaias nga Propeta 55:6

    Dangop kamo sa Ginoo, kag magpangamuyo sa iya, samtang malapit pa sia.

Ang Pagbasa sang Santos nga Ebanghelyo suno kay:

San Mateo 7:21, 24-27

    Nagsiling si Jesus sa iya mga gintuton-an: “Indi ang tanan nga nagatawag sa akon ‘Ginoo, Ginoo,’ makasulod sa Ginharian sang langit, kundi ang nagatuman lamang sang kabubot-on sang akon Amay nga yara sa langit. 

     “Gani, ang nagapamati sang akon mga pulong kag nagatuman sini kaangay sia sang isa ka maalam nga tawo nga nagpatindog sang iya balay sa bato. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Pero wala ini matumba kay napasad ini sa bato. 

     “Ang nagapamati sang akon mga pulong kag wala nagatuman sini, kaangay sia sa tawo nga buangboang nga nagpatindog sang iya balay sa balas. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Natumba ini kag daw ano ang pagragamak sini!” 

Disyembre 2 | Disyembre 4

"Bulahan Kamo nga Makakita sang mga Butang nga Inyo Ginatan-aw"

Liturhiya sang Pulong

(Martes, Disyembre 3, 2019)

San Francisco Javier, Pari

Ang Pagbasa gikan sa Libro ni:

Isaias nga Propeta 11:1-10

   Ang harianon nga linahi ni David kaangay sang isa ka kahoy nga ginpulod; pero subong sang pagpanalingsing sang puno sang kahoy nga ginpulod, subong man magabangon ang bag-o nga hari gikan sa mga kaliwat ni David. 

   Ang gahom sang Ginoo

   Magahatag sa iya sing kaalam,

   Ang ihibalo kag abilidad 

   Sa paggahom sa iya mga tawo. 

   Makilala niya ang kabubot-on sang Ginoo

   Kag magakahadlok sa iya,

   Kag may kalipay sia

   Sa pag-alagad sa iya. 

   Indi sia maghukom paagi sa iya makita 

   Ukon paagi sa sugidsogid lang; 

   Pagahukman niya ang mga imol sing nagakaigo, 

   Kag apinan niya ang kinamatarong 

   Sang mga mapainuboson. 

   Sa iya mando ang duta pagsilutan, 

   Kag ang malaut nga mga tawo magakalamatay. 

   Magagahom sia sa iya mga tawo, 

   Sa katarungan kag kamatuoran.

   Ang mga lobo kag mga karnero, 

   Magaupdanay nga may kalinong, 

   Kag ang mga leopardo magaluko 

   Upod sa mga tinday sang kanding. 

   Ang mga tinday sang baka 

   Kag ang mga totoy sang leon 

   Magaupdanay sa pagkaon 

   Kag ang magamay nga mga kabataan 

   Amo ang magatatap sa ila. 

   Ang mga baka kag mga uso 

   Magasalo sa pagkaon, 

   Kag ang ila mga tinday 

   Kag mga totoy 

   Magaluko sing tingob nga may kalinong. 

   Ang mga leon magahalab sang dagami, 

   Kaangay sang mga baka. 

   Bisan ang lapsag indi maano 

   Kon maghampang sia 

   Malapit sa dalitan nga man-og. 

   Sa Sion, ang balaan nga bukid sang Dios 

   Wala sing butang nga makahalalit 

   Ukon malaut. 

   Ang duta mapuno sang pagkilala sa Ginoo 

   Subong sang mga kadagatan 

   Nga puno sang tubig. 

   Ang adlaw magaabot nga ang bag-o nga hari halin sa linahi ni David mangintanda sa mga kapungsoran. Magatipon sila sing tingob sa iya harianon nga siyudad kag magapadungog sa iya.

Salmo sa Pagsabat:

Mga Salmo 72:1-2, 7-8, 12-13, 17

(S) Kabay nga sa iya panahon magluntad ang pagkamatarong kag ang paghidait nga wala sing katapusan.

Ipaambit sa iya ang imo kaugalingon nga katarungan, agod magahari sia sa imo mga tawo suno sa katarungan, kag magagahom sing matarong sa mga imol. (S)

Kabay nga sa iya panahon magluntad ang pagkamatarong, kag ang kauswagan magpadayon samtang nagasanag pa ang bulan. Ang iya ginharian magalambot halin sa isa ka dagat tubtob sa isa, halin sa Suba sang Eufrates tubtob sa punta sang duta. (S)

Ginaluwas niya ang mga imol nga nagapanawag sa iya, kag ang mga nawad-an kag mga pinatumbayaan. May kaluoy sia sa mga maluya kag sa mga imol, ginaluwas niya ang kabuhi sang mga nawad-an. (S)

Kabay nga ang ngalan sang hari indi gid pagkalimtan, kabay ang iya pagkabantog magpadayon subong sang adlaw. Kabay nga ang tanan nga mga katawhan magpangayo sa Dios nga bendisyunan sila subong sang iya pagbendisyon sa hari. (S)

Aleluya:

   Tan-awa ang aton Ginoo magaabot kag magapasadya sang kabuhi sang iya mga alagad.

Ang Pagbasa sang Santos nga Ebanghelyo suno kay:

San Lucas 10:21-24

   Sa amo nga takna si Jesus nga puno sing kalipay sang Espiritu Santo nagsiling, “O Amay, Ginoo sang langit kag duta, nagapasalamat ako sa imo kay ang imo gintago sa mga maalam kag may tinun-an imo ginpakita sa indi mga maalam. Huo, Amay, kay amo ini ang ginpakamaayo mo. 

   “Gintugyan sa akon sang Amay ang tanan nga butang. Wala sing may nakakilala sa Anak luas sa Amay, kag wala sing may nakakilala sa Amay luas sa Anak kag sa mga luyag sang Anak ipahayag ang Amay.” 

   Dayon si Jesus nag-atubang sa iya mga gintuton-an kag nagsiling sini sa ila lamang, “Bulahan kamo nga makakita sang mga butang nga inyo ginatan-aw. Nagasiling ako sa inyo nga madamo sang mga propeta kag mga hari ang naghandom sa pagtan-aw sang inyo ginatan-aw karon, pero indi sila makakita, kag sa pagpamati sa inyo ginapamatian, pero wala sila makabati.”

Disyembre 2 | Disyembre 4

"Madamo ang Magalingkod sa Punsyon sa Ginharian sang Langit"

Liturhiya sang Pulong

(Lunes, Disyembre 3, 2018)

San Francisco Javier, Pari

Ang Pagbasa gikan sa Libro ni:

Isaias nga Propeta 2:1-5 

Yari ang ginpahayag sang Dios kay Isaias nga anak ni Amoz nahanungod sang Juda kag Jerusalem. Sa palaabuton nga mga inadlaw, ang bukid nga ginatindugan sang Templo amo ang labing mataas sa tanan. Madamo nga mga kapungsoran ang magadugok sa iya, kag ang ila mga tawo magasiling, "Mataklad kita sa bukid sang Ginoo, pakadto sa Templo sang Dios sang Israel. Mahibaluan naton kon ano ang luyag niya nga aton himuon, magalakat kita sa mga dalan nga iya ginpili para sa aton." Ang pagtudlo sang Ginoo nagahalin sa Jerusalem, gikan sa Sion nagahambal sia sa iya mga tawo. Husayon niya ang mga kasuayon sang gamhanan nga mga pungsod. Ipasalsal nila ang ila mga espada nga mangin-arado, kag ang ila mga bangkaw nga mga inughagbas. Ang mga kapungsoran indi na mag-ilinaway, ukon maghanda para sa inaway. Karon, mga kaliwat ni Jacob, maglakat kita sa kapawa nga ginahatag sang Ginoo sa aton!

Salmo sa Pagsabat:

Mga Salmo 122:1-2, 3-4, 4-5, 6-7, 8-9

(S) Magkadto kita sa balay sang Ginoo nga may kalipay. 

Nagkasadya ako sang pagsiling nila sa akon, "Dali makadto kita sa balay sang Ginoo!” Kag karon yari na kita diri, nga nagatindog sa sulod sang mga puwerta sang Jerusalem! (S)
Ang Jerusalem isa ka siudad nga ginpatindog liwat sa diin ang mga tawo magahiliusa sing tingob! Diri nagakadto ang mga tribo sang Israel. (S)
Sa pagpasalamat sa Ginoo suno sa iya ginsugo sa ila. Diri napahamtang ang mga hukmanan, sa diin ang hari nagahukom sang iya mga tinawo. (S)
Magpangamuyo kamo agod may paghidait sa Jerusalem! "Kabay nga ang mga nagahigugma sa Imo magmainuswagon! Kabay nga may paghidait sa sulod sang Imo mga pader, kag kalig-onan sa imo mga palasyo." (S)
Tungod sa mga abyan kag mga kaupdanan, nagasiling ako sa Jerusalem, “Ang paghidait manginyara sa imo!" Tungod sa balay sang Ginoo nga aton Dios, nagapangamuyo ako para sa aton kauswagan. (S) 

Aleluya:

Mga Salmo 80:4

Kari ka, O Ginoong Dios namon, kag luwasa kami; ipakita ang Imo nawong kag maluwas kami.

Ang Pagbasa sang Santos nga Ebanghelyo suno kay:

San Mateo 8:5-11

Sang pagsulod ni Jesus sa Capernaum, may opisyal nga Romanhon nga nagsugata sa iya kag nagpangayo sing bulig nga nagasiling, “Sir, ang akon suloguon didto sa balay nagamasakit; indi sia makahulag kag tama gid ang iya pag-antos.” Si Jesus nagsiling, “Kadtuan ko sia kag ayuhon.” Nagsabat ang opisyal, “Indi na lang, Sir, kay indi ako takos nga magkadto ka sa akon balay, kundi isiling lang kag magaayo ang akon suloguon. Kay ako man yara sa idalom sang mataas nga mga opisyales, kag may mga soldado man sa idalom ko; nagamando ako sa isa, ‘Lakat!’ kag nagalakat sia; nagamando man ako sa isa, ‘Kari!’ kag nagakari sia; kag nagasugo ako sa akon suloguon, ‘Himoa ini!’ kag ginahimo niya.” Natingala gid si Jesus sang pagkabati niya sini, kag nagsiling sia sa mga tawo nga nagasunod sa iya, “Nagasiling ako sa inyo nga wala pa ako makakita sa Israel sing pagtuo nga subong sini. Dumdoma ninyo ini! Madamo ang magakari halin sa sidlangan kag sa nakatundan nga magalingkod kaupod ni Abraham, ni Isaac, kag ni Jacob sa punsyon sa Ginharian sang langit.

Disyembre 2 | Disyembre 4