Kabuhi nga Wala sing Katapusan batok sa Pagasilutan sa Wala sing Katapusan

Liturhiya sang Pulong

(Lunes, Marso 11, 2019)

Ang Pagbasa gikan sa Libro sang:

Levitico 19:1-2, 11-18

Ginsugo sang Ginoo si Moises nga singganon ang katilingban sang Israel, “Magpakabalaan kamo, kay ako balaan; ako amo ang Ginoo nga inyo Dios. “Indi kamo magpangawat ukon magdinaya ukon magbutig. Indi kamo magsaad sa akon ngalan kon wala kamo sing tuyo sa pagtuman sini; magapakahuya ini sa akon ngalan. Ako amo ang Ginoo nga inyo Dios. “Indi pagpamintahai ang bisan sin-o ukon pangawatan mo sia. Indi paghawiri ang suweldo sang tawo nga imo ginsuholan bisan isa lamang ka gab-i. Indi pagpakamalauta ang bungol nga tawo ukon magbutang sing makapasandad sa alagyan sang bulag. Magtahod kamo sa akon; ako amo ang Ginoo nga inyo Dios. “Indi ka magpasulabi sa bisan kay sin-o sa imo paghukom sa mga asunto; indi ka magpakita sing pagpasulabi sa imol ukon magkahadlok sa manggaranon. Indi ka magsugid sing mga binutig nahanungod sa bisan sin-o, kag kon may yara nga ginahukman nga nagakahulogan sang iya kabuhi ukon kamatayon, magasugid ka sang imo panaksihon nga sarang makabulig sa iya. Ako amo ang Ginoo. “Indi ka maghupot sing dumot sa bisan kay sin-o, kundi husaya ang imo kasuayon sa iya, agod indi ikaw makapakasala tungod sa iya. Indi ka magtimalos sa bisan kay sin-o ukon magpadayon sa pagkaakig sa iya, kundi higugmaa ang imo isigkatawo pareho sang imo kaugalingon. Ako amo ang Ginoo.

Salmo sa Pagsabat:

Mga Salmo 19:8, 9, 10, 15

(S) O Ginoo, ang imo pulong amo ang Espiritu kag ang Kabuhi.

Ang kasugoan sang Ginoo himpit; nagahatag ini sing bag-o nga kabuhi; ang mga sugo sang Ginoo masaligan, kag nagahatag ini sing kaalam sa mga nakulangan. (S)
Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop sa hunahona. (S)
Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; Wala ini sing may ginapasulabi. (S)
Kabay pa nga mabaton mo ang akon mga pulong kag panghunahona, O Ginoo nga akon dalangpan kag Manunubos! (S)

Bersikulo antis ang Ebanghelyo:

2 Corinto 6:2

Amo ini ang nahamut-an nga tion; karon amo ang adlaw sang kaluwasan.

Ang Pagbasa sang Santos nga Ebanghelyo suno kay:

San Mateo 25:31-46

“Kon ang Anak sang Tawo magkari subong Hari, nga ginaupdan sang tanan nga mga anghel, magalingkod sia sa iya harianon nga trono, kag ang tanan nga mga tawo sa kalibutan pagatipunon sa iya atubangan. Dayon painon niya sila sa duha ka grupo, subong nga ang mga karnero ginapain sang manugbantay sa mga kanding. Ipahamtang niya ang mga karnero sa iya tuo, kag ang mga kanding sa iya wala. Dayon ang Hari magasiling sa mga tawo sa iya tuo, ‘Kari kamo nga ginpakamaayo sang akon Amay. Panublia ninyo ang Ginharian nga gin-aman sa inyo halin pa sa pagtuga sang kalibutan. Kay gingutom ako kag ginpakaon ninyo ako, gin-uhaw ako kag ginpainom ninyo ako, dumoluong ako kag ginpadayon ninyo ako sa inyo mga puloy-an, hubo ako kag ginpabayuan ninyo ako, nagmasakit ako kag gin-atipan ninyo ako, nabilanggo kag ginduaw ninyo ako.’ Ang mga matarong magasabat sa iya, ‘San-o bala Ginoo nga nakita ka namon nga nagutom kag ginpakaon ka namon, ukon nauhaw kag ginpainom ka namon? San-o ka bala namon nakita nga dumoluong kag ginpadayon ka sa amon nga mga balay, ukon hubo kag ginpabayuan ka namon? San-o ka bala namon nakita nga nagmasakit ukon nabilanggo kag ginduaw ka namon?’ Ang Hari magasabat, ‘Nagasiling ako sa inyo, kon inyo ini nahimo sa isa sang labing kubos sining akon mga utod, ginhimo ninyo ini sa akon!’ “Dayon magasiling sia sa mga tawo sa iya wala, ‘Palayo kamo sa akon, mga ginpakamalaut sang Dios! Didto kamo sa kalayo nga wala sing katapusan nga gin-aman sa Yawa kag sa iya mga anghel! Kay gingutom ako kag wala ninyo ako pagpakan-a, gin-uhaw ako kag wala ninyo ako pagpaimna, dumoluong ako kag wala ninyo ako pagpadayuna sa inyo mga balay, hubo ako kag wala ninyo ako pagpabayui, nagmasakit ako kag ginbilanggo pero wala ninyo ako pagduawa.’ Dayon magasabat sila sa iya, ‘Ginoo, san-o ka bala namon nakita nga ginagutom, ukon ginauhaw, ukon dumoluong, ukon hubo, ukon nagamasakit, ukon ginabilanggo kag wala kami magbulig sa imo?’ Ang Hari magasabat sa ila, ‘Matuod gid nagasiling ako sa inyo, kon wala ninyo paghimoa ini sa isa sining labing kubos, wala man ninyo mahimo ini sa akon.’ Ini sila pagasilutan sa wala sing katapusan, kag ang mga matarong magaangkon sang kabuhi nga wala sing katapusan.”

Marso 10 | Marso 12