Liturhiya sang Pulong
Nahauna nga Balasahon - Isaias 61:1-2A, 10-11
Kalantahon sa Pagsabat - Lucas 1:46-48, 49-50, 53-54
Ikaduha nga Balasahon - 1 Tesalonica 5:16-24
Aleluya - Isaias 61:1
Ebanghelyo - Juan 1:6-8, 19-28
Ang Dios Nagpabayu sa Akon sing Kaluwasan kag Pagdaog!
Ang Pagbasa gikan sa Ikaduha nga Sulat ni:
Isaias nga Propeta 61:1-2A, 10-11
Ang Ginoo nagpuno sa akon sang iya gahom. Ginpili kag ginpadala niya ako Sa pagdala sang maayong balita sa mga imol, Sa pag-ayo sang buong nga mga tagipusoon, Sa pagbantala sang kahilwayan sa mga ginbihag, Kag sa mga binilanggo. Ginpadala niya ako sa pagpahibalo Nga ang tion nag-abot na Nga ang Ginoo magaluwas sang iya mga tawo, Kag magalutos sang ila mga kaaway.
Ang Jerusalem nagahinugyaw tungod sang ginhimo sang Ginoo. Ang Dios nagpabayu sa iya sing kaluwasan kag pagdaog! Kaangay sia sang nobya ukon nobyo nga nakailis na para sa kasal. Pat-od gid nga ang Ginoo magaluwas sang iya mga tawo subong nga ang mga binhi magatubo. Kag ang tanan nga mga kapungsoran magadayaw sa iya.
Kalantahon sa Pagsabat:
San Lucas 1:46-48, 49-50, 53-54
(S) Ang akon kalag nagahugyaw sa akon Dios.
"Ang akon tagipusoon Nagadayaw sa Ginoo, Kag nagakalipay ang akon espiritu Tungod sa Dios ngaa kon Manlulowas. Kay gintamod niya ako, Ang iya kubos nga alagad! Sugod karon ang tanan nga mga tawo Magatawag sa akon ang bulahan. (S)
Tungod sang dalagku nga mga butang Nga nahimo sa akon Sang Gamhanan nga Dios. Ang iya ngalan balaan. Nagakaluoy sia sa tanan Nga nagakahadlok sa iya, Sa mga kaliwatan kag mga kaliwatan. (S)
Ginbusog niya Sang maayo nga mga butang Ang mga ginagutom, Ginpalakat niya nga wala sing dala Ang mga manggaranon. Gintuman niya Ang iya saad sa aton mga katigulangan; Ginbuligan niya si Israel Nga iya alagad. (S)
2. Ang Pagbasa gikan sa Nahauna nga Sulat ni San Pablo nga Apostol sa mga:
Taga-Tesalonica 5:16-24
Mga utod: Magkalipay kamo sa gihapon, magpangamuyo sa tanan nga tion, magmapasinalamaton bisan sa ano nga kahimtangan kay amo ini ang ginapaabot sang Dios sa inyo, sa inyo pagkabuhi kay Cristo Jesus. Indi ninyo pagpunggi ang Espiritu Santo. Indi ninyo pagtamaya ang ginawali nga pulong sang Dios. Tilawi ang tanan nga mga butang, hupti ang maayo, kag likawi ang tanan nga sahi sang kalautan. Kabay nga ang Dios nga nagahatag sa aton sing paghidait, magpakabalaan sa inyo sing bug-os, kag magtipig sang inyo bug-os nga kaugalingon: espiritu, kalag, kag lawas, nga wala sing dagta sa pag-abot sang aton Ginoong Jesu-Cristo. Sia nga nagatawag sa inyo magahimo sini, kay sia masaligan.
Aleluya:
Isaias nga Propeta 61:1
Magtindog kamo kag magbayaw sang inyo mga ulo, kay ang inyo kaluwasan malapit na.
Ang Pagbasa sang Santos nga Ebanghelyo suno kay:
San Juan 1:6-8, 19-28
Ang Dios nagpadala sang iya manugbalita, ang tawo nga ginahingalanan kay Juan, nga nagkari sa pagsugid sa mga tawo nahanungod sang kapawa. Ginsugiran niya sila agod ang tanan magpamati sang mensahi, kag magtuo. Sia mismo indi amo ang kapawa, kundi nagkari sia sa pagsugid nahanungod sang kapawa. Ang mga pangulo sang mga Judio sa Jerusalem nagpadala sing mga pari kag mga Levita sa pagpamangkot kay Juan kon sin-o sia.
Si Juan nagsabat kag nagpahayag nga wala sing lipudlipod, “Indi ako ang Cristo.”
Ginpamangkot nila sia, “Kon amo, sin-o ka? Ikaw bala si Elias?”
Nagsabat si Juan, “Indi ako si Elias.”
Nagpamangkot sila, “Ikaw bala ang Propeta?”
Nagsabat si Juan, “Indi.”
Nagsiling sila, “Sugiri kami kon sin-o ka agod may isabat kami sa mga nagpadala sa amon. Ano ang masiling mo nahanungod sa imo kaugalingon?”
Si Juan nagsabat: “Ako amo ‘ang tingog sang isa Nga nagasinggit sa desierto: Maghimo kamo sing tadlong nga dalan Nga pagaagyan sang Ginoo!’ ” (Amo ini ang ginsiling ni Isaias nga propeta.)
Ini nga mga sinugo ginpadala sang mga Fariseo. Ginpamangkot nila si Juan, “Kon indi ikaw ang Cristo, ukon si Elias ukon ang Propeta, ngaa bala nga nagapangbautiso ka?”
Nagsabat si Juan, “Ako nagapangbautiso sa tubig, pero sa tunga ninyo may isa nga wala ninyo makilala. Ulihi lang sia sa akon, pero indi ako takos sa paghubad sang higot sang iya sandalyas.”
Ini tanan nahanabo sa Betania, sa tabok sang suba sang Jordan sa diin nagapangbautiso si Juan.
Disyembre 12 | Disyembre 14
No comments:
Post a Comment