Nagpuasa si Jesus sang 40 ka Adlaw kag Ginsulay Sia sang Yawa

Liturhiya sang Pulong

(Domingo, Marso 10, 2019)

1. Ang Pagbasa gikan sa Libro sang:

Deuteronomio 26:4-10

"Ang pari magakuha sang alat sa imo, kag ibutang ini sa atubangan sang altar sang Ginoo nga imo Dios. Dayon amo ini ang imo isiling sa atubangan sang Ginoo, 'Ang akon katigulangan ngaArameanhon wala sing permanente nga puloy-an sang pagdala niya sang iya panimalay sa pagpuyo sa Egipto. Diutay pa lang sila sang pagkadto nila didto, pero nagdamo sila kag nangingamhanan nga pungsod. Ang mga Egiptohanon nagpintas sa amon kag nagpilit sa amon sa pag-obra subong mga ulipon. Dayon nagpanawag kami sa pagpangayo sing bulig sa Ginoo nga Dios sang amon mgakatigulangan. Nagpamati sia sa amon, kag nakita niya ang amon pag-antos, kabudlayan, kag kalisod. Sa iya daku nga gahom kag kusog ginluwas niya kami gikan sa Egipto. Naghimo sia sing mgamilagro kag mga tanda, kag makakulogmat nga mga butang. Gindala niya kami diri kag ginhatag ining maayo kag mapatubason nga duta. Gani karon, ginadala ko sa Ginoo ang nahauna nga bahin sang patubas nga iya ginhatag sa akon.' “Dayon ibutang ang alat sa atubangan sang Ginoo kag magsimba didto.

Salmo sa Pagsabat:

Mga Salmo 91:1-2, 10-11, 12-13, 14-15

(S) O Ginoo, buligi ako sa akon kalisdanan.

Ang bisan sin-o nga nagadangop sa Labing Mataas, ang bisan sin-o nga nagapabilin sa idalom sang pagpangapin sang Labing Makagagahom, makasiling sa Ginoo, “Ikaw ang akon palalipdan kag mangangapin! Ikaw ang akon Dios, sa Imo nagasalig ako." (S)
Wala sing kalaglagan nga magaabot sa imo, wala sing kalalat-an nga magpalapit sa imo puloy-an. Ang Dios magapadala sang iya mga anghel sa pagbantay sa imo, sa pag-apin sa imo bisan diin ikaw makadto. (S)
Hakwaton ka nila sang ila mga kamot, agod indi masamad angimo mga tiil sa mga bato. Pagatapakon mo ang mga leon kag mga man-og, ang mapintas nga mga leon kag dalitan nga mga man-og. (S)
Ang Dios nagasiling, "Luwason ko ang mga nagahigugma sa akon, kag apinan ko ang mga nakakilala sa akon. Kon magpanawag sila sa akon, ako magasabat sa ila, kon yara sila sa kalisod, ako magaupod sa ila. Luwason kag padunggan ko sila." (S)

2. Ang Pagbasa gikan sa Sulat ni San Pablo nga Apostol, sa mga:

Taga- Roma 10:8-13

Amo ini ang ginasiling: “Ang pulong sang Dios malapit na sa inyo, sa inyo mga bibig kag sa inyo mga tagipusoon”—kon sayuron, ang pulong sang pagtuo nga amon ginawali. Kon imo ginapabutyag nga “si Jesus Ginoo,” kag nagatuo ka sa imo tagipusoon nga ginbanhaw sia sang Dios gikan sa mga minatay, maluwas ka. Kay nagatuo kita sa aton tagipusoon kag ginapakamatarong kita sa atubangan sang Dios. Ginapabutyag sang aton mga bibig, kag kita naluwas. Ang kasulatan nagasiling, “Ang nagatuo sa iya indi mapaslawan.” Ini para sa tanan, kay wala sing kinatuhay ang mga Judio sa mga Gentil. Ang Dios amo man ang Ginoo sang tanan, kag nagahatag sia sing bugana nga kaayuhan sa tanan nga nagapanawag sa iya. Ang kasulatan nagasiling, “Ang tagsatagsa nga nagapanawag sa ngalan sang Ginoo maluwas.”

Bersikulo antis ang Ebanghelyo:

Mateo 4:4

Ang tawo indi lamang sa tinapay mabuhi, kundi sa tagsa ka pulong nga ginahambal sang Dios.

Ang Pagbasa sang Santos nga Ebanghelyo suno kay:

San Lucas 4:1-13

Si Jesus nga napun-an sang Espiritu Santo nagbalik halin sa Jordan, kag gindala sia sang Espiritu sa desierto. Didto ginsulay sia sang Yawa sa sulod sang 40 ka adlaw. Wala sia magkaon sa sulod sina nga mga inadlaw, kag sa tapos sadto gingutom sia. Karon ang yawa nagsiling sa iya, “Kon ikaw ang Anak sang Dios, sugoa ining bato nga mangintinapay.” Nagsabat si Jesus, “Ang kasulatan nagasiling, ‘Indi lamang sa tinapay mabuhi ang tawo.’” Dayon gindala sia sang Yawa sa isa ka mataas nga lugar kag ginpakita sa iya sa isa ka pamisok ang tanan nga ginharian sang kalibutan. Nagsiling ang Yawa, “Ihatag ko sa imo ining tanan nga kagamhanan kag kamanggaran. Gintugyan ini tanan sa akon kag sarang ko ini mahatag sa bisan kay sin-o nga luyag ko hatagan. Ini tanan mangin-imo kon magsimba ka sa akon.” Nagsabat si Jesus, “Ang kasulatan nagasiling, ‘Magsimba ka sa Ginoo nga imo Dios kag sia lamang ang imo alagaron.’” Gindala pa gid sia sang Yawa sa Jerusalem, kag ginpatindog sia sa pinakamataas nga bahin sang templo kag nagsiling sa iya, “Kon Anak ka sang Dios, lukso ka paidalom. Kay ang kasulatan nagasiling, ‘Ang Dios magasugo sang iya mga anghel sa pagbantay sa imo. Bayawon ka nila sa ila mga kamot agod indi makasandad ang imo mga tiil sa bato.’” Nagsabat si Jesus sa iya, “Ang kasulatan nagasiling, ‘Indi mo pagsulayon ang Ginoo nga imo Dios.’” Sang matapos sang Yawa ang tanan nga paagi sang pagsulay, ginbayaan niya anay si Jesus tubtob nga may kahigayunan na man sia.

Marso 9 | Marso 11