"Kon Indi kamo Magbiya sa Pagpakasala Mapatay kamo"

Liturhiya sang Pulong

(Domingo, Marso 24, 2019)

1. Ang Pagbasa gikan sa Libro sang:

Exodo 3:1-8, 13-15

Karon si Moises nagabantay sang mga karnero kag mga kanding sang iya ugangan nga lalaki nga si Jetro, ang pari sang Midian. Gindala niya ang panong sa tabok sang desierto,kag nakaabot sia sa Horeb, ang bukid sang Dios. Ang anghel sang Ginoo nagpakita sa iya sa dagway sang nagadabdab nga kalayo sa tunga sang kahuykahoy. Gintan-aw ni Moises ang kahuykahoy kag natalupangdan niya nga nagadabdab ini pero wala ini masunog. Si Moises nagpanghunahona, “Mapalapit ako kag tan-awon ining makatilingala nga butang. Ngaa ining kahuykahoy indi masunog?” Sang makita sang Ginoo nga nagapalapit sia, ang Dios nagtawag sa iya gikan sa tunga sang kahuykahoy nga nagasiling, “Moises, Moises!” Kag nagsabat sia, “Yari ako.” Ang Dios nagsiling, “Indi ka gid magpalapit. Ubaha ang imo mga sandalyas, kay ang duog nga imo ginatindugan balaan. Ako amo ang Dios sang imo amay, ang Dios ni Abraham, ang Dios ni Isaac, kag ang Dios ni Jacob.” Gintabunan ni Moises ang iya guya, kay nahadlok sia sa pagtulok sa Dios. Dayon ang Ginoo nagsiling, “Nakita ko gid kon daw ano ang pagpintas sa akon mga tawo didto sa Egipto. Nabatian ko ang ila pagpangayo sing bulig batok sa mga kabo nga nagapamintas sa ila. Huo, nahibaluan ko gid ang ila mga pag-antos. Nagpanaog ako sa pagluwas sa ila sa mga Egiptohanon, kag sa pagpagwa sa ila sa amo nga duta, pakadto sa isa ka maayo kag malapad nga duta. Maayo kag mapatubason ini nga duta. Si Moises nagsiling sa Dios, “Karon, kon magkadto ako sa mga Israelinhon kag magsiling sa ila, ‘Ang Dios sang inyo mga ginikanan nagpadala sa akon sa inyo’,kag kon sila mamangkot sa akon, ‘Sin-o ang iya ngalan?’ Ano bala ang isabat ko sa ila?” Ang Dios nagsiling kay Moises, “Ako nga Amo sa Gihapon.” Kag nagsiling pa gid sia, “Amo ini ang dapat mo isiling sa mga Israelinhon: ‘Si Amo ako ang nagpadala sa akon sa inyo.’” Ang Dios naghambal liwat kay Moises, “Amo ini ang dapat mo isiling sa mga Israelinhon, ‘Ang Ginoo, ang Dios sang inyo mga katigulangan, ang Dios ni Abraham, ang Dios ni Isaac, kag ang Dios ni Jacob, nagpadala sa akon sa inyo.’ Ini amo ang akon ngalan tubtob sa katubtoban. Ini amo ang itawag sa akon sang tanan nga palaabuton nga mga kaliwatan.

“Ako nga Amo sa Gihapon . . . Ini ang akon ngalan." (3:14-15)

Salmo sa Pagsabat:

Mga Salmo 103:1-2, 3-4, 6-7, 8, 11

(S) Ang Ginoo maluloy-on kag mahigugmaon.

Dayawa ang Ginoo, O kalag ko! Dayawa ang iya balaan nga ngalan, bug-os ko nga tagipusoon! Dayawa ang Ginoo, O kalag ko, kag indi pagkalimti kon daw ano ang iya kaayo. (S)
Ginapatawad niya ang tanan ko nga mga sala kag ginaayo niya ang tanan ko nga mga balatian; ginaluwas niya ako sa lulobngan kag ginalikupan niya ako sang gugma kag kaluoy. (S)
Ang Ginoo nagahukom sa pag-apin sa mga ginapigos kag nagahatag sa ila sang ila mga kinamatarong. Ginsugid niya ang iya mga plano kay Moises kag ginpakita niya sa mga tawo sang Israel ang iya gamhanan nga mga buhat. (S)
Ang Ginoo maluloy-on kag mahigugmaon, indi madali mangakig kag puno sing mapinadayunon nga gugma. Subong sang kataas sang langit sa ibabaw sang duta, amo man kadaku ang iya paghigugma sa mga nagatahod sa iya. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 10:1-6, 10-12

Mga utod, dapat ninyo dumdomon ang gin-agihan sang aton mga ginikanan nga nagsunod kay Moises. Ginlandungan sila sang panganod kag nagtabok sila nga wala maano sa Mapula nga Dagat. Sa gal-om kag sa dagat ginbautisohan sila subong nga mga sumolunod ni Moises. Tanan sila nagkaon sang amo man nga espirituhanon nga pagkaon, kag tanan sila nag-inom sang amo man nga espirituhanon nga ilimnon. Kay nag-inom sila sa sadtong espirituhanon nga bato nga nag-upod sa ila. Yadto nga bato amo si Cristo. Pero ang Dios wala malipay sa kalabanan sa ila, gani ang ila mga bangkay naglalapta sa desierto. Karon, ini nga mga butang nga nahanabo mga halimbawa sa pagpaandam sa aton nga indi kita maghandom sang malain nga mga butang subong sang ginhimo nila, Indi gid kamo magkumod subong sang ginhimo sang iban sa ila, kag ginlaglag sila sang Anghel nga Manugpatay. Ini tanan nga mga butang nahanabo sa ila subong mga halimbawa para sa iban, kag ini ginsulat subong nga paandam sa aton. Kay nagakabuhi kita sa panahon nga ang katapusan madali na lang mag-abot. Gani, ang nagahunahona nga malig-on ang iya pagtindog mag-andam basi kon matumba sia.

Bersikulo antis ang Ebanghelyo:

Mateo 4:17

Maghinulsol kamo, siling sang Ginoo, kay malapit na ang ginharian sang langit.

Ang Pagbasa sang Santos nga Ebanghelyo suno kay:

San Lucas 13:1-9

Sa sadto nga tion may mga tawo didto nga nagsugid kay Jesus nahanungod sang mga taga-Galilea nga ginpapatay ni Pilato samtang nagadulot sila sang ila mga halad sa Dios. Si Jesus nagsabat sa ila, “Tungod kay ini nga mga taga-Galilea ginpamatay sa sini nga paagi, nagahunahona bala kamo nga labi sila ka makasasala sang sa iban nga mga taga-Galilea? Indi! Nagasiling ako sa inyo nga kon indi kamo magbiya sa pagpakasala mapatay man kamo tanan subong sa ila. Ano karon yadtong mga 18 ka mga tawo sa Siloe nga napatay sang natumbahan sila sang tore? Nagahunahona bala kamo nga labi pa sila kalain sang sa tanan nga mga tawo nga nagapuyo sa Jerusalem? Indi! Nagasiling ako sa inyo nga kon indi kamo magbiya sa pagpakasala, mapatay man kamo tanan subong sang sa ila.” Dason si Jesus nagsugid sa ila sining palaanggiran, “May higera sa katamnan sang isa ka tawo. Ang tawo nagkadto sa pagpangita sing bunga sa sina nga higera, pero wala gid sia sing may nakita nga bunga. Gani nagsiling sia sa iya manugtatap, ‘Abi dumdoma, tatlo na ka tuig ang pagbalikbalik ko diri sa pagpangita sing bunga sa sini nga higera, pero wala gid ako sing nakita nga bunga. Tapsa na lang ini! Ngaa magpadayon ini sa pagpalamgod sang duta?’ Pero ang manugtatap nagsabat, ‘Amoy, pabay-i lang anay sa sini nga tuig. Kutkotan ko ang palibot sini kag abunohan. Kon ini nga kahoy magpamunga sa madason nga tuig, ti, maayo; kon indi gani, ti, ipatapas mo na lang ini.’ ”

Marso 23 | Marso 25