"Ang Bisan Sin-o nga Nagahimo sing Milagro paagi sa Akon Ngalan"

Liturhiya sang Pulong

(Miyerkules, Pebrero 27, 2019)

Ang Pagbasa gikan sa Libro ni:

Sirac 4:11-19

Ang Kaalam nagasagod sang iya mga anak, kag nagatatap sa mga nagapangita sa iya. Ang nagahigugma sang Kaalam nagahigugma sang kabuhi, ang nagaalagad sa iya sing aga pa mapuno sing kalipay. Ang tawo nga nagaangkon sa iya magaagom sang kadungganan, bisan diin sia makadto pagabendisyunan sia sang Ginoo. Ang nagaalagad sa iya nagaalagad sa Balaan, kag ang Ginoo nagahigugma sa mga nagahigugma sang Kaalam. Ang nagatuman sa iya nagapamat-od sing husto, kag ang nagapati manginmalig-on. Kon itugyan niya ang iya kaugalingon sa Kaalam. Magaangkon sia sa iya kag ipapanubli niya sia sa iya mga kaliwat. Bisan sa primero ginatuytoyan sia sang Kaalam sa likuliko nga dalan, nga nagahatag ini sa iya sing kahadlok kag kaluya. Kag ginapaantos sia paagi sa disiplina tubtob nga masaligan sia sang Kaalam, kag ginatilawan sia paagi sa mga kabudlayan. Sa katapusan pabalikon niya sia sa dalan nga matadlong kag ipahayag sa iya ang tinago sang kaalam. Pero kon magpalayo sia, ang Kaalam magasikway sa iya, kag pabay-an niya sia kon ano ang iya maabutan.

Salmo sa Pagsabat:

Mga Salmo 119:165, 168, 171, 172, 174, 175

(S) Ang mga nagahigugma sang imo kasugoan may bug-os nga kalig-unan.

Ang mga nagahigugma sang imo kasugoan may bug-os nga kalig-unan, kag wala sing may makapukan sa ila. (S)

Ginatuman ko ang imo mga sugo kag mga pagsulondan, makita mo ang tanan ko nga ginahimo. (S)

Dayawon ko ikaw sa gihapon, tungod kay ginatudloan mo ako sang imo mga kasugoan. (S)

Magakanta ako nahanungod sang imo kasugoan, tungod kay ang imo mga sugo matarong. (S)

Daw ano ang paghandom ko sang imo kaluwasan, O Ginoo! May kalipay ako sa imo kasugoan. (S)

Hatagi ako sing kabuhi, agod makadayaw ako sa imo, kabay nga ang imo mga pagtudlo magbulig sa akon! (S)

Aleluya:

Juan 14:6

Ako amo ang dalan, ang kamatuoran kag ang kabuhi, siling sang Ginoo; wala sing may makakadto sa Amay kon indi paagi sa akon. 

Ang Pagbasa sang Santos nga Ebanghelyo suno kay:

San Marcos 9:38-40

Si Juan nagsiling sa iya, “Manunodlo, nakakita kami sang isa ka tawo nga nagatabog sang mga yawa sa imo ngalan, kag gintapna namon sia kay indi sia kaupod naton.” Si Jesus nagsiling, “Pabay-i lang ninyo sia kay wala sing may nagahimo sing milagro paagi sa akon ngalan kag makahambal dayon sing malain batok sa akon. Kay ang bisan sin-o nga indi batok sa aton kaapin naton.

Pebrero 26 | Pebrero 28