Enero 5, 2021, Martes, Panahon sang Pagkatawo

Liturhiya sang Pulong

Nahauna nga Balasahon - 1 Juan 4:7-10

Salmo sa Pagsabat - Mga Salmo 72:1-2, 3-4, 7-8

Aleluya - Lucas 4:18

Ebanghelyo - Marcos 6:34-44

Ang Pagbasa gikan sa Nahauna nga Sulat ni:

San Juan nga Apostol 4:7-10

   Mga hinigugma, maghigugmaanay kita, kay ang gugma nagagikan sa Dios. Ang nagahigugma anak sang Dios kag nakakilala sa Dios. Ang wala nagahigugma wala makakilala sa Dios, kay ang Dios gugma. Sa sini nga paagi ginpahayag sang Dios ang iya gugma sa aton: ginpadala niya ang iya bugtong nga Anak sa kalibutan agod nga may kabuhi kita paagi sa iya. Amo ini ang gugma: indi tungod kay naghigugma kita sa Dios, kundi nga ang Dios naghigugma sa aton kag nagpadala sang iya Anak agod nga paagi sa iya mapatawad ang aton mga sala.

Salmo sa Pagsabat:

Mga Salmo 72:1-2, 3-4, 7-8

(S) Kabay nga magluhod sa Imo atubangan ang tanan nga mga pungsod, O Ginoo.

Tudloi ang hari sa paghukom suno sa imo pagkamatarong, O Dios, ipaambit sa iya ang imo kaugalingon nga katarungan, agod magahari sia sa imo mga tawo suno sa katarungan, kag magagahom sing matarong sa mga imol. (S)

Kabay ang duta makaagom sang kauswagan, kabay nga makaagom ini sang katarungan. Kabay ang hari maghukom sing nagakaigo sa mga imol, kabay nga magbulig sia sa mga nawad-an kag maglutos sa mga nagapamigos! (S)

Kabay nga sa iya panahon magluntad ang pagkamatarong, kag ang kauswagan magpadayon samtang nagasanag ang bulan. Ang iya ginharian magalambot halin sa isa ka dagat tubtob sa isa, halin sa Suba Eufrates tubtob sa ukbong sang duta. (S)

Aleluya:

San Lucas 4:18

   Ang Ginoo nagpili sa akon sa pagwali sang Maayong Balita sa mga imol, ginpadala niya ako sa pagbantala sang kahilwayan sang mga bihag.

Ang Pagbasa sang Santos nga Ebanghelyo suno kay:

San Marcos 6:34-44

   Sadto nga panahon: Sang pagtakas ni Jesus, nakita niya ang masyado kadamo nga mga tawo kag nagbatyag sia sing kaluoy sa ila kay subong sila sang mga karnero nga wala sing manugbantay. Kag gintudloan niya sila sang madamo nga mga butang. Sang sirom na, ang iya mga gintuton-an nagkadto sa iya kag nagsiling, “Madulom na kag baw-ing ini nga duog. Palakta kag pakadtoa ang mga tawo sa mga baryo ukon mga sityo sa palibot agod nga makabakal sila sang ila pagkaon.”

   Nagsabat si Jesus, “Kamo mismo ang maghatag sa ila sing pagkaon.”

   Nagpamangkot sila, “Gusto mo bala nga maglakat kami sa pagbakal sing tinapay nga nagabili sing P200 agod nga mapakaon sila?”

   Gani si Jesus nagpamangkot sa ila, “Pila bala ka bilog ang inyo tinapay? Abi tan-awa ninyo.”

   Sang mausisa nila, nagsiling sila, “Lima ka bilog nga tinapay kag duha ka bilog nga isda.”

   Sa gilayon ginsugo ni Jesus ang iya mga gintuton-an sa pagpalingkod sang mga tawo sing hinut-onghut-ong sa hilamon. Gani ang mga tawo naglingkod nga nahut-onghut-ong sa tag-ginatos kag tag-singkuwenta. Dayon ginkuha ni Jesus ang lima ka bilog nga tinapay kag ang duha ka bilog nga isda, nagtangla sia sa langit, kag nagpasalamat sa Dios. Iya ginpamihakpihak ang tinapay kag ginhatag sa iya mga gintuton-an agod nga ila ipanagtag sa mga tawo. Iya man ginpartiparti ang duha ka bilog nga isda. Nagkaon sila tanan kag nagkalabusog. Dayon gintipon sang mga gintuton-an ang nagkalabilin nga tinapay kag isda kag napuno ang dose ka mga alat. Ang kadamuon sang mga lalaki nga nagkalaon 5,000.

Enero 4 | Enero 6