Liturhiya sang Pulong
Nahauna nga Balasahon - Malaquias 3:1-4
Salmo sa Pagsabat - Mga Salmo 24:7, 8, 9, 10
Ika-2 nga Balasahon - Hebreo 2:14-18
Aleluya - Lucas 2:32
Ebanghelyo - Lucas 2:22-40
1. Ang Pagbasa gikan sa Libro ni:
Malaquias nga Propeta 3:1-4
Ang Ginoo nga Makagagahom nagasabat, “Magapadala ako sang akon manugbalita nga magaaman sang dalan para sa akon. Dayon sa hinali ang Ginoo nga inyo ginapangita magaabot sa iya Templo. Ang manugbalita nga inyo ginahandom nga makita magaabot kag magabantala sang akon kasugtanan.”
Pero sin-o bala ang sarang makaagwanta sa sadto nga adlaw kon magkari sia? Sin-o bala ang mabuhi kon magpahayag sia? Manginkaangay sia sang maisog nga habon ukon sang kalayo nga nagatunaw sang metal. Magakari sia sa paghukom kaangay sang platero nga nagatunaw kag nagapuraw sang pilak. Subong nga ang platero nga nagapuraw sang pilak kag bulawan, ang mensahero sang Ginoo magapapuraw man sang mga pari, agod magadala sila sa Ginoo sang nagakabagay nga mga dulot. Dayon ang mga dulot nga pagadalhon sa Ginoo sang mga tawo sang Juda kag Jerusalem manginkahalamut-an sa Ginoo subong sang una.
Salmo sa Pagsabat:
Mga Salmo 24:7, 8, 9, 10
(S) Sia amo ang Ginoo sang mga hangaway, ang hari nga gamhanan!
Abrihi sing daku ang mga ganhaan, buksi ang daan nga mga puwertahan, kay magasulod ang hari nga gamhanan! (S)
Sin-o bala ining Hari nga gamhanan? Sia amo ang Ginoo nga makusog kag makagagahom, ang Ginoo nga nagadaog sa inaway! (S)
Abrihi sing daku ang mga ganhaan, buksi ang daan nga mga puwertahan, kag magasulod ang Hari nga gamhanan! (S)
Sin-o bala ining hari nga gamhanan? Sia amo ang Ginoo sang mga hangaway, ang Hari nga gamhanan! (S)
2. Ang Pagbasa gikan sa Sulat sa mga:
Hebreo 2:14-18
Tungod kay ang iya ginatawag nga mga anak, mga tawo nga may lawas kag dugo, si Jesus man nanginkaangay nila kag nagsuklob sang tawuhanon nga kinaugali. Ginhimo niya ini agod nga paagi sa iya pagkamatay malaglag niya ang Yawa, nga may gahom sang kamatayon, kag maluwas niya ang mga nangin-ulipon sa bug-os nila nga kabuhi tungod sang ila kahadlok sa kamatayon. Kay maathag gid nga indi ang mga anghel ang iya ginabuligan, kundi suno sa ginasiling sang kasulatan, “Ginabuligan niya ang mga kaliwat ni Abraham.” Ini nagakahulogan nga dapat manginkaangay sia sa iya mga kautoran sa tanan nga bagay, agod sia mangin-ila matutom kag maluloy-on nga pinakamataas nga pari sa iya pag-alagad sa Dios, agod mapatawad ang mga sala sang mga tawo. Kag karon sarang sia makabulig sa mga ginasulay, kay sia mismo ginsulay kag nag-antos.
Aleluya:
San Lucas 2:32
Isa ka kapawa nga maga-iwag sa mga Hentil, kag mangin himaya sa imo mga tawo nga Israel.
Ang Pagbasa sang Santos nga Ebanghelyo suno kay:
San Lucas 2:22-40
Nag-abot ang tion nga si Jose kag si Maria kinahanglan magtuman sang seremoniya sang pagpaninlo suno sa Kasugoan ni Moises. Gani, gindala nila ang bata sa Jerusalem agod ihalad sa Ginoo.nAmo ini ang nasulat sa kasugoan sang Ginoo, “Ang tagsa ka panganay nga lalaki ihalad sa Ginoo.” Nagdulot man sila sing halad suno sa nasiling sa kasugoan sang Ginoo, “Duha ka tukmo, ukon duha ka kuyabog nga pating.”
Sa sadto nga tion may tawo nga nagapuyo sa Jerusalem nga ang iya ngalan si Simeon. Ini nga tawo matarong kag matinuohon sa Dios, kag nagahulat sang pagluwas sa Israel. Ang Espiritu Santo yara sa iya, kag nagpasalig sa iya nga indi sia mapatay sa wala pa niya makita ang ginsaad sang Ginoo nga Cristo. Sa pagtuytoy sang Espiritu, si Simeon nagkadto sa templo. Sang gindala ang bata nga si Jesus sang iya mga ginikanan sa pagtuman sang ginasiling sang Kasugoan, ginkugos ni Simeon ang bata kag nagpasalamat sia sa Dios nga nagasiling:
“Karon, O Ginoo,
gintuman mo ang imo saad,
kag mapataliwan mo na
ang imo alagad sa paghidait.
Kay ang akon gid mga mata
nakakita sang imo kaluwasan,
nga gin-aman mo sa atubangan
sang tanan nga mga katawuhan:
Isa ka kapawa
nga magaiwag sa mga Gentil,
kag manginhimaya
sa imo mga tawo sa Israel.”
Ang amay kag iloy sang bata natingala gid sang ginhambal ni Simeon nahanungod sa iya. Si Simeon nagbendisyon sa ila kag nagsiling kay Maria nga iloy sang bata, “Ini nga bata ginpili sang Dios nga manginkalaglagan ukon kaluwasan sang madamo sa Israel. Sia mangintanda gikan sa Dios nga pagakontrahon sang madamo, kag magapahayag sang ila tinago nga mga panghunahona. Kag ang kalisod, subong sang isa ka matalom nga espada, magalapos sang imo kaugalingon nga tagipusoon.”
May propeta nga babayi nga si Ana nga anak ni Fanuel gikan sa tribo ni Aser. Ini sia isa ka tigulang nga pito ka tuig lang ang ila pagpuyo sang iya bana kag mabalo sia. Otsentay kuwatro na ka tuig nga nabalo sia kag sa sini nga kalawigon wala gid sia makagwa sa templo. Sa adlaw kag gab-i nagaalagad sia sa Dios kag nagapuasa kag nagapangamuyo. Sa sadto gid nga takna nag-abot sia kag nagpasalamat sa Dios, kag nagpanugid sia nahanungod sang bata sa tanan nga mga tawo nga nagahulat sang pagtubos sang Dios sa Jerusalem.
Sang natuman na nila ang tanan nga ginasiling sang kasugoan sang Ginoo, nagbalik sila sa Galilea sa ila kaugalingon nga banwa nga Nazaret. Ang bata nagdaku kag nagbakod, nga napun-an sang kaalam, kag ang grasya sang Dios yara sa iya.
