Nobyembre 13, 2020, Biyernes sang Ika-32 nga Semana sang Tuig

Liturhiya sang Pulong

Santa Frances Xavier Cabrini, Birhen

Nahauna nga Balasahon - 2 Juan 1:4-9

Salmo sa Pagsabat - Mga Salmo 119:1, 2, 10, 11, 17, 18

Aleluya - Lucas 21:28

Ebanghelyo - Lucas 17:26-37

"Ang Isa Kuhaon kag ang Isa Ibilin"

Ang Pagbasa gikan sa Ikaduha nga Sulat ni:

San Juan nga Apostol 1:4-9

    Hinigugma ko: Daku gid ang akon kalipay sa paghibalo nga ang pila sang imo mga anak nagakabuhi sa kamatuoran, suno sa ginsugo sa aton sang Amay. Gani, nagapangabay ako sa imo, talahuron nga Babayi, nga maghigugmaanay kita tanan. Indi bag-o nga sugo ang ginasulat ko sa imo, kundi ini nga sugo halin pa sa ginsugoran. Ini nga gugma nga ginasiling ko, nagakahulogan nga dapat kita magkabuhi suno sa mga sugo sang Dios. Ang sugo nga inyo nabatian halin sa ginsugoran amo ini: dapat kamo magkabuhi sa gugma. 

    Madamo na nga mga manugpatalang ang naglapnag sa bug-os nga kalibutan, mga tawo nga wala nagakilala nga si Jesu-Cristo nagpakatawo. Ini nga sahi sang tawo manugpatalang kag Anti-Cristo. Gani mag-andam kamo sa inyo kaugalingon, agod indi ninyo madula ang inyo ginpangabudlayan, kundi magabaton kamo sang bug-os nga balos. 

    Ang wala nagasunod sang mga pagtulon-an ni Cristo, kundi nagatudlo sing sobra pa sini, ang Dios wala sa iya. Ang nagasunod sini nga pagtulon-an, yara sa iya ang Amay kag ang Anak.

Salmo sa Pagsabat:

Mga Salmo 119:1, 2, 10, 11, 17, 18

(S) Bulahan ang mga nagatuman sang kasugoan sang Ginoo.

Bulahan ang mga wala sing dagta sa ila kabuhi, nga nagakabuhi suno sa kasugoan sang Ginoo. (S)

Bulahan sila nga nagasunod sang iya mga sugo, nga nagatuman sa iya sa bug-os nila nga tagipusoon. (S)

Sa bug-os ko nga tagipusoon nagtinguha ako sa pag-alagad sa imo, buligi ako nga indi magmalalison sa imo mga sugo! (S)

Ginatipigan ko ang imo kasugoan sa akon tagipusoon, agod indi ako makasala batok sa imo. (S)

Magmaayo ka sa akon nga imo alagad, agod nga magkabuhi ako kag magtuman sang imo mga pagtudlo. (S)

Buksi ang akon mga mata, agod nga makakita ako sang makatilingala nga mga kamatuoran sa imo kasugoan. (S)

Aleluya:

San Lucas 21:28

   Magtindog kamo kag magbayaw sang inyo mga ulo, kay ang inyo kaluwasan malapit na.

Ang Pagbasa sang Santos nga Ebanghelyo suno kay:

San Lucas 17:26-37

   Sadto nga panahon: Si Jesus nagsiling sa iya mga gintuton-an: Subong sang natabo sa mga adlaw ni Noe, amo man ang matabo sa inadlaw sang Anak sang Tawo. Ang tanan nagkalaon kag nag-ininom, ang mga lalaki nagpalangasawa kag ang mga babayi nagpalamana, tubtob sa adlaw nga si Noe nagsulod sa arka kag ang anaw nag-abot kag naglumos sa ila tanan. Amo man ang natabo sa mga inadlaw ni Lot. Nagkalaon kag nag-ininom sila, nagpamakal kag nagpamaligya sila, nagpananom sila kag nagpatindog sang mga balay. Pero sa adlaw nga si Lot nakagwa sa Sodoma, nag-ulan sing kalayo kag asupre didto sa Sodoma kag nagkalamatay ang tanan nga mga tawo. Manginkaangay man sini sa adlaw nga ipahayag ang Anak sang Tawo. 

   “Sa sadto nga adlaw ang tawo nga yara sa atop sang iya balay indi na magpanaog sa pagkuha sang iya pagkabutang nga yara sa sulod sang balay. Sa amo man nga bagay, ang tawo nga yara sa iya uma indi na magpauli. Dumdoma ninyo ang asawa ni Lot. Ang nagatinguha sa pagluwas sang iya kabuhi madula niya ini, kag ang bisan sin-o nga nagadula sang iya kabuhi maluwas niya ini. Nagasiling ako sa inyo, sa sina nga gab-i may duha ka tawo nga magatulog sa isa ka higdaan, ang isa kuhaon kag ang isa ibilin. May duha ka babayi nga nagagaling, ang isa kuhaon kag ang isa ibilin. May duha ka tawo sa latagon, ang isa kuhaon kag ang isa ibilin.” 

   Ang mga gintuton-an nagpamangkot sa iya, “Diin bala, Ginoo?” 

   Si Jesus nagsabat, “Kon diin ang lawas nga patay, didto man magatipon ang mga uwak.”

Nobyembre 12 | Nobyembre 14

"Nagluhod sia sa Tiilan ni Jesus kag Nagpasalamat"

Liturhiya sang Pulong

(Miyerkules, Nobyembre 13, 2019)

Santa Frances Xavier Cabrini, Birhen

Ang Pagbasa gikan sa Libro sang:

Kaalam ni Salomon 6:1-11

   Gani, kamo nga mga hari, kamo nga mga nagagahom sa bug-os nga kalibutan, magpamati kamo sa akon igasiling kag talupangda ninyo ini. Ginagamhan ninyo ang madamu nga kadutaan kag nagapabugal kamo nga madamo kamo sing ginagamhan, pero ang gahom ginhatag sa inyo sang Ginoo nga Labing Mataas. Pagausisaon niya kamo kon anano ang inyo nabuhat kag kon anano ang inyo ginaplano nga pagabuhaton. Nagagahom kamo sa ngalan sang Dios kag sang iya ginharian, kag kon indi kamo maggahom sing matarong, kon indi ninyo pagtumanon ang kasugoan, kon indi kamo magkabuhi suno sa kabubot-on sang Dios, magabaton kamo sang kuyos kag makakulogmat nga silot. Ang paghukom mas mabug-at para sa mga nagagahom. Ang ordinaryo nga tawo pagahukman sing may kaluoy, pero ang mga nagagahom magapangatubang sang isa ka mabug-at nga paghukom. Ang Ginoo sang tanan wala nahadlok sa kay bisan sin-o walay sapayan sa kon daw ano sa iya ka gamhanan. Ang Dios nagtuga sang tanan, gamhanan man ukon sumolunod, kag iya ginatatap sing alalangay ang tanan, pero mangin-estrikto sia sa paghukom sa mga nagagahom. Ginasulat ko ini para sa inyo nga mga hari, agod makahibalo kamo kon paano kamo makabuhat nga may kaalam kag inyo malikawan ang mga kasal-anan. Balaan ini nga mga butang, kag kon inyo ini talupangdon, manginbalaan man kamo. Kon inyo maangkon ini nga kinaalam, mapangapinan ninyo ang inyo kaugalingon sa Adlaw sang Paghukom. Gani hupti ninyo subong isa ka hiyas kag kalipay ang akon ginatudlo kag mabaton ninyo ang maayo nga pagtulon-an.

Salmo sa Pagsabat:

Mga Salmo 82:3-4, 6-7

(S) Kari, O Dios, kag maggahom sa kalibutan.

Apini ang kinamatarong sang mga imol kag sang mga ilo; himoa ang nagakaigo sa mga nawad-an kag sa mga makalulooy. Luwasa ang mga imol kag ang mga nawad-an, luwasa sila sa gahom sang malaut nga mga tawo! (S)

Ginsingganan ko kamo nga mga dios kamo, nga tanan kamo mga anak sang Labing Mataas. Pero mapatay kamo kaangay sang tawo;  ang inyo kabuhi matapos kaangay sang bisan sin-o nga prinsipe.” (S)

Aleluya:

1 Tesalonica 5:18

   Magmapasinalamaton bisan sa ano nga kahimtangan kay amo ini ang ginapaabot sang Dios sa inyo, sa inyo pagkabuhi kay Cristo Jesus. 

Ang Pagbasa sang Santos nga Ebanghelyo suno kay:

San Lucas 17:11-19

   Sang nagapakadto si Jesus sa Jerusalem nag-agi sia sa dulonan sang Samaria kag Galilea. Sang nagapasulod sia sa isa ka baryo ginsugata sia sang napulo ka mga aruon. Ang mga aruon nagtindog sa unhan kag nagsinggit, “Jesus nga manunodlo, kaluoyi kami!” 

   Nakita sila ni Jesus kag nagsiling sia sa ila, “Lakat kamo kag ipatan-aw ang inyo kaugalingon sa mga pari.” 

   Sang nagalakat sila nag-ayo sila. Ang isa sa ila, sang matalupangdan niya nga nag-ayo na sia, nagbalik nga nagadayaw sa Dios sa mabaskog nga tingog. Nagluhod sia sa tiilan ni Jesus kag nagpasalamat sa iya. Yadto nga tawo taga-Samaria. Si Jesus nagsiling, “Indi bala napulo ka tawo ang gintinluan? Karon diin na ang siyam? Ngaa ining dumoluong lang ang nagbalik sa pagpasalamat sa Dios?” Si Jesus nagsiling sa tawo, “Tindog ka kag maglakat. Ang imo pagtuo nag-ayo sa imo.” 

Nobyembre 12 | Nobyembre 14

"Gintuman lamang namon ang amon Katungdanan"

Liturhiya sang Pulong

(Martes, Nobyembre 13, 2018)

Santa Frances Xavier Cabrini, Birhen

Ang Pagbasa gikan sa Sulat ni San Pablo nga Apostol, kay:

Tito 2:1-8, 11-14

Pero dapat ikaw magpanudlo sang husto nga pagtulon-an. Tudloi ang gulanggolang na nga mga lalaki nga maghaganhagan, magmahinangpanon kag magpugong sila sang ila kaugalingon; magmanginhusto sila sa ila pagtuo, paghigugma, kag pagbatas. Sa amo man nga paagi tudloi man ang gulanggolang na nga mga babayi nga magginawi sila subong mga babayi nga nagakabuhi sing balaan. Indi sila magkutsokutso ukon mangin-ulipon sang bino. Dapat sila magpanudlo sang maayo, agod matudloan nila ang pamatan-on nga mga babayi nga maghigugma sang ila mga bana kag mga kabataan, nga magpugong sang ila kaugalingon kag magmanginputli, kag manginmaayo sila nga mga asawa, nga nagatuman sa ila mga bana, agod nga wala sing may magapakamalain sang pulong sang Dios. Sa amo man nga bagay laygayi ang pamatan-on nga mga lalaki nga magpugong sang ila kaugalingon. Ikaw imo dapat manginsulondan nila sa paghimo sing maayo sa tanan nga mga butang. Magmanginsinsero ka kag seryuso sa imo pagpanudlo. Gamita ang nagakaigo nga mga pulong nga indi mahikayan, agod mahuy-an ang imo mga kaaway, kay wala sila sing ihambal nga malain nahanungod sa aton. Kay ginpahayag sang Dios ang iya grasya para sa kaluwasan sang tanan nga mga tawo. Ina nga grasya nagatudlo sa aton sa pagsikway sang pagkabuhi nga di-diosnon kag sang kalibutanon nga mga kailigbon, kag sa pagkabuhi sa sining kalibutan nga may pagpugong sang kaugalingon, matarong kag diosnon, samtang nagapaabot kita sang bulahan nga Adlaw nga aton ginalauman, nga ang himaya sang aton gamhanan nga Dios kag Manlulowas nga si Jesu-Cristo magapakita. Gintugyan niya ang iya kaugalingon tungod sa aton, agod maluwas kita sa tanan nga mga kalautan kag manginputli nga mga tawo nga iya kaugalingon kag nagahandom sa paghimo sing maayo. 

Salmo sa Pagsabat:

Mga Salmo 37:3-4, 18, 23, 27, 29

(S) Ang Ginoo nagaluwas sang matarong nga mga tawo.

Magsalig ka sa Ginoo kag maghimo sing maayo, magkabuhi ka sa duta kag indi ka maano. Pangitaa ang imo kalipay sa Ginoo, kag ihatag niya sa imo ang imo gid ginahandom. (S)
Ang Ginoo nagatatap sa mga nagatuman sa iya, kag mangin-ila ang duta sa walay katubtoban. Ang Ginoo nagatuytoy sa tawo nga indi maano sa iya dapat pagaagyan, kag nagakalipay sia sa iya pagginawi. (S)
Likawi ang malaut kag himoa ang maayo, kag magakabuhi ka sa duta sa walay katubtoban. Ang mga matarong magakabuhi sa duta nga indi maano. Kag mangin-ila ini sa walay katapusan. (S)

Aleluya:

Juan 14:23

Ang nagahigugma sa akon magatuman sang akon pulong, siling sang Ginoo, kag ang akon Amay magahigugma sa iya kag kami magakadto sa iya.

Ang Pagbasa sang Santos nga Ebanghelyo suno kay:

San Lucas 17:7-10

“Abi ang isa sa inyo may suloguon nga nagaarado ukon nagabantay sang mga karnero. Kon magpauli sia halin sa uma, nagasiling bala kamo sa iya, ‘Dali, kaon na’? Wala gid kamo nagasiling sini. Sa baylo, nagasiling kamo sa iya, ‘Ihanda ang akon panihapon, mag-ilis ka kag magsirbe sa akon samtang nagakaon kag nagainom ako. Magkaon kag mag-inom ka ugaling kon tapos na ako.’ Indi bala nga wala gid kamo sing pasalamatan sa suloguon kon ang ginahimo niya amo lamang ang ginasugo sa iya? Subong man ini sa inyo; sa tapos ninyo mahimo ang tanan nga ginsugo sa inyo, magsiling kamo, ‘Mga suloguon man lang kami. Gintuman lamang namon ang amon katungdanan.’ ”

Nobyembre 12 | Nobyembre 14