"Ihatag - kag Magaangkon ka sang Manggad didto sa Langit"

Liturhiya sang Pulong

(Lunes, Marso 4, 2019)

Ang Pagbasa gikan sa Libro ni:

Sirac 17:20-24

Ang ila malain nga ginahimo indi matago sa Ginoo; ginatan-aw niya ang ila mga sala. Ang maayo nga binuhatan sang isa ka tawo ginapakamahal niya subong sang singsing nga inugpat-in, kag ang iya pagkaalwan subong sang tawotawo sang iya mata. Sa ulihi magabangon sia sa pagbalos sa ila, kag magatupa sa ila ang ila silot. Pero ginabuksan niya ang kahigayunan sa mga mahinulsolon sa pagbalik sa iya, kag nagahatag sia sing pagpabakod sa mga nadulaan sing paglaom.

Salmo sa Pagsabat:

Mga Salmo 32:1-2, 5, 6, 7

(S) Tanan kamo nga mga matarong, magkalipay kag maghinugyaw sa Ginoo.

Bulahan ang tawo nga ang iya mga sala ginpatawad, ang iya mga paglapas ginpanas. Bulahan ang tawo nga wala ginasumbong sang Ginoo nga nagahimo sang malaut nga binuhatan, nga hilway sa tanan nga paglimbong. (S)
Dayon ginkilala ko ang akon mga sala sa imo, wala ko gintago ang akon kasaypanan. Nagtapat ako sa pagtuad sang akon mga sala sa imo, kag ginpatawad mo ang akon paglapas sa imo. (S)
Gani ang imo matutom nga mga tawo dapat magpangamuyo sa imo sa tion sang kinawad-on; kon ang daku nga baha mag-abot nga nagasagana, indi ini makalambot sa ila. (S)
Ikaw ang akon palanaguan; imo ako pagaluwason sa kalalat-an. Nagakanta ako sing mabaskog sa imo kaluwasan, kay imo ako ginaapinan. (S)

Aleluya:

2 Corinto 8:9

Ang aton Ginoong Jesukristo, bisan manggaranon sia, nagpakaimol agod nga paagi sa iya kaimulon manginmanggaranon kamo.

Ang Pagbasa sang Santos nga Ebanghelyo suno kay:

San Marcos 10:17-27

Sang malakat na kuntani si Jesus, may isa ka tawo nga nagdalagan pakadto sa iya, nagluhod kag nagpamangkot, “Maayo nga Manunodlo, ano bala ang himuon ko agod akon maangkon ang kabuhi nga dayon?” Si Jesus nagpamangkot sa iya, “Ngaa ginatawag mo ako nga maayo? Wala gid sing bisan isa nga maayo kundi ang Dios lamang. Nahibaluan mo naman ang mga kasugoan: ‘Indi ka magpatay, indi ka magpanginbabayi ukon magpanginlalaki, indi ka magpangawat, indi ka magbutig, indi ka magdaya, tahura ang imo amay kag iloy.’” Ang tawo nagsiling sa iya, “Manunodlo, sugod sang lamharon pa ako natuman ko na ining mga kasugoan.” Gintulok sia ni Jesus sing mahigugmaon kag ginsingganan, “Isa pa ka butang ang kinahanglan para sa imo. Lakat ka kag ibaligya ang tanan mo nga pagkabutang, kag ihatag mo ang kuwarta sa mga imol, kag magaangkon ka sang manggad didto sa langit, kag dali sunod ka sa akon.” Sang pagkabati sini sang tawo, nahulog ang iya guya, kag naglakat sia nga masinulob-on, kay madamo ang iya mga pagkabutang. Si Jesus nagpanghulonghulong sa palibot niya kag nagsiling sa iya mga gintuton-an, “Daw ano kabudlay para sa mga manggaranon ang pagsulod sa Ginharian sang Dios!” Ang mga gintuton-an naurongan sa sini nga mga pulong, pero si Jesus nagpadayon sa pagsiling, “Mga anak ko, daw ano kabudlay ang pagsulod sa Ginharian sang Dios! Labi pa kabudlay para sa isa ka manggaranon ang pagsulod sa Ginharian sang Dios, sang sa paglapos sang isa ka kamelyo sa buho sang dagom.” Tungod sini, ang mga gintuton-an natingala gid kag nagpinamangkutanay, “Sin-o na lang bala ang maluwas?” Gintulok sila ni Jesus sing tadlong, kag ginsabat, “Para sa tawo indi ini mahimo, pero para sa Dios mahimo ini, kay ang tanan nga butang sarang mahimo sang Dios.”

Marso 3 | Marso 5